Bìoball air-loidhne

Eblëënyʋä 4 - GOD - u2

¹ ‑Mä kä Laagɔ ‑sonö‑anyɩ nynä ‑mä ‑anyɩ, ‑a yi ʋʋ' 'kʋwɔtɔdaa plä. 'Nɩ sä ʋ cii‑ lä nynä ‑mä ʋ yi nʋ nä, ʋ bhobho ‑lätee sɔɔ. Nä a ‑ya luë ‑kä! Nyɩkpɔɔ' kʋ'anyɩ lä nëëdë 'nɩ ɔ 'kä bhobho nynä ɔmɔ, ɔɔ' ‑wʋ sisio ‑yi nä, ɔɔ' ‑lä ‑mɔɔ plämʋ.

² Sä ‑a nu lä ‑lää Laagɔɔ' 'Nägädöö nä, sɔɔ ‑a tɩtɩä nuu‑ lä 'sɩɩ Laagɔɔ' 'Nägädöö. ‑Mä 'Nägädöö wa nuu‑ lä nä, ɩ 'nʋwa ‑wʋ lʋʋ ‑lää. ‑Ɔnöza bhää, wa nui‑ ‑mä waa' bhɔɔ ɩɩ' pɔlötɛtɛ ‑kä.

³ ‑Mä ‑anyɩmɔɔ‑ nui‑ lä 'nɩ ‑ɔ ‑kä lä ɩɩ' pɔlötɛtɛ nä, ‑a yi mii 'nɩ ‑a yi Laagɔɔ' kʋwɔtɔda plä. Kä Laagɔ cii‑ lä nynä ‑mä, 'Tänyɩ gbʋgblɛ bhlää'ä bhlä nä, Kä n ‑zlügo nynä ‑mä 'kʋwɔtɔdaa' 'bhlɩɛ n ‑göglä lä 'mnö waa' ‑za nä, Wa 'nɩɛ ‑lä 'kɔɔn 'mnö plä. ‑Bhlɛ Laagɔ nä, ‑lɩɩ 'fɩɩn ‑kʋ lä 'ylʋzɔɔ nä, 'kɔɔn ciedä, ‑lɔɔ ʋ ‑nʋ lä ɩɩ' ‑lefɩɩn.

⁴ A ni wälɩklë ‑jɩjlɔ ‑ngbɔɔsɔna ylʋʋ' ‑za 'nɩ a ci nynä ‑mä, Laagɔ ‑nʋ lä ‑lɩɩ 'fɩɩn nä, ‑ngbɔɔsɔna ylʋʋ 'kʋ kʋ ‑wɔtɔ 'kʋ.

⁵ 'Nɩ Laagɔ ci lä 'sɩɩ nynä ‑mä, 'kʋwɔtɔdaa' 'bhlɩɛ n ‑göglä lä 'mnö waa' ‑za nä, wa 'nɩɛ ‑lä 'kɔɔn 'mnö plä.

⁶ Ɩ cio nynä ‑mä, nyɩkpaa' ‑nänʋä ‑kʋ 'nɩ wa yi Laagɔɔ' 'kʋwɔtɔda plä. Tɛɛtɛɛdaa' nyɩkpaa‑ nuu‑ lä 'Nägädönö 'nɩ ‑waa ‑wʋ lä 'kʋwɔtɔdaa ‑plämʋ nä, kä wa 'tɛ bhlä 'nyukwli ɩɩ' ‑zä ɩ plöö‑ lä sɔɔ 'kʋ.

⁷ ‑Nɩnɩ ‑kä yɩ 'ŋnö nä, Laagɔ döö‑ bʋkʋ ylʋʋ. Ʋmʋ plöö‑ lä ‑Zɩkä. 'Ylʋʋnʋ nä, Laagɔ ‑bɛɛ 'nɩ 'tänyɩ ‑tlʋmä sää 'mʋ 'fɩa, 'nɩ ʋ cii‑ Davidö nëë' 'klünö ‑säkä ‑säkä ʋ yä bhɛ lä ‑zä ci nä. Ɔ lä, ‑Zɩkä nä, a kä Laagɔɔ' nüwälɩ 'nu nä, aa' ‑gbaa ‑lä anyɩa' pɔlöö 'klʋ!

⁸ A ni 'yi nä, Zozue 'tienʋwa bhlä nä, 'kʋwɔtɔdä‑ ɔ kwa bhä ‑fä nä, Laagɔɔ' ‑lä bhɛ bʋkʋ 'kʋ wɔtɔlɩɩ' 'yigädaylʋʋ wälɩ ci.

⁹ Kɩ sä lä ‑zɔɔ nynä ‑mä, 'kʋ wɔtɔlɩɩ' 'cëbhlo ‑kʋ ‑lɔɔ Laagɔɔ' 'yuaa' ‑za. Kä ‑lɔɔ' ylʋʋ ‑kʋ lä nynä ‑ngbɔɔsɔnaylʋʋ plöö‑ lä nyämʋ‑säylʋʋ nä.

¹⁰ Nyɩkpɔɔ' lɔɔ‑ yi lä Laagɔɔ' 'kʋ wɔtɔda plä nä, ɔ yi 'kʋ wɔtɔ. Lebhee 'fɩɩn ɔ yä bhlä nʋ nä, ɔ yi ɛɛ' ‑za 'kʋ wɔtɔ ‑n ‑näsä Laagɔ ‑nʋ lä ‑lɩɩ 'fɩɩn 'nɩ ʋ ‑wɔtɔ lä 'kʋ nä.

¹¹ ‑Nɩnɩ ‑kä ylä 'ŋnö nä, a ‑ya tään ‑mɔɔ anyɩa pɔlöö 'yi nynä ‑mä ‑a 'gä Laagɔɔ' 'kʋwɔtɔda plämʋ. ‑A gä sɔɔ nʋ nä, tɛɛtɛɛdaa' ‑lʋa ‑wa ‑sä bhlä Laagɔ 'klʋkpä nä, nyɩkpɔɔ' ‑lä waa' 'sëploo 'kʋ 'gë 'nɩ ɔ 'kä ‑zɔɔ bhlü.

¹² Laagɔɔ' ciciwälɩ nä, kɩ ‑yä, 'nɩ ɩ ‑kä 'sɩɩ 'tɛtɩ kpänyɩ. Kɩ nɛɛ 'nɩ ɩ ‑zi ‑jlɛɛ' lɛɛ ‑wa 'nɛɛ‑ lä 'pɛlɩ 'sɔɔ nä. Kä Laagɔɔ' ciciwälɩɩ plä nyɩkpɔ pleyii, 'nɩ ɩ mʋ 'nɩ ɩ 'taa ɔɔ' kätö ‑zuzuu ‑yä ɔɔ' 'wuga. Ɩ plä 'nɩ ɩ ŋëë 'fɔɔ gënödöö. 'Nɩ ɩ plä ɩɩ' 'mumnii 'mnö. 'Nɩ sä nyɩkpɔ ‑yi lä, 'nɩ sɔ bhobho lä 'sɩɩ ɔɔ' pleyi nä, ɩ ‑yi sɔɔ.

¹³ Lʋʋ ‑wʋ ‑kʋ 'nɩ ʋ 'kä 'kʋ ‑zizio Laagɔɔ' ‑za. Kʋkʋlɩɩ 'fɩɩn ʋ ‑nʋ lä nä, kɩ ‑ghlä 'kʋ wɩa, 'nɩ ʋʋ' 'yi ‑kʋɩ 'sɩɩ 'kʋ. Nä sä nyɩkpɔ nää‑ lä nä, ɔ yi sɔɔ ‑zɔɔ ‑sä Laagɔ dëlü.

Zozii plöö‑ 'Cibhisänyʋa 'fɩɩn ‑lɛ 'kädɔ

¹⁴ Naa, ‑a ‑kä 'Cibhisänyɔ 'kädɔɔ' 'päwö‑käälɔɔ. Kɔ blüë‑ 'nyukpɔ‑laagɔnʋ 'mnö, 'nɩ ‑ɔ ‑mʋ ‑mɔɔ Laagɔduu' Laagɔ yëku. Ɔmɔɔ‑ plöö‑ lä Zozii, Laagɔ ‑Yowli. Nä pɔlötɛtɛɛ ‑a ‑kä lä ɔɔ' ‑za nä, a ‑ya klɛɛ sä klɩ klɩ klɩ.

¹⁵ 'Cibhisänyɔ 'kädɔnɔ ‑a ‑kä ylä nä, ɔ mii 'nɩ sä ‑aa ‑wʋ lä ‑cʋcʋ ‑kä nä, ɔ fään sɔɔ plɛ yëku. Ɔ nii‑ ‑zɔɔpälɩ ‑anyɩ 'bhisäkʋ ‑mä, ɔɔ' ‑wʋ nyenyii' ‑bhlüü.

¹⁶ Nä a ‑ya 'jloo Laagɔɔ' plɛkʋmɛnɔɔ' 'leyi‑këkpëa yëku. ‑A ga yëku 'jloo nä, Laagɔ yi‑anyɩ ŋäzö yibhë 'nɩ ʋ yi‑anyɩ wamä ‑yä ‑a gä ‑mie nä, ʋ 'ka‑anyɩ 'kʋ yi.

« Roimhe

Air adhart »

Wycliffe Bible Translators, Inc.

Lean sinn:

Ceanglaichean taic

Sanasan