Bìoball air-loidhne

Eblëënyʋä 7 - GOD - u2

Mɛkizedɛkö plöö‑ 'loyo ‑yä 'cibhisänyɔ

¹ Mɛkizedɛkö nä, ɔ ‑glö bhä Salɛmʋ‑duu' 'loyo. Ɔ ‑glö bhä 'sɩɩ 'Kʋzi Laagɔɔ' 'cibhisänyɔ. 'Tänyɩɩ Ablaamʋ ‑sɩä lä 'loyua tʋʋ' 'nɩ ɔ bha bhlä tʋ 'kʋ nä, kä Mɛkizedɛkö ‑mʋɔ ‑blɔkʋ 'nɩ ɔ yi Ablaamʋ 'nyu 'pä.

² ‑Mä, tʋʋ 'mnö ‑lɩɩ 'fɩɩn Ablaamʋ 'nii‑ bhlä ‑mɔɔ nä, kɔ ‑sä ɩɩ' ‑lefɩɩn 'tigiti 'nɩ ɔ nyɩɛ‑ Mɛkizedɛkö. Mɛkizedɛkö‑ŋnöö nä kɩ sä lä ‑zɔɔ nynä ‑mä, 'Yigëëgbɩɩ' 'Loyo. 'Nɩ ɔ yi 'nɩ ɔ plöö bhlä 'sɩɩ Salɛmʋ‑duu' 'loyo. Kɩ sä lä ‑zɔɔ nynä ‑mä ɔ ‑glö 'kʋ wɔtɔlɩɩ' 'loyo.

³ Nyɩkpɔ 'nöɔ ‑wʋ ‑gään. Ɔɔ' ‑wʋ 'bä ‑yä 'nɔ ‑kä. Ɔɔ' ‑wʋ 'sɩɩ tötɔ ‑kä. Ɔɔ' ‑wʋ gänö ylʋʋ ‑kä, 'nɩ ɔɔ' ‑wʋ 'kwie 'ylʋ ‑kä. Kä ɔɔ' kʋkʋsaa 'wlʋʋ‑ lä Laagɔ ‑Yowli. Ɔ ‑glö yɩ 'cibhisänyɔ 'kɔɔkɔɔ ‑za.

⁴ A ni sä Mɛkizedɛkö 'ghlü lä nä ‑a! 'Tänyɩɩ ‑a tötɔ 'kädɔɔ Ablaamʋ ‑sɩä lä tʋʋ nä, ‑lɩɩ 'fɩɩn ɔ nii‑ lä nä, kɔ ‑sä ɩɩ' 'tigiti 'nɩ ɔ nyɩɛ‑ Mɛkizedɛkö.

⁵ ‑Bhlɛ Levii' 'lɔlʋnyʋä wamää‑ sää lä Laagɔ dëlü 'cibhi nä, wamä ‑bhlo 'coo ‑Jlämaa ci lä nynä ‑mä wamää‑ ‑kä 'nɩ ‑wa 'gä 'Yizlɛnyʋä Laagɔɔ' 'tigitie 'ylää. Kɩ ŋʋɔ‑ lä nynä ‑mä wa bhelie 'yizlɛnyʋä, wamä wa lä wa 'ylänɩɛ, ‑bhlɛ wa plöö‑ 'sɩɩ Ablaamʋʋ' 'lɔlʋnyʋä wamä 'bhisäkʋ.

⁶ Ɩ ‑kʋ sɔɔ ‑bhlɛ Mɛkizedɛkö nä, ɔɔ' bhɔɔ Levii' 'lɔlʋnyɔ plöö‑ 'nɩ Ablaamʋ ‑sä lä 'tigitie 'nɩ ɔ nyɩɔ'nyɛ lä. 'Nɩ Ablaamʋ mɔ Laagɔ yä bhlä cii‑ nynä ‑mä ʋ yio 'nää 'nyɛ nä, kä Mɛkizedɛkö pɔɔ‑ yɩ 'nyu.

⁷ 'Nɩ ‑a ‑yi sɔɔ wɩa nynä ‑mä, ‑lɛ 'kädɔ nä, ɔmɔɔ‑ pä lä ‑lɛ 'tɩkɩɩlɛɛ 'nyu.

⁸ Bʋkʋ nä, ‑wa bhlü lä 'tigitie 'kʋ nä, wa 'kumʋ 'sɩɩ nyɩkpa 'fɩɩn 'bhisäkʋ. ‑Maa, Mɛkizedɛkönɔ Ablaamʋ nyɛɛ‑ lä 'tigitie nä, kɩ cio‑ lä nynä ‑mä ɔ ‑yä ‑läzä.

⁹ ‑A yi ci nynä ‑mä, 'tänyɩɩ Ablaamʋ ‑sä lä 'tigitie nä, kä Levi ‑sämʋɛ bhlä 'sɩɩ. 'Nɩ Leviinɔ nä, ɔɔ' 'lɔlʋnyʋä wamää‑ bhlüü lä 'tigitie 'kʋ.

¹⁰ Kɩ ‑sä lä ‑zɔɔ nynä ‑mä, Levii nä, ɔ ‑glö Ablaamʋʋ' 'lɔlʋʋ 'mnö nyɩkpɔ. 'Tänyɩ Ablaamʋ ‑yä Mɛkizedɛkö 'sɔ sloo‑ lä nä, Levi ‑kʋ bhä ɔ tötɔ Ablaamʋʋ' 'yɛkɛɛ 'mnö.

¹¹ Levii 'lɔlʋnyʋa 'cibhisälɩɩ nä, ɩmɩ ‑Jlämaa 'tënö. Nä kwa plöö‑ lä 'Cibhisänyʋä Alɔɔ 'bhisäkʋ ‑mä, waa' 'cibhisälɩɩ bhɔɔ ‑kplɔɔ wɩa. Ɔnöza bhää, ɩ kä bhä ‑kplɔɔ wɩa nä, Laagɔɔ' ‑lä bhɛ bʋkʋ Mɛkizedɛkö 'bhisäkʋ 'Cibhisänyɔ 'kädɔɔ' 'yigädalɔɔ wlʋa.

¹² Kɩ ‑kʋ lä nynä ‑mä, 'cibhisälɩɩ kä 'cɩcɩnöɔ nä, ‑Jläma ‑kä 'sɩɩ 'nɩ a yi 'cɩcɩnöɔ.

¹³ Nä, 'klünö ‑ɩ ‑jɩjlɔ lä nä, nyɩkpɔɔ' 'yigädalɔɔ ɩ sä lä. ‑Lɔɔ' nyɩkpɔɔ nä, ɔɔ' 'lɔlʋnyɔɔ' ‑läzä Laagɔ dëlü 'cibhi ‑sä.

¹⁴ Kɩ ‑yio lä 'sää wɩa nynä ‑mä, ‑anyɩa Kwlienyɔɔ nä, ɔ ‑glö Zudaa' 'lɔlʋnyɔ. ‑Bhlɛ Moyizöö' ‑wʋ cii‑ nynä ‑mä Zudaa' 'lɔlʋʋ 'mnö nyɩkpɔ yi bhä 'cibhisänyɔ 'plö.

Mɛkizedɛkö 'bhisäkʋ 'cibhisänyɔ

¹⁵ A ni 'klëë laa‑ yi ylä gbä 'nɩ a yii lä 'mʋ 'nu 'nägäsä nä. Kɩ ‑kʋ ylä nynä 'cibhisänyɔ 'yigädalɔɔ yä yi. Ɔ ‑kʋ nynä Mɛkizedɛkö.

¹⁶ Nyɩkpa ‑jlämaa 'mää‑ yɩɔ ‑lɔɔ 'cibhisänyɔɔ wlʋa ‑mä, 'pʋpʋɛ 'päwa ‑aa ‑lä lä 'kɔɔn 'kʋ bhɩä nä, amää‑ wlʋɔ.

¹⁷ Ɔɔ' ‑zä wa lü lä ‑dläfʋɛ 'nɩ wa ci lä nynä ‑mä, Mɛkizedɛkö 'bhisäkʋ, ‑N ‑glö yɩ 'cibhisänyɔ 'kɔɔkɔɔ ‑za.

¹⁸ Kɩ plöö‑ lä nyna ‑mä, ‑jläma ‑a ‑kʋ bhlä ‑lɔɔ nä, a yä ‑lɔɔ ‑bha. ‑Ɔnöza bhää? ‑Aa bhɛ ‑pɛɛ 'tɛtɩ ‑kä, 'nɩ aa' bhɛ ‑pɛɛ 'sɩɩ gba ‑kä.

¹⁹ ‑Jläma nä, aa' ‑wʋ lʋʋ ‑bhlo 'coo kpɔlʋä wɩa. ‑Mä ‑lʋʋ ‑anyɩ ‑a 'tɛɛ lä dë nä, kʋ nää‑ lä kpänyɩ, ʋ ‑kä 'ŋnö 'nɩ ‑a 'jloo yɩ Laagɔ yëku.

²⁰ 'Nɩ 'klünö nä, kɩ 'sänyɩnöɔ lä 'titi nynä ‑mä sɔɔ ɩ 'kä ylä kʋ ‑mä, ‑mɔɔ' ‑lʋa nä, ɩɩ' bhɔɔ 'sänyɩnöɔ‑ 'nɩ wa ‑kä bhlä 'cibhie ‑tëbhuu.

²¹ ‑Mä Zozii' tëbhuu ‑za nä, kä Laagɔ 'sänyɩ‑ 'nɩ ʋ cii, ʋ lä Kä Kwlienyɔ Laagɔ 'sɔlɩ‑ lä nynä ‑mä ɩ yi sɔɔ kʋ. Nä ɔɔ' ‑läyɩɔ bʋkʋ nüwälɩ 'ylɩbha. Laagɔ laa, ‑mɔɔ nä, ‑n ‑glö yɩ 'cibhisänyɔ 'kɔɔkɔɔ' ‑za.

²² Kɩ pana lä nynä ‑mä Zozii nä, ɔmɔ 'mnö ‑a ‑ghlä 'nɩ ‑a yä Laagɔ ‑mɛnö ylä 'nägäsä.

²³ 'Nɩ ɩ ‑yio 'sɩɩ sɔɔ nynä ‑mä, 'Cibhisänyʋa 'fɩɩn ‑wa ‑kʋ bhlä nä, kwa ‑zu bhä kpänyɩ. ‑Ɔnöza bhɛɛ? sä wa ‑kä bhlä 'kwiee dlu nä, waa' bhɔɔ ‑lɔɔ ‑kʋ 'kɔɔkɔɔ' ‑za.

²⁴ ‑Mä Zozii nä, kɔ plöö‑ lä 'cibhisänyɔ 'kɔɔkɔɔ ‑za nä, nyɩkpɔɔ' ‑lä 'kɔɔn ɔɔ' bhlëë' 'plöö.

²⁵ Ɩmɩɩ‑ ‑kä lä 'ŋnö 'nɩ, nyɩkpaa' ‑lʋa ghlänöɔ 'kʋ 'nɩ ‑wa 'jloo lä Laagɔ yëku nä, ɔ sʋwa lä ‑lɔɔ nëë' 'kɔɔkɔɔ ‑za. 'Nɩ ɔ bhibhie lä 'kɔɔkɔ waa' ‑za.

²⁶ Sää 'cibhisänyɔ 'kädɔ‑ ‑a ‑ŋwa lä 'kʋ. Ɔ kplɔɔ. Ɔɔ' ‑wʋ 'foclo yëku ‑kä. Ɔɔ' ‑läzä nyenyi nʋ. 'Nɩ Laagɔ ‑gbä 'nɩ ɔ ‑sä gbenyenyinyʋa 'fɩɩn gwë 'nɩ ɔ gblää‑ Laagɔduu' fɛɛn fɛɛn.

²⁷ 'Nɩ ɔɔ' tään yɩɔ nynä ‑mä ɔ 'kä ylɩɩ 'fɩɩn 'kʋ 'cibhi ‑sä 'Cibhisänyʋä 'kädʋa 'bhisäkʋ. Ɩ yɩɔ plöö‑ nynä ‑mä, ɔ sä ylä 'fɩa ɔ yëkuu' 'cibhi ɔ yëkuu' nyenyii' ‑za nä, 'nɩ ɔ yi 'nɩ ɔ sä yɩ nyɩkpa 'fɩɩn lɛɛ. Ɔ yä wɛzä ‑lɔɔ' 'cibhie ‑sä. Ɔ ‑sänɩɛ 'ci ‑bhlo. Ɔ yëku 'titi ɔ ‑sää lä 'cibhi 'kʋ.

²⁸ ‑Bhlɛ Moyizöö ‑Jlämaa' nä, nyɩkpaa' ‑lʋä waa' bhɔɔ lä ‑cʋcʋ ‑kä nä, wamää‑ plöö‑ bhlä 'Cibhisänyʋä. ‑Mä Laagɔ ‑lä ylä 'fɩa ‑Jlämaa nä, ɩɩ' sä ʋ 'sänyɩ ylä bʋkʋ nä, sɔɔ plöö‑ lä nynä ‑mä, Laagɔ ‑Yowlio ‑ɔ ‑kplɔɔ lä wɩa nä, ɔmɔ plöö‑ ylä 'cibhisänyɔ 'kädɔ 'kɔɔkɔɔ ‑za.

« Roimhe

Air adhart »

Wycliffe Bible Translators, Inc.

Lean sinn:

Ceanglaichean taic

Sanasan