Bìoball air-loidhne

2 Timotee 2 - GOD - u2

'Cɔcɩnyɔ nä, kɔ kʋ lä nynä Klisöö' 'sʋjäyu

¹ Nä ‑mɔɔ, n ‑yowli Timotee‑, Kwlienyɔ Zozi Klisöö' plɛkʋmɛnɔɔ gbä ‑yä ‑n kään 'tɛtɩ.

² Nyɩkpa ‑bhutukpää' 'klʋ, sä ‑n cɩa‑ 'nɩ ‑n nii‑ lä 'yi nä, ‑n cɩa 'sɩɩ 'sɔɔ nyɩkpa. Nyɩkpaa' lʋä ‑n yi lä dë 'tɛɛ, 'nɩ ‑n gä lä cɩa 'nɩ ‑wa yi lä 'sɩɩ wa ‑liesɩ cɩa nä, ‑n cɩwa!

³ ‑N ‑yamʋ 'sɔ 'jɛnyɩ ‑yä ‑n nyɛnɩä nynä Zozi Klisöö' 'sʋjäyu 'titi.

⁴ ‑Mä ‑n ni 'yi ‑a! 'Sʋjäyu kä cii‑ nynä ‑mä ɔɔ' 'kämänyɔ 'kä ɔɔ' 'sʋjälɛɛ wamä nä, ɔɔ' plɛɛ' kʋ yɩɔ ‑mää zëkpëkʋʋ' nʋnʋgbɩɩ 'kʋ.

⁵ Nyɩkpɔɔ' lɔɔ‑ bhlää lä 'kʋ nynä ‑mä ɔ 'kä ‑ajɛɛkpä 'ni nä, ‑jlämaa 'fɩɩn wa ŋʋ lä ‑ajɛɛkpaa' ‑za sä nä, ‑lɔɔ' nyɩkpɔɔ 'nöa 'klʋkpää ŋʋʋ‑ nä, waa' 'nyɩɔ ‑wʋ ‑lɔɔ' ‑ajɛɛkpaa.

⁶ Bʋkʋ nä, ‑lɛɛ ‑gogonyɔɔ' ‑lɔɔ 'kwlɩ ‑bhɩä lä nä, ɔɔ' gogolɩɩ' tlʋlɩɩ 'mnö ‑bʋzʋɛɛ, ɔmɔɔ‑ lie tɛɛ.

⁷ Nä, wälɩɩ n ci lä nä, ‑n 'nui 'mʋ. 'Nɩ n ‑yi sɔɔ nynä ‑mä Kwlienyɔ yi gbä 'nɩ ‑n yi ɩɩ' ‑lefɩɩn 'mʋ 'nu.

‑N luë nynä Zozii‑ ‑glɔɔ lä 'kuëë

⁸ Zozi Klisö ‑ɔ ‑glɔɔ lä 'kuëë nä, ‑n luë ɔɔ' dä 'kʋ. 'Nägädöö n bie lä nä, kɩ ci lä nynä Kwlienyɔ ‑glö 'loyo Davidöö' 'lɔlʋnyɔ.

⁹ 'Nägädönöö' ‑zä 'kwlɩ bhɩänö'ö lä ‑mää ‑jɩɩ'. 'Nɩ wa ŋʋʋ'ʋ lä ‑abhluëkö nynä nyɩkpa‑bhlänyɔ. ‑Maa, Laagɔwälɩ nä, wa 'nɩɩ ‑wʋ ‑abhluëkä ŋʋʋ‑.

¹⁰ Nyɩkpaa' ‑lʋa Laagɔ ‑yä lä ‑sä nynä ‑mä, wa plöö‑ yɩ ʋʋ' lʋä nä, waa' ‑za n 'kuu lä 'mnö. Ɩyä wamä ‑mä 'sɩɩ, Zozi Klisö 'kwa ‑kä ‑lɔɔ nëë' ‑sä. Ɩyä 'klʋagba ‑a ‑kʋ lä 'kɔɔkɔɔ ‑za nä, wa 'ka 'mnö kʋmʋ.

¹¹ ‑N ni wälɩklënä, a plöö‑ sää wälɩklë 'titi. Amää‑ plöö lä nynä ‑mä, ‑A ‑yä Klisö 'sɔ kä däbhloo' 'kuu‑ nä, ‑A ‑yɔsɔ yi 'sɩɩ däbhloo' zëkpë 'kʋ yii.

¹² ‑A ‑yɔsɔ 'kwlɩ ka‑anyɩ ‑bhɩä nä, ‑A ‑yɔsɔ yi 'leyisä 'kämä. 'Ɩzä ka ‑a gɔ cɛɛ‑ nä, Ɔmɔ ‑mä 'sɩɩ, ɔ yi‑anyɩ cɛɛ.

¹³ ‑A 'nöɔ ‑zi dë 'tɛɛ ‑kaaa, Ɔ ‑kä dë 'tɛɛ sä. ‑Ɔnöza bhää? Klisöö' ‑lä 'kɔɔn ɔ yëku cɛɛ.

Cɩa Laagɔwälɩɩ' ‑nʋawlɛɛ

¹⁴ Wälɩnɩ, ‑n cii ‑yä ‑n luë 'cɔcɩnyʋa 'fɩɩn. ‑N sonʋwa 'sää wɩa nynä waa' too lä nüzawlɛɛ 'mnö ‑mä, nüzawlɛɛ' fä ‑wʋ nyɩkpɔ dä. Kɛ gbä 'nɩ ‑wa poo lä 'sɔɔ nyɩkpaa 'nyukwli nä, wa too.

¹⁵ ‑N nʋ saa 'fɩɩn ‑yä, lebhee ‑n nʋ lä nä Laagɔ wamänɩɛ. Lebhe‑nʋnyɔɔ' ‑lɔɔ ɔ yëkuu' nʋnʋ‑lebhe bhlüa lä plɛɛ' nä, ‑n kʋ ɔmɔ 'bhisäkʋ. Ɩyä ‑n cɩa nyɩkpa ‑nʋawlɛɛ' wälɩɩ.

¹⁶ Nyɩkpaa‑ ‑wʋ lä Laagɔ ‑yi nä, waa' 'flɛflɛsaa' 'kɛsɛɛ wa sä lä nä, ‑n ‑sɛɛ gwë. ‑Wa ‑kʋ lä ‑lɔɔ' nʋnʋgbɩɩ 'mnö nä, wa yi 'pɩä 'pɩä Laagɔ gwë ‑sä.

¹⁷ Wälɩɩ‑ bhʋwa lä nëë' nä kɩ ‑nyu. Ɩ ‑kʋ nynä 'jëë laa‑ zɛ 'nɩ ‑a mʋmʋ klä. ‑Lɔɔ' nyɩkpaa nëëdë nä, Yimene ‑yä Filɛtö 'sɔ ‑kʋmʋ ‑mɔɔ.

¹⁸ Wa yä Laagɔɔ' ‑nʋawlɛɛ gwë ‑sä. Wlä Laagɔ nä, ʋ ‑yä wɛzä gbä 'nɩ 'kudukua ‑yä 'kuëë glɔɔ. Wa yä gbä 'nɩ bhutukpää' pɔlötɛtɛɛ yä 'foclo bhlü.

¹⁹ Ɩ ‑kʋ 'flɛ sɔɔ ‑mä, 'cɔcɩnyʋaa' pɔlötɛtɛɛ nä, kä Laagɔ pänɩɛ‑ 'nägäsä glu nynä ‑bhutu 'titi. 'Cɔcɩɛɛ' ‑za nä, ɩ ‑jɩjlɔ nynä ‑mä, Kwlienyɔɔ nä, nyɩkpaa ‑wa plöö‑ lä ɔɔ' lʋä nä, ɔ ‑yiwa. 'Nɩ ɩ ‑jɩjlɔ 'sɩɩ nynä ‑mä, nyɩkpɔɔ' lɔɔ ‑ɔ gä yɩ Kwlienyɔ 'ŋnö zɛɛ nä, ɔ ‑sä yɩ gbenyenyii gwë.

²⁰ 'Nɩ bʋkʋ nä, 'gbü 'kädä 'mnö, ‑sikaa ‑dɔkwɩ ‑yä dlɛɛ ‑dɔkwɩ, ɩmɩ ‑bhlo 'gbëa käänyɔɔ' ‑wʋ ‑kä. Ɔ ‑kämʋ 'sɩɩ ‑mɔɔ si ‑dɔkwɩ ‑yä maa ‑dɔkwɩ. ‑Dɔkwɩɩ' ‑nɩnɩ ‑kʋ ‑lɔɔ 'nɩ wa wlʋɩ ‑zɔɔ ‑glɩsɩɩsɩ 'kʋ, 'nɩ ‑nɩnɩ ‑kʋ ‑lɔɔ 'nɩ ɩ plöö‑ ylɩɩ 'fɩɩn 'kʋ 'mʋ lüülɩɩ.

²¹ Nä nyɩkpɔɔ' lɔɔ ‑ɔ gä gbenyenyinɩ 'fɩɩn gwë ‑sä nä, kɔ kpɔlʋä lä ɔ yëku. Kɔ 'kä lä kʋ nynä ‑dɔkɔɔ' lʋʋ‑ kään lä gbʋ nä. Sɔ ‑kplɔɔ ylä nä, ɔmɔ käänyɔ 'kä lä 'kʋ 'bhlü ‑yä ɔ 'kä ɔɔ' 'nägälɩɩ nʋ.

Kwlienyɔɔ' ‑gänʋnyɔ

²² Nä, Timotee‑, nʋnʋgbɩɩ 'fɩɩn ‑ɩ ‑nyu lä 'nɩ, nyëblii ‑waa lä nʋlɩ nä, ‑n ‑sɩɩ gwë! Ɩyä 'yigëgbɩɩ, pɔlötɛtɛɛ, ‑wawʋʋ ‑yä 'kʋ wɔtɔlɩɩ nä, nyɩkpaa' ‑lʋa ‑wanö pleyii ‑kplɔɔ lä 'nɩ, ‑wa bhibhie lä Kwlienyɔ nä, wamä yëku ‑mɔɔ ‑n ‑nä ‑n tänönɩ.

²³ ‑Ɔ plöö‑ lä dëbësä ‑yä 'flɛflɛsaa' cɛɛlɩɩ nä, ‑n ‑sɩɩ gwë. ‑Mɔɔ 'titi ‑n yi sɔɔ nynä ‑mä kɩ lä cice.

²⁴ ‑Bhlɛ, nyɩkpɔɔ' lɔɔ‑ plöö‑ ylä Kwlienyɔɔ' ‑gänʋnyɔ nä, ɩɩ' ‑wʋ 'kʋ ‑ŋwa nynä ‑mä, ɔ tään cice. Ɩ ‑ŋwa 'kʋ nynä ɔ wamä nyɩkpa 'fɩɩn. Ɔ yibhë 'sɩɩ cɩasä, ɩyä nyɩkpaa' ‑lʋa ‑wa ‑yɔsɔ gblɩ lä nä, ɔ 'kuu 'mnö ‑yä ɔ ŋonʋwa.

²⁵ Ɩyä sɔɔ' nyɩkpaa ‑wa ‑yɔsɔ gblɩ lä nä, ɔ wɔtɔmä plɛ ‑yä ɔ ‑säsänʋwa wälɩɩ'. ‑Mɔɔ yi ‑mɔɔ nynä Laagɔ yi waa' pɔlöö 'taa 'nɩ, wa yi waa' bhobhosaa 'cɩcɩ, 'nɩ wa yi ‑nʋawlɛɛ yibhë.

²⁶ Ɩ yi gbä 'nɩ 'Dëvloo' ‑gbesii wa ‑kʋ bhlä nëë' nä, 'nɩ ‑ɩ gbä 'nɩ wa nʋ bhä 'Dëvlo ‑gä nä, wa yii nëë' ‑bha, 'nɩ waa' bhobhowluu yi bʋkʋ 'nää 'kʋ 'bhlü.

« Roimhe

Air adhart »

Wycliffe Bible Translators, Inc.

Lean sinn:

Ceanglaichean taic

Sanasan