Bìoball air-loidhne

2 Timotee 3 - GOD - u2

Bhɩä ‑gbäsɩɩ' ylɩɩ 'mnö gbenyenyi yi zumë

¹ Timothee‑, ɩ ‑ŋwa 'kʋ nynä ‑mä ‑n yibhë wälɩklënä. Zëkpëa' bhɩä ‑gbäsɩɩ' ylɩɩ 'mnö nä, 'tänyɩɛ yi 'tɛmä.

² 'Ylʋzɔkʋnyʋä nä, wa yi ‑abhlɛɛ kään. Wa yi monii 'nagwɩ 'kʋ klä. Wa yi në nʋ 'nɩ wa yi täkpɔ. 'Nɩ wa yi 'sɩɩ Laagɔ 'bhɩsɛ. Wa yi wa 'bäsɩ ‑yä wa 'nɔsɩ 'klʋkpää ‑sä. Sä nyɩkpɔ yiwa 'nää nʋ ‑kaaa nä, wa 'nöa ‑lä yibhë. Bʋkʋ 'nɩ waa' ‑lä Laagɔ 'mänyɩ.

³ Waa' wälɩ yi 'tɛmä kpänyɩ. Waa' ‑lä ŋäzöplɛ kään 'nɩ, wa yi wa ‑liesɩ nyenyisä yëku 'mʋ ‑sää. Wa yi ‑käpä ‑käpäsä nää. Nyɩkpa ‑bhlälɩ yiwa wlɩɩ' kʋ. 'Nɩ wa yi 'sɩɩ 'nää zɔbhlɛmä.

⁴ Wa yi wa ‑liesɩ ‑zɔɔ ‑bha. Wa yi 'yizlɛ kään kpänyɩ 'nɩ waa' täkpɔlɩɩ yiwa 'yikpüü 'ŋʋ. 'Nɩ ‑wawʋʋ wa yi bhlä Laagɔɔ' ‑za kään nä, waa' pleyii ‑gämʋʋ' ‑wawʋʋ ‑yiu 'kʋ zi.

⁵ Wa yi nʋ nynä nyɩkpaa' lʋä‑ bʋbɔ Laagɔ nä, ‑mä Laagɔɔ' bʋbɔlɩɩ' 'päwa nä, wa yia cɛɛ. Nä, ‑lɔɔ' nyɩkpa‑cëa, Timotee‑, ‑n ‑sʋwa gwë!

⁶ Waa' nëëdëë' bhutukpä mɛnɩɔ 'nɩ 'ŋwnɩa ‑waa ‑wʋ lä 'cʋcʋ ‑kä 'nɩ nyenyii ‑yä lä 'luu nä, 'nɩ ‑wanö pɔlötɛtɛɛ ‑wʋ lä ‑mɔɔ ‑see nä, wa mʋnʋwa 'nɩ wa pänʋwa waa' gbenyenyii' 'sokwlie 'mnö. ‑Lɔɔ ŋnʋ‑cëyɩ nä, 'ylʋzɔɔ' 'yigämɛtʋʋ 'mʋʋ‑ fänʋwa lä.

⁷ Kä wa cɩä lä ‑bhlɛ 'kɔɔkɔ ‑mä ‑nʋawlɛɛ, wa 'nɩɛ ‑läzä yibhë.

⁸ Sɔɔ' Zanɛsö ‑yä Zablɛsö 'sɔ ‑nʋ lä ‑mɔɔ ‑gɔgɔbhlää'. Sä waa' bhɔɔ lä Moyizöö' ciciwälɩɩ 'kʋ ŋoo‑ nä, sɔɔ ‑säkä ‑säkä nyɩkpanä cɛɛ‑ lä 'sɩɩ ‑nʋawlɛɛ. Wa ‑glö 'sää nyɩkpaa' lʋä ‑wanö bhobhowlu‑ ‑sɩɔ lä ‑mɔɔ nä. 'Nɩ waa' pɔlötɛtɛɛ' ‑wʋ lʋʋ 'plöö‑.

⁹ 'Nɩ waa' ‑lä 'sɩɩ dä ŋëë. Sä Zanɛsö ‑yä Zablɛsöö' dëbëa nyɩkpa 'wlʋnöa‑ bhlä 'kʋ nä, ‑nänʋä ‑mä 'sɩɩ, 'tänyɩ yi ŋëë 'nɩ nyɩkpa 'fɩɩn yi waa' dëbëa 'yi 'ni.

Pɔlʋʋ' gbäbhɩä‑wälɩklëa ɔ ‑soo lä Timotee nä
( 2 Kolɛ 6.3‑10 ; 2 Pɩɛ 1.19‑21 ; Nʋnʋ 20.28‑31 )

¹⁰ ‑Mä ‑mɔɔ Timotee nä, saa 'fɩɩn n cɩa‑ lä nä, kä ‑n gëë‑ 'sɔɔ 'kʋ 'nägäsä. 'Naa sä n nää lä nä, kä ‑n 'bhlüü‑ sɔɔ 'sëploo' 'kʋ. 'Nɩ sä n ŋʋ lä nynä n 'kä nʋ nä, ‑n ‑yibhë 'sɩɩ sɔɔ. 'Naa pɔlötɛtɛɛ ‑yä sä n ‑yi lä ‑bɛɛsä 'nɩ n ‑kä lä ‑wawʋ, 'nɩ n ‑yi lä 'sɩɩ 'mnö 'kuu sä nä, ‑n nii‑ yɩ sɔɔ 'yi.

¹¹ Nyäkälɩ 'kädɩ, ɩyä 'kwlɩ kplɔɔlɩ n blüënɩ‑ 'mnö. 'Kwlɩ ‑sä nö'ö bhä kplɔɔ? Cie yɩ Atɩɔsöduu' ‑yä ŋëë Yikonɩɔmʋduu', ‑yä Lislöduu' nä, kä 'kwlɩɩ ‑bhɩänö'ö. ‑Nɩnɩ 'fɩɩn ‑ŋënö'ö lä nä, kä Kwlienyɔ yi 'nɩ ɔ ‑sämɩ nëë'.

¹² 'Nɩ bʋkʋ nä, nyɩkpaa' 'fɩɩn ‑wa ylä lä nynä ‑mä wa 'kä Zozi Klisöö' bʋbɔnyʋä 'plö nä, nyɩkpa yiwa nyäkälɩɩ' 'ŋʋ.

¹³ 'Ɩzä nyɩkpaa‑ ‑nyu lä nä, wa ‑yä nyɩkpa‑nyigënyʋa 'sɔ, wa yi waa' gbenyenyii 'mnö 'kʋ mʋmʋ ‑aaa, 'nɩ wa yi ‑mɔɔ' ‑lʋa 'nyigë. 'Nɩ wamä ‑mä 'sɩɩ, nyɩkpa yiwa 'nyigë.

¹⁴ Nä ‑mɔɔ, sä ‑n cɩä‑ lä 'nɩ ‑n bhlüü‑ lä ‑naa 'wugɔɔ 'mnö 'kʋ nynä ‑mä, sɔɔ plöö‑ ‑nʋawlɛ nä, ‑n klä sɔɔ sä klɩ klɩ klɩ. 'Nɩ nyɩkpɔɔ' ‑lɔmɔ ‑ɔ cɩä‑ä mɩɩ lä 'sɩɩ nä, ‑n ‑yio.

¹⁵ 'Bhää yɩ ‑naa yuëë' nä, Laagɔ‑bɔɔgʋʋ 'mnö kplɔɔkplɔɔ‑wälɩɩ, kä ‑n yi. Nä, Laagɔwälɩɩ yi mii 'nɩ ɩ yi‑i dɩgälɩɩ' ŋʋ. Nyɩkpɔɔ' lɔɔ ‑ɔ ŋoo‑ lä Zozi Klisö 'kʋ nä, ‑lɔɔ' dɩgälɩɩ 'mɩɩ‑ gbä 'nɩ ɔ bha lä ‑lɔɔ nëë'.

¹⁶ Laagɔwälɩɩ 'fɩɩn nä, Laagɔ‑ ŋʋɩ‑ lä nyɩkpa pleyii' 'nɩ wa yii lä jɩjlä. Kɩ ‑jɩjlɔ lä ‑yä ɩ 'kä nyɩkpa cɩa ‑yä ɩ 'kä nyɩkpa plɛɛ' bhlüa. Ɩ 'kä nyɩkpa 'kʋ gögä ‑yä ɩ 'kä nyɩkpa 'yigëgbɩ cɩa.

¹⁷ Ɩyä nyɩkpɔɔ' lɔɔ‑ plöö‑ ylä Laagɔɔ' lɔɔ nä, ɔ 'kä ‑ghlɩlɩ 'nägäsä ‑yä ɔ 'kä mii ɔ 'kä 'nägägbɩɩ 'fɩɩn nʋ.

« Roimhe

Air adhart »

Wycliffe Bible Translators, Inc.

Lean sinn:

Ceanglaichean taic

Sanasan