Bìoball air-loidhne

Eblëënyʋä 10 - GOD - u2

'Cibhinɛ ‑zi 'cibhii 'fɩɩn

¹ Moyizöö' ‑Jläma nä, aa' pana bhɔɔ Laagɔ yëkuu' wälɩɩ wɩa. 'Nää‑ 'gä bhlä ‑mɔɔ 'yikʋ yi nä, aa' ‑zuzu ɩ pana bhlä. 'Ylʋbɔɔ 'fɩɩn 'mnö nä, a ci bhä nynä ‑mä 'cibhi ‑sɔɔ. 'Nɩ 'cibhie ‑säkä ‑säkä sɔɔ bhä 'kɔɔkɔ. 'Nɩ ‑lɔɔ' 'cibhie nä, ɛɛ' ‑lä bhɔɔ 'sɩɩ nyɩkpɔ kpɔlʋä wɩa ‑yä ɔ 'kä Laagɔ dëlü mʋ.

² Kɩ kä bhä sɔɔ ‑kʋ nä, nyɩkpaa 'fɩɩn‑ ‑nözä ‑lɔɔ 'cibhie sɔɔ bhlä nä, waa' nyenyii' ‑gesii yiwa bhä yëku ‑bha 'fɩɔ 'fɩɔ. Nyenyii' gbʋ 'nʋwa ‑lä bhɛ 'wlu 'gbi ‑yä wa 'kä bʋkʋ 'cibhi ‑sä.

³ ‑Mä 'ylʋbɔɔ 'fɩɩn 'mnö nä, kä 'cibhie luënʋwa bhä 'kɔɔkɔ waa' nyenyii.

⁴ ‑Ɔnöza bhɛɛ? ‑Dodobhlüü ‑yä 'bhɔɔwöö 'sɔɔ doluu nä, ʋʋ' ‑lä bhɔɔ 'kɔɔkɔ ‑za nyɩkpɔɔ' nyenyi ‑lɔɔ ‑sä.

⁵ Ɩmɩɩ‑ ‑kä lä 'ŋnö 'nɩ Klisö 'kä bhlä zëkpë 'kʋ yi 'nɩ ɔ cii‑ lä nynä ‑mä, ‑Mɔɔ Laagɔ nä, ‑nn tään ‑wʋ 'cibhi, 'Nɩ ‑nn tään ‑wʋ 'sɩɩ nyɩkpɔɔ' 'nyɛnyɛlʋʋ, ‑Mä 'naa 'yɛkɛɛ 'mɛ ‑n ‑nʋ.

⁶ ‑Nn tään ‑wʋ siesie‑mna, 'Nɩ ‑nn tään ‑wʋ 'cibhisälɩ Nynä ɩ 'kä nyɩkpa nyenyi cie. ‑Nɩnɩ 'fɩɩn nä, ‑n 'nɩɩ ‑wʋ ‑waa.

⁷ 'Nɩ n yi ci nynä ‑mä, 'Ooo Laagɔ‑, ‑n ni ‑amʋ, n yä yi. ‑N ‑kʋ ‑lɔɔ ‑yä n 'kä ‑naa pɔlösaa nʋ. ‑Nɩnɩ 'fɩɩn 'mɩɩ‑ ‑jɩjlɔ lä 'naa ‑za kplɔɔkplɔɔ‑bɔɔgʋʋ 'mnö.

⁸ Klisö cii‑ 'fɩa, ɔ lä ‑nn tään ‑wʋ 'cibhi, 'nɩ ‑nn tään ‑wʋ 'sɩɩ nyɩkpɔɔ' 'nyɛnyɛlʋʋ. ‑Nn tään ‑wʋ siesie‑mna, 'nɩ ‑nn tään ‑wʋ 'cibhisälɩ nynä ɩ 'kä nyɩkpa nyenyi cie. ‑Nɩnɩ 'fɩɩn nä, ‑n 'nɩɩ ‑wʋ ‑waa. ‑Bhlɛ sɔɔ ɩ ‑kʋ 'nɩ ‑Jlämaa ci nynä ‑mä wa ‑sä ‑lɔɔ' 'cibhie.

⁹ 'Nɩ ɔ yi bʋkʋ ci nynä ‑mä, ‑n ni ‑amʋ, n yä yi. ‑N ‑kʋ ‑lɔɔ ‑yä n 'kä ‑naa pɔlösaa nʋ. Kä Klisö ‑sä ylä ‑lɔɔ ‑gɔgɔbhlää' 'cibhie 'nɩ ɔ wlʋa ylä ‑lɛɛ lele.

¹⁰ Zozi Klisö nä, sä Laagɔ ‑waa lä nä, sɔɔ ɔ ‑nʋ lä. Ɔ ‑sä ɔ yëkuu' zëkpë 'ci ‑bhlo 'coo, 'nɩ ‑anyɩa nyenyii' ‑gesii yi lä ‑lɔɔ ‑bha.

¹¹ 'Cibhisänyɔ nä, kɔ 'nynigo lä 'kʋ ylɩɩ 'fɩɩn 'kʋ, 'nɩ ɔ nʋ lä Laagɔ ‑gä. 'Nɩ 'cibhie säbhlo ‑säbhlo ‑lɛɛ, ɛmɛ ɔ sä lä 'sɩɩ ‑mä, ɛɛ' ‑sä ‑wʋ ‑lɔɔ nyenyi.

¹² ‑Mä Klisö nä, ɔ ‑sä 'cibhi 'ci ‑bhlo nyenyii' ‑za 'nɩ ɔ yi lä Laagɔɔ' lüüklä 'kʋ sä kʋ ‑kää mʋ 'kɔɔkɔɔ ‑za.

¹³ ‑Mɔɔ ɔ ‑kʋ 'nɩ ɔ ‑bɛɛ ylä ‑yä, Laagɔ 'kä ɔɔ' ‑zɔhlɛgbänyʋa ɔɔ' 'kʋnämnö‑gwädɛ 'kʋ nʋ.

¹⁴ Nä, ɔ ‑sä ɔ yëku 'cibhi 'kʋ 'ci ‑bhlo, 'nɩ nyɩkpaa 'fɩɩn ɔ döö‑ ‑lä 'kpɔ nä, ɔ ‑kpɔlʋä wɩa 'kɔɔkɔɔ ‑za.

¹⁵ Kplɔɔkplɔɔ‑wugɔɔ ‑bhlü‑anyɩ plɛɛ' 'nɩ ʋ cii‑ nynä ‑mä,

¹⁶ Kwlienyɔ Laagɔ lä, Ylɩɩyɩ kä yɩ plöö‑ nä, N yi n ‑yʋwa 'sɔ pään mɛnʋ 'ŋʋ. 'Naa ‑Jlämaa, n yia waa' pɔlöö 'yi jɩjlä, 'Nɩ n yia 'sɩɩ waa' bhobhowluu 'mnö jɩjlä.

¹⁷ Nn' ‑läyɩɔ waa' nyenyii ‑yä waa' 'focloo plɛ yëku fään.

¹⁸ Naa, nyenyi kä wɛzä ‑cienöɔ nä, waa' tään yɩɔ bʋkʋ nynä ‑mä wa 'kä ɩɩ' 'cibhi ‑sä.

Klisö kään ‑blɔɔ' ‑lɛɛ lolu 'klʋ

¹⁹ Nä bhelie ‑yä bhɛŋwnɩänyɩ‑, Zozii' doluu' ‑bɔɔ 'nɩ ‑a ‑känɩ ylä plɛkʋ nynä ‑mä, ‑a yi mii 'nɩ ‑a yi ylä kplɔɔdaa' kplɔɔkplɔɔda plämʋ.

²⁰ Ɔ blüë‑ yɩ bʋbɔɔdaa' lokwie nëë' 'nɩ ɔ yi ‑blɔɔ' lɛɛ lolu ‑sä. ‑Lɔɔ' ‑blɔɔ 'mʋʋ‑ plöö‑ lä ‑anyɩa 'pʋpʋɛ ‑blɔɔ. Ɩ sä ‑zɔɔ nynä ‑mä ɔɔ' 'yɛkɛɛ kuu 'mnö ‑mɔɔ ‑lɔɔ' ‑blɔɔ ghlää lä.

²¹ Naa, Laagɔɔ' 'gbëa nä, ‑a ‑kä yɩ 'cibhisänyɔ 'kädɔ 'nɩ ɔ ‑kʋa ylä nëkʋ.

²² Nä, ‑anyɩa pɔlöö 'yi kplɔɔ ‑yä pɔlötɛtɛɛ 'mnö, ‑a 'gä Laagɔ yëku 'mɛ. Ɩyä ‑anyɩa 'yɛkɛɛ büdanöɔ yɩ kplɔɔkplɔɔ‑nyuu 'mnö ‑yä ɛ 'kä 'plö wɩa.

²³ Plɛɛ' 'kpɔsʋ‑anyɩ ‑lä ‑yä ‑a 'tɛɛ Laagɔ dë ‑mä Laagɔ nä, sʋʋ ci lä nä, kʋ nʋ sɔɔ 'kɔɔkɔ.

²⁴ A ‑ya wloo ‑wloo 'kʋ ‑yä ‑a 'gä ‑kä ‑wawʋ kään ɩyä ‑a 'gä 'nägägbɩ nʋ.

²⁵ 'Cɔcɩnyʋaa' 'wlu 'wlää ‑jlëa, aa' sa gwë. ‑Nänʋä ‑kʋ ‑lɔɔ 'nɩ waa' yi yɩɔ ‑jlëë' 'nɩ, ɩ plöö yɩ waa' 'bhlɛ. Nä a ‑ya 'ŋʋŋʋ 'tɛtɩɩ ‑mä Kwlienyɔɔ' yiylʋʋ ‑yä 'mɛmɛ.

²⁶ ‑A gä ‑nʋawlɛɛ ‑yi 'nɩ ‑a gä ylä 'kpokposä nyenyi nʋ nä, 'cibhii' yɩɔ bʋkʋ ‑kʋ 'nɩ ɛ 'kä ‑anyɩa nyenyii 'mʋ 'kplɩ.

²⁷ ‑Ŋänöö 'mnö ‑a 'gä ylä kʋ ‑yä ‑a 'gä ylä Laagɔɔ' 'Tite 'kädɛɛ ‑yä ʋʋ' gbʋgblɛɛ' ‑kosuu 'tänyɩɛ ‑bɛɛ. Ʋmʋʋ‑ sie lä nyɩkpaa ‑wa cɩcɩɔ lä nä.

²⁸ A ni Moyizöö' ‑Jlämaa nä, nyɩkpɔ ka 'gbä ‑sä nä, 'nɩ nyɩkpa 'sɔ ‑yä taa kä ‑yi 'nɩ wa kä ‑dläfʋɛ ‑lü nynä ‑mä wa nio‑ nyenyi nʋdä nä, ‑lɔɔ' nyɩkpɔɔ waa' 'pä yɩɔ ɔɔ' ŋäzöplɛ ‑mä kä wa bhlɔɔ 'nɩ ɔ ku.

²⁹ Nä, a ni yia ‑a? Nyɩkpɔɔ' lɔɔ Laagɔ ‑Yowlii' mɛnʋʋ' doluu ‑yä bhlä kpɔlʋä 'nɩ ‑ɔ yi lä bʋkʋ 'nɩ ‑ɔ sʋ lä 'klʋkpää' nä, ‑lɔɔ' nyɩkpɔ yi dlu 'kädʋ plʋʋ. Kɔ 'bhɩsɛ lä Kplɔɔkplɔɔ‑wugɔɔ.

³⁰ ‑Ɛɛɛ, ‑ɔ cii‑ lä nynä ‑mä, ‑amʋʋ‑ sä nyɩkpɔɔ' kpä, 'nɩ sä nyɩkpɔ ‑ŋwa lä 'kʋ nä, ‑amʋʋ‑ plʋnöɔ sɔɔ nä, ‑a ‑yio. 'Nɩ ɔ cii‑ 'sɩɩ nynä ‑mä Kwlienyɔ Laagɔ yi ɔɔ' 'yua 'tite 'ŋʋ.

³¹ Nä, nyɩkpɔ kä ‑Yäyä Laagɔɔ' ‑gesi ‑tʋ nä, kɩ ‑kä lä kpänyɩ ‑ŋänö 'kʋ!

³² Nä aa' bë ‑lä anyɩa' ‑bhɔɔdä 'kʋ. Sä a ‑plä lä gää Laagɔɔ' zëlüü 'mnö nä, kä 'kwlɩ cie'anyɩ bhɩälɩ 'kʋ. ‑Mä sɔɔ ɩ ‑kʋ 'nɩ a ‑bhlää 'kʋ 'sää 'titi.

³³ Wa ŋʋ'anyɩ ‑jlëë', 'nɩ wa 'bhɩsɛ'anyɩ, 'nɩ wa ŋʋ'anyɩ 'kwlɩkabhɩä'. 'Nɩ nyɩkpaa' ‑lʋwa wa klä bhlä sɔɔ nä, a ‑yiwa 'kʋ, 'nɩ a ‑yʋwa 'sɔ plöö‑ bhä.

³⁴ ‑Ɛɛɛ, nyɩkpaa' ‑lʋa wa ŋʋʋ‑ ‑lä ‑jɩɩ' nä, a ‑yʋwa 'sɔ 'kwlɩ ‑bhɩänö'anyɩ. 'Nɩ wa ‑sa'anyɩ anyɩa' kääkäälɩɩ ‑mä ‑pʋpɛ ‑kʋ'anyɩ bhä pleyii. A yi a sɔɔ nynä ‑mä lɩɩ‑ ‑bɛnö'anyɩ lä ‑mɔɔ 'yikʋ nä, ɩmɩɩ‑ ‑kä kpänyɩ gba 'nɩ ‑ɩ yi kʋ 'kɔɔkɔɔ' ‑za.

³⁵ Nä sä a 'tɛɛ‑ lä Laagɔ dë nä, aa' të ‑lä sɔɔ ‑mä ɩ yi gbä 'nɩ a yi bɔɔpälɩ 'kädɩ 'ni.

³⁶ A yibhë ‑bɛɛsä ɩyä a nʋ sä Laagɔ ‑waa lä nä ‑mä sä ʋ ‑kä lä anyɩa' ‑za nä, a yi sɔɔ 'ni.

³⁷ Kɩ ‑jɩjlɔ lä nynä ‑mä, ‑Ɔ ‑too yɩ 'pɛpɛ. ‑Ɔ ‑too yɩ 'pɛpɛ ‑yä ‑ɔ 'gä bhlä yi nä, ɔ 'kä yi. Ɔɔ' ‑lä ‑kä bʋä.

³⁸ Laagɔ lä nyɩkpɔɔ' lɔɔ‑ ‑kä lä 'naa pɔlötɛtɛ nä, Ɔ ‑glö yɩ 'yigëënyɔ nä, Ɔɔ' pɔlötɛtɛ yio 'pʋpʋɛ 'nyɛ. ‑Mä kɔ kä 'ylɩbhɔ‑ nä, ɔɔ' 'mnö nö'ö ‑lä ‑kä mɛmä.

³⁹ Nyɩkpaa' lʋä‑ mʋʋ lä gwëë' ‑yä wa 'kä too nä, wamä ‑aa ‑wʋ plöö‑. Kä ‑a ‑kä lä Laagɔɔ' pɔlötɛtɛ nynä a yi ‑lɔɔ nëë' ‑bha.

« Roimhe

Air adhart »

Wycliffe Bible Translators, Inc.

Lean sinn:

Ceanglaichean taic

Sanasan