Bìoball air-loidhne

Kolɔsʋ‑dunyʋä 3 - GOD - u2

¹ A yä ylä 'kuëë glɔɔ 'nɩ a yä ylä zëkpë 'kʋ yi nä, ‑mɔɔ Laagɔduu', ‑mɔɔ ‑gbäsɩɩ Klisö ‑kʋ lä Laagɔɔ' lüüklä 'kʋ sä nä, ‑mɔɔ' kʋkʋlɩɩ 'mɩ a la tään yɩ.

² ‑Mää 'ylʋzɔɔ' kʋkʋlɩɩ' gbʋ 'nä 'bhlanyɩ ‑lä, ‑mä ‑mɔɔ ŋɔkʋʋ' kʋkʋlɩɩ' gbʋʋ ‑lä 'bhlanyɩ.

³ ‑Ɔnöza bhää? A yä 'ku, 'nɩ anyɩa' zëkpëa ‑yä Zozi Klisö 'sɔ ‑yä Laagɔ 'mnö zizio.

⁴ Nä Klisö ‑ɔ plöö‑ lä anyɩa' zëkpëa nä ɔ kä yɩ 'kʋ ‑ghlä nä, a ‑yɔsɔ yi 'kʋ ghlä 'nɩ, 'klʋagba ɔ ‑kʋ lä 'mnö nä, a yia 'sɩɩ 'mnö kʋmʋ.

Tɛɛtɛɛ' zëkpëa ‑yä zëkpü ‑lëlëa

⁵ Nä, kʋkʋsa 'fɩɩn a ‑kʋ 'nɩ ‑ɔ plöö‑ lä ‑mää zëkpëkʋ kʋkʋsaa nä, a gbä ‑yä sɔɔ 'ku yɩ! ‑Ɔ plöö‑ lä dëbësaa' näälɩɩ ‑yä plʋ ‑pläsaa' näälɩɩ nä, ‑ɔ plöö‑ lä zëkpënää' ‑wawʋʋ nä, 'nɩ ‑ɔ plöö‑ lä leylüü' ‑waawʋ nyɩkpa ‑kä 'nɩ ‑ʋ ‑kʋ lä nynä zlüü' bʋbɔlɩɩ nä, a gbä ‑yä ʋ 'ku yɩ!

⁶ ‑Nɩnɩ 'fɩɩn 'mɩɩ‑ ‑kä lä 'ŋnö 'nɩ ‑wa cɩcɩɔ lä Laagɔ 'yii nä, Laagɔɔ' gbʋgblɛɛ yinʋwa lä.

⁷ 'Tänyɩɩ a ‑kʋ bhlä ‑lätee nyenyii 'mnö nä, sɔɔ a nää bhlä.

⁸ ‑Mä 'tänyɩnɛ 'mnö nä, a ‑taa yɩ ‑lɔɔ' zëkpëa 'yi! Ggbʋgblɛɛ, dëbëa, ‑abhlɛɛ, nyɩkpaa' kpʋkpɔlɩɩ, ɩyä 'klʋtɛtʋ‑wälɩɩ' cilɩɩ nä, a ‑tanɩ yɩ 'yi!

⁹ Anyɩa' tɛɛtɛɛdää' ‑zëkpëa ‑yä aa' 'mnö nʋnʋgbɩɩ 'fɩɩn, anyɩmɔɔ‑ yä ylä ɩɩ' kuu 'mʋ ‑sä nä, aa' mna ‑mna ‑läyɩɔ ‑kpläkplä!

¹⁰ Kuu' ‑lɛɛ lolu‑ a plä ylä 'mʋ nä, a ‑glö yɩ nyɩkpaa' ‑lɛɛ loluë. Laagɔ yi gbä 'nɩ a yi 'cɩcɩ 'nɩ yiu yibhë wɩa.

¹¹ Ɩɩ' yɩɔ plöö‑ nynä ‑mä nyɩkpɔnɔ plöö‑ 'Glɛköyu 'nɩ ‑nɔnɔ plöö‑ 'Zufʋyu. Ɩɩ' yɩɔ 'sɩɩ plöö‑ nynä ‑nɔnɔ döö‑ 'kʋ 'nɩ ‑nɔnɔɔ' ‑wʋ 'kʋ döö‑. Ɩɩ' yɩɔ plöö‑ nynä ‑mä ‑nɔnɔ plöö‑ 'klää ‑bhlüdü 'kʋ nyɩkpɔ, 'nɩ ‑nɔnɔ plöö‑ 'jekpiduu' nyɩkpɔ. Ɩɩ' yɩɔ plöö‑ nynä ‑mä ‑nɔnɔ plöö‑ geyu 'nɩ ‑nɔnɔɔ' ‑wʋ geyu plöö‑. Kɩ plöö‑ ylä nynä ‑mä Klisö 'mɔɔ‑ plöö‑ wälɩɩ 'fɩɩn, 'nɩ ɔ ‑kʋ lä 'sɩɩ nyɩkpa 'fɩɩn 'mnö.

¹² Nä, a ‑glö yɩ Laagɔɔ' nyɩkpa. Kä Laagɔ ‑sa'anyɩ 'nɩ ʋ ‑wamänö'anyɩ lä. Nä a kään ŋäzö pleyii, ɩyä a namä plɛkʋ. Aa' täkpɔ ‑lä. A wɔtɔmä plɛ ‑yä, a yibhë ‑bɛɛsä.

¹³ Plɛkʋʋ' si'anyɩ ‑lä 'flɛ a ‑liesɩɩ' ‑za ‑mä a cie ‑cie. Kä anyɩa' nëëdëë' nyɩkpɔ kä bhä ŋʋʋ‑ nynä ‑mä ɔ 'kä ɔ ‑lie wälɩklë yëku fä nä, ɔ cienöɔ. Sä Klwienyɔɔ ‑cienö'anyɩ lä nä, anyɩ ‑mä 'sɩɩ, a cie sɔɔ a ‑liesɩ.

¹⁴ ‑Ɛɛɛ, ɩ ‑ŋwa sää 'titi 'kʋ nynä ‑mä a kään ‑wawʋ. ‑Wawʋ nä, ʋmʋʋ‑ 'jɛnyɩ lä nyɩkpa 'sää 'nägäsä 'titi.

¹⁵ Nä Kwlienyɔɔ' 'kʋ wɔtɔlɩɩ 'tie anyɩa' pɔlö ‑yä ɩ wɔtɔ 'kʋ! ‑Lɔɔ' 'kʋ wɔtɔlɩɩ 'mnö, Klisö lanö'anyɩ lä ‑yä a 'kä ‑bhlo 'plö. Ɩyä nyɩkpɔ ka'anyɩ 'nää ‑nʋ nä, a yibhë ‑lɔɔ' 'nää.

¹⁶ Klisöö' 'Nägädöö ‑yä ɩɩ' 'mnö leylüü 'sɔ kʋ'anyɩ pleyii. A 'bhlü dɩgälɩ 'kʋ ‑yä a cɩa ‑cɩa ‑yä a 'ŋʋ ‑ŋʋʋ dɩgälɩɩ'. A bhlɩ ‑laagɔɔ' lɔlɔ. A bhlɩ ‑Laagɔlɩ. Bhlɩ bhlɩlɩɩ 'fɩɩn Kplɔɔkplɔɔ‑wugɔɔ ka'anyɩ lä pleyi 'pä nä, a bhlɩɩ ‑yä a fään Laagɔ 'ŋnu.

¹⁷ Saa 'fɩɩn a yi lä nʋ nä, ciciwälɩɩ' ‑o, nʋnʋgbɩɩ' ‑o, a nʋnɩ Kwlienyɔ Zozii' 'ŋnöö 'mnö. A ghlänöɔ 'kʋ ‑yä a bhään Laagɔ.

'Sää 'cɔcɩnyʋä 'kä lä nää

¹⁸ 'Ŋwnɩänyɩ‑, a ‑lä a yëku ‑dʋdʋkʋ a ‑nyëtie 'yikʋ ‑mä, sɔɔ ɩ ‑ŋwa lä 'kʋ nynä ɩ nʋɔ Kwlienyɔɔ 'mnö.

¹⁹ 'Wlienyɩ‑, nyɩkpɔ nyɩkpɔ nä, ɔ wamä ɔ 'ŋnɔ ‑mä, aa' kamä lä waa' ‑za yëkuu.

²⁰ 'Yuënyɩ‑, anyɩa' nʋnʋgbɩɩ 'fɩɩn 'mnö nä, a 'ŋʋ a 'bäsɩ 'klʋkpä ‑mä, 'klünö 'mɩ Kwlienyɔɔ ‑waa lä.

²¹ 'Bäsɩnyɩ‑, a 'nä plaa ‑lä anyɩa' 'yua gbʋgblɛɛ' ‑mä, plɛɛ' kwa ‑kä 'kpɔsɔ.

²² Geyuënyɩ‑, saa 'fɩɩn a yi lä ‑mää 'ylʋzɔɔ nʋ nä, ɩmɩ 'mnö, a 'ŋʋ anyɩa' käänyʋä 'klʋkpää. Ɩɩ' plö ‑lä nynä ‑mä wa kä ‑lɔɔ ‑kʋ nä, ‑lɔɔ tɛɛ a 'kwa ‑gä nʋ. Ɩɩ' kä ‑kä kʋ nynä ‑mä wa ka'anyɩ wamä nä, ɩɩ' ‑zä a nʋ sɔɔ. ‑Mä sä a ŋʋ lä Kwlienyɔ 'klʋkpää nä, ɩ kään 'ŋnö ‑yä, ‑mɔɔ anyɩa' pleyii' a 'ŋʋwa 'klʋkpää'.

²³ Lebhee' 'cënänä a yi lä nʋ nä, anyɩa' pleyi kplɔɔ ‑yä a nʋɛ nynä ‑n ‑näsä Kwlienyɔ‑ ‑gä a nʋɛ ‑mä nyɩkpaa ‑gä aa' nʋɛ ‑bhɔɔ lä nä.

²⁴ 'Nɩ a ‑yi sɔɔ nynä ‑mä Kwlienyɔ yi ɔɔ' jaa 'mnö ‑sä 'nɩ ɔ yi'anyɩ bɔɔ 'pä. Kwlienyɔɔ ‑ɔ plöö‑ lä Klisö nä, ɔmɔ a nʋ lä ‑gä.

²⁵ ‑Mä nyɩkpɔɔ' lɔɔ‑ yi lä gbenyenyi nʋ nä, ɔ yi ɩɩ' dluu' plʋlɩɩ 'ni. 'Nɩ Laagɔ nä, ʋʋ' gbäzö ‑wʋ 'mʋ.

« Roimhe

Air adhart »

Wycliffe Bible Translators, Inc.

Lean sinn:

Ceanglaichean taic

Sanasan