Bìoball air-loidhne

Eblëënyʋä 12 - GOD - u2

A kä mielɩɩ' ‑kʋ nä plɛɛ' 'kpɔsʋ'anyɩ ‑lä

¹ A ni ylä 'yi naa, ‑dläfʋɛɛ' lünyʋä ‑bhutukpä wamää‑ ‑glänö‑anyɩ lä 'klʋ. Naa, lʋʋ lʋʋ‑ yi bhlä ‑anyɩa ‑blɔɔ 'kʋ sɩä nä, ɩyä nyenyii' ‑lɩɩ ‑ɩ gbi‑anyɩ lä 'flɛ 'wlu nä, a ‑ya ‑sɩɩ yɩ ‑a yëku ‑väkö. Ɩyä sämɩɩ ‑a ‑kʋ lä paa dä nä, a ‑ya wloo yɩ 'kɔɔkɔ ɩɩ' wälɩ 'kʋ.

² A ‑ya wloo yɩ 'kɔɔkɔ Zozii ‑mä ɔmɔɔ‑ gbä 'nɩ pɔlötɛtɛ yi lä, 'nɩ ɔmɔɔ‑ gbä lä 'sɩɩ 'nɩ ɛ kplɔɔ lä wɩa. Ɔmɔ, ɔɔ' ‑wʋ zoo 'mänyɩ 'nɩ ɔ ŋoo‑ lä 'nɩ ɔ 'kuu‑ lä 'kusu 'yii. ‑Ɔnöza bhää? ‑Mɔɔ 'yikʋʋ ‑pʋpɛɛ‑ yi bhlä nä, ɔ nie bhä 'yi. ‑Pɛpɛɛ nä, ɔ ‑kʋ yɩ 'Päwö kää Laagɔɔ' lüüklä 'kʋ sä.

³ ‑Ɛɛɛ, a 'pä Zozii plɛkʋ ‑nä. Gbenyenyinyʋa' bhɔɔ ɔɔ' wälɩ 'kʋ mɛɛ ‑mä, ɩ ‑kʋ sɔɔ 'nɩ ɔ 'kuu‑ 'mnö waa' ‑za. Nä, plɛɛ' 'kpɔsʋ'anyɩ ‑lä 'nɩ a 'kä sɩä.

⁴ A ‑yä nyenyi 'sɔ bhlää 'kʋ ‑mä a ‑nyɩ 'sɔ ‑lätee ‑plä.

⁵ Kä Laagɔ ‑bhlüë nö'anyɩ plɛɛ' nynä ɔɔ' 'yuë ‑mä a yä bë. Ʋ cii‑, ʋ lä 'Naa 'yunɔ, Kwlienyɔ Laagɔ kä‑ä gbäylɩ ‑sä nä, Fään ‑lɔɔ wälɩklëa plɛ yëku. Ɔ kä‑ä nëkʋ ‑fä nä, plɛ 'naa 'kpɔsɔ‑ɔ ‑lä.

⁶ ‑Mä Kwlienyɔ Laagɔ nä, Nyɩkpɔɔ' lɔɔ ɔ ‑waa lä nä, ɔmɔ ɔ sä lä gbäylɩ. 'Nɩ 'yuu lɔɔ ɔ ‑waa lä nä, ɔmɔ ɔ 'sɛpɛ lä.

⁷ Nä a ŋoo nynä Laagɔ ‑sa'anyɩ gbäylɩ ‑mä kʋ kla'anyɩ lä nynä ʋʋ' 'yuë. 'Bä ‑sä ‑ɔɔ ‑sä bhä ɔɔ' 'yu gbäylɩɩ?

⁸ Sä Laagɔ sä lä ʋʋ' 'yua 'fɩɩn gbäylɩ nä, ʋ nö'anyɩ sɔɔ gbäylɩ ‑sä nä, a ‑glö 'läbhʋyuë ‑mä aa' ‑wʋ ʋʋ' 'yuë 'titi plöö‑.

⁹ ‑A ‑kä 'bäsɩ ‑mää 'ylʋzɔɔ 'nɩ wa 'tienö‑anyɩ. 'Nɩ wa sa‑anyɩ gbäylɩ 'nɩ ‑a ŋʋwa 'klʋkpä. Nä Laagɔɔ, ‑ʋ plöö‑ lä 'wugöö 'fɩɩn ɩ 'Bä nä, ‑a 'nʋʋ ‑lä bhä 'klʋkpää 'ŋʋ 'nɩ ‑a 'gä 'pʋpʋɛ 'ni ‑a?

¹⁰ ‑Ɛɛɛ, ‑a 'bäsɩ nä, sä wa ‑waa bhlä nä, sɔɔ wa ‑sanyɩ lä gbäylɩ 'tänyɩ ‑zioo' ‑za, ‑mä Laagɔɔ' 'pɛlʋʋ 'mnö nä, ‑a 'gä 'nää 'ni nä, ɩɩ' ‑zä ʋ nʋ lä sɔɔ. Ʋ ‑waa nynä ‑mä ‑a ‑kʋ kplɔɔlɩɩ 'mnö ʋmʋ 'bhisäkʋ.

¹¹ Nyɩkpɔ nä, 'tänyɩɛ 'mnö wa sänöɔ lä gbäylɩ nä, ‑lɔɔ' 'tanyɩɛ 'nöɔ ‑wʋ 'kɔɔkɔ ‑gä nää‑. ‑Mä ‑zee nä, ɩ gbä 'nɩ ɔɔ' zëkpëa gëë 'yi 'nɩ a ‑wɔtɔ 'kʋ.

¹² Nä, ɩ ‑kä ylä 'ŋnö nä, anyɩa' ‑klɔgbö 'tɛmä 'mʋ ‑yä anyɩa' ‑kokoowlii' tɩtɛ ‑lä ‑mä ɩ kään 'tɛtɩ.

¹³ A ‑sä ‑bɔlɩɩ' lɩɩ‑ gëë‑ lä 'yi nä anyɩa' ‑kokokpüü' ‑za. Ɩyä ‑ɔ gä bhä bho bhlü nä, ɔɔ' kä ‑kä ɔ yëku bho ‑sëkeyee' ‑sä ‑mä ɔ 'kä yamä.

¹⁴ A tään nynä ‑mä a ‑yä nyɩkpaa 'fɩɩn 'sɔ pää' 'kʋ wɔtɔlɩ 'kä ‑mɔɔ kʋ. Ɩyä a kplɔɔ ‑mä nyɩkpɔ 'nö ‑kplɔɔ nä, ɔɔ' ‑lä Kwlienyɔɔ 'yi 'ni.

¹⁵ A luë ‑kä! Sä Laagɔ nyɛ lä nyɩkpɔ nyɩkpɔ nä, ɔ ŋoo sɔɔ 'kʋ. Gbʋgblɛɛ' pänönö'anyɩ ‑lä ‑kä 'mnö 'nɩ ɛ 'kä nyima, 'nɩ ɛ 'kä 'sɩɩ nyɩkpaa' ‑nänʋä 'plöö.

¹⁶ A luë ‑kä! Aa nää ‑lä ‑käpä ‑käpä! A 'ŋʋ Laagɔɔ kplɔɔkplɔɔlɩɩ 'klʋkpää' ‑mä aa' nʋ lä nynä Ezayu. Ɔ ŋʋʋ‑ ɔɔ' 'kɔgwlɛ‑klʋʋ 'kpä lülülɩɩ' ‑za.

¹⁷ A ‑yi sɔɔ nynä ‑mä 'tänyɩ ‑kʋ ‑lɔɔ 'nɩ Ezayu tään bhɛ nynä ‑mä ɔ 'kä 'kɔgwlɛ‑klʋʋ' 'nyupälɩɩ 'ni ‑mä, ɔɔ' 'bää ‑wʋ ŋoo‑. Ɔ tuu‑ bhɛ, ɔ ‑nʋ saa 'fɩɩn ‑yä ɔ 'bä 'kɔ ‑kä 'nyu 'pä ‑mä ɔɔ' ‑wʋ mii‑.

¹⁸ 'Kükëë' laa a yi bhlä 'taa nä amä yëku aa' bhɔɔ ‑yi. Amä Sinayii‑kükëa ‑anö 'wluu‑ ŋnä bhlä, 'nɩ 'ylʋʋ ‑bhlü 'nɩ 'cucukpä‑ ‑kʋ bhlä 'wlu, 'nɩ didee yi bhlä 'wlu nä,

¹⁹ 'nɩ läglɛ gbää bhlä 'wlu, 'nɩ nuwälɩɩ ghlää bhlä 'wlu nä, amä yëku aa' ‑wʋ ‑yi. 'Tänyɩɩ 'Yizlɛnyʋä nuu‑ lä 'kükëyɩ 'wluu nuwälɩɩ' kplüü nä, kwa cii‑ nynä ‑mä waa' ‑lä ɩɩ' 'nyukwli poolɩ mii nä, ɩ bhloo yɩ.

²⁰ 'Klüü Laagɔ ylä bhlä nä, waa' minɩ bhɔɔ. Ʋ lä Nyɩkpɔɔ' lɔɔ‑ gä 'kükënä yëku 'jloo nä, a 'bhlɔɔ cɛkwɩɩ' ‑yä ɔ 'ku. Mnɛ 'titii‑ yia bhä yëku 'jloo nä, a 'bhlɛɛ cɛkwɩɩ' ‑yä ɛ 'ku.

²¹ ‑Mä wälɩɩ 'fɩɩn sɩ plöö bhlä 'kʋ nä, sɔɔ nënümä bhä nyɩkpa ‑ŋänöö' ‑za. Ɩ ‑kä 'ŋnö 'nɩ Moyizö cii‑, ɔ lä kä 'naa 'yɛkɛɛ tɩtɛ lä. 'Nɩ n yä nënümä ‑ŋänö'ö ‑za.

²² Maa, anyɩ nä, Siyɔɔduu' 'kükëa ɩyä ‑Yäyä Laagɔ 'du 'kädʋʋ, ʋmʋ yëku a 'jloo‑ lä. Ʋmʋʋ‑ plöö‑ lä ‑mɔɔ Laagɔ yëkuu' Zolizalɛmʋ‑duu. ‑Mɔɔ ‑Laagɔzizii' ‑gbʋgbʋzɛɛ ‑kʋ lä 'nɩ ɩ nʋ lä ‑pʋpɛ.

²³ Laagɔɔ tɛɛtɛɛ‑yua ‑wanö 'ŋnöö‑ ‑jɩjlɔ lä ‑mɔɔ Laagɔduu nä, a yä waa' ‑jlëa yëku 'jloo. Laagɔɔ, ‑ʋ 'gä lä nyɩkpa 'fɩɩn 'tite 'ŋʋ nä, a yʋ yëku 'jloo. 'Yigëënyʋa ‑wanö 'wʋgöö‑ yä lä kplɔɔ wɩa nä, a yʋwa yëku 'jloo.

²⁴ ‑Ɛɛɛ, a yä Zozii yëku 'jloo. Ɔmɔɔ‑ ‑kʋ lä ‑a ‑yä Laagɔ 'sɔ pää' mɛnʋ ‑loluu' ‑za. Ɔɔ' doluu ɔɔ' mëë‑ lä ‑anyɩa ‑za nynä ‑mä ‑a 'gä kplɔɔ nä, ʋ pä Laagɔduu' wälɩ 'nɩ ʋ ‑zi Abɛlöö' doluu 'kʋ.

²⁵ A luë ‑kä! Wa ka'anyɩ soo nä, a poo 'nyukwli! 'Yizlɛnyʋä nä, wa ‑gblɩmänʋwa ‑mää 'ylʋzɔɔ, ‑mä waa' ‑wʋ 'nyukwli poo. Ɩ ‑kä 'ŋnö 'nɩ Laagɔ ‑sʋwa gbäylɩ. 'Nɩ ‑anyɩ nä, ‑nɩnɩ ‑a nu lä ‑lää nä, Laagɔduu' ɩ ghlää lä. Nä, ‑ɔ sonö‑anyɩ lä nä, ‑a gɔ ‑kä kee 'täkä nä, saa 'fɩɩn Laagɔ yi‑anyɩ 'sɩɩ gbäylɩ ‑sä.

²⁶ ‑Mɔɔ ‑gɔgɔbhlää' nä, Laagɔɔ' nuwälɩ ‑gbä 'nɩ ‑dʋdʋ ‑tɩtɛ. ‑Mä 'tänyɩnɛ 'mnö kä Laagɔ cii‑ nynä ‑mä ʋ yi wälɩklë nʋ. Ʋ lä N yi bʋkʋ gbä 'nɩ ‑dʋdʋ yi tɩtɛ, ‑mä n yi 'sɩɩ gbä 'nɩ ‑laagɔɔ' yi tɩtɛ.

²⁷ 'Klünö Laagɔ cii‑ lä nynä ‑mä ʋ yi bʋkʋ 'sɔɔ nʋʋ nä, ɩ pana nynä ‑mä ‑lɩɩ 'fɩɩn‑ yi lä gbʋgbɔnöɔ ‑lɔɔ' 'tänyɩɛ 'mnö nä, Laagɔ yii gboguë. ‑Mä ‑lɩɩ ‑ɩɩ ‑lä lä gbʋgbɔnöɔ nä, kɩ 'kä ylä kʋ 'kɔɔkɔɔ ‑za.

²⁸ 'Leyiduu‑ ‑bɛnö‑anyɩ lä nä, nyɩkpɔ 'nʋʋ ‑lä 'kɔɔn bhlëë' 'kʋ ‑sä. Nä a ‑ya bhään Laagɔ, ɩyä saa‑ yiu lä ‑gä namä nä, ‑a ‑ya nʋʋ sɔɔ ‑gä. A ‑ya 'tɛnʋ dë ‑yä ‑a 'ŋʋʋ 'klʋkpää.

²⁹ ‑Ɛɛɛ, ‑anyɩa Laagɔɔ nä, ʋ ‑glö ŋnäŋnä ‑kosu nä, kʋ sie.

« Roimhe

Air adhart »

Wycliffe Bible Translators, Inc.

Lean sinn:

Ceanglaichean taic

Sanasan