Bìoball air-loidhne

Kolɔsʋ‑dunyʋä 1 - GOD - u2

Bhäälɩ

¹ ‑Amʋ Pɔlʋ Laagɔ ŋoo‑ lä 'nɩ ‑ɔ 'plöö‑ lä Zozi Klisöö' lobho lobhonyɔɔ' nä, n ‑yä ‑anyɩa bhelio Timotee 'sɔ, ‑anyɩ jɩjlä'anyɩ lä 'bɔɔgʋnʋ.

² Anyɩmɔɔ‑ plöö‑ lä 'cɔcɩnyʋa 'nɩ ‑ɔ ‑kä lä Zozi Klisöö' pɔlötɛtɛ, 'nɩ ‑ɔ ‑kʋ lä ‑mɔɔ Kolɔsʋduu' nä, ‑a 'Bä Laagɔɔ' 'nyupälɩɩ ‑yä ʋʋ 'kʋ wɔtɔlɩɩ ŋënö'anyɩ 'kʋ.

Pɔlʋ bhää Laagɔ ʋʋ' 'Nägädöö' ‑za

³ Laagɔ, ‑anyɩa Kwlienyɔɔ Zozi Klisö ɔ 'Bä, ‑a gä 'kɔɔkɔ anyɩa ‑za bhibhiedä ‑kʋ nä, kä ‑a bhänöɔ.

⁴ ‑Ɛɛɛ! ‑A yä anyɩa' yëkuu' 'dö 'nu. Wlä ka ‑kä Zozi Klisöö' pɔlötɛtɛɛ, 'nɩ a ‑yi 'nɩ a ‑kä 'sɩɩ 'cɔcɩnyʋa 'fɩɩn ‑wawʋ.

⁵ ‑Nʋawlɛɛ ‑yä 'Nägädöö a nuu‑ lä tɛɛ nä, ɩmɩ anyɩa' pɔlötɛtɛɛ ‑yä anyɩa' ‑wawʋʋ' 'sɔ ‑slä lä gwë. Ɩ ‑kä 'ŋnö nä, sä Laagɔ ŋʋʋ‑ lä anyɩa' ‑zä ‑mɔɔ Laagɔduu nä, ka ‑kään sɔɔ plɛkʋ.

⁶ 'Nɩ 'Nägädönö a nuu‑ lä nä, kɩ mʋ 'ylʋzɔɔ' dää 'fɩɩn 'nɩ ɩ tlʋ 'bhü. Sɩ plöö‑ lä 'ylʋzɔɔ dää 'fɩɩn 'kʋ nä, sɔɔ ‑säkä ‑säkä ɩ plö'anyɩ lä nëëdë 'kʋ. A nuu‑ nynä ‑mä ‑kä Laagɔ ‑kä plɛkʋmɛnɔ, 'nɩ ‑lɔɔ' plɛkʋmɛnɔɔ a yä yɩ ʋʋ' ‑nʋawlɛɛ 'ni.

⁷ ‑Anyɩa ‑wawanyɔɔ ‑yä ‑anyɩa 'kʋnämʋnyɔɔ Epaflasö, ɔmɔɔ‑ cɩa'anyɩ lä 'klünö 'fɩɩn. Klisöö' ‑gänʋnyɔɔ‑ ‑kʋ'anyɩ lä ‑mɔɔ yëku, 'nɩ ‑ɔ nʋ lä 'nägäsä ‑anyɩa bhlëë' lebhe nä, ɔmɔ lä.

⁸ Ɔ ‑sänö‑anyɩ yɩ 'döö 'fɩɩn nynä ‑mä, kä Kplɔɔkplɔɔ‑wugɔɔ ŋʋʋ'anyɩ ‑wawʋ pleyii.

Pɔlʋ bhibhie Kolɔsʋduu' 'cɔcɩnyʋa 'wlu

⁹ Ɩ ‑kä 'ŋnö 'nɩ dä ‑a 'nö bhlä anyɩa' yëkuu' 'döö 'nu nä, kä ‑a bhibhie lä 'kɔɔkɔ anyɩa' 'wlu. ‑A zla Laagɔ nynä ‑mä, 'fikee ‑yä dɩgälɩɩ ʋʋ' 'Wugɔɔ nyɛ lä nä, ʋ 'nyɩ'anyɩmɩ. Ɩ yi gbä 'nɩ 'klüü Laagɔ 'ylää lä nyɩkpɔ nä, a yii yibhë.

¹⁰ Ɩ yi gbä 'nɩ sä Kwlienyɔ yi lä wamä nynä 'cɔcɩnyɔ nää nä, a yi sɔɔ nää 'kɔɔkɔ. 'Klüü 'fɩɩn‑ nää‑ lä Laagɔ ‑gä nä, a yii nʋ. 'Nɩ ‑lɔɔ' 'nägä‑lebhee 'fɩɩn a 'kä lä nʋ nä, ɛmɛ 'mnö, a yi ‑mɔɔ 'bhü tlʋ. Ɩ yi gbä 'nɩ anyɩa' ‑laagɔ‑yibhëlɩɩ yi 'yikʋ 'mʋ.

¹¹ ‑A soo Laagɔ ‑yä ʋ gbä ‑yä ʋʋ' 'päwaa' 'klʋagba ŋʋ'anyɩ 'tɛtɩɩ. Ɩyä saa 'fɩɩn‑ yi'anyɩ lä ŋëë nä, a 'kä plɛkʋ 'tɛmä ‑yä a 'kä sɔɔ nëë bhɩä.

¹² ‑Jäkä kʋ'anyɩ pleyi ‑yä a fään ‑a 'Bä Laagɔ 'ŋnu. ‑Ɔnöza bhää? Jaa 'fɩɩn ʋ ŋʋʋ‑ lä ‑mɔɔ ʋʋ' 'Leyiduu' zëlüü 'mnö kplɔɔkplɔɔnyʋa' ‑za nä, ʋmʋʋ‑ ‑gbä 'nɩ a ‑kämʋa lä.

¹³ ‑Ɛɛɛ, Laagɔ nä, kʋ sa‑anyɩ 'cucuu' 'päwa nëë', 'nɩ ʋ yi‑anyɩ lä ʋʋ' ‑wawa ‑Yowlio 'Leyiduu 'mnö fä.

¹⁴ Ʋ ‑Yowlinɔ 'mnö, ‑mɔɔ ‑a ghlää 'nɩ ‑a ‑bha lä gbenyenyii nëë', 'nɩ ‑anyɩa nyenyii yi lä cienöɔ.

¹⁵ Laagɔ nyɩkpɔɔ 'niu ‑wʋ 'yi, ‑Mä Zozi Klisö nyɩkpa nii‑ lä 'yi nä, Ɔɔ' kʋkʋsa pana Laagɔɔ' kʋkʋsa. Ɔmɔɔ‑ plöö‑ lä Laagɔɔ' tɛɛtɛɛyu. Kä Klisö 'ghlü 'nɩ ɔ ‑zi nʋnʋlɩɩ 'fɩɩn 'kʋ.

¹⁶ Kʋkʋlɩɩ 'fɩɩn‑ ‑kʋ lä ‑mɔɔ ŋɔkʋ nä, ‑Lɩɩ 'fɩɩn‑ ‑kʋ lä ‑mää ‑dʋdʋkʋ nä, Klisö 'kʋ Laagɔ ‑ghlää 'nɩ ʋ ‑nʋɩ lä. Kʋkʋlɩɩ 'fɩɩn ‑ɩ nio lä 'yi nä, Ɩyä ‑lɩɩ 'fɩɩn ‑ɩɩ 'nio ‑wʋ lä 'yi nä, 'Ŋʋʋ yɩ ‑zizii 'fɩɩn‑ 'kämä lä 'leyisä nä, Ɩyä ‑lɩɩ pɩä lä zëkpënä 'kʋ nä, ‑Yä ‑lɩɩ ‑kä lä 'kämälɩɩ' 'päwä nä, Klisö 'kʋ Laagɔ ‑ghlää 'nɩ ʋ ‑nʋ lä ɩɩ' ‑lefɩɩn. 'Nɩ ‑lɩɩ 'fɩɩn Laagɔ ‑nʋ lä nä, Klisöö' ‑zä ʋ ‑nʋɩ.

¹⁷ 'Fɩa ‑yä ‑lɩɩ 'fɩɩn‑ ‑kʋ lä 'ylʋzɔɔ nä ɩ 'kä kʋ nä, Klisö ‑kʋ bhä. 'Nɩ ɔɔ' ‑bɔɔ 'nɩ lʋʋ lʋʋ nä, ʋ ‑kʋ lä ʋʋ' dä.

¹⁸ Kä 'cɔcɩɛ ‑kʋ lä nynä nyɩkpɔɔ' 'yäkö‑bhëa 'Nɩ Klisö plöö‑ lä ‑lɔɔ' 'yɛkɛɛ' 'wlu. Ɔmɔɔ‑ plöö‑ lä 'sɩɩ zëkpëa' ciedä. Ɔmɔɔ‑ plöö‑ lä 'sɩɩ nyɩkpɔɔ' lɔɔ‑ ‑glɔɔ lä tɛɛ 'kuëë nä. Ɩmɩɩ‑ ‑kä 'ŋnö 'nɩ ɔ ‑zi lä 'kʋ dää 'fɩɩn.

¹⁹ Kä Laagɔ ŋʋʋ‑ lä nynä ‑mä, Sä ʋmʋ 'titi ‑kʋ lä nä, Sɔɔ ‑säkä ‑säkä Klisö kä 'sɩɩ kʋ.

²⁰ Klisönɔ 'kʋ Laagɔ 'kä lä ghlää ‑yä Ʋ ‑yä 'ylʋzɔkʋnyʋä 'sɔ 'kä 'jɛnyɩ. ‑Lɩɩ 'fɩɩn‑ ‑kʋ lä ‑mää 'ylʋzɔɔ nä, Ɩyä ‑mɔɔ Laagɔduu' nä, Klisöö' 'kusuu 'yii doluu 'mʋʋ‑ nyɩɩ‑ lä 'kʋ wɔtɔlɩ.

²¹ Anyɩ nä, ka ‑tlʋ bhä tɛɛ Laagɔ dä, 'nɩ a ‑yi 'nɩ a plöö‑ bhä 'sɩɩ Laagɔɔ' ‑zɔbhlɛgbänyʋä anyɩa' bhobhosaa ɩyä anyɩa' gbenyenyii 'mnö.

²² ‑Mä ‑pɛpɛɛ nä, Laagɔ ‑Yowlii' 'yɛkɛɛ' 'kwiee 'mnö, ʋ yä gbä 'nɩ a ‑yʋsɔ yä glään ‑yä a 'kä kplɔɔ Laagɔ dëlü. Aa' ‑läyɩɔ 'foclo kään, 'nɩ nyɩkpɔ nö'anyɩ ‑läyɩɔ gbëgëdü yëku 'nii.

²³ ‑Mä ɩ ‑ŋwa 'kʋ nynä a kʋ pɔlötɛtɛɛ 'mnö, ɩyä anyɩa' pɔlötɛtɛɛ see sä 'nägäsä. A 'nä ‑sä lä Kwlienyɔɔ' 'Nägädöö gwë. Ɩmɩ a 'tɛɛ lä dë. A yɩɩ wɛzä 'nu, 'nɩ ‑a yɩɩ wɛzä ‑mää 'ylʋzɔɔ' nyɩkpaa 'fɩɩn ‑sää. Ɩmɩ 'mnö ‑amʋ Pɔlʋ n 'plöö‑ lä ‑zɩkä Kwlienyɔɔ' ‑gänʋnyɔɔ ‑yä n 'kä ‑lɔɔ' 'Nägädöö bie.

Pɔlʋʋ' ‑Laagɔ‑lebhee 'mnö ɔ bhlää 'cɔcɩnyʋaa' ‑za 'kʋ
( Efɛ 3.1‑13 ; 1 Kolɛ 2.7‑13 )

²⁴ ‑Pɛpɛɛ nä, sä n ‑kʋ lä 'kwlɩkabhɩä' anyɩa' ‑za nä, ‑pʋpɛ bhlä'ä yɩ. Ɛɛɛ, Klisöö' 'yɛkɛɛ‑ plöö‑ lä ɔɔ' 'cɔcɩɛ nä, ɛɛ' ‑zä n 'plöö‑ lä ɔɔ' bhlëë' 'nɩ n nyɛnɩä lä 'naa 'yɛkɛnɛ 'mnö.

²⁵ Klisöö' 'cɔcɩɛɛ' ‑gänʋnyɔ n plöö‑ lä. Kä Laagɔ nyɛɛ'ɛ lä ‑tëbhuu nynä Laagɔwälɩɩ n sonö'anyɩmɩ wɩa.

²⁶ ‑Lää' wälɩnɩ nä, kɩ ‑zizio bhä 'kɔɔkɔ 'ylʋzɔkʋnyʋä 'yii. ‑Mä Laagɔ yɩɩ yɩ ‑pɛɛ 'cɔcɩnyʋa pana.

²⁷ Sä Laagɔ ‑zizie bhlä 'kʋ nä, kʋ pana‑ yɩ sɔɔ 'cɔcɩnyʋa. Ɩyä wa 'kä sɔɔ yibhë nynä ‑nʋawlɛɛ‑ ‑zizio bhlä 'kʋ nä, ɛ bhɛɛ‑ bhä 'nää 'kädä ‑kädä. 'Klüü‑ ‑zizio bhlä nä, ɩmɩɩ‑ plöö‑ lä nynä ‑mä, Klisö ‑kʋ'anyɩ lä pleyii nä, a känɩ plɛkʋ nynä ‑mä ɔ yi gbä 'nɩ a yi Laagɔɔ' 'klʋagba 'mnö kʋmʋ.

²⁸ 'Nägädönö ‑a bie lä nä, Klisöö' yëkuu' wälɩ‑ ‑a ci lä. Nyɩkpɔ nyɩkpɔ nä, kä ‑a 'pänöɔ ‑dɔɔ, 'nɩ dɩgälɩɩ 'mnö, ‑a cɩa 'sɩɩ nyɩkpɔ nyɩkpɔ. Kä ‑a nʋ lä sɔɔ ‑yä nyɩkpɔ nyɩkpɔ 'kä Klisö 'mnö ‑glɛɛ.

²⁹ Ɩmɩɩ‑ ‑kä 'ŋnö 'nɩ Klisö nyɛɛ'ɛ lä 'tɛtɩ 'nɩ n nʋ lä saa 'fɩɩn ‑yä n 'kä ‑lɔɔ' lebhee nʋ.

« Roimhe

Air adhart »

Wycliffe Bible Translators, Inc.

Lean sinn:

Ceanglaichean taic

Sanasan