Bìoball air-loidhne

Eblëënyʋä 5 - GOD - u2

¹ A ni 'yi naa, 'cibhisänyɔ 'kädɔ nä, ɔ lü‑nyɩkpa nëëdë ɔ bha 'nɩ ɔ nʋ lä Laagɔ ‑gä ɔ lü‑nyɩkpaa' ‑za. Ɔ lä bʋbɔ bʋbɔlɩɩ 'nɩ ɔ sä 'cibhi Laagɔ dëlü waa' nyenyii' ‑za.

² 'Nɩ nyɩkpaa' ‑lʋa ‑wʋ lä 'klüü ‑nɩnɩ ‑yi, 'nɩ wa too lä nä, ɔ yi mii 'nɩ ɔ yiwa 'mʋ 'nu. Ɔnöza bhää? Ɔmɔ 'titi ‑lɔɔ' 'klüü ‑ŋënöɔ 'sɩɩ.

³ Ɩmɩɩ‑ ‑kä lä 'ŋnö 'nɩ ɔ sä lä 'cibhi nyɩkpaa' nyenyii' ‑za, 'nɩ ɔ sä lä 'sɩɩ ɔ yëkuu' nyenyii' 'cibhi.

⁴ Nä, nyɩkpɔ 'titii 'nyɛ ‑wʋ ɔ yëku 'Cibhisälɩɩ 'kädɩɩ 'klʋagba ‑mä, Laagɔ nyɩ'ɔnya. Sɔɔ ‑tëbhu Laagɔ nyɛɛ‑ 'Cibhisänyɔ 'kädɔɔ Alɔɔ.

⁵ Klisöö' 'pɛlʋʋ 'mnö nä, sɔɔ ɩ ‑kʋ lä 'sɩɩ. Klisö 'titii‑ ‑wʋ ɔ yëku 'cibhisälɩ 'kädɩɩ 'klʋagbaa nyɛɛ‑. Laagɔ nyɩɔnya lä. Laagɔ‑ ‑sonöɔ ʋ lä ‑Mɔɔ plöö‑ lä ‑n ‑Yowli. 'Nɩ, ‑a 'bhää ylä ‑zɩkä ‑lää 'kʋ nä, ‑Amʋʋ‑ ‑gänö‑ö ylä.

⁶ Laagɔ ‑sonöɔ bʋkʋ, ʋ lä Mɛkizedɛkö 'bhisäkʋ, ‑N ‑glö yɩ 'cibhisänyɔ 'kɔɔkɔɔ ‑za.

⁷ Klisöö' zëkpëa 'fɩɩn ɔ ‑sä lä 'ylʋzɔɔ nä, kɔ ‑bhibhie 'nɩ ɔ ‑zözlä, ɔ paa‑ 'saglö 'nɩ ɔ tuu‑ Laagɔ dëlü. Ɔ ‑yi a sɔɔ nynä ‑mä Laagɔ‑ 'gɔ bhlä 'kwie nëë' ‑sä. 'Nɩ ɔɔ' Kplɔɔkplɔɔ‑zëkpëa' ‑za, ɔɔ' bhibhielɩɩ Laagɔ nui‑.

⁸ Ɔ plöö‑ bhä Laagɔ ‑Yowli ‑mä, ɩ ‑kʋ sɔɔ 'nɩ ɔ nii‑ nyäkälɩ. ‑Mä nyäkälɩnɩ 'mnö nä, ɔ cɩä‑ Laagɔɔ' 'klʋkpää.

⁹ Nä, kä Laagɔ ‑gbä 'nɩ ɔ ‑kplɔɔ yɩ wɩa. 'Nɩ nyɩkpaa' ‑lʋa ŋʋɔ lä 'klʋkpää nä, ɔ ‑yi 'nɩ ɔ plöö‑ yɩ wa Puënyɔ 'kɔɔkɔɔ ‑za.

¹⁰ Kä Laagɔ nyɩɔ‑ lä 'cibhisälɩ 'kädɩɩ ‑tëbhu Mɛkizedɛkö 'bhisäkʋ.

Ɩɩ' ‑wʋ nää‑ nynä ‑mä nyɩkpɔ ‑bha pɔlötɛtɛɛ' ‑blɔɔ 'kʋ

¹¹ 'Klünö 'kʋ nä, ‑a ‑kä wälɩ ‑bhutukpä ‑a 'gä ci. ‑Mä ɩ kään ‑zɔɔ ‑sä ‑yëku. Ɔnöza bhää? Aa' 'nu ‑wʋ siso.

¹² 'Tänyɩnɛ 'mnö nä, a ‑yi bhɛ nyɩkpa cɩasä ‑mä, a lä wa cɩa'anyɩ ‑lätee nynä nyɩkpaa' lʋä ‑wa cie Laagɔwälɩ 'cɩälɩ 'kʋ nä. Ka nyɛ lä lätee ‑mä aa' ‑lätee nyɩkpa bhëë' ‑ŋënüü' lüdä ‑ŋëë.

¹³ ‑Ɔ nyɛ lä ‑lätee nä, ɔ ‑glö 'yu ‑dɔdɔ, 'nɩ ɔɔ' ‑wʋ sä wälɩklë gëë 'yi nä ‑yi.

¹⁴ Nyɩkpabhë, ɔmɔ wa nyɛ lä nyɩkpa bhëë' ‑ŋënüü' lüdä. ‑Lɔɔ' nyɩkpɔɔ nä, ɔ yä wälɩ ‑bhutukpää' dä 'nii nä, ɔ ‑kä dɩgälɩ. 'Nɩ ɔ ‑yi ‑lɛɛ 'nänʋ, 'nɩ ɔ ‑yi ‑lɛɛ nyonyu.

« Roimhe

Air adhart »

Wycliffe Bible Translators, Inc.

Lean sinn:

Ceanglaichean taic

Sanasan