Bìoball air-loidhne

3 Zään 1 - GOD - u2

Bhäälɩ

¹ 'Naa ‑wawanyɔ Gayusö‑, ‑mɔɔ mɔ n ‑waa lä ‑nʋawlɛɛ 'mnö nä, ‑amʋ 'cɔcɩɛ 'mnö 'kɔgwlɛnyɔɔ, ‑amʋʋ‑ jɩjlä‑ä lä 'bɔɔgʋnʋ.

² 'Naa ‑wawanyɔ‑, n ylä nynä ‑mä ‑naa nʋnʋlɩɩ 'fɩɩn 'plöö‑ 'kʋ 'nägäsä ‑yä sä ‑naa 'wugɔɔ' ‑kä lä 'tɛtɩ nä, ‑naa 'yɛkɛɛ kään sɔɔ 'tɛtɩ.

Gayusö nämnö ‑nʋawlɛɛ 'mnö

³ Bhelia ‑wa ‑yi lä ‑mää nä, 'döö wa ‑sänö'ö lä ‑naa ‑za nä, ɩ nʋ'ʋ kpänyɩ ‑pʋpɛ. Wlä ‑n ‑glö 'sää ‑nʋawlɛɛ‑cinyɔ 'titi, 'nɩ ‑n nämnö 'sɩɩ ‑nʋawlɛɛ 'mnö.

⁴ Nä, n kä 'nu nynä ‑mä 'naa 'yua nämnö Laagɔɔ' ‑nʋawlɛɛ 'mnö nä, ‑pʋpɛɛ ‑ɛ 'bhlänö'ö lä pleyii nä, ɛɛ' ‑wʋ 'bɛ.

⁵ 'Naa ‑wawanyɔ‑, ‑lɩɩ 'fɩɩn ‑n nʋ lä bhelia ‑yä bhɛŋwnɩaa' ‑za nä, 'nɩ ‑n nʋ lä 'sɩɩ lowiaa' ‑za nä, ɩ pana nynä ‑mä Laagɔɔ' ‑blɔɔ 'mʋ ‑n bhlü lä.

⁶ 'Cɔcɩnyʋaa' 'klʋ, bhelia ‑lü ‑naa ‑wawʋʋ' ‑za ‑dläfʋɛ. Nä, ‑blɔɔ wa 'kä lä bhlü nä, bheeje, ‑n klänʋwa sää‑ yi lä Laagɔ 'klʋkpää 'ŋʋ nä, ‑yä wa 'kä 'yikʋ mʋ.

⁷ Klisöö' lebhee' ‑za wa ‑bha lä 'kʋ 'nɩ wa ‑mʋ lä. Wa 'kä lä mʋ nä, waa' ‑wʋ nyɩkpaa‑ ‑wʋ lä Laagɔ ‑yi nä, lʋʋ 'ylää‑.

⁸ ‑Lɔɔ' bhelia nä, ‑a ‑kä 'nɩ ‑a 'gwa 'kʋ yi. ‑A 'gwa 'kʋ yi ‑yä ‑a ‑yʋwa 'kä Laagɔɔ' ‑nʋawlɛ‑döö nyɩkpa ‑sää.

Diotlɛfö nyima 'cɔcɩɛ ‑mä Demetlusö ‑kä ‑dläfʋɛ 'nänɛ

⁹ N ‑jɩjlä bhä 'bɔɔgʋ 'nɩ n ‑fʋʋ bhä 'cɔcɩɛ. Ʋʋ' 'mnö wälɩɩ' bhɔɔ ‑jɛjɛsä ‑zu. ‑Mä nyɩkpɔɔ wa laa lä Diotlɛfö 'nɩ ‑ɔ ‑waa lä nynä ‑mä ‑ɔ 'gä ‑lɩɩ 'fɩɩn 'yikʋ ‑kʋʋ nä, ɔɔ' 'mänyɩnö‑anyɩ ‑wʋ.

¹⁰ Ɩ ‑kä 'ŋnö nä, n kä ‑mɔɔ ‑yi nä, gbenyenyi‑wälɩɩ 'fɩɩn ɔ nʋ lä nä, n yii ‑sää. Kɔ sänö‑anyɩ nyenyisä yëku 'mʋ. 'Nɩ bhelie kä ‑mɔɔ ‑yi nä, ɔɔ' 'ylä ‑wʋ nynä ‑mä ɔ 'kwa klä, 'nɩ ɔɔ' 'ylä ‑wʋ 'sɩɩ nynä ‑mä nyɩkpɔ klʋwa. 'Nɩ ‑wa ylä bhlä bheliaa' klälɩ nä, ɔ tluwa 'sɩɩ 'cɔcɩɛ 'mnö.

¹¹ Nä, 'naa ‑wawanyɔ Gayusö‑, ‑naa tään ‑lä nynä ‑n 'gä gbenyenyinyʋä 'kʋ 'gë, ‑mä ‑n tään 'nää nʋlɩ! Nyɩkpɔ kä 'nää nʋ nä, ɔ ‑glö Laagɔɔ' lɔɔ. 'Ɩzä nyɩkpɔ kä gbenyenyi nʋ nä, ɔɔ' ‑wʋ Laagɔɔ' lɔɔ plöö‑ 'nɩ ɔɔ' ‑wʋ 'sɩɩ Laagɔ ‑yi.

¹² ‑Mä bhelio ‑ɔ plöö‑ lä Demetlusö nä, kä nyɩkpaa' ‑lefɩɩn lü ɔɔ' 'nägä‑dläfʋɛ. 'Nɩ ‑nʋawlɛɛ ɔ nämnö lä 'mnö nä, ɛ lü 'sɩɩ ɔɔ' 'nägä‑dläfʋɛ, 'nɩ ‑anyɩ ‑mä 'sɩɩ, ‑a lü ɔɔ' 'nägä‑dläfʋɛ. 'Nɩ ‑n ‑yi sɔɔ nynä ‑mä ‑anyɩa ‑dläfʋɛɛ ‑glö nyaasäsä.

Bhlüüdää' bhää‑wälɩ

¹³ Gayusö‑, n ‑kä wälɩ ‑bhutukpä ‑yä n 'kä‑ä soo, ‑mä nn' 'ylä ‑wʋ nynä ‑mä n 'kɩ jɩjlää.

¹⁴ N ylä nynä n 'kä‑ä 'yi 'ni kää yi ‑yä, ‑anyɩ 'sɔ 'kä sä kʋ ‑yä n 'kä‑ä nëë' sonö.

¹⁵ Laagɔɔ' 'kʋ wɔtɔlɩɩ ŋënö‑ö 'kʋ! 'Naa ‑mää' 'nagwɩa bhänö‑ö. ‑Anyɩa ‑mɔɔ' 'nagwɩa, bhään waa' 'kʋʋ nyɩkpɔ nyɩkpɔ.

« Roimhe

Air adhart »

Wycliffe Bible Translators, Inc.

Lean sinn:

Ceanglaichean taic

Sanasan