Bìoball air-loidhne

Eblëënyʋä 8 - GOD - u2

Zozii 'mɔɔ plöö‑ lä 'Cibhisänyɔ 'kädɔɔ 'titi

¹ 'Klüü ‑lɩɩ ‑a ‑kä 'nɩ ‑a ga'anyɩ lä soo nä, ɩɩ' 'mnö 'klëa ‑a plöö‑ lä ‑lɛ 'kädä nä, amää‑ plöö‑ lä nynä ‑mä ‑a ‑kä 'cibhisänyɔ 'kädɔ. 'Leyidu‑Laagɔɔ ‑ʋ ‑kä lä 'tɛtɩɩ nä, ɔ ‑kʋ ‑mɔɔ Laagɔduu' ʋʋ' lüüklä 'kʋ sä.

² Ɔ ‑kʋ ‑mɔɔ kplɔɔkplɔɔda lebhe 'kʋ. ‑Mɔɔ plöö‑ lä bʋbɔda 'titi. Kwlienyɔ Laagɔ 'titii‑ slää‑ lä ‑mɔɔ. Nyɩkpɔɔ' wlɩɩ ‑wʋ ‑mɔɔ slää.

³ 'Cibhisänyɔ 'kädɔ nä, kɔ ‑kʋ lä ‑yä ɔ 'kä Laagɔ dëlü bʋbɔlɩɩ ‑lä, ɩyä ɔ 'kä 'sɩɩ 'cibhi ‑sä. Nä kɩ plöö‑ ylä nynä ‑mä Zozii nä, ɔ ‑kä 'nɩ ɔ yi bhɛ 'mʋ bʋbɔlʋʋ Laagɔ dëlü ‑lä.

⁴ Ɔ kä bhlä ‑mää 'ylʋzɔɔ ‑kʋ nä, ɔɔ' ‑lä bhɔɔ 'cibhisänyɔ 'plö, ‑ɔnöza bhä? ‑Jlämaa ŋʋʋ‑ bhä 'Cibhisänyʋä ‑yä wa 'kä ‑lɔɔ' lebhee nʋ.

⁵ ‑Mä 'cibhie ‑lɛɛ wa sä bhlä nä, kɛ pana bhlä ‑mɔɔ Laagɔduu' ‑lɛɛ. Kɛ ‑kʋ lä nynä ‑mä Laagɔduu' ‑lɛɛ' ‑zuzu. Sɔɔ 'sëploo 'mnö Moyizö nämnö‑ lä. 'Tänyɩ Moyizö 'kä lä bʋbɔdaa 'slä nä, kä Laagɔ panöɔ. Ʋ lä ‑n gä 'slä nä, sä n panö‑ö lä ‑mɔɔ 'kükëa 'wlu nä, sɔɔ ‑n ‑nä ‑n 'slä.

⁶ ‑Tëbhuu Zozii ‑kä ylä ‑pɛɛ nä, ʋ zi yɩ ‑tëbhii 'fɩɩn 'kʋ. Mɛnʋʋ‑ zi lä tɛɛtɛɛlʋʋ 'kʋ nä, ʋmʋ 'mnö ɔ ghlä 'nɩ ɔ ‑kʋ ylä 'ylʋzɔkʋnyʋä ‑yä Laagɔ 'sɔ pää'. Sä Laagɔ cii‑ lä nynä ‑mä ʋ yi nʋ nä, sɔɔ nää‑ ylä kpänyɩ nä, mɛnʋnʋ ‑ʋ ‑zi lä 'kʋ nä, ʋmʋ ʋ ŋʋʋ‑ yɩ ‑lɔɔ.

⁷ Mɛnʋʋ‑ ‑yi lä tɛɛ nä, ʋ 'nö bhlä 'foclo 'mnö ‑kä nä, 'sɔnalʋ ‑lä bhɔɔ ‑lɔɔ ŋʋɔ.

⁸ Kä Laagɔ fä lä Yizlayɛɛ 'lɔlʋnyʋa ‑yä Zudaa' 'lɔlʋnyʋä wälɩklë yëku. Kä Laagɔ cii‑ lä, ʋ laa, 'Ylʋʋ yi ‑lɔɔ kʋ 'nɩ ‑amʋ Kwlienyɔɔ Laagɔ, N ‑yä Yizlayɛɛ 'lɔlʋnyʋä ‑yä Zudaa' 'lɔlʋnyʋä 'sɔ pään nä, N yi ‑mɔɔ mɛnʋʋ' ‑lɛɛ lolu 'ŋʋ.

⁹ Ʋʋ' ‑lä kʋ nynä ‑mä 'Tänyɩ n ‑klä lä a tɩtɩä ‑klɔgbä 'Nɩ n ‑sʋwa lä Ejipitii' geylüü 'mnö nä, Ɩɩ' mɛnʋʋ n ‑yʋwa 'sɔ ‑mɛnö bhlä nä. ‑Lɔɔ' mɛnʋʋ nä wa 'nʋʋ ‑wʋ 'klʋkpää ŋʋʋ‑. Ɩ ‑kä 'ŋnö 'nɩ ‑amʋ ‑mä 'sɩɩ Nn' yɩɔ waa' wälɩ 'mänyɩ‑. ‑Amʋ Kwlienyɔɔ Laagɔ, ‑amʋʋ‑ ci lä 'sɔɔ.

¹⁰ Kwlienyɔ Laagɔ cii‑ bʋkʋ, Ɔ lä a ni ylɩɩnɩ kä yɩ plöö‑ nä, N ‑yä 'Yizlɛnyʋä 'sɔ pää' nä, N yi bʋkʋ ‑mɔɔ mɛnʋ 'ŋʋ. Kä n 'kä ylä 'naa ‑Jläma waa' bhobhowluu 'mnö jɩjlä, Ɩyä n 'ka 'sɩɩ waa' pɔlöö 'yi jɩjlä. Ɩyä n 'kä yɩ waa' Laagɔ 'plö, Ɩyä wa 'kä 'naa lʋä 'plö.

¹¹ ‑Lɔɔ' 'tänyɩɩ nä nyɩkpɔɔ' ‑läyɩɔ ɔ 'bhuyu yëku yi, 'Nɩ ɔɔ' ‑läyɩɔ ɔ bheli yëku yi nynä ‑mä Wa cɩɔ 'fɩa ‑yä ɔ kä'ä yibhë. ‑Ɔnöza bhää? Cie yɩ 'yua 'kʋ ‑aaa Ɩyä ŋëë yɩ nyɩkpa‑bhüü 'kʋ nä, Waa' ‑lefɩɩn yi'i yibhë.

¹² N yi waa' nyenyii cie. Nn' ‑läyɩɔ waa' gbenyenyii plɛ yëku fään.

¹³ Laagɔ ci lä nynä ‑mä ʋ wlʋa‑ mɛnʋʋ' ‑lɛɛ lolu nä, kɩ pana lä nynä ‑mä, mɛnʋʋ‑ ‑kʋ bhlä ‑lɔɔ tɛɛ nä, ʋ yä 'kʋ bhɩä. Kɩ sä ylä ‑zɔɔ nynä ‑mä, ʋ ‑kʋ bhlä ‑gɔgɔbhlää' nä, ʋ yä gwlɛ nä, ʋʋ' bhɩä‑tänyɩ yä ŋëë.

« Roimhe

Air adhart »

Wycliffe Bible Translators, Inc.

Lean sinn:

Ceanglaichean taic

Sanasan