Bìoball air-loidhne

Eblëënyʋä 11 - GOD - u2

‑Gɔgɔbhlää' nyɩkpaa' pɔlötɛtɛɛ yëkuu wälɩ

¹ Pɔlötɛtɛ nä, kɛ plöö‑ lä nynä ‑mä, lʋʋ lʋʋ nyɩkpɔ ylä lä nä, ɔ känʋ plɛkʋ nynä ‑mä ɔ yiu 'ni. Ɩyä lʋʋ lʋʋ ɔɔ' 'ni ‑wʋ lä 'yi nä, ɔ pana nynä ‑mä ʋ ‑kʋ.

² ‑A gä lä ‑a tɩtɩää' 'nägä ‑dläfʋɛ lü nä, waa' pɔlötɛtɛɛ' ‑za lä.

³ ‑A ‑kä ylä Laagɔɔ' pɔlötɛtɛ nä, ‑a ‑yi yɩ sɔɔ nynä ‑mä ‑lɩɩ 'fɩɩn ‑kʋ lä nä, kä Laagɔ bhlüü‑ ciciwälɩ 'kʋ 'nɩ ʋ nʋɩ‑. Nä ‑a ‑yi yɩ sɔɔ nynä ‑mä, ‑lɩɩ nyɩkpɔɔ' 'ni ‑wʋ lä 'yi nä, ɩmɩɩ‑ wlʋa lä ‑lɩɩ nyɩkpɔ ni lä 'yi nä.

⁴ ‑A tötɔ Abɛlö ‑kä bhlä Laagɔɔ' pɔlötɛtɛ nä, ɩ ‑kä 'ŋnö 'nɩ 'cibhie ɔ ‑sä lä nä, Laagɔ ‑wamänɩɛ 'nɩ ʋ ‑zi Kayɛɛn ‑lɛɛ, 'fɩa 'nɩ ʋ cii‑ nynä ‑mä ɔ ‑glö 'sɩɩ 'yigëënyɔ. 'Zaazɩ Abɛlö yä wɛzä 'ku ‑mä, ɔɔ' pɔlötɛtɛɛ' ‑za, ɔɔ' sää ‑lätee 'mʋ.

⁵ ‑A tötɔ Enɔkö ‑mä 'sɩɩ, ɔ ‑kä bhlä Laagɔɔ' pɔlötɛtɛ nä, ɩ ‑kä 'ŋnö 'nɩ Laagɔ bhlüo‑ 'kʋ 'nɩ ʋ ‑yɔsɔ gblää‑ Laagɔduu' ‑yä ɔɔ' kä 'kwiee dlu kään. Kä Laagɔ bhlüo‑ 'kʋ 'nɩ ʋ ‑fɔɔ ‑mɔɔ ʋ yëku yëku 'nɩ nyɩkpa 'nöɔ yɩɔ 'kɔɔn nii‑. Ɩ cio‑ nynä ‑mä, 'fɩa ‑yä Laagɔ 'kä Enɔkö 'kʋ 'bhlü nä, kä Enɔkö ‑kä bhä Laagɔ 'tʋ.

⁶ 'Nɩ nyɩkpɔ 'nö Laagɔɔ' pɔlötɛtɛ ‑kä naa, ɔɔ' ‑lä 'kɔɔn Laagɔ 'tʋ kään. Nyɩkpɔɔ' lɔɔ ci lä nynä ‑mä ɔ yi Laagɔ yëku 'jloo nä, ɩ ‑ŋwa 'kʋ nynä ‑mä ɔ kään pɔlötɛtɛ nynä 'zaazɩ, Laagɔ ‑kʋ. 'Nɩ nyɩkpaa' ‑lʋa ‑wa tänʋ lä nä, ʋ pʋwa bɔɔ.

⁷ Nowee ‑kä bhlä Laagɔɔ' pɔlötɛtɛ nä, ɩ ‑kä 'ŋnö 'nɩ Laagɔ ‑gblɩmänöɔ ‑bhlɛ. Wälɩɩ 'gä bhlä 'kʋ 'plö nä, nyɩkpɔ 'nɩɩ bhɔɔ ‑yi. Noweenɔ nä, kɔ laa‑ Laagɔɔ' ciciwälɩɩ nyaasäsä 'nɩ ɔ yi lä 'gokpëa koo ‑yä ɔ 'kä ‑lɔɔ ɔɔ' gbünyʋä nëë' ‑sä. Ɔɔ' pɔlötɛtɛɛ 'mnö ɔ ‑klaa ylä 'ylʋzɔkʋnyʋä gbʋ. Ɩ ‑gbä 'nɩ ɔ ‑lü yɩ 'yigëëlɩ jaa 'kʋ. Pɔlötɛtɛ 'mɛɛ‑ gbä lä 'nɩ nyɩkpɔ kʋ lä 'sɔɔ.

⁸ Ablaamʋ ‑kä bhlä Laagɔɔ' pɔlötɛtɛ nä, ɩ ‑kä 'ŋnö 'nɩ 'tänyɩɩ Laagɔ pɔɔ‑ lä wälɩ nä, ɔ ŋoo‑. Ɔ ŋʋʋ‑ Laagɔ 'klʋkpää 'nɩ ɔ mʋ 'yigäda bhlɩkʋ 'wlʋ kää. Kä Laagɔ ‑sonöɔ bhlä nynä ‑mä ‑lɔɔ' 'bhlɩɛ 'mɛ ʋ 'kɔ 'nyɛ. ‑Mä ɔ mʋ bhlä nä, ɔɔ' bhɔɔ sää 'titi ‑gbäsɩɩ ɔ mʋ bhlä nä ‑yi.

⁹ Ablaamʋ ‑kä bhlä Laagɔɔ' pɔlötɛtɛ nä, ɩ ‑kä 'ŋnö 'nɩ 'bhlɩɛ Laagɔ cii‑ bhlä ‑mä ʋ yio 'nyɛ nä, ɔ ‑mʋ 'nɩ ɔ ‑kʋɛ 'mnö nynä lowuyu. ‑Mɔɔ ɔ slää‑ 'taplee ‑papä 'nɩ ɔ ‑kʋ bhä. Ɔmɔ, ɩyä Yizakö, ɩyä Zakɔpʋ, ‑papö ‑zɔɔ wa ‑kʋ bhä. Ablaamʋʋ' 'nyupälɩɩ 'mɩɩ‑ ‑ŋënʋwa lä 'sɩɩ 'kʋ.

¹⁰ 'Du 'kädʋʋ ‑lʋʋ Laagɔ 'titi pään‑ lä glu nä, ʋmʋ Ablaamʋ ‑bɛɛ bhlä. Laagɔ 'titii‑ ‑nyäka 'nɩ ‑ʋ slää‑ lä ‑lɔɔ 'duu.

¹¹ Ablaamʋ 'ŋnɔ Salaa ‑kä bhlä Laagɔɔ' pɔlötɛtɛ nä, ɩ ‑kä 'ŋnö 'nɩ ɔ yä bhɛ kpänyɩ 'kɔglwɛ plä ‑mä Laagɔ nyɩɔ‑ 'yugälʋ. Ɔ 'tɛɛ‑ a wälɩklë ‑bhlo dë, amää‑ plöö‑ bhlä nynä ‑mä sä Laagɔ ci lä nä, kʋ nʋ sɔɔ.

¹² Ɩmɩɩ‑ ‑kä ŋnö 'nɩ Ablaamʋ, ɔmɔ mɔɔ‑ yä bhɛ lä yiosä 'ku nä, ɔɔ' 'mnö 'lälɩ bhutukpä ‑ghlää lä ‑mɔɔ 'nɩ ɩɩ' ‑wʋ lä ‑zunɔɔ' 'bɛ. Waa' ‑zunɔ ‑kʋ nynä ‑laagɔzälö ‑yä ji ‑zägbö ‑dʋdʋ.

¹³ Nyɩkpanä 'fɩɩn nä, kwa ‑kä Laagɔɔ' pɔlotɛtɛ 'nɩ wa kuu‑ lä. 'Nɩ 'nää Laagɔ cii‑ bhlä ‑mä ʋ yiwa ‑lä nä, wa 'nöa yɩɔ 'nimʋ‑. Wa 'ninöa ‑blëlë 'yi, 'nɩ wa ‑bhänöa. 'Nɩ wa ‑yibhë sɔɔ wɩa nynä ‑mä ‑mää 'ylʋzɔɔ nä, wa ‑glö lowie nä, kä wa plö bhä.

¹⁴ Wa ci bhlä sɔɔ nä, kɩ plöö‑ lä nynä ‑mä, 'bhlɩ wa tään bhä.

¹⁵ 'Bhlɩɛ wa ‑bha lä 'mnö nä, ɛmɛ waa' tään bhɔɔ. ‑Ɔnöza bhää? wa kä bhä ‑waa nynä ‑mä wa yi ‑mɔɔ 'ylɩbhɔ nä, wa yi bhä ‑lɔɔ' 'tänyɩɛ 'ni.

¹⁶ ‑Mä 'bhlɩ, ɛɛ' lɛɛ‑ nää‑ bhlä kpänyɩ nä, ɛmɛ wa tään bhlä. Laagɔduu' kʋdä wa tään bhlä. ‑Nɩnɩ 'mɩɩ‑ ‑kä 'ŋnö 'nɩ waa' ‑wʋ lä Laagɔ zoo 'kʋ ‑kä 'nɩ ʋ plöö‑ lä 'sɩɩ waa' Laagɔ. ‑Ɛɛɛ, 'nɩ 'zaazɩ, Laagɔ slää‑ waa' 'du 'kädʋ.

¹⁷ Ablaamʋ ‑kä bhlä pɔlötɛtɛ nä, kä Laagɔ ylɔɔ‑ gbɩɩ' nynä ɔ ‑sä ɔ ‑yowli Yizakö 'cibhi 'kʋ. ‑Mä Ablaamʋ ‑yia sɔɔ nynä ‑mä Yizakö ‑bhlo 'coo Laagɔ nyɩɔ‑, 'nɩ ɔmɔ ɔ sä bhɛ lä 'sɩɩ 'cibhi 'kʋ. ‑Bhlɛ, ɔmɔ 'mnö Laagɔɔ' 'nää 'kä bhlä yii.

¹⁸ Kä Laagɔ ‑sonöɔ bhlä nynä ‑mä, Yizakö 'mnö, n 'kä lä ghlää ‑yä ‑naa 'lɔlʋnyʋä 'kä ‑naa 'ŋnöö bhɛɛ.

¹⁹ Ablaamʋ ‑yi bhä sɔɔ nynä ‑mä kä Laagɔ ‑kää 'kwie 'päwä 'kʋ. 'Nɩ ʋ gbä 'nɩ 'kudukuë glɔɔ 'kuëë. Ɩmɩɩ‑ ‑kä ŋnö 'nɩ Laagɔ 'ylɩbhɔɔ‑ lä ɔ ‑yowli Yizakö. Panalɩɩ' 'cë ‑bhlo lä.

²⁰ Yizakö ‑kä bhlä Laagɔɔ' pɔlötɛtɛ nä, kɔ paa‑ ɔ ‑yowlie Zakɔpʋ ‑yä Ezayu 'nyu waa' 'yikʋʋ zëkpëa' ‑za.

²¹ Zakɔpʋ ‑kä bhlä Laagɔɔ' pɔlötɛtɛ nä, 'tänyɩɩ ɔɔ' 'kwiee ylɩɩ 'mɛmɛ bhɛ lä nä, kɔ laa‑ ɔ ‑yowli Zozɛfʋ ‑yowlie, 'nɩ ɔ yiwa 'nyu 'pä bhlo ‑bhlo bhlo. Ɔ ‑pɩä ɔɔ' ‑kpäma 'kʋ 'nɩ ɔ yi Laagɔ dëlü 'wlu sä glaa.

²² Zozɛfʋ ‑kä bhlä Laagɔɔ' pɔlötɛtɛ nä, ɔɔ' zëkpëa' bhɩä ‑gbäsɩɩ nä, ɔ cii‑ 'tänyɩɩ 'Yizlɛnyʋä 'kä lä geylüü' ‑bha nää' wälɩ. 'Nɩ ɔ pana‑ ɔ ‑yowlie ɔ kä kuu‑ nä ɩɩ' sä wa 'kä bhlä ɔɔ' ‑gɛzɛɛ klä nä.

²³ Moyizö, ɔ 'bä ‑yä ɔ ‑nɔɔ 'sɔ ‑kä bhlä Laagɔɔ' pɔlötɛtɛ nä, 'tänyɩ wa ‑gään lä Moyizö nä, kwa ‑zizio ‑aaa 'nɩ ɩ ‑nʋ 'cɩ taa. Wa ‑zizio bhä, ɔnöza bhɛɛ? Kä wa nii‑ bhlä 'yi nynä ‑mä 'yuo nää‑ bhä kpänyɩ, 'nɩ waa' bhɔɔ 'sɩɩ Ejipitii' 'loyoo ciciwälɩɩ ‑guu.

²⁴ Moyizö ‑kä bhlä Laagɔɔ' pɔlötɛtɛ nä, ɔ 'ghlümë‑ lä nä, ɔɔ' 'ylä bhɔɔ nynä wa ci nynä ‑mä Ejipitii' 'loyoo' 'yuŋnʋgbɛnyɔɔ' 'yu ɔ plöö‑.

²⁵ Ɔɔ' ‑wʋ ‑tään nynä ‑mä ɔ 'kä ‑mɔɔ nyenyii 'mnö, 'nää kʋ, 'pɛpɛlɩä ‑za. Kɔ 'sänyɩ‑ nynä ‑mä ɔ yi 'kwlɩkabhɩa 'mnö kʋ ɔ ‑yä ɔ 'bhunyʋä Laagɔɔ' 'yua 'sɔ.

²⁶ Ɔ ni bhä 'yi nynä ‑mä, Laagɔɔ' lobho lobhonyɔɔ' 'ŋnöö 'mnö, 'kwlɩ kɔɔ bhɩä nä, ɩ ‑glö leylü 'kädɩɩ' lɩɩ‑ ‑zi lä Ejipitii' leylüü 'fɩɩn 'kʋ nä. Ɔ bhobho bhlä sɔɔ nä, leylüü' ‑lɩɩ ‑ɩ yi bhlä ‑mɔɔ 'yikʋ nä, ɩmɩ ɔ ni bhlä 'yi.

²⁷ Moyizö ‑kä bhlä Laagɔɔ' pɔlötɛtɛ nä, ɔɔ' ‑wʋ 'loyoo' ‑gbʋgblɛɛ ‑guu, 'nɩ ɔ ‑bha Ejipiti‑bhlɩɛ 'mnö. Plɛ 'nöɔ ‑wʋ 'kɔɔn 'kpɔsɔ. 'Nɩ Laagɔɔ wa 'ni ‑wʋ lä 'yi nä, ɔ ‑kʋ bhä nynä lɔɔ‑ niu 'yi.

²⁸ Moyizö ‑kä bhlä Laagɔɔ' pɔlötɛtɛ nä, kɔ ‑gbä 'nɩ Pakö‑glɩsɩɩsɩ nio‑. 'Nɩ ɔ yi gbä 'nɩ 'cibhisä‑mnaa' doluu, 'Yizlɛnyʋä yiu waa' 'gbüü kplii 'yii 'mëë ‑yä, 'kwiee ‑zuzuu' kä bhä 'plö nä, ʋʋ' kä ‑kä bhä waa' 'lɔlʋkpɔɔ 'kʋʋ tɛɛtɛɛ‑yua 'taa.

²⁹ 'Yizlɛnyʋä ‑kä bhlä Laagɔɔ' pɔlötɛtɛ nä, kä wa nää‑ 'nɩ wa tɔɔ‑ jizlɛɛ nynä lʋa‑ nämnö ‑dʋdʋ ‑sɔsʋ 'kʋ nä. Ejipitinyʋa 'bhänʋwa‑ 'bɩɩ nynä ‑mä wa 'kä 'sɩɩ 'tɔɔmʋ 'nɩ 'nyie yiwa 'bhlä.

³⁰ 'Yizlɛnyʋä ‑kä bhlä Laagɔɔ' pɔlötɛtɛ nä, wa bhlüü‑ ylɩɩ ‑ngbɔɔsɔ 'kʋ 'nɩ wa ‑bii Zelikoo‑duu 'kʋ, 'nɩ Zelikoo‑duu' gbü‑papɩɩ yi bhlü.

³¹ Wluylä‑ŋnɔɔ, Laabʋ ‑kä bhlä Laagɔɔ' pɔlötɛtɛ nä, 'Yizlɛnyʋä bhlää‑ Laagɔɔ' ‑zɔbhlɛgbänyʋa ‑mä wa 'nöɔ ‑wʋ 'bhlämʋ‑. ‑Ɔnöza bhɛɛ? 'Yizlɛnyʋaa‑ ‑yi bhlä 'bhlɩɛ 'mnö bɩä ‑kää nä, kɔ ‑klʋwa bhä 'nägäsä.

³² N yi bhä bʋkʋ zɛɛ 'naa‑? Nn' ‑läyɩɔ 'tänyɩ 'ni ‑yä n 'kanyɩ pɔlötɛtö‑nyɩkpaa' yëkuu' wälɩ soo 'nɩä 'nɩä. ‑Mä n yi Zedeyɔɔ zɛɛ, ɩyä Balakö, ɩyä Samösɔɔ, ɩyä Zɛfʋtee, ɩyä Davidö, ɩyä Samɩɛ, Laagɔɔ' 'plɔfɛtɩnyʋa.

³³ Nyɩkpanä nä, wa ‑kä bhlä Laagɔɔ' pɔlötɛtɛ nä, ɩ ‑gbä 'nɩ wa ‑sɩä 'leyibhlɩ‑ ‑bhutukpä tʋʋ'. Wa ‑nʋ yigëegbɩ 'nɩ sä Laagɔ ŋʋʋ‑ bhlä nynä ‑mä ʋ yiwa 'nyɛ nä, wa nii‑ sɔɔ. Wa gbaa‑ vëvëmna nü 'klʋ.

³⁴ Wa ŋëmüë‑ ‑kosu‑düdü. Wa ‑bha ‑jälökwie nëë'. Gu bhlʋwa‑ 'nɩ wa ‑yamä. Wa ‑kä bhä 'tɛtɩ tëvëdä 'nɩ wa gbä bhä 'nɩ ‑zɔbhlɛgbänyʋä mʋʋ bhä gwëë'.

³⁵ 'Ŋwnɩä ‑nänʋä ‑wa ‑kä bhlä Laagɔɔ' pɔlötɛtɛ nä, waa' nyʋä ‑glɔɔ 'kuëë 'nɩ wa niwa‑ 'yi. Nyɩkpaa' ‑nänʋä, wa ‑bhütuwa 'kukusä 'nɩ wa ŋoo bhɔɔ nynä nyɩkpɔ ‑sʋwa ‑lɔɔ nëë'. ‑Ɔnöza bhää? Wa tään bhä nynä ‑mä wa kä kuu‑ nä, wa 'kä 'kuëë glɔɔ ɩyä wa 'kä zëkpëë' 'nägälaa 'ni.

³⁶ Wa nyɩänʋwa bhä, ‑nänʋä wa 'sɛpɩnʋwa bhä ‑gblɩ. Wa ‑gʋä bhä ‑nänʋä ‑abhluëköö' 'nɩ wa pʋwa‑ ‑jɩɩ.

³⁷ Wa 'bhlää‑ bhä ‑nänʋä cɛkwɩɩ'. Wa ‑döö ‑nänʋä ‑sʋkwɩɩ' 'nɩ wa kuu‑. Wa 'bhlää‑ ‑nänʋä ‑jälöö'. ‑Nänʋä ‑bha 'bhlɩ 'kʋ 'nɩ wa mʋ jlä ‑kää. Wa ‑plä bhä 'bhabhlö kwi ‑yä wlükwi. Wa bɔɔ bhä ‑lɩɩ 'fɩɩn. Wa ŋʋwa bhä nyäkälɩɩ' 'nɩ wa klʋwa bhä nyenyisä.

³⁸ ‑Mää 'ylʋzɔɔ nä, waa' bhɔɔ ‑mää 'kʋ ‑ŋwaa. Wa jlä bhä 'popie 'mnö ɩyä 'küküü nëëdë. Wa goo bhä ‑dʋdʋʋ' këfüü 'mnö, 'nɩ wa goo bhä cɛkwɩɩ' këfüü 'mnö.

³⁹ Waa' ‑lefɩɩn, wa ‑kä bhä Laagɔɔ' pɔlötɛtɛ nä, kä Laagɔ ci waa' 'nää. ‑Maa, sä Laagɔ ŋʋʋ‑ bhlä nynä ‑mä ʋ yi nʋ nä, waa' ‑wʋ sɔɔ nii‑.

⁴⁰ ‑Ɔnöza bhää? kä Laagɔ ‑bhobho 'nää 'kädä ‑anyɩa ‑za nä, ɩ ‑ŋwa bhä 'kʋ nynä ‑mä wa yä‑anyɩ 'sɔ 'nii ‑lɔɔ' 'nää däbhloo'.

« Roimhe

Air adhart »

Wycliffe Bible Translators, Inc.

Lean sinn:

Ceanglaichean taic

Sanasan