Bìoball air-loidhne

Eblëënyʋä 9 - GOD - u2

‑Gɔgɔbhlää' bʋbɔlɩɩ ‑yä bʋbɔlɩɩ' ‑lɛɛ leli

¹ ‑Gɔgɔbhlää' mɛnʋʋ nä, ʋ ‑kä bhä ‑jlämä 'nɩ ʋ ‑kä bhä sä wa bʋbɔ bhlä Laagɔ nä. 'Nɩ ‑mää ‑dʋdʋkʋ wa bʋbɔ bhlä 'sɩɩ.

² Bʋbɔdaa Moyizö slää‑ bhlä nä, ‑lɔɔ ‑dënöɔ bhä 'ci 'sɔ 'kʋ. Tɛɛtɛɛda 'mä wa laa bhlä kplɔɔdä. ‑Mɔɔ bʋbɔdaa' 'näpöö' beziedaa ‑kʋ bhlä. 'Nɩ ‑lɔɔ bʋbɔlɩɩ' 'flɔɔ 'tëbhlee ‑kʋ bhlä.

³ ‑Mɔɔ' 'sɔnada nä, lokwi sɩä bhä ‑lɔɔ 'yikʋ. ‑Mɔɔ wa laa bhlä Kplɔɔdaa' Kplɔɔkplɔɔda.

⁴ Wa bhlüü‑ bhä ‑sika 'kʋ 'nɩ wa ‑nʋ ‑kätawlɛɛ' ŋuudä. 'Nɩ Laagɔɔ' mɛnʋ ‑gboluu' 'lokwlee ‑kʋ bhä ‑mɔɔ. Wa ‑didie bhä ‑sika ɛɛ' ‑lefɩɩn. Ɛmɛ 'mnö nä, wa bhlüü‑ ‑sikaa 'kʋ 'nɩ wa ‑tɛɛ 'bhɔklɔ 'nɩ wa ŋʋʋ‑ ‑mɔɔ. Ʋmʋ 'mnö 'flɔɔ 'cë ‑bhlo ‑kʋ bhä ‑mɔɔ, ʋmʋ wa laa bhä 'manö. Bʋkʋ 'nɩ 'cibhisänyɔ 'kädɔ Alɔɔ' ‑kpäma ‑a wlʋʋ‑ bhlä nä, a ‑kʋ bhä ‑mɔɔ. 'Nɩ ‑Jlämaa' cɛkwɩ kplii ‑kʋ bhä 'sɩɩ ‑mɔɔ.

⁵ 'Nɩ 'klʋagbä ‑Laagɔzizii wa laa lä Selubɛɛn nä, ɩɩ' suyuë 'nynigo‑ bhä 'lokwlee 'wlu. Ɩɩ' ‑papüü' ‑zuzuu gbii‑ bhä 'lokwlee' ‑tapäka 'kʋ. ‑Lɔɔ wa ŋʋ bhlä doluu ‑yä nyɩkpaa' nyenyii 'kä cienöɔ. ‑Lɔɔ' 'klüü 'mɩ nn' ‑läyɩɔ bɩɩ' bhlü 'nɩ n 'kä yɩ ci.

⁶ Nä Laagɔɔ bʋbɔdaa, wa slää‑ bhä ‑lɔɔ ‑bhitiklü 'sɔ. 'Nɩ 'Cibhisänyʋa plä bhlä ylɩɩ 'fɩɩn 'kʋ nëkʋʋ' 'klëa 'mnö 'nɩ wa bʋbɔ bhlä.

⁷ ‑Mä ‑mɔɔ' 'sɔna‑klëa 'mnö nä, 'Cibhisänyɔ 'kädɔɔ, ɔmɔ ‑bhlo 'coo plä bhlä ‑mɔɔ. ‑Mä ɔ plä bhä ‑mɔɔ 'ci ‑bhlo 'ylʋbä. Ɔ kä ‑mɔɔ plä nä, ɔ bhɛɛ‑ bhä 'cibhisä‑mnaa' doluu 'nɩ ɔ sä bhä 'cibhie Laagɔ dëlü. 'Cibhie ɔ sä bhlä nä, ɔ sɛ bhä ɔ yëkuu' nyenyii' ‑za 'nɩ ɔ sɛ bhä 'sɩɩ nyɩkpaa 'fɩɩn nyenyii' ‑za.

⁸ Kä Kplɔɔkplɔɔ‑wugɔɔ pana bhlä 'klünö 'mnö nynä ‑mä, kplɔɔdaa' kplɔɔkplɔɔdaa' ‑blɔɔ' ‑lä bhä tee 'klʋ ‑känöɔ. Tɛɛtɛɛ ‑bhutuklëa ‑sɩä bhä ‑lɔɔ 'yikʋ.

⁹ Kɩ plöö‑ ylä panalɩ ‑zɩkää' ‑za. Kɩ sä lä ‑zɔɔ nynä ‑maa, ‑lɩɩ nyɩkpa nyɛ bhlä Laagɔ 'nɩ 'cibhie wa sä bhlä nä, ɩɩ' ‑lä bhɔɔ mii 'nɩ nyɩkpaa' ‑lʋa nʋɩ lä nä, ɩ 'kä waa' pleyii kpɔlʋä wɩa.

¹⁰ Ɩ ‑glö bhä lülülɩɩ ‑yä 'mnälɩɩ yëkuu' wälɩ. 'Nɩ ɩ plöö bhä 'sɩɩ nyɩkpaa' ‑gesii' yëkuu' ‑salɩ. ‑Mä kɩ ‑nʋɔ lä sɔɔ ‑aaa ‑yä 'tänyɩ 'kä bhɛ ŋëë ‑yä Laagɔ 'kä bhɛ ‑bɔwlägä 'ylɩbha.

Klisö ‑sä ɔ yëkuu' zëkpë 'cibhi 'kʋ

¹¹ ‑Mä Klisö nä kɔ ‑yi lä 'cibhisänyɔ 'kädɔ 'bhisäkʋ, ɩyä 'nää‑ ‑kʋ lä ‑mɔɔ 'yikʋ nä, ɔ 'kä gbä ‑yä ‑a 'ga 'ni. ‑Mä bʋbɔda ɔ ‑plä lä nä, ‑mɔɔ‑ 'ghlü 'nɩ ‑mɔɔ‑ ‑kplɔɔ 'sɩɩ kpänyɩ. 'Nɩ ‑lɔɔ' bʋbɔda nä, nyɩkpɔɔ‑ ‑wʋ ‑lɔɔ slää‑. Kɩ sä lä ‑zɔɔ nynä ‑mä ‑ɛɛ ‑wʋ ‑mää 'ylʋzɔɔ.

¹² Klisö nä, kplɔɔdaa' kplɔɔkplɔɔda, Klisö ‑yä ‑mɔɔ plä. Ɔ ‑plä ‑mɔɔ 'ci bhlo 'coo. ‑Mä ɔ plä lä ‑mɔɔ nä, ɔɔ' bhɔɔ 'bhɔɔwö ‑yä ‑bhlüüyuëë' dolu 'sɔ bhɛɛ‑. Ɔmɔ 'titi ɔ yëkuu' dolu, ʋmʋ ɔ bhɛɛ‑ 'nɩ ɔ ‑fä Laagɔ dëlü, 'nɩ ɔ yi‑anyɩ lä 'mʋ 'kplɩ 'kɔɔkɔɔ ‑za.

¹³ ‑Jlämaa 'mnö nä, kɩ plöö‑ bhlä nynä ‑mä 'bhɔɔwö ‑yä ‑bhlüüwö 'sɔɔ dolu, ʋmʋ wa fämʋ 'nɩ nyɩkpaa‑ ‑wʋ lä ‑kplɔ nä, wa mënʋwa nyʋ 'kʋ. 'Nɩ ‑bhliigö wa sii, 'nɩ ɩɩ' 'tɩtɔɔ wa mënʋwa nyʋ 'sɩɩ 'kʋ ‑yä waa' 'yɛkɛɛ 'kä kplɔɔ.

¹⁴ ‑Maa, Klisöö' doluu nä, sʋ nʋ bhää? Klisö nä, kɔ ‑ghlää lä Kplɔɔkplɔɔ‑wugɔɔ 'mnö 'nɩ ɔ ‑sä lä ɔ yëku Laagɔ dëlü. Kɔ ‑kʋ ylä nynä 'cibhisä‑mnɛɛ' lɛɛ ‑wʋ lä 'foclo yëku ‑kä nä. Nä ɔɔ' doluu yi ‑anyɩa pleyii gbenyenyii 'mʋ 'kplɩ ‑yä ‑a 'gä ‑Yäyä Laagɔɔ ‑gä nʋ.

Doluu 'mʋ plöö‑ lä mɛnʋʋ panalɩɩ

¹⁵ ‑Nɩnɩ 'mɩɩ‑ ‑kä 'ŋnö 'nɩ mɛnʋ ‑loluu' ‑za, Klisö ‑kʋ lä ‑a ‑yä Laagɔ 'sɔ pään. Kɔ kuu‑ lä ‑yä 'focloo nyɩkpa ‑bhlü bhlä tɛɛtɛɛ‑ mɛnʋʋ' 'tänyɩɩ nä, ɔ 'kʋ ‑lɔɔ ‑sä. Ɩ yi 'ŋnö kään 'nɩ, ‑lʋa Laagɔ laa lä nä, 'nää ʋ ŋʋʋ‑ lä ‑lɔɔ 'kɔɔkɔ waa' ‑za nä, wa yia 'ni.

¹⁶ Wa kä cii nynä ‑mä nyɩkpɔ ‑të wälɩklë nä, kɩ sä ‑lä ‑zɔɔ nynä ‑mä ‑lɔɔ' nyɩkpɔɔ yä 'ku.

¹⁷ Nyɩkpɔ kä wälɩklë sä ŋʋʋ‑ nä, ɔ kuu‑ yɩ 'fɩa 'nɩ wa ci lä nynä ‑mä ‑lɔɔ' nyɩkpɔɔ ‑të wälɩklë. Ɔ kä lätee ‑yä nä, wälɩklëa ɔ ŋʋʋ‑ lä sä nä, aa ‑wʋ ‑bhlɛ gba ‑kä.

¹⁸ Ɩmɩɩ‑ ‑kä 'ŋnö 'nɩ tɛɛtɛɛ' mɛnʋ‑gboluu, 'fɩa ‑yä wa 'kʋ lä 'slü nä, 'nɩ dolu ‑jɛɛ lä sä.

¹⁹ Kä Moyizö ‑zɛnö Laagɔɔ' ‑Jläma nyɩkpaa 'fɩɩn 'klʋ 'fɩa. 'Nɩ ɔ yi ‑bhlüüyuëë' dolu 'kʋ 'bhlü, 'nɩ ɔ yi 'bhɔɔwöö' dolu 'kʋ 'bhlü, 'nɩ ɔ yi 'nyu 'kʋ 'bhlü, 'nɩ ɔ yi lokupɛlʋ ‑zɔlʋ 'kʋ 'bhlü, 'nɩ suvaa wa laa lä yisɔpʋ nää' ‑gbolugbë 'kʋ 'bhlü 'nɩ ɔ yi 'bɔɔgʋʋ doluu 'kʋ 'mëë. 'Nɩ ɔ yiu 'sɩɩ nyɩkpaa 'kʋ 'mëë.

²⁰ Ɔ lä mɛnʋʋ Laagɔ cii‑ lä nynä ‑mä a 'ŋʋ 'klʋkpää nä, a ni ʋʋ' doluu‑ ‑jɛɛ lä sä nä.

²¹ 'Nɩ Moyizö yi 'sɩɩ doluu bʋbɔdaa' ‑papaa 'wlu 'mëë 'nɩ ɔ yiu 'sɩɩ bʋbɔdaa' ‑lɩɩ 'fɩɩn 'kʋ 'mëë.

²² Nä, ‑Jläma lä dolu, ʋmʋ wa bhlü 'kʋ 'nɩ wa kplɩ lä yiosä ‑lɩɩ 'fɩɩn 'mʋ. Kɩ plöö‑ lä nynä ‑mä dolu 'nö sä ‑jɛɛ nä, nyenyii' ‑lä cienöɔ.

Klisöö' 'cibhie 'mɛɛ‑ kplɩ ylä nyenyii 'mʋ

²³ Nä ‑mää ‑dʋdʋkʋ ‑lɩɩ ‑ɩ plöö‑ lä ‑mɔɔ Laagɔduu' ‑lɩɩ' ‑zuzu nä, wa kɩ yɩ 'sää 'mʋ 'kplɩ nä, kɩ plöö‑ ylä nynä ‑mä ‑mɔɔ Laagɔduu' ‑lɩɩ 'titi ɩ ‑ŋwa 'kʋ nynä ‑mä wa ‑sä ɩɩ' ‑za 'cibhii' lɛɛ‑ zi lä 'kʋ nä.

²⁴ Bʋbɔda nyɩkpa slä lä nä, ‑lɔɔ ‑glö Laagɔduu' bʋbɔdaa' ‑zuzu, nä Klisöö' ‑wʋ ‑mɔɔ ‑plä, ‑mä Laagɔduu' ɔ ‑mʋ. Ɔ ‑mʋ ‑mɔɔ Laagɔ dëlü ‑anyɩa ‑za.

²⁵ 'Nɩ ɔɔ' ‑wʋ ‑mɔɔ ‑mʋ nynä ɔ 'kä ɔ yëku 'cibhi 'kʋ ‑sää 'ci bhutukpä ‑n ‑näsä 'Cibhisänyɔ 'kädɔɔ plä bhlä 'ylʋbä 'ylʋbä bʋbɔda, 'nɩ ɔ bhɛ bhlä mnaa' doluu' nä.

²⁶ Sɔɔ ɩ kä bhä ‑kʋ nä, 'bhää yɩ 'kɔɔn ciedä ‑aaa nä, 'kwlɩ yɔ bhɛ bhɩä 'ci bhutukpä. A ni 'yi naa, zëkpëa' bhɩä‑tänyɩɛ 'mnö ‑a ‑kʋ ylä nä, 'ɩɩ ‑zä Klisö ‑yi lä 'ci ‑bhlo ‑yä ɔɔ' 'cibhie 'mnö, ɔ 'kä nyenyii ‑lɔɔ ‑sä.

²⁷ Nyɩkpɔ nä, ɔ 'kuu 'ci ‑bhlo. Ɔ kä yɩ kuu‑ nä, ɔɔ' 'titee' pläylʋʋ 'mʋʋ‑ ‑too yɩ ‑mɔɔ.

²⁸ Ɩmɩɩ‑ ‑kä lä 'ŋnö 'nɩ Klisö ‑sä lä ɔ yëkuu' zëkpë 'ci ‑bhlo ‑yä ɔ 'kä bhutukpä nyenyi yëku ‑sä. 'Nɩ ɔ yi 'sɔnadä yii. ‑Mä ɔ kä yɩ ‑yi nä, ɩɩ' yɩɔ plöö‑ nynä ‑mä ɔ 'kä ‑lɔɔ nyenyi ‑sä. Kɔ yi lä ‑yä ‑wa ‑bɛnöɔ lä nä, ɔ 'kwa ‑lɔɔ nëë' ‑sä.

« Roimhe

Air adhart »

Wycliffe Bible Translators, Inc.

Lean sinn:

Ceanglaichean taic

Sanasan