Bìoball air-loidhne

Eblëënyʋä 6 - GOD - u2

¹ Naa, ‑a cie bhlä 'kʋ nä, ɩɩ' tɛɛtɛɛ‑klüü wa cɩa‑anyɩ lä Klisöö' ‑za nä, a ‑ya 'plɩɩ yɩ ‑goo, ɩyä a ‑ya 'cɩä yɩ nynä nyɩkpabhü. ‑A 'nä 'ŋʋ ‑lä 'yigäda‑wälɩɩ' cɩalɩ sä, 'nɩ wa 'kanyɩ bʋkʋ soo nynä ‑mä a ‑bha gbenyenyii 'mnö, ‑yä a kään Laagɔɔ' pɔlötɛtɛ.

² Ɩyä waa' cɩa‑anyɩ ‑läyɩ bʋkʋ 'nyuu 'wlu‑ŋʋlɩɩ yëkuu' wälɩ. Ɩyä wa cɩa'anyɩ bʋkʋ ‑klɔgbö 'wlu gbɛɛlɩɩ' 'nyupälɩɩ' yëkuu' wälɩ. Ɩyä wa cɩa'anyɩ ‑läyɩ bʋkʋ 'kuëë glɔɔlɩ yëkuu' wälɩ. Ɩyä wa cɩa'anyɩ bʋkʋ Laagɔɔ' 'Tite 'kädɛɛ ylʋʋ yëkuu' wälɩ.

³ Laagɔ kä ‑gbä nä, sä wa cɩa lä nyɩkpabhü nä, sɔɔ cɩalɩɩ 'mɩ ‑a 'gä ylä cɩa.

⁴ ‑Ɔ plöö‑ lä nyɩkpaa' ‑lʋa ‑wa yä lä 'fɩa Laagɔɔ' zëlüü 'yi 'ni, 'nɩ ‑wa yä lä Laagɔduu' 'nää nëë' yla nä, 'nɩ wa ‑yä Kplɔɔkplɔɔ‑wugɔɔ 'sɔ yä lä 'kʋ kʋʋ nä,

⁵ 'nɩ Laagɔɔ' 'Nägädöö 'nää, ɩyä ‑mɔɔ 'yikʋ zëkpëa' 'tɛtɩɩ 'sɔ, ‑wa yɩ lä 'fɩa yibhë

⁶ 'nɩ ‑wa yä lä bʋkʋ waa' 'kɔgɔbhlä ‑zëkpëa 'mnö bhlüü nä, ‑lɔɔ' nyɩkpa‑cëa nyɩkpɔɔ' ‑läyɩɔ mii 'nɩ ɔ 'kwa soo nynä ‑mä wa 'ylɩbhɔ ‑yä wa yii zëkpü‑lëlëa 'mnö 'nɩ wa 'kɔ ŋomä. Ɔnöza bhää? Kɩ ‑kʋ lä nynä ‑mä kwa bhoo Laagɔ ‑Yowli 'kusu 'yi 'sɔnadä, 'nɩ wa sʋkpanöɔ ‑jlëë'.

⁷ A ni 'yi naa, ‑dʋdʋ 'nyu kʋʋ 'klʋ bhlää 'nɩ gogolɩɩ kʋ 'mnö 'pʋʋ nä, ‑wa gonʋ lä lɩɩ 'mnö nä, kwa ni 'nää. ‑Mä ‑lɔɔ' ‑dʋdʋʋ ‑mä 'sɩɩ ʋ ni 'nää Laagɔ dëlü.

⁸ ‑Mä ‑dʋdʋʋ' lʋʋ‑ wlʋ lä ‑kpäkö ‑yä 'ŋocuë 'sɔ 'klʋ nä, ʋʋ' ‑wʋ gba ‑kä. Kä Laagɔ gbütë ‑lɔɔ ‑dʋdʋ, 'nɩ 'tänyɩ ŋëë 'nɩ wa siu.

⁹ Bhelie ‑yä bhɛŋwnɩänyɩ‑, ‑ɛɛɛ ‑a ci yɩ 'flɛ sää ‑mä, ‑a ‑yi sɔɔ 'zaazɩ nynä ‑mä 'nägä‑blɔɔ 'mʋ a bhlü lä nä, a yi ‑lɔɔ nëë' ‑bha.

¹⁰ Laagɔɔ' ‑wʋ 'glɩ ‑kä. Saa 'fɩɩn a nʋ lä ʋʋ' ‑za nä, ɩyä ‑wawʋʋ a ‑kä lä ʋʋ' 'ŋnöö ‑za nä, ɩ gbä 'nɩ ʋ nö'anyɩ ‑lä 'kɔɔn 'kʋ bë. 'Tänyɩɩ a klä lä 'cɔcɩɛ 'mnö nyɩkpaa nä, anyɩa' ‑wawʋʋ ka yʋ wɛ läzä pana. 'Nɩ a klänʋwa ‑läte 'sɩɩ ‑zɩkä.

¹¹ Nä, ‑a ‑waa bhä nynä anyɩa nëëdëë' nyɩkpɔ nyɩkpɔ klä sɔɔ sä ‑aaa ‑yä ɔ ŋëë bhɩända ‑mä, ‑lʋʋ ɔ tänö lä Laagɔɔ' nä, ɔ yiu 'ni.

¹² Nä aa plä ‑lä yɔlʋ. Nyɩkpaa' ‑lʋa ‑kä lä pɔlötɛtɛ 'nɩ ‑wa ‑yi lä ‑bɛɛsä nä, 'nɩ ‑wa 'ninɩ‑ lä Laagɔɔ' 'nää 'mnö nä, a nʋ wamä 'bhisäkʋ.

Sä Laagɔ cii‑ lä nä, ʋ yi sɔɔ nʋ

¹³ A ni 'tänyɩɩ' Laagɔ soo bhlä Ablaamʋ nä, ʋ yëkuu' 'ŋnöö 'mnö ʋ zlügoo, ‑ɔnöza bhää? nyɩkpɔɔ' ‑wʋ ‑kʋ 'nɩ ɔ 'kä 'ghlü 'nɩ ɔ 'kä Laagɔ ‑zi.

¹⁴ Kʋ cii‑ lä nynä ‑mä, Ablaamʋ‑, n yi‑i 'sää 'titi 'nyu 'pä, 'nɩ n yi ‑naa 'lɔlʋnyʋä zumë.

¹⁵ Ablaamʋʋ' bɛɛsää' yibhëlɩɩ 'mnö ‑mɔɔ ɔ nii‑ lä sä Laagɔ cii‑ bhlä nynä ʋ yio 'nyɛ nä.

¹⁶ 'Nyɩkpɔ kä zlügo nä, lʋʋ lʋʋ‑ 'ghlü 'nɩ ‑ʋ zio lä 'kʋ nä, ʋmʋ ɔ 'sɔlɩ 'nɩ ɔ zlügo lä. Zlügodaa' wälɩɩ ɔ ci lä nä, kɩ ‑kä kpänyɩ gba 'nɩ ɩ ‑kä dë 'tɛɛsä.

¹⁷ Sɔɔ ‑säkä ‑säkä Laagɔ sää lä 'mʋ Ablaamʋʋ' ‑za. Laagɔ 'kä lä Ablaamʋʋ' 'lɔlʋnyʋä ʋʋ' jaa 'kʋ kwlie nä, kʋ ‑gbɛɛ ‑lɔɔ 'klüü lɩɩ‑ ‑kä lä dë 'tɛɛsä nä. Kʋ ‑zlügo ylä nynä ‑mä ʋʋ' ‑läyɩɔ 'kɔɔkɔ wälɩɩ 'ylɩbha.

¹⁸ Laagɔ cii‑ nynä ‑mä ʋ yi 'nyupälɩ kwlie, 'nɩ ʋ ‑yi 'nɩ ʋ ‑zlügo 'sɩɩ nynä ‑mä sʋ cii‑ lä nä, ʋ yi sɔɔ nʋ. 'Klünö 'sɔ pana nynä ‑mä sä Laagɔɔ' gë ‑wʋ lä yio nä, ʋʋ' ‑läyɩɔ 'kɔɔn wälɩ 'ylɩbha. Ɩ gbä 'nɩ ‑a ‑kä yɩ kpänyɩ 'tɛtɩ, 'nɩ ‑a ‑yi 'nɩ ‑a ‑zizio yɩ Laagɔ 'mnö, 'nɩ ‑a 'tɛnʋ yɩ dë nynä ‑mä, sä ʋ cii‑ lä nä, ʋ yi sɔɔ nʋ.

¹⁹ Sä ‑a 'tɛɛ lä Laagɔ dë nä, sɔɔ gbä 'nɩ ‑a ‑see 'nägäsä sä. Plɛɛ' belio‑anyɩ yɩɔ 'mʋ ‑anyɩa 'wugöö ‑za. ‑Anyɩa pɔlötɛtɛɛ nä, kɛ blüe yɩ 'nyukpɔ ‑laagɔnʋ 'mnö, 'nɩ ɛ mʋ,

²⁰ 'nɩ Zozii 'plönö‑anyɩ lä 'yikʋ nä, ɩɩ' ‑gbäsɩɩ ɔ mʋ lä nä, ɛ mʋ ‑mɔɔ. Ɔmɔɔ‑ plöö‑ ylä 'cibhisänyɔ 'kädɔ 'kɔɔkɔɔ ‑za. Kɔ ‑kʋ lä nynä Mɛkizedɛkö.

« Roimhe

Air adhart »

Wycliffe Bible Translators, Inc.

Lean sinn:

Ceanglaichean taic

Sanasan