Bìoball air-loidhne

2 Timotee 4 - GOD - u2

Pɔlʋ lä Timotee ci Laagɔwälɩ

¹ Laagɔ dëlüü', ɩyä Zozi Klisö ‑ɔ yi lä ‑yäyänyʋa ‑yä 'kudukuaa' 'tite 'ŋʋ 'kää nä, ɔɔ' yilɩɩ ‑yä ɔɔ' 'Leyi‑päwaa' 'ŋnöö 'mnö, wälɩklëa n 'ylanö‑ö lä 'sää kpänyɩ nä, amää‑ plöö‑ lä nynä ‑mä,

² Laagɔwälɩɩ nä, n cii! ‑N pɩänɩ 'kʋ ‑yä ‑n 'gɩ cɩa. Sä 'tänyɩ yi 'flɛ kʋ ‑o, ɛ yi namä ‑o, ɛɛ' ‑lä namä ‑o, ‑naa bhlü lä nëkʋ ‑mä, ‑n cii 'kɔɔkɔ! Wa nää lä nyenyisä nä, ‑n 'ŋʋwa ‑blɔkʋ! ‑N fä nyɩkpa nëkʋ, ɩyä ‑n 'ŋʋ 'sɩɩ nyɩkpa 'tɛtɩɩ'! ‑Nɩnɩ 'fɩɩn nä, ‑n mnaa 'sää 'mʋ 'nägäsä ɩyä ‑n 'gɩɩ cɩa.

³ ‑Ɔnöza bhää? 'Tänyɩ yi ŋëë 'nɩ nyɩkpaa' ‑nänʋää' ‑läyɩɔ ŋoo ‑yä cɩalɩɩ‑ ‑kplɔɔ lä nä, wa 'kɩ 'nyukwli poo. 'Nɩ sä waa' plɛ ‑waa lä nä, wa yi sɔɔ nää. Wälɩɩ' ‑lɩɩ wa ylä lä nynä ‑mä wa 'kä 'nyukwli poo nä, wa yi ɩɩ' cɩanyʋä ‑bhutukpä laa nynä wa cɩwanyɩ.

⁴ Wa yi ‑nʋawlɛɛ 'nyuklwi 'kʋ ‑sä, 'nɩ wa yi ‑jlibɔɔ' ‑za 'nyuklwi celɩe.

⁵ ‑Mä ‑mɔɔ nä, ‑n klä ‑n yëku ‑kpään wälɩɩ 'fɩɩn 'mnö. Ɩyä 'kwlɩkabhɩa 'tänyɩɩ nä, ‑n 'kuu 'mnö ‑yä ‑n nʋ Kwlienyɔɔ 'Nägädöö' bielɩɩ' lebhe. Lebhee ‑ɛnözä Laagɔ lä‑ä lä nä, ‑n nʋɛ 'nää!

Pɔlʋ pä ɔɔ' 'kwiee 'tänyɩ plɛkʋ
( Matie 10.18‑20 )

⁶ ‑Amʋ nä, 'tänyɩɛ 'mnö 'naa zëkpëa 'kä lä 'cibhi 'kʋ ‑sɔɔ Laagɔ dëlü nä, ‑lɔɔ' 'tänyɩɛ yä ŋëë. 'Naa 'kwiee 'tänyɩ ŋëë ylä.

⁷ N ‑bhlää 'nägäsä 'kʋ. Sämɩɩ n paa bhlä nä, n yä ɩɩ' 'wlu ‑säädä ŋëë. 'Nɩ 'naa pɔlötɛtɛɛ, n ‑känɩɛ 'kɔɔkɔ sä.

⁸ ‑A 'bhää ylä ‑lää 'kʋ nä, 'kʋzilɩɩ' ‑ajɛɛkpa ‑bɛnö'ö yɩ. 'Nɩ Kwlienyɔɔ, ‑ɔ dëë lä 'yigëësa nä, bɔɔpälɩɩ‑ gëë‑ lä ‑lɔɔ 'yi nä, Laagɔɔ' 'tite 'kädɛɛ' pläylʋʋ 'kʋ, ɔ yi'i 'mɩɩ 'nyɛ. Ɔ yi'i bɔɔ 'pä. 'Nɩ ‑ɛɛ ‑wʋ 'sɩɩ ‑amʋ ‑bhlo ‑mä, nyɩkpaa' ‑lʋa ‑wa ‑waa lä ɔɔ' yiylʋʋ 'nɩ ‑wa ‑bɛɛnʋ lä nä, ɔ yiwa 'sɩɩ bɔɔ 'pä.

Pɔlʋʋ' gbäbhɩä ‑wälɩklë

⁹ Nä, Timotee‑, ‑n 'tlänyɩ ‑yä ‑n ‑vʋvʋä 'kʋ ‑yä ‑n yi'i yëku 'fäfä.

¹⁰ ‑Mä zëkpëkʋ ‑lɩɩ' ‑wawʋʋ ‑za, bheli Demasö yä'ä yëku ‑bha. Ɔ ‑mʋʋ Tesaloniköduu'. Bheli Klɛsɛsö ‑mʋ Galatɩbhlɩ 'kʋ, 'nɩ bheli Titö ‑mʋ Damasiibhlɩ 'kʋ.

¹¹ Bheli Lukö ‑bhlo, ɔmɔɔ‑ ‑kʋ'ʋ lä yëku. ‑N gä yi nä, ‑n ‑yä bheli Makö 'sɔ yimʋ ‑mä, ‑Laagɔ‑lebhee' 'mnö nä, kɔ känö'ö gbʋ.

¹² Bheli Tisikö, n ‑lobhuo Efɛzɩduu'.

¹³ ‑N gä yi nä, 'naa 'kotuklëa n ‑të lä Tlʋwasöduu', ‑mɔɔ bheli Kalɩpɔsöö' ‑gbäsɩɩ nä, ‑n ‑lämʋa. ‑N ‑lämʋ 'sɩɩ 'bɔɔgwɩɩ. ‑Lɩɩ 'titi ‑ɩ känö'ö lä kpänyɩ gbʋ nä, 'naa mnɛku‑bɔɔgwɩɩ, ‑naa bii ‑lä 'kʋ.

¹⁴ Gbli‑bhlänyɔ Alɛzadlö, ɔ ‑nʋ'ʋ kpänyɩ nyenyi ‑mä Laagɔ ‑tɛɛ ‑lä 'gɔ plʋʋ.

¹⁵ Nä, ‑mɔɔ ‑mä 'sɩɩ, ‑n luënöɔ ‑kä! ‑Ɔnöza bhää? Wälɩɩ 'fɩɩn ‑a cɩa‑ lä nä, ɩɩ' 'wluu ɔ ŋʋʋ‑ kpänyɩ zɔgblö sä.

¹⁶ Bʋkʋ nä, wa ‑kunö'ö lä 'zuzugbëë' tʋ 'naa tɛɛtɛɛdä ‑yä n 'kä lä n yëku 'kʋ bhlää nä, kä wa ‑dlonö'ö 'yi waa' ‑lefɩɩn. Nyɩkpɔ nö'ö ‑wʋ 'kʋ ‑yi. ‑Mä n bhibhie waa' ‑za Laagɔ nynä ʋʋ' 'mäkänʋwa ‑lä 'kʋ ‑yä ʋ cienʋwa.

¹⁷ Kwlienyɔ ‑kʋ'ʋ bhä yëku 'nɩ ɔ nyɛɛ'ɛ ɔɔ' 'tɛtɩɩ. Ɩ ‑gbä 'nɩ n ‑sää ɔɔ' 'Nägädöö' 'yɛkɛ 'yɛkɛɛ ‑aaa 'nɩ, nyɩkpaa' ‑lʋa ‑wʋ lä 'Zufʋnyʋä plöö‑ nä, wa nui‑. Kwlienyɔ yä'ä ji nëë' ‑sä.

¹⁸ 'Nɩ n ‑yi sɔɔ nynä ‑mä Kwlienyɔ yi'i ‑lätee gbenyenyinyʋa 'fɩɩn nëë' ‑sä. Ɔ yi'i ‑lɔɔ nëë' ‑sä 'nɩ, n yi Laagɔɔ' 'Leyiduu 'mnö plä. Nä, ɔmɔ Kwlienyɔɔ, 'klʋagba ŋënöɔ 'kʋ 'kɔɔkɔɔ' ‑za. Ɩ kʋ sɔɔ!

Bhlüüdää' bhää‑wälɩ

¹⁹ ‑N bhään bhɛŋnɔ Plisii ‑yä ɔ ‑nyoto Akilasö 'sɔ. N bhään 'sɩɩ bheli Onezifɔɔ ‑yä ɔɔ' gbünyʋa 'sɔ.

²⁰ Bheli Elasö ‑too Kolɛtɩduu', 'nɩ bheli Tlofimö, n ‑tüo Mileeduu'. Ɔɔ' bhɔɔ ‑yä.

²¹ Nä Timotee‑, ‑n nʋ saa 'fɩɩn ‑yä 'nyugozo‑wätlɩɩ' ŋëë lä ‑yä ‑n 'gä yi. Bhelia Ebule ‑yä Pudɛsö, ɩyä Linusö ‑yä Klodia, wa bhänö‑ö. 'Bhelia ‑yä bhɛŋwnɩa 'fɩɩn, wlä wa bhänö‑ö.

²² Kwlienyɔɔ kʋ‑ʋ yëku. Ɔɔ' 'nyupälɩɩ ŋënö'anyɩ 'kʋ anyɩ 'fɩɩn!

« Roimhe

Air adhart »

Wycliffe Bible Translators, Inc.

Lean sinn:

Ceanglaichean taic

Sanasan