Bìoball air-loidhne

Kolɔsʋ‑dunyʋä 2 - GOD - u2

¹ N ‑waa nynä ‑mä a yibhë sɔɔ nynä 'kʋ bhläälɩ 'kädɩ‑ n bhlää lä 'kʋ anyɩa' ‑za. N bhlää 'sɩɩ Lawodisee‑duu' 'lëkpëa 'mnö 'cɔcɩnyʋaa' ‑za 'kʋ. 'Nɩ 'cɔcɩnyʋää' ‑nänʋä ‑kʋ ‑lɔɔ 'nɩ wa nö'ö ‑läzä 'yi 'ni, 'nɩ n bhlää 'sɩɩ waa' ‑za 'kʋ ‑yä

² wa 'kä ‑mɔɔ waa' pɔlöö 'yii 'tɛtɩ 'ni ‑yä wa 'kä ‑wawʋʋ 'mnö 'jɛnyɩ. Wa 'kä 'fike 'titi kään ‑yä Klisöö' yëkuu' wälɩɩ Laagɔ ‑zizie bhlä 'kʋ nä, wa 'kɩ yibhë.

³ 'Nää 'fɩɩn ‑a ‑kʋ lä dɩgälɩ ‑yä 'fike 'sɔ 'mnö nä, Klisö 'mnö a 'pää‑ lä gwë.

⁴ Kä n sonö'anyɩ lä 'klünö ‑yä nyɩkpɔɔ' kä ‑kä nëë' mɛnɔ 'mnö ghlää ‑yä ɔɔ' ka'anyɩ ‑kä 'nyigë.

⁵ ‑Ɛɛɛ, nn' ‑wʋ ‑lɔɔ ‑kʋ 'zaazɩ ‑mä, 'wugɔɔ 'mnö nä, n ‑kʋ'anyɩ yëku. 'Nɩ n ni ylä 'yi nynä ‑mä, anyɩa' pɔlötɛtɛɛ ‑yä Klisö 'mnö sä klä 'nɩ anyɩa' nʋnʋsaa bhlü yɩ 'sɩɩ ‑blɔɔ nä, kɩ ŋʋ ylä 'naa pleyi ‑jäkä.

Klisö ‑bhlo 'coo 'mɔɔ‑ nyɛ lä zëkpë 'titi

⁶ Nä a yä ylä Zozi Klisö 'kʋ ŋoo nynä ɔ plöö‑ anyɩa' Kwlienyɔ nä, a ‑yɔsɔ 'jɛnyɩ yɩ.

⁷ A kʋɔ 'mnö ‑yä a 'ŋʋ sikplii, ɩyä a 'slänöɔ anyɩa' zëkpëa 'kʋ. Sä wa cɩa'anyɩ lä nä, a 'gë sɔɔ 'kʋ ‑yä anyɩa' pɔlötɛtɛɛ 'kä 'nägäsä sä klä. Ɩyä a bhään 'sɩɩ Laagɔ kpänyɩ kpänyɩ.

⁸ A gblɩmä ‑yä nyɩkpɔɔ' kä ‑mää 'ylʋzɔɔ' dɩgälɩɩ cɩalɩɩ ‑yä ‑kpläkpla 'sɔ 'mnö ghlää ‑yä ɔɔ' ka'anyɩ 'nyigë. ‑Mää 'ylʋzɔɔ' nyɩkpaa ‑jlämaa, ɩyä ‑mɔɔ ‑zizinyenyii' 'tɛtɩɩ, ɩmɩ wa ‑kä 'nɩ wa nʋ lä ‑lɔɔ ‑lɩɩ, ‑mä Klisö 'kʋ waa' ghlää ‑wʋ.

⁹ Laagɔ nä, kä wa 'ninʋ ylä Klisö 'mnö 'bhë 'kʋ 'nɩ ʋ ‑kʋɔ ylä 'yɛkɛɛ.

¹⁰ 'Nɩ Klisönɔ 'mnö a 'nii‑ ylä 'sɩɩ ‑lɩɩ 'fɩɩn. Ɔmɔɔ‑ 'kämä lä ‑zizii 'fɩɩn‑ ‑kä lä 'kämälɩɩ' 'päwaa nä, ɩyä ‑mɔɔ 'päwö‑kää ‑zizii 'fɩɩn.

¹¹ A ‑yɔsɔ 'jɛnyɩlɩɩ 'mnö ‑mɔɔ a ‑ghlää 'nɩ a döö‑ lä 'kʋ. Nyɩkpaa' wlɩɩ‑ nö'anyɩ ‑wʋ 'kʋ döö‑ ‑mä Klisö 'titi 'mɔɔ‑ döö'anyɩ lä 'kʋ. 'Yɛkɛɛ‑ gbä bhlä 'nɩ a mʋʋ bhlä gbenyenyii 'mnö nä, Klisö yɛ ‑lɔɔ ‑sä.

¹² 'Tänyɩ wa mnaa'anyɩ lä 'nyuu 'mnö 'kʋ anyɩa' 'nyuu 'wlu‑ŋʋdaa nä, kɩ pana‑ lä nynä ‑mä a ‑yä Klisö kä wa ŋʋʋ'anyɩ glu 'nɩ a ‑yɔsɔ yi lä 'kuëë glɔɔ. ‑Ɔnöza bhää? Laagɔɔ' 'päwa ‑a ‑gbä 'nɩ ɔ ‑glɔɔ lä 'kuëë nä, anyɩ, a ‑kä aa' pɔlötɛtɛ.

¹³ Gbenyenyii' 'pɛlʋʋ nä, a yä bhɛ 'ku. 'Nɩ bʋkʋ ‑Jlämaa' pɛlʋʋ 'mnö nä, aa' bhɔɔ 'kʋ döö‑. ‑Mä ‑pɛpɛɛ nä, a ‑yä Klisö 'sɔ Laagɔ ya'anyɩ bʋkʋ zëkpë 'kʋ ‑lä. Ɔ ‑cie yɩ ‑anyɩa nyenyii 'fɩɩn.

¹⁴ Sɩ ‑jɩjlɔ bhlä ‑anyɩa ‑za nynä ‑mä gbʋ yä‑anyɩ klä nä, ɩɩ' bhɔɔ ‑anyɩa ‑za nää. Ɩ ‑kä 'ŋnö nä, kä Laagɔ 'tütlü‑ yɩ ‑lɔɔ' wälɩɩ 'fɩɩn 'kʋ. Ʋ ‑bhoo yɩ ‑lɔɔ' wälɩɩ 'fɩɩn 'kusuu yi 'nɩ ɩ yi ‑lɔɔ ‑bha.

¹⁵ ‑Zizinyenyii 'fɩɩn ‑ɩ 'kämä bhlä 'nɩ ‑ɩ ‑kä bhlä 'tɛtɩɩ nä, Klisöö' 'kusuu yii 'kwiee 'mnö kä Laagɔ ‑sɩɩ ɩɩ' 'päpälɩɩ 'fɩɩn wlɩɩ'. 'Nɩ 'kʋ ‑gboolɩɩ 'mnö ɔ ‑lɩɩ ‑jlëë' 'klʋ ‑yä ɔ 'kä pana nynä ‑mä ɔ yɩɩ ‑sɩä.

¹⁶ Nä a kä ‑lɔɔ ‑kʋ nä, anyɩa' ‑lʋʋ a lü lä 'nɩ ‑lʋʋ a mnä lä nä, a gbä ‑yä nyɩkpɔɔ' fa'anyɩ ‑lä ʋʋ' ‑za nëkʋ. Nyɩkpɔ 'nä 'ŋʋ ‑lä ‑jlämä sä nynä ‑mä, ‑glɩsɩɩsɩnɛ 'mɛ a ‑kä 'nɩ a 'kä 'ni. ‑Ɔ! 'Cʋnʋ 'mʋ a ‑kä 'nɩ a 'kä bʋbɔ, ‑ɔ! Sabaa‑gwlɛylʋʋ 'mʋ a ‑kä 'nɩ a 'kä ‑gwlɛɛ.

¹⁷ ‑Nɩnɩ 'fɩɩn‑ nʋɔ bhlä tɛɛ nä, ɩ ‑glö bhä ‑zuzu. ‑Mä ɩɩ' ‑nʋawlɛɛ 'mɛɛ plöö‑ lä Klisö.

¹⁸ Nyɩkpɔɔ' gbä lä 'nɩ a 'kä 'kʋzilɩɩ' ‑blɔɔ mnɔ. ‑Wa lä lä wa yëku ‑dʋdʋkʋ 'nɩ ‑wa bʋbɔ lä ‑zizii nä, wamä n pä lä plɛkʋ 'nɩ n ci lä. Sä wa ghlä lä nä, sɔɔ‑ känʋwa lä kpänyɩ gbʋ. ‑Lɔɔ' nyɩkpa‑cëa nä, kwa bhobho lä kpänyɩ nyɩkpasä. 'Nɩ ‑lɔɔ' 'klüü wa ‑kä lä nä, wa täkpɔnɩ 'mʋ.

¹⁹ Klisö‑ plöö‑ lä 'wluu nä, wa ‑yɔsɔɔ ‑wʋ 'jɛnyɩ‑. ‑Bhlɛ 'wluu plöö‑ lä 'yɛkɛɛ 'cifi, 'nɩ ʋʋ' ‑bɔɔ 'nɩ ɛ ni lä lülülʋʋ, 'nɩ 'yɛkɛɛ gënödöö' telii' ‑bɔɔ 'nɩ 'yɛkɛɛ nëmüü ‑kä lä sä 'nɩ ɩ bhʋä lä sä Laagɔ ylä lä nä.

Kä 'cɔcɩnyɔ kuu‑ 'nɩ ɔ plöö‑ ylä Klisöö' lɔɔ

²⁰ Anyɩ nä, a ‑yä Klisö 'sɔ yä dä ‑bhloo' 'kuu. 'Nɩ ‑lɔɔ 'kwie nä, ɛ yä gbä 'nɩ a yä 'ylʋzɔɔ' ‑zizii' 'tɛtɩɩ sɩä. 'Nɩ a nää nynä nyɩkpaa' lʋä 'kɔɔnʋ 'mnö 'tɛtɩɩ 'tie ‑lätee!

²¹ Wa sonö‑ö nynä ‑mä, ‑naa 'bhlü ‑lä ‑nʋnʋ 'kʋ! ‑Naa yla lä ‑nʋnʋ nëë'! ‑Naa 'taa lä ‑nʋnʋ wlɩ!

²² ‑Lɔɔ ‑lɩyɩ 'fɩɩn nä, kɩ ‑kʋ lä ‑yä nyɩkpa 'kɩ nʋ ‑yä ɩ 'kä 'kʋ bhɩä. Nyɩkpaa‑ cɩa lä ‑lɔɔ' 'klüü, 'nɩ ‑wa ŋʋ lä sɔɔ' ‑jlämöö sä.

²³ Wa kä nyɩkpɔ soo nynä ‑mä ɔ bʋbɔ nä, 'nɩ wa kɔ soo nynä ‑mä ɔ 'nä täkpɔ lä 'sɩɩ nä, 'nɩ wa kɔ soo nynä ‑mä ɔ 'ŋʋ ɔ yëku 'yɛkɛɛ kpʋkpɔ‑kälöö' nä, ‑lɔɔ' ‑jlämaa wa ŋʋ lä sä nä, a dɩdɛ 'fike ‑mä, ‑ɔɔ ‑wʋ 'fike. Aa ‑wʋ gba ‑kä, a ‑glö 'yɛkɛɛ 'nää kʋlɩɩ' ‑jlämä.

« Roimhe

Air adhart »

Wycliffe Bible Translators, Inc.

Lean sinn:

Ceanglaichean taic

Sanasan