Bìoball air-loidhne

Efɛzɩ‑dunyʋä 1 - GOD - u2

Bhäälɩ

¹ ‑Amʋ Pɔlʋ nä, Laagɔ 'mʋʋ‑ ŋoo‑ lä nynä ‑mä n 'plö Zozi Klisöö' lobho lobhonyɔ. Nä, anyɩmɔɔ‑ plöö‑ lä kplɔɔkplɔɔnyʋa 'nɩ ‑ɔ ‑kʋ lä [‑mɔɔ Efɛzɩduu'] 'nɩ ‑ɔ ‑kä lä Zozi Klisöö' pɔlötɛtɛ nä, ‑amʋʋ‑ jɩjlä'anyɩ lä 'bɔɔgʋnʋ.

² ‑A 'Bä Laagɔ, ɩyä Zozi Klisö ‑anyɩa Kwlienyɔɔ 'sɔ waa' 'nää ‑yä waa' 'kʋ wɔtɔlɩɩ ŋënö'anyɩ 'kʋ.

Laagɔ ‑ghlää Klisö 'kʋ 'nɩ ʋ nyɩ‑anyɩ 'nää

³ Laagɔ ‑ʋ plöö‑ lä ‑anyɩa Kwlienyɔɔ Zozi Klisö ɔ 'Bä nä, a ‑yä fänʋ 'ŋnu. ‑Ɔnöza bhää? ‑A ‑yä Klisö 'sɔɔ 'jɛnyɩlɩɩ 'mnö nä, Laagɔ ‑gbä 'nɩ ʋʋ' 'wugɔɔ 'nyupälɩɩ 'fɩɩn ‑ɩ bha lä Laagɔduu' nä, ‑a yɩɩ 'ni.

⁴ 'Fɩa ‑yä 'kɔɔnʋ 'kä 'wlʋ nä, Laagɔ yä‑anyɩ wɛzä Zozi Klisö 'mnö ‑sä nynä ‑a 'gä Laagɔ dëlü kplɔɔkplɔɔnyʋä 'plö ‑yä ‑aa kä ‑kä gbëgëdë yëku kään. Nä, sä Laagɔ ‑waa‑anyɩ lä nä,

⁵ ʋ ŋʋʋ‑ wɛzä too too nynä ‑mä, ʋ yi Zozi Klisö 'kʋ ghlää 'nɩ ‑anyɩ, ‑a yi ʋʋ' 'yuë 'plö. Kä Laagɔ ‑waa lä nä, ɩɩ' ‑zä ʋʋ' plɛkʋ mɛɛnɔɔ 'mnö, ʋ ‑ghlää lä ‑mɔɔ 'nɩ ʋ nʋ lä ‑nɩnɩ 'fɩɩn.

⁶ Nä, 'nää 'fɩɩn Laagɔ ‑nʋ 'nɩ ‑aa ‑wʋ lä 'kʋ mʋsä ‑kä nä, a kään 'ŋnö ‑yä ‑a fänʋ 'ŋnu. Ʋʋ' plɛkʋmɛnɔɔ 'mnö, ʋ ‑ghlää lä ʋʋ' ‑Wawayuo 'kʋ 'nɩ ʋ ‑nʋ lä sɔɔ.

⁷ Klisöö' 'kwiee doluu 'mnö ‑mɔɔ Laagɔ ‑sänö‑anyɩ lä gbʋ 'wlu. 'Nɩ sä Laagɔ nää‑ lä kpänyɩ plɛkʋ nä, ʋ cienö‑anyɩ ‑anyɩa nyenyii.

⁸ Ʋʋ' 'nää kʋ kwlienö‑anyɩma 'kʋ 'zaazɩ 'nɩ ʋ nyɩ‑anyɩ dɩgälɩɩ 'fɩɩn ɩyä 'fike.

⁹ Sää‑ ‑zizio bhlä 'kʋ nä, Laagɔ yä‑anyɩ sɔɔ pana. Ɩmɩɩ‑ plöö‑ lä nynä ‑mä, 'nää ʋ ŋʋʋ‑ bhlä nynä ‑mä ʋ yi Zozi Klisö 'kʋ ghlää 'nɩ ʋ yi nʋ nä, ʋ ya‑anyɩma pana.

¹⁰ Kä Laagɔ ŋʋʋ‑ bhlä 'tänyɩnɛ nynä ‑lɔɔ' 'tanyɩɛ kä ‑ŋëë nä, ʋ yii bhä nʋ. Nä, ‑lɩɩ 'fɩɩn‑ ‑kʋ lä ŋɔkʋ nä, ɩyä ‑lɩɩ 'fɩɩn‑ ‑kʋ lä ‑mää ‑dʋdʋkʋ nä, Laagɔ kɩ yɩ 'fɩa däbhloo' 'wlu 'wlää nä, ʋ yii 'cifi ‑bhlo 'kämädä 'nyɛ. ‑Lɔɔ' 'cifio nä, ɔmɔɔ plöö‑ lä Klisö.

¹¹ Laagɔ ‑ʋ nʋ lä ‑lɩɩ 'fɩɩn ʋʋ' pɔlösa nä, Klisö 'mnö ʋ ‑ghlää 'nɩ saa 'fɩɩn ʋ ŋʋʋ‑ bhlä nynä ‑mä ʋ yi ‑anyɩa ‑za nʋ nä, 'nɩ ʋ yi lä sɔɔ nʋ.

¹² Nä, ‑anyɩmɔɔ‑ ‑yi lä tɛɛ Klisö 'mnö 'nɩ ‑ɔ 'tɛnöɔ lä dë nä, a ‑ya jäka Laagɔɔ' 'klʋagba.

¹³ Anyɩ ‑mä 'sɩɩ, Klisönɔ 'mnö ‑mɔɔ a 'nuu‑ lä ‑nʋawlɛɛ. ‑Nʋawlɛɛnɛ 'mɛɛ‑ plöö‑ lä 'Nägädöö ‑ɩ sä lä ‑lɔɔ nëë' nä. 'Nɩ ‑a ‑yi 'sɩɩ 'nɩ a ‑kä lä Klisöö' pɔlötɛtɛ. Ɩ ‑kä 'ŋnö 'nɩ Laagɔ ‑saa'anyɩ 'ylö ‑yä a 'kä yibhënöɔ. 'Ylönö 'mɩɩ‑ plöö‑ lä Kplɔɔkplɔɔ‑wugɔɔ Laagɔ ŋʋʋ‑ bhlä nynä ‑mä ʋ yi ‑lä nä.

¹⁴ 'Nää Laagɔ 'ka‑anyɩ lä 'nyɛ nä, Kplɔɔkplɔɔ‑wugɔɔ 'mʋʋ‑ plöö‑ lä aa' tɛɛtɛɛlʋʋ. ‑Mä ‑a gä yɩ 'fɩa 'kpɔ döɔ wɩa nä, ‑lɔɔ ‑tɛɛ ‑lɔɔ' 'nää 'fɩɩn Laagɔ 'ka‑anyɩma lä 'nyɛ. Nä, a ‑ya fään Laagɔ 'ŋnu ‑yä ‑a jäkʋʋ!

Pɔlʋ bhibhie 'cɔcɩɛɛ' 'wlu
( Kolɔ 1.3‑6 , 9‑13 ; Fili 2.9‑11 )

¹⁵ ‑Amʋ ‑mä 'sɩɩ n nuu‑ lä nynä ‑mä a ‑kä Kwlienyɔ Zozii' pɔlötɛtɛ 'nɩ a ‑kä 'sɩɩ kplɔɔkplɔɔnyʋa' ‑wawʋ nä,

¹⁶ ylɩɩ 'fɩɩn 'kʋ n kä bhibhie nä, kä n bhään Laagɔ 'nɩ n bhibhie anyɩa' ‑za

¹⁷ ‑yä ‑anyɩa Kwlienyɔɔ Zozi Klisö ɔ 'Bä, ɔmɔ mɔɔ‑ plöö‑ lä 'klʋagba a 'Bä nä, ɔ 'kanyɩ anyɩa' dɩgälɩɩ ‑yä anyɩa' bhobhowluu 'klʋ kään ‑yä a 'kɔ yibhë wɩa.

¹⁸ Anyɩa' bhobhowluu känöɔ 'klʋ ‑yä a 'kä Laagɔɔ' zëlüü 'yi 'ni wɩa. Ɩ yi gbä 'nɩ a yi sɔɔ yibhë nynä ‑mä, kä Laagɔ laa'anyɩ ‑yä ʋ 'kanyɩ puë. Laagɔɔ' 'nää 'käda ʋ ŋʋʋ‑ lä nynä ‑mä ʋ yi ʋʋ' kplɔɔkplɔɔnyʋa 'nyɛ nä, ‑lɔɔ 'nää a yia yibhë.

¹⁹ 'Nɩ Laagɔɔ' 'päwö 'käda lebhee a nʋ ‑lä ‑anyɩa ‑za nä, a yia 'sɩɩ yibhë. Laagɔɔ' 'päwa nä, ka ‑kä kpänyɩ 'tɛtɩ.

²⁰ ‑Lɔɔ' 'päwaa 'mä ʋ bhlüü‑ lä 'kʋ 'nɩ Klisö kuu‑ 'fɩa 'nɩ ʋ gälɩɔ lä 'kuëë. 'Nɩ ʋ yi lä gbä 'nɩ Klisö yi lä ‑mɔɔ Laagɔduu' ʋʋ' lüüklä 'kʋ sä kʋ.

²¹ ‑Mɔɔ Klisö ‑kʋ lä 'nɩ ɔ ‑zii lä ‑lɩɩ 'fɩɩn 'wlu. 'Kämänyʋa 'fɩɩn, ‑tëbhi‑käänyʋa 'fɩɩn, 'päwö‑käänyʋa 'fɩɩn, 'tɛtɩɩ 'fɩɩn käänyʋa, ɩyä 'ŋnöö 'cenänää‑ yi lä 'ylʋnʋzɔɔ' 'ŋnö 'plö nä, 'nɩ ‑ɩ yi lä zee zëkpëa 'mnö 'ŋnö 'plö nä, kä Klisö ‑zinɩ 'wlu ɩɩ' ‑lefɩɩn.

²² Kä Laagɔ ‑gbä 'nɩ ‑nɩnɩ 'fɩɩn 'plöö‑ Klisö ‑kokokpü ‑zɔɔ 'nɩ ɔɔ' 'kämänɩ 'nɩ ‑zinɩ 'wlu. 'Nɩ Klisö nä, ɔmɔɔ‑ plöö‑ lä 'sɩɩ 'cɔcɩɛɛ 'wlu.

²³ 'Nɩ 'cɔcɩɛ plöö‑ lä Klisöö' 'yɛkɛɛ. 'Cɔcɩnɛ 'mnö nä, kä Klisöö' 'bhëa 'titi ‑kʋ lä 'sɩɩ ‑mɔɔ, 'nɩ ɔ ‑kʋ lä bʋkʋ 'ylʋzɔɔ' dää 'fɩɩn.

« Roimhe

Air adhart »

Wycliffe Bible Translators, Inc.

Lean sinn:

Ceanglaichean taic

Sanasan