Bìoball air-loidhne

2 Zään 1 - GOD - u2

Bhäälɩ

¹ ‑Amʋ, 'cɔcɩɛ 'mnö 'kɔgwlɛnyɔɔ, ‑amʋʋ‑ jɩjla'anyɩ lä 'bɔɔgʋnʋ. ‑Mɔɔ plöö‑ lä 'ŋnɔɔ Laagɔ ‑sä 'nɩ ʋ ŋʋʋ‑ lä ‑naa dä nä, ‑mɔɔ ‑yä ‑naa 'yua 'sɔ. Anyɩmɔ n ‑waa lä ‑nʋawlɛɛ 'mnö nä, anyɩ‑ n jɩjlä lä 'bɔɔgʋnʋ. ‑Amʋ ‑bhlo nö'anyɩ ‑wʋ 'sɩɩ ‑waa, ‑mä nyɩkpaa 'fɩɩn‑ ‑yi lä ‑nʋawlɛɛ nä, wa ‑wamʋ'anyɩ.

² ‑Nʋawlɛɛ ‑kʋ‑anyɩ lä pleyii nä, 'nɩ ‑ɛ yi‑anyɩ lä ‑lätee 'kɔɔkɔɔ ‑za pleyi kʋ nä, ɛ gbä 'nɩ ‑a ‑waa'anyɩ.

³ ‑A 'Bä Laagɔ ‑yä Zozi Klisö Laagɔ ‑Yowli, wa 'nyɩ‑anyɩ 'nyupälɩ ‑yä wa yibhënö‑anyɩ ŋäzö. Wa 'nyɩ‑anyɩ 'sɩɩ 'kʋ wɔtɔlɩ ‑yä ‑a 'gä ‑nʋawlɛɛ ‑yä ‑wawʋʋ 'sɔ 'mnö kʋ.

A nämnö ‑wawʋʋ 'mnö

⁴ ‑Nʋawlɛɛ 'Bäɔ cii‑ lä nynä ‑mä ‑a nämnö 'mnö nä, n nii‑ lä 'yi nynä ‑mä kä ‑naa 'yua nämnönɩɛ 'mnö nä, ɩ ŋʋʋ‑ 'naa pleyii ‑jäkä 'kädä.

⁵ ‑Pɛpɛɛ' nä, ‑atigloo, 'klünö n jɩjlä‑ä lä nä, ɩɩ' ‑wʋ ‑Jlämä lëlë plöö‑. ‑Mä cie ‑bhɔɔdää nä, ‑jlämaa 'nö bhlä ‑lɔɔ kʋ nä, aa' ‑säkä ‑säkä lä. Ka plöö‑ lä nynä ‑mä ‑a wamä ‑wamä.

⁶ ‑Wawʋ plöö‑ nynä ‑mä nyɩkpɔ nämnö Laagɔɔ' ‑Jlämaa 'mnö. ‑Bhɔɔdää' ‑jlämaa a cɩä‑ lä nä, 'klünö 'mɩ a cii‑ lä.

A luë ‑kpläkplö cɩanyʋa

⁷ ‑Kpläkplönyʋä yä 'ylʋzɔɔ zumë, 'nɩ waa' ŋoo ‑wʋ 'kʋ nynä Zozi Klisö ‑glö bhä 'zaazɩ nyɩkpɔ. ‑Kpläkplönyɔɔ ‑ɔ plöö‑ lä Klisöö' ‑Zɔbhlɛgbänyɔɔ nä, 'klünö 'mnö ‑a yibhënöɔ lä.

⁸ A kä ‑lɔɔ ‑kʋ nä, a gblɩmä ‑mä lebhee‑ ‑nʋɔ lä nä, aa' kä ‑kä ɛɛ' ‑bʋzʋɛ të. Ɩ ‑ŋwa 'kʋ nynä ‑mä a 'ni ɛɛ' 'mnö bɔɔpälɩɩ 'fɩɩn.

⁹ Nyɩkpɔɔ' lɔɔ ‑ɔ 'nö Klisöö' cɩalɩɩ nyɩkpa cɩa 'nɩ ɔ gɩ 'kʋ 'pää nä, ‑lɔɔ' nyɩkpɔɔ' ‑wʋ Laagɔ 'kʋ ŋoo‑. ‑Mä ‑ɔ cɩa lä Klisöö' cɩalɩɩ nä, ɔmɔɔ‑ ŋoo‑ lä 'Bäɔ ‑yä ɔ ‑Yowli 'sɔ 'kʋ.

¹⁰ Nä nyɩkpɔ kä ‑yi 'nɩ ɔ kä 'yigäda‑wälɩ cɩa nä, ‑lɔɔ' nyɩkpɔɔ 'nä plä ‑lä anyɩa ‑bhutuu ‑zɔɔ, 'nɩ a 'nä bhänöɔ ‑lä 'sɩɩ!

¹¹ Nyɩkpɔɔ' lɔɔ ‑ɔ gɔ ‑bhää nä, ɔ ‑yɔsɔ yä 'jɛnyɩ‑ gbenyenyii 'mnö.

Bhɩädää' bhäälɩ

¹² N ‑kä bhä wälɩ ‑bhutukpä ‑yä n 'kanyɩ bhä soo, ‑mä nn' 'ylä yɩɔ nynä n 'kɩ jɩjlä. N bhobho nynä ‑mä n yi'anyɩ ‑mɔɔ yëku yi, 'nɩ n yi'anyɩ nëë' sonö ‑yä ‑anyɩa ‑pʋpɛɛ 'kä nëë' slää.

¹³ ‑N bhɛŋnɔɔ, ‑lɔɔ Laagɔ ‑sä 'nɩ ʋ ŋʋʋ‑ lä ɔɔ' dä nä, ɔɔ' 'yua lä wa bhänö.

« Roimhe

Air adhart »

Wycliffe Bible Translators, Inc.

Lean sinn:

Ceanglaichean taic

Sanasan