Bìoball air-loidhne

Eblëënyʋä 2 - GOD - u2

‑Lɔɔ nëë' ‑bhalɩ 'kädɩ

¹ ‑Nɩnɩ 'mɩɩ‑ ‑kä 'ŋnö 'nɩ wälɩɩ 'fɩɩn ‑a nuu‑ lä nä, ‑a ‑kä 'nɩ ‑a 'gɩ lä kpänyɩ plɛ yëku fään ‑yä ‑aa kä ‑kä ‑blɔɔ mnɔ.

² Wälɩɩ' ‑lɩɩ ‑Laagɔzizii cii‑ bhlä nä ɩ yä glää. ‑Mä ‑nänʋä 'nɩɩ ‑wʋ 'klʋkpää ŋʋʋ‑ 'nɩ wa ‑sɩɩ 'gbä. Ɩ ‑kä 'ŋnö 'nɩ wa nii‑ ɩɩ' gbäylɩ‑sälɩɩ.

³ Nä, ‑anyɩ ‑a gä Kwlienyɔɔ' puëlɩɩ yɔlʋ 'kʋ plää nä, säsä Laagɔ yi‑anyɩ bhä cie? Puëlɩnɩ 'mɩ Kwlienyɔɔ sä bhlä ‑bhɔɔdää. 'Nɩ ‑wa nui‑ lä 'sɩɩ nä, wa ‑bhlü‑anyɩ plɛɛ.

⁴ 'Nɩ Laagɔ ‑dläfʋɛ wa ‑lü lä nä, Laagɔ ‑gbä 'nɩ ɛ gëë‑ panalɩ, ‑yä ‑daminë ‑yä 'yiziziogbɩ nü nü nü 'kʋ. 'Nɩ Laagɔɔ' pɔlösaa, Kplɔɔkplɔɔ‑wugɔɔ ‑yi 'nɩ ʋ nyɛɛ‑ sɔɔ 'ylʋzɔkʋnyʋä.

Ɔmɔɔ‑ sä lä ‑lɔɔ nëë'

⁵ A ni 'yi na, zëkpëa ‑a yi lä ‑mɔɔ 'yikʋ 'nɩ ‑anö wälɩɩ ‑a ci lä nä, ‑zizii 'mɩ Laagɔ 'nöa ‑wʋ 'kämädä nyɛɛ‑.

⁶ 'Tänyɩ ‑kʋ ‑lɔɔ 'nɩ nyɩkpɔ ‑bhlo ‑lü ‑lɔɔ' ‑dläfʋɛɛ, ɔ laa, 'Nɩ Laagɔ‑, wa laa bhä 'titi nyɩkpɔ 'nɩ ‑n luë bhä ɔɔ' dä 'kʋʋ? 'Ylʋzɔkʋnyɔ, gba ‑sä ɔ ‑kä bhä 'nɩ ‑n wluo bhä 'kʋʋ?

⁷ ‑N ‑nʋ lä 'ylʋzɔkʋnyɔ nä, Kä ‑n ŋʋʋ‑ 'tänyɩ 'nɩ, ‑naa ‑zizii ‑zio ‑bhlɛ 'kʋ. ‑N ŋʋɔ 'klʋkpää' 'nɩ ‑n sluo‑ 'klʋagba 'wlu nynä 'leyi‑wugblë. 'Nɩ ‑lɩɩ 'fɩɩn ‑n ‑nʋ lä nä, ‑n nyɩɔ 'nyɩ 'kämädä.

⁸ Kä ‑n ‑lɔɔ lä kʋkʋlɩɩ 'fɩɩn dëlü nynä ɔ 'kämänɩ. Kä Laagɔ nyɛɛ‑ lä 'ylʋzɔkʋnyʋä 'päwä ‑lɩɩ 'fɩɩn 'kʋ. 'Nɩ lʋʋ ‑ʋ yi lä kʋ 'nɩ waa' ‑lä lä 'kämä nä, ʋʋ' ‑wʋ ‑kʋ. ‑Bhlɛ 'tänyɩnɛ 'mnö nä, a 'nii ‑wʋ 'yi nynä ‑mä 'ylʋzɔkʋnyʋä 'mää 'kämä lä ‑lɩɩ 'fɩɩn.

⁹ ‑Mä ‑lɔɔ Laagɔ ‑gbä lä 'nɩ 'tänyɩ ‑kʋ ‑lɔɔ 'nɩ ‑Laagɔzizii ‑zio bhlä 'kʋ 'pɛpɛlɩä 'nɩ, wa laa lä Zozii nä, ‑a nio yɩ 'yi 'nɩ, 'klʋkpaa ‑yä 'klʋagba ‑kʋɔ yɩ 'wlu nynä 'leyi‑wugblë. 'Kwiee nyäkälɩɩ 'fɩɩn ɔ nii‑ lä nä, ɩmɩɩ‑ ‑gbä lä 'nɩ ɔ ‑kʋ ylä sɔɔ. Laagɔ‑ ‑bɔɔ 'nɩ, ɔ kuu‑ lä ‑lɔɔ' 'kwie nyɩkpa 'fɩɩn ‑za.

¹⁰ Ɩ ŋwa bhä 'kʋ nynä ‑mä Laagɔ ghlää 'kwiee nyäkälɩɩ 'mnö ‑yä ʋ 'kä Zozii 'ghlümë ‑yä ɔ 'kä kplɔɔ wɩa. Laagɔ 'mʋʋ‑ ‑nʋ lä 'kɔɔnʋ, 'nɩ 'kɔɔnʋ nä, ʋ ‑kʋ 'sɩɩ ‑lɔɔ Laagɔɔ' ‑za. 'Nɩ Laagɔ wamä‑ nynä 'ylʋzɔkʋnyʋää' ‑lɛɛ bhutukpä, wa kʋmʋ ʋʋ' 'klʋagbaa 'mnö. ‑Ɔnöza bhää? Zozii yʋwa puë.

¹¹ 'Nɩ Zozii nä, kɔ ‑gbä 'nɩ 'ylʋzɔkʋnyʋa ‑wa ‑kä bhlä nyenyii' ‑gesii yëku nä, waa' ‑lefɩɩn ‑kplɔɔ yɩ wɩa. 'Nɩ ɩ plöö‑ yɩ nynä ‑mä, ‑ɔ ‑kplɔɔ lä nä, ɩyä ‑lʋa ɔ ‑kpɔlʋä lä nä 'sɔ nä, wa ‑kä yɩ 'Bäɔ ‑bhlo. Ɩ ‑kä 'ŋnö 'nɩ wa 'nöɔ ‑wʋ zoo 'kʋ ‑kä 'nɩ ɔ ‑lʋa yɩ ɔ bhelie ‑yä ɔ bhɛŋwnɩä.

¹² Ɔ ‑soo Laagɔ, ɔ laa ‑Naa 'ŋnöö nä, n yi mʋ 'nɩ n yii n bhelie ‑yä n bhɛŋwnɩä 'sɔ pana. 'Nɩ n yi ‑jlünëëdë kʋ 'nɩ n yi‑i 'ŋnu fään.

¹³ Ɔ cii‑ 'sɩɩ ɔ lä N yi Laagɔ dë 'tɛɛ. 'Nɩ ɔ cii‑ 'sɩɩ, ɔ lä ‑N ni ‑amʋ, 'nɩ ‑n ni 'yua Laagɔ nyɛɛ'ɛ lä nä.

¹⁴ 'Yuënä wa ‑känö wälɩklë ‑bhlo 'kʋ. Amää‑ plöö‑ lä nynä ‑mä, wa ‑glö ‑mää 'ylʋzɔɔ' nyɩkpa nä, kä 'kwiee ‑zuzuu ‑känʋwa bhä 'päwä 'kʋ. ‑Nɩnɩ 'mɩɩ‑ ‑kä lä 'ŋnö 'nɩ Zozii ‑mä 'sɩɩ, ɔ bhlüü lä nyɩkpaku 'kʋ 'nɩ ɔ kuu‑ lä ‑yä 'Dëvlo ɔ ‑kä bhlä 'kwiee 'tɛtɩ nä, ɔ 'kʋ 'plɩtɩä.

¹⁵ Ɩ yä nyɩkpaa 'fɩɩn ‑wa ‑kʋ bhlä 'kwiee ‑guulɩɩ' ‑ŋänöö' geylüü 'mnö nä, ɔ kwa ‑lɔɔ nëë ‑sä.

¹⁶ ‑Ɔɔ bhɔɔ ‑Laagɔzizii ‑za, ‑mä Ablaamʋʋ' 'lɔlʋʋ 'mnö nyɩkpaa' kläälɩɩ' ‑zä ɔ ‑yi lä.

¹⁷ ‑Nɩnɩ ‑kä bhɛ 'ŋnö nä, ɩ ‑ŋwa bhä 'kʋ nynä ‑mä 'pɛlɩ 'fɩɩn 'mnö nä, ɔ kʋ ɔ bhelie ‑yä ɔ bhɛŋwnɩä 'bhisäkʋ. Ɔ plöö‑ yɩ 'cibhisänyɔ 'kädɔ, 'nɩ ɔ yi ŋäzö. Kɔ nʋ lä 'kɔɔkɔ Laagɔ ‑gä ‑yä ɔ 'kä gbä Laagɔ dëlü waa' nyenyii 'kä cienöɔ.

¹⁸ Sä 'kwlɩ ‑bhɩänöɔ 'nɩ ɔ nii‑ lä ‑zɔɔpälɩ nä, ɩ yi gbä 'nɩ nyɩkpa 'fɩɩn‑ ni lä zɔɔpälɩ nä, ɔ yiwanyɩ nëë' ‑sä.

« Roimhe

Air adhart »

Wycliffe Bible Translators, Inc.

Lean sinn:

Ceanglaichean taic

Sanasan