Bìoball air-loidhne

Eblëënyʋä 3 - GOD - u2

Zozii ‑zi Moyizö 'kʋ
( Matie 21.33‑38 )

¹ Bhelie ‑yä bhɛŋwnɩänyɩ‑, anyɩmɔ Laagɔ laa‑ lä nä, 'nɩ ‑ɔ plöö‑ lä ʋʋ' lʋä nä, a wloo Zozii nynä Laagɔɔ' lobho lobhonyɔ ‑yä ‑anyɩa 'cibhisänyɔ 'kädɔ. Ɔmɔ ‑a ŋʋʋ‑ lä ‑anyɩa pɔlötɛtɛɛ 'kʋ.

² A ni 'yi na, sä ‑mɔɔ ‑gɔgɔbhlää' Moyizö ‑nʋ lä saa 'fɩɩn Laagɔ ylää bhlä ʋʋ' ‑bhutuu' ‑za nä, sɔɔ ‑säkä ‑säkä Laagɔ ‑sä lä Zozii 'nɩ ɔ ‑nʋ lä 'sɩɩ Laagɔ ‑gä wɩa.

³ ‑Mä Zozii nä, ɔ ‑kä bhä kpänyɩ 'klʋagba 'nɩ ɔ ‑zi Moyizö. Kɩ ‑kʋ lä nynä ‑n ‑näsä nyɩkpɔ kä ‑bhutu slää‑ 'nɩ ɔ mʋ lä 'ŋnu 'nɩ ɔ ‑zi lä ‑bhutuu nä.

⁴ ‑Bhutu ‑bhutu nä, ʋ ‑kä ʋʋ' 'slänyɔ. ‑Mä ‑lɩɩ 'fɩɩn ‑ɩ ‑kʋ lä nä, ɩɩ' 'slänyɔ 'mɔɔ‑ plöö‑ lä Laagɔ.

⁵ ‑Gɔgɔbhlää' nä, sä Laagɔ ylä bhlä ɔɔ' ‑bhutuu' ‑za nä, kä Moyizö ‑nʋ sɔɔ ‑bhutuu 'fɩɩn 'mnö. Ɔ ‑glö bhä Laagɔɔ' ‑gänʋnyɔ ‑yä sa 'fɩɩn Laagɔ 'kä bhlä ci nä, ɔ 'kä ‑lɔɔ ‑lɩɩ' ‑dläfʋɛ lü.

⁶ ‑Mä Klisö nä, ɔmɔ kɔ ‑kʋ lä Laagɔ yëku nynä ‑mä ʋ ‑Yowli. 'Nɩ ʋ ‑Yowlinɔ nä, ɔ ‑yi 'nɩ ɔ plöö‑ yɩ Laagɔ‑bhutuu' 'wluu. ‑A gɔ dë 'tɛɛ 'nɩ, lʋʋ ‑a ‑bɛɛ lä 'nɩ ‑a täkpɔ lä 'mʋ nä, ‑a gʋ plɛkʋ ‑kää nä, ‑anyɩ plöö‑ ylä ɔɔ' ‑bhutuu.

Laagɔɔ' 'yua yi 'kʋ wɔtɔlɩ 'ni

⁷ 'Ɩɩ ‑zä Kplɔɔkplɔɔ‑wugɔɔ ci lä nynä ‑mä, ‑Zɩkä nä, a kä Laagɔɔ' nüwälɩ 'nu nä,

⁸ Aa' ‑gbaa ‑lä anyɩa' pɔlöö 'klʋ 'Nɩ sä a 'bäsɩ ylää'ä bhlä gbɩɩ' ‑mɔɔ 'popie 'mnö nä, A kä'ä sɔɔ gbɩɩ' yla.

⁹ Kwa paa‑ ‑bli 'nɩ wa ylää'ä gbɩɩ'. ‑Mä 'ylʋbɔɔ' gwlɩɩ 'sɔ wa ‑sä lä ‑mɔɔ nä, Wa nii‑ 'naa nʋnʋ‑lebhee 'yi.

¹⁰ Ɩ ‑gbä 'nɩ waa' 'bhlɛsʋʋ 'fɩɩn 'mnö nyɩkpa nä, Waa' gbʋgblɛ ‑kʋ'ʋ bhä pleyii. Ɩ ‑kä 'ŋnö 'nɩ n cii‑ nynä ‑mä, Kä waa' pɔlöö mʋ ylä 'kɔɔkɔɔ' ‑za too ‑kää. 'Nɩ waa' ‑wʋ 'naa ‑bɔlɩɩ ‑yibhë.

¹¹ 'Klünö mɩɩ‑ ‑kä 'ŋnö 'nɩ waa' gbʋgblɛ kʋ'ʋ bhlä pleyii. Nä kä n ‑zlügo nynä ‑mä waa' ‑lä 'kɔɔkɔ 'naa 'kʋ wɔtɔ ‑daa plämʋ.

¹² Bhelie ‑yä bhɛŋwnɩänyɩ‑, a luë ‑kä! Nyɩkpɔɔ' kʋ'anyɩ ‑lä pään 'nɩ ɔ kä pɔlö ‑nyenye kään, 'nɩ ɔ 'kä 'nyukwlɩ 'tɛmä 'nɩ ‑Yäyä ‑Laagɔɔ, ɔ 'kʋʋ ‑blɔɔ 'kʋ ‑bha.

¹³ Laagɔ kä ʋʋ' 'bɔɔgʋʋ 'mnö ci nynä ‑mä, ‑zɩkä nä, 'tänyɩɩ 'fɩɩn 'mnö a nui lä, a 'ŋʋŋʋ 'tɛtɩɩ. Ɩ yi gbä 'nɩ gbenyenyi nö'anyɩ ‑lä 'nyigë, 'nɩ nyɩkpɔɔ' ‑lä ‑kä 'nyukwli 'tɛmä.

¹⁴ ‑Pɛpɛɛ nä, Klisö 'mɔ ‑a ‑yɔsɔ nʋʋ ylä lebhe 'kʋ. ‑Mä, ɩ ‑ŋwa 'kʋ nynä ‑mä, sä a cie‑ lä 'kʋ 'nɩ a 'tɛnöɔ‑ bhlä dë nä, a klä sɔɔ sä ‑aaa ‑yä bhɩända 'kä ŋëë.

¹⁵ Laagɔ‑bɔɔgwɩ ci nynä ‑mä, ‑Zɩkä nä, a kä Laagɔɔ' nuwälɩ 'nu nä, Aa' ‑gbaa ‑lä anyɩa' pɔlöö 'klʋ 'Nɩ sä a 'bäsɩ ylää'ä bhlä gbɩɩ' nä, A kä'ä sɔɔ gbɩɩ' yla.

¹⁶ ‑Wa nuu‑ bhɛɛ ‑zi Laagɔɔ' nuwälɩɩ 'nɩ wa ‑cɩcɩɔ bhɛ 'naa‑? Nyɩkpaa 'fɩɩn Moyizö ‑gbä 'nɩ ‑wa ‑bha lä Ejipitii' geylüü 'mnö nä, wamä lä.

¹⁷ 'Ylʋbɔɔ' gwlɩ 'sɔ 'mnö, Laagɔ paa gbʋgblɛ 'zaazɩ. ‑Mä ɔ 'pänɩɛ bhɛ 'wlɩɩ 'naa‑? Nyɩkpaa' ‑lʋa ‑wa nʋ bhlä nyenyii nä, wamä ʋ 'pänɩɛ bhlä 'wlɩɩ. 'Nɩ nyɩkpanää' ‑säkä ‑säkä, wamää‑ 'kuu lä 'popie 'mnö.

¹⁸ Kä Laagɔ ‑zlügo bhlä. Ʋ lä ‑mä, 'bhlɩɛ n ŋʋʋ‑ lä ‑lɔɔ nynä ‑mä wa 'kɛ 'mnö mʋ ‑yä wa 'kä 'kʋwɔtɔ nä, wa 'nɩɛ ‑läyɩɔ 'kɔɔn mnö plä. 'Nɩ ‑ɔnözä Laagɔ ‑zlügo bhä 'titii? ‑Wa ‑sʋʋ bhlä 'klʋkpää' nä, waa' ‑zä ʋ ‑zlügo lä.

¹⁹ Kä ‑a ni lä 'yi nynä ‑mä, kwa 'tɛ bhä kpänyɩ 'nyukwli nä, ɩɩ' ‑za waa' ‑wʋ lä mii 'nɩ wa 'kä 'kʋ wɔtɔlɩɩ' 'bhlɩɛ 'mnö ‑plämʋ.

« Roimhe

Air adhart »

Wycliffe Bible Translators, Inc.

Lean sinn:

Ceanglaichean taic

Sanasan