Bìoball air-loidhne

Kolɔsʋ‑dunyʋä 4 - GOD - u2

¹ Anyɩmɔɔ‑ ‑kä lä geyuë nä, saa‑ gëë‑ lä 'yi nä, sɔɔ a la ‑yʋwa ‑sɔ nää. A yibhë sɔɔ nynä ‑mä, anyɩ ‑mä 'sɩɩ a ‑kä käänyɔ 'nɩ ɔ ‑kʋ mɔɔ Laagɔduu'.

² Aa' ŋɔɔ ‑lä ‑mä a bhibhie 'kɔɔkɔ ‑yä a bhään 'sɩɩ Laagɔ.

³ A bhibhie 'sɩɩ ‑anyɩa 'wlu ‑yä Laagɔ kään ‑anyɩa ciciwälɩɩ 'gbë ‑yä Klisöö' wälɩɩ‑ 'fɩɩn ‑ɩ ‑zizio bhlä 'kʋ nä, n 'kɩ nyɩkpa ‑sää ‑mä ɩɩ' ‑zä n ‑kʋ ‑lä ‑jɩɩ'.

⁴ Nä a bhibhie 'naa 'wlu ‑yä sä n yii bhlä ‑sää nä, n 'kɩ sɔɔ ‑sää wɩa.

⁵ Nyɩkpaa' ‑lʋa ‑wʋ lä 'cɔcɩnyʋä plöö‑ nä, a kwa 'yikʋ ‑kʋ nä, a nämnö dɩgälɩɩ'. 'Tänyɩnɛ Laagɔ nyɩ'anyɩ ylä nä, a kpelionɩɛ 'kʋ ‑yä a nämnö 'fikee 'mnö.

⁶ Ciciwälɩɩ' ‑lɩɩ ‑ɩ bha'anyɩ lä nëë' nä, ɩ bhɛɛ 'nää ‑yä ɩ mɛmä 'nyukwlii. A yibhë nyɩkpɔ nyɩkpɔɔ' 'kʋ ŋoo sä.

Bhlüüdaa' bhää‑wälɩ

⁷ Nä, ‑wawa‑bhelio Tisikö ‑ɔ nʋ lä Kwlienyɔɔ' lebhee 'nägäsä nä, ɔ ‑glö 'naa 'kʋnämʋnyɔ, ɔ yi'anyɩ 'naa yëkuu' 'dö 'fɩɩn ‑sää.

⁸ Kä n ‑sɔɔ su yëku 'nɩ n lobhuo lä anyɩ yëku ‑yä sɩ plö lä ‑mää 'kʋ ‑anyɩ ‑za nä, ɔ 'kanyɩ sɔɔ 'dö ‑sää ‑yä ɔ 'kanyɩ 'tɛtɩɩ 'ŋʋ.

⁹ ‑Wawa‑bhelio Onezimö nä, ‑a 'tɛnöɔ‑ dë, 'nɩ ɔ plöö‑ 'sɩɩ a 'bhuyu. Nä Tisikö ‑yɔsɔ yi'anyɩ ‑mɔɔ yëku yi 'nɩ sɩ plö lä ‑mää 'kʋ nä, wa yi'anyɩ sɔɔ 'dö ‑sää.

¹⁰ Bhelio n ‑yɔsɔ ‑kʋ lä ‑mää ‑jɩɩ' nä, Alisötakö, ɔ lɔ bhänö'anyɩ. Banabasö, ɔ bheli‑ Makö, ɔ lɔ bhänö'anyɩ 'sɩɩ. Maköö' ‑za nä, sä a 'kä lä nʋ nä, n ya'anyɩ wɛzä sɔɔ soo. Kɔ yi'anyɩ lä ‑mɔɔ yëku nä, a wluo 'nägäsä 'kʋ.

¹¹ Bheli Zozii, wa bhizie lä Zutusö nä, ɔ lɔ bhänö'anyɩ 'sɩɩ. Nyɩkpanä taa, wamää‑ plöö‑ lä 'Zufʋnyʋää' lʋä ‑wa ‑yä ‑amʋ 'sɔ nʋʋ lä lebhe 'kʋ Laagɔɔ' 'Leyiduu' ‑za nä. Wa ‑glö nyɩkpaa' lʋä ‑wa ŋʋ'ʋ lä 'sää 'titi 'tɛtɩɩ' nä.

¹² Zozi Klisöö' ‑gänʋnyɔ Epaflasö, ‑ɔ plöö‑ lä 'sɩɩ a 'bhuyuo nä, ɔ lɔ bhänö'anyɩ. Bhelinɔ nä, kɔ bhibhie lä 'kɔɔkɔ 'tɛtɩsä anyɩa' 'wlu ‑yä a 'kä ‑glɛɛ ‑yä a 'kä Laagɔɔ' pɔlösaa 'fɩɩn yibhë. Ɩyä anyɩa' pɔlötɛtɛɛ 'kä 'nägäsä sä klä.

¹³ ‑Ɛɛɛ, n yi Epaflasöö' ‑za ‑dläfʋɛ lü. Ɔ bhlää kpänyɩ 'kʋ anyɩa' ‑za, 'nɩ Lawodisee‑duu 'cɔcɩnyʋa ‑yä Yielapolisö‑duu' 'cɔcɩnyʋa, ɔ bhlää 'sɩɩ kpänyɩ waa' ‑za 'kʋ.

¹⁴ Bhelio ‑ɔ plöö‑ lä ‑dɔtɔɔ nä, bheli‑ Lukö, ɔ ‑yä bheli‑ Demasö 'sɔ wa bhänö'anyɩ 'sɩɩ.

¹⁵ Bhelia ‑yä bhɛŋwnɩa ‑wa ‑kʋ lä Lawodiseeduu' nä, a sonʋwa nynä ‑mä ‑a bhänʋwa. Nɛfaa ‑yä 'cɔcɩnyʋa 'fɩɩn ‑wa 'wlää lä ɔɔ' 'gbëa 'mnö 'wlu nä, a sonʋwa 'sɩɩ nynä ‑mä ‑a bhänʋwa.

¹⁶ A kä 'bɔɔgʋnʋ ‑zɛɛ nä, a nʋ saa 'fɩɩn ‑yä ʋ zɛnönöɔ Lawodiseeduu' 'cɔcɩɛ 'mnö. 'Bɔɔgʋ yi 'sɩɩ Lawodiseeduu' 'cɔcɩnyʋa yëku ‑bha 'nɩ ʋ yi'anyɩ ‑mɔɔ yëku yi. Wa kʋʋ ‑mɔɔ ‑lä nä, anyɩ ‑mä 'sɩɩ, a zɛnʋ.

¹⁷ A soo Asipʋ nynä ‑tëbhuu' ‑lʋʋ Kwlienyɔ nyɩɔ‑ lä nä, ɔ wluu 'nägäsä 'kʋ.

¹⁸ Amʋ Pɔlʋ, ‑amʋ 'titii‑ jɩjlä lä 'klünö 'bɔɔgʋnʋ 'mnö. A luë 'kɔɔkɔ 'naa dä 'kʋ nynä n ‑kʋ ‑mää ‑jɩɩ'. Laagɔɔ' 'nyupälɩɩ ŋënö'anyɩ 'kʋ!

« Roimhe

Air adhart »

Wycliffe Bible Translators, Inc.

Lean sinn:

Ceanglaichean taic

Sanasan