Bìoball air-loidhne

Eblëënyʋä 1 - GOD - u2

Laagɔ ‑ghlää ʋ ‑Yowli 'kʋ 'nɩ ʋ ‑soo 'ylʋzɔkʋnyʋä

¹ ‑Mɔɔ ‑gɔgɔbhlää', Laagɔ ‑ghlää ʋʋ' 'plɔfɛtɩnyʋa 'kʋ 'nɩ ʋ ‑soo ‑a tɩtɩä 'sää 'ci bhutukpä. Ʋ ‑sonʋwa nü nü nü 'kʋ.

² ‑Mä bhɩädää' 'tänyɩnɛ ‑a ‑kʋ ylä ‑lää 'mnö nä, Laagɔ nä, ʋ ‑Yowli 'kʋ ʋ ‑ghlää 'nɩ ʋ ‑sonö‑anyɩ lä. Ʋ ‑Yowli 'kʋ ʋ ‑ghlää 'nɩ ʋ wlʋa‑ lä ‑lɩɩ 'fɩɩn‑ ‑kʋ lä nä. 'Nɩ ʋ ‑Yowli 'mɔ ʋ 'nyɛɛ‑ lä 'sɩɩ ‑lɩɩ 'fɩɩn jaa 'kʋ.

³ Laagɔ ‑Yowlinɔ nä, ɔ bhɛɛ‑ Laagɔɔ' 'klʋagba 'fɩɩn ‑a lie lä nä. Kɔ ‑kʋ lä nynä Laagɔ 'titi. 'Nɩ, ɔɔ' ciciwälɩɩ 'päwaa ‑yi 'nɩ a bhɛɛ‑ 'kɔɔnʋ. Ɔ yä 'ylʋzɔkʋnyʋä kpɔlʋä, ɔ ‑yʋwa waa' nyenyii yëku ‑sä. 'Nɩ ɔ ‑kʋ yɩ ‑mɔɔ ŋäkʋ fɛɛn fɛɛn, ‑mɔɔ Laagɔduu'. Ɔ ‑kʋ ‑mɔɔ 'päwö 'kädö ‑kään Laagɔɔ' lüüklä 'kʋ sä.

Laagɔ ‑Yowli zi ‑Laagɔzizii 'fɩɩn 'kʋ

⁴ Laagɔ ‑Yowli nä, kɔ zi ‑Laagɔzizii 'fɩɩn. Ɩmɩɩ‑ ‑kä 'ŋnö 'nɩ Laagɔ ŋʋɔ‑ lä 'ŋnö. 'Ŋnöö' lɩɩ‑ 'ghlü 'nɩ ‑ɩ zi lä ‑Laagɔzizii 'fɩɩn 'ŋnöö nä, ɩmɩ Laagɔ ŋʋɔ‑ lä.

⁵ Laagɔɔ' ‑läzä ʋʋ' ‑zizii' nëëdëë' ‑zuzu soo nynä ‑mä, ‑Zuzunʋ, ‑mɔɔ plöö‑ lä ‑n ‑Yowli. ‑A 'bhää ylä ‑zɩkä ‑lää 'kʋ nä, ‑Amʋʋ‑ ‑gänö‑ö ylä. ‑Ɛɛɛ, Laagɔɔ' ‑läzä ci nynä ‑mä, ‑Laagɔzuzunʋ nä, n yi ʋ 'Bä 'plö 'nɩ ʋ yi n ‑Yowli 'plö.

⁶ 'Nɩ bʋkʋ, Laagɔ ‑lä lä ʋʋ' Tɛɛtɛɛ‑yuo ‑mää 'ylʋzɔɔ nä, kʋ cii, ʋ lä ‑Laagɔzizii 'fɩɩn bʋbɔnöɔ.

⁷ 'Nɩ ‑Laagɔzizii' ‑za nä, kʋ cii‑ nynä ‑mä, Kʋ nʋ ‑Laagɔzizii ‑vʋvɔlʋ 'kʋ, 'Nɩ ʋ ‑nʋ ʋʋ' ‑gänʋnyʋä ŋnäŋnä ‑kosu 'kʋ.

⁸ 'Nɩ ʋ cii‑ 'sɩɩ ʋ ‑Yowlii' ‑za, ʋ lä 'Oo Laagɔ‑! ‑Naa 'leyi‑këkpëa nä, ka ‑kʋ lä 'kɔɔkɔɔ ‑za. ‑Naa 'yigëgbɩɩ nä, Ɩmɩɩ‑ plöö‑ lä ‑naa 'leyi ‑kpämä.

⁹ 'Yigëëgbɩɩ 'mɩ ‑n ‑waa lä, Bʋkʋ 'nɩ, ‑n ‑yi 'nɩ ‑n ‑zɔɔ lä nyenyi. Ɩ ‑kä 'ŋnö 'nɩ, 'oo! ‑mɔɔ plöö‑ lä Laagɔ nä, Laagɔ yä‑ä ‑sä, 'Nɩ ‑n ‑liesɩɩ 'fɩɩn nëëdë nä, ʋ ŋʋʋ‑ ‑naa dä 'Nɩ ʋ yi‑i ‑jäkaa' 'kpüü 'wlu bʋä.

¹⁰ Ʋ cii‑ 'sɩɩ nynä ‑mä, 'Oo! Kwlienyɔ‑, ‑bhɔɔda ‑lɔɔ ‑n wlʋa lä 'kɔɔnʋ! 'Nɩ Laagɔduu' ‑lɩɩ 'fɩɩn ‑kʋ lä ‑mɔɔ nä, ‑Naa wlɩɩ' nʋnʋ‑lebhe lä.

¹¹ 'Nɩ ‑nɩnɩ 'fɩɩn nä, ɩ ‑kä bhɩädä ‑mä ‑mɔɔ, Kä ‑n ‑kʋ lä 'kɔɔkɔɔ ‑za. Ɩ yi 'yikʋ bhɩä nynä 'kotu,

¹² 'Nɩ ‑n yii gügë nynä lokwi. Ɩ yi 'cɩcɩnöɔ nynä 'kwëti. ‑Mä ‑mɔɔ nä, Sä ‑n ‑kʋ lä nä, sɔɔ ‑n 'gä lä 'kɔɔkɔ kʋ. 'Nɩ ‑naa 'ylʋbɔɔ' ‑wʋ 'wlu koo dä ‑kä.

¹³ ‑Laagɔzuzuu' 'cësä‑ Laagɔ yä bhɛ soo nynä ‑mä, ‑Naa ‑zɔbhlɛgbänyʋa nä, N 'kwa ‑naa 'kʋ nämnö ‑gwädɛ 'kʋ nʋ ‑mä, ‑N kʋ 'naa lüüklä 'kʋ sää?

¹⁴ ‑Laagɔzizii nä, Laagɔ‑ ɩɩ' nʋ bhä ‑gä ‑a? Kä Laagɔ lobhui ‑yä nyɩkpaa' ‑lʋa 'gä lä ʋʋ' puëlɩɩ jaa 'kʋ lüü nä, ɩ 'kwa klää.

« Roimhe

Air adhart »

Wycliffe Bible Translators, Inc.

Lean sinn:

Ceanglaichean taic

Sanasan