Eblëënyʋä 13 - GOD - u2

‑Dɔɔ' nü nü nü

¹ Sä bhelie ‑yä bhɛŋwnɩä sɔ wamä wamä lä nä, a wamä ‑wamä sɔɔ 'kɔɔkɔ.

² Aa' bë ‑lä nyɩkpa‑klälɩ 'kʋ ‑mä, nyɩkpaa' ‑nänʋä ‑kʋ ‑lɔɔ, waa' bhɔɔ sɔɔ ‑yi 'nɩ wa ‑klä ‑Laagɔzizi.

³ Nyɩkpaa ‑wa ‑kʋ lä ‑jɩɩ nä, a luë 'sɩɩ waa' dä 'kʋ. Ɩ ‑kʋ anyɩa pleyi nynä ‑mä ‑n ‑näsä a ‑yʋwa 'sɔɔ‑ ‑kʋ bhlä ‑jɩɩ' nä. Nyɩkpaa' ‑lʋa wa ŋʋ lä nyäkälɩɩ' nä, a lüe 'sɩɩ waa' dä 'kʋ, ɩ kʋ anyɩa' ‑za nynä ‑mä ‑n ‑näsä anyɩ‑ ‑kʋ bhlä 'sɩɩ ‑lɔɔ' 'kwlɩkabhɩa 'mnö nä.

⁴ ‑Ɔ plöö‑ lä wlunöölɩɩ' wälɩɩ nä, a 'ŋʋɩ 'klʋkpä ‑yä 'ŋwadi ‑yä ɔ 'ŋnɔ 'sɔ kʋʋ 'kʋ. ‑Ɔ plöö‑ lä ‑käpä ‑käpäsaa' näänyʋa nä, ɩyä ŋnʋ‑ylänyʋa ‑yä wlu‑ylänyʋa nä, Laagɔ yiwa ‑kä 'tite 'ŋʋ.

⁵ Aa' ‑kään ‑lä gbʋʋsä monii' ‑wawʋ, ɩyä sä a ‑kä lä nä, a ŋoo sɔɔ 'kʋ. Laagɔ 'titi cii‑ ʋ lä n 'nö‑ö ‑lä cɛɛ. N 'nö‑ö lä yëku ‑bha.

⁶ Ɩ ‑kä ylä 'ŋnö nä, ‑anyɩ ‑mä 'sɩɩ ‑a yi 'tɛtɩ 'ni 'nɩ ‑a yi ci nynä ‑mä, Kwlienyɔ Laagɔ plöö‑ 'naa 'kʋ yinyɔ nä nn' ‑lä ‑guu. Lʋʋ ‑sä nyɩkpɔ yi'i a nʋʋ?

⁷ Nyɩkpaa' ‑lʋa ‑wa 'tienö'anyɩ bhlä nä, 'nɩ ‑wa ‑sonö'anyɩ bhlä Laagɔwälɩɩ nä, a luë waa' dä 'kʋ. Sä waa' zëkpëa plöö‑ lä 'kʋ nä, a 'pä 'sɔɔ plɛkʋ ‑yä a dɩdɛ waa' pɔlötɛtɛɛ.

⁸ Zozi Klisö nä, sä ɔ ‑kʋ bhlä zëkü nä, sɔɔ ɔ ‑kʋ lä ‑zɩkä, 'nɩ sɔɔ ɔ 'kä lä kʋ 'kɔɔkɔ ‑za.

⁹ Aa' ‑taa ‑lä a yëku 'yi 'nɩ nyɩkpa 'kanyɩ ‑aa ‑yibhë 'bhëë cɩalɩ cɩa ‑mä, Laagɔɔ' plɛkʋmɛnɔɔ 'mnö ‑mɔɔ ‑a 'nii lä 'tɛtɩ. Nä, ɩɩ' ‑wʋ 'kʋ ‑ŋwa nynä ‑mä lülülɩɩ' ‑jlämä 'tienö‑anyɩ. ‑Wa gëë‑ bhlä ‑lɔɔ' ‑jlämaa 'kʋ nä, wa 'nöa ‑wʋ lʋʋ 'mnö 'nii‑.

¹⁰ Laagɔ‑bhutu 'kädʋʋ 'mnö 'cibhisädaa'lülülɩɩ nä, 'Cibhisänyʋa nʋ ‑mɔɔ lebhe ‑mä waa' lii ‑wʋ.

¹¹ Kä 'Cibhisänyɔ 'kädɔɔ ‑yä mnaa' doluu 'sɔ yi 'nɩ, ɔ ‑yʋsɔ plä lä kplɔɔdaa' kplɔɔkplɔɔda ‑yä nyɩkpaa' nyenyii 'kä ‑lɔɔ ‑sɔɔ. 'Nɩ mnaa' ‑laa ‑anö doluu wa bhlüü‑ lä 'kʋ nä, kwa ‑ya 'sɔ mʋ 'duu kpëkpë 'kʋ, 'nɩ wa sia.

¹² 'Nɩnɩ pana ‑ɔnözä Zozii 'kuu‑ lä 'duu kpëkpë 'kʋ ‑yä ɔɔ' doluu 'kä nyɩkpa nyenyi yëku ‑sä.

¹³ Nä a ‑ya ‑bha 'kʋ ‑yä ‑a mʋɔ ‑blɔkʋ ‑mɔɔ 'duu kpëkpë 'kʋ ‑yä wa 'bhɩsɛ‑anyɩ ɔmɔ 'bhisäkʋ.

¹⁴ ‑Mä 'du 'kädʋnʋ ‑a ‑kʋ lä ‑mää zëkpë 'kʋ 'mnö nä, kʋ 'kä lä 'plö. Ʋʋ' ‑wʋ ‑lɔɔ ‑kʋ 'kɔɔkɔɔ' ‑za. ‑Ʋ yi lä ‑mɔɔ 'yikʋ nä, ʋmʋ ‑a tään lä.

¹⁵ Nä ‑a ‑ya ghlää Zozii 'mnö ‑yä ‑a fään 'kɔɔkɔ Laagɔ 'ŋnu. Bhlɩ bhlɩlɩɩ ɩmɩɩ‑ plöö‑ ylä ‑anyɩa 'cibhisälɩ nä, a ‑ya bhlɩ ‑yä ‑a fänʋ 'ŋnu.

¹⁶ Aa' bë ‑lä nynä ‑mä kä a ‑kä 'nɩ a 'kä nyɩkpa 'nää nʋ, ‑yä a ‑yä nyɩkpa 'sɔ 'kä dëë. 'Cibhinɛ 'mɛ Laagɔ ‑waa lä.

¹⁷ A 'ŋʋ anyɩa' 'tienyʋa 'klʋkpää' ‑yä a ‑lä a yëku ‑dʋdʋkʋ wamä 'yikʋ. Wamää‑ wloo lä anyɩa' kätö‑zizii 'kʋ, 'nɩ wamä Laagɔ 'kä lä anyɩa' yëkuu' wälɩ 'ylää. Nä a kwa 'klʋkpää 'ŋʋ nä, wa yi'anyɩ 'kʋ wloo ‑pʋpɛɛ 'mnö. A 'nö sɔɔ nʋ nä, wa yi anyɩa' ‑za 'mnö 'ŋuŋuë. 'Nɩ wa kä yɩ 'mnö 'ŋuŋuë nä, ɩɩ' ‑lä anyɩa ‑za namä.

Bhibhielɩ ‑yä bhäälɩ

¹⁸ A bhibhie ‑anyɩa 'wlu. ‑A ‑yi sɔɔ nynä ‑mä wälɩklë ‑bhlo 'coo zɛnö‑anyɩ ‑wʋ 'ŋnö. ‑Ɔnöza bhää? ‑Anyɩ nä, kä ‑a tään lä 'kɔɔkɔ nynä ‑mä ‑a 'gä 'nää nʋ.

¹⁹ N sonö'anyɩ 'sää 'titi nynä ‑mä a bhibhie ‑yä n 'kanyɩ ‑kä sisio nëëdë yi.

²⁰ Laagɔɔ ‑ʋ nyɛ lä 'kʋ wɔtɔlɩ nä, ʋmʋʋ‑ ‑sä lä ‑anyɩa Kwlienyɔɔ Zozii 'kudukʋ 'nɩ ɔ plöö‑ lä ʋʋ' 'bhabhlöö' kpanyɔ 'kädɔ. 'Nɩ ɔɔ' doluu' 'cibhie wlʋa‑ lä mɛnʋʋ' ‑lɛɛ loluu.

²¹ Nä, ‑lɔɔ' Laagɔɔ, ʋ 'nyɩanyɩ 'casɩ ‑yä sa 'fɩɩn‑ nää‑ lä nä, a 'kä sɔɔ nʋ. Ɩyä sʋ ylä lä nä, a 'kä 'sɩɩ sɔɔ nʋ. Ɩyä sä ʋ ‑waa lä nä, ʋ nʋ'anyɩ 'sɔɔ nëëdë Zozi Klisö 'mnö. 'Klʋagba ŋëë Zozi Klisö 'kʋ 'kɔɔkɔɔ' ‑za. Ɩ kʋ sɔɔ!

²² Bhelie ‑yä bhɛŋwnɩänyɩ‑, n ylä nynä ‑mä a poo 'nägäsä 'klünö 'nyukwli ‑yä ɩ 'kanyɩ 'tɛtɩɩ 'ŋʋ ‑mä 'bɔɔgʋnʋ n ‑jɩjlä'anyɩ lä nä, ʋʋ' ‑wʋ 'mʋ ‑tlʋ.

²³ 'Döö n 'kanyɩ ylä ‑sää nä, ɩmɩɩ‑ plöö lä nynä ‑mä bhelio, Timotee, ɔ yä ‑jɩɩ' ‑bha. Ɔ kä siso ‑yi nä, n ‑yɔsɔ yi'anyɩ 'yi 'ni kää yi.

²⁴ N bhään 'cɔcɩɛɛ' 'tienyʋa. N bhään 'cɔcɩnyʋa 'fɩɩn. 'Nɩ ‑mää Yitalii‑bhlɩɛɛ' 'cɔcɩnyʋa, wa bhänö'anyɩ.

²⁵ Laagɔɔ' 'nää ŋënö'anyɩ 'kʋ, anyɩ 'fɩɩn!

« Roimhe

Air adhart »

Wycliffe Bible Translators, Inc.

Lean sinn:

Ceanglaichean taic

Sanasan