Bìoball air-loidhne

2 Timotee 1 - GOD - u2

Pɔlʋ bhään Timotee

¹ ‑Amʋ Pɔlʋ nä, kä Laagɔ ‑waa 'ɩzä ʋ nyɛɛ'ɛ lä ‑tëbhu nynä n 'plö Zozi Klisöö' lobho lobhonyɔ. Ɩyä Zëkpëa Zozi Klisö ŋʋʋ‑ lä nynä ‑mä, ɔ yi‑anyɩ 'nyɛ nä, n 'ka yëkuu' wälɩ nyɩkpa ‑sää.

² Nä Timotee‑, 'naa ‑wawayunɔ, ‑mɔɔ n jɩjlä lä 'bɔɔgʋnʋ. ‑A 'Bä Laagɔɔ, ɔ yä Zozi Klisö ‑ɔ plöö‑ lä ‑anyɩa Kwlienyɔɔ nä, waa' 'nyupälɩɩ ŋënö‑ö 'kʋ. Wa kään ‑naa plɛkʋmɛnɔ, ɩyä 'kʋ wɔtɔlɩɩ kʋ‑ʋ yëku.

Pɔlʋ bhää Laagɔ 'nɩ ɔ ŋʋ Timotee 'tɛtɩɩ'
( 2 Timo 2.1‑12 ; Efɛ 1.3‑7 ; 2 Tesa 2.13‑15 )

³ N kä bhibhie nä, ‑gägä‑zëlü ‑yä 'sabo, n bhibhie 'kɔɔkɔ ‑naa 'wlu. 'Nɩ Laagɔɔ ‑a tɩtɩä ‑bʋbɔ lä nä, n bʋbɔnʋ ‑mɔɔ 'naa pleyi kplɔɔlɩɩ 'mnö wamä 'bhisäkʋ.

⁴ N kä ‑naa 'tuwälɩɩ plɛkʋ 'pä nä, 'naa plɛ ‑waa 'sää 'titi nynä ‑mä, n yi‑i 'yi 'ni kää ‑yä 'naa pleyi ‑jäkä 'kä ‑mɔɔ kʋ.

⁵ N luë ‑naa pɔlötɛtɛɛ' dä. Ɛ ‑glö 'sää pɔlötɛtɛ 'titi. 'Nɩ n ‑yi sɔɔ nynä ‑mä, ‑n natɔ Loyisö ‑yä ‑n ‑nɔɔ Enisö, waa' pɔlötɛtɛɛ' ‑säkä ‑säkä n ‑kä lä.

⁶ ‑Nɩnɩ 'fɩɩn ‑kä ylä 'ŋnö nä, kä n luënö‑ö lä nynä ‑mä, 'tänyɩɩ n gbɛnö‑ö lä ‑klɔgbö 'kʋ nä, ɩɩ' 'tɛtɩɩ Laagɔ kwlienö‑ö lä 'kʋ nä, ‑naa ‑tanɩ ‑lä 'yi 'nɩ ɩ 'kä‑ä 'mʋ ‑bha.

⁷ ‑Ɔnöza bhää? Kplɔɔkplɔɔ‑wugɔɔ Laagɔ nyɩ‑anyɩ lä nä, ʋ 'nö‑anyɩmʋ ‑wʋ nyɛɛ‑ nynä ‑mä ‑a 'gä ‑cʋʋn kʋ ‑mä, kʋ nyɩ‑anyɩmʋ lä ‑yä ‑a 'gä 'tɛtɩ kään kpänyɩ. ‑A 'gä 'sɩɩ ‑wawʋ kään, ɩyä ‑a 'gä plɛkʋ 'tɛmä sä yibhë.

⁸ Nä, zoo' 'bhlä‑ä lä ‑yä ‑n lü Zozii' ‑dläfʋɛ. ‑Amʋ mɔ wa ŋʋʋ‑ lä ɔɔ' ‑za ‑jɩɩ' nä, 'naa zoo' 'bhlä‑ä lä 'sɩɩ ‑mä, ‑n ŋoo ‑yä, ‑n ‑yä ‑amʋ 'sɔ 'kwlɩ bhɩänö‑anyɩ Kwlienyɔɔ' 'Nägädöö' ‑za! Ɩyä ‑a 'tɛɛ Laagɔɔ' 'päwaa dë ‑mä,

⁹ Laagɔ 'mʋʋ‑ ‑sanyɩ lä ‑lɔɔ nëë, 'nɩ ‑ʋ laa‑anyɩ lä nynä ‑a 'gʋʋ 'yuë 'plö. Ɩɩ' ‑wʋ plöö‑ nynä ‑mä ka ‑a ‑nʋ lebhee' cënänä ‑gä. ‑Mä sä Laagɔ ŋʋɩ‑ lä nä, sɔɔ ɩ plöö‑ lä 'kʋ. Ʋʋ' plɛkʋmɛnɔɔ 'mnö ʋ ‑nʋ lä sɔɔ. 'Kɔɔnʋʋ' ‑lä bhä tee wlʋʋ‑ 'nɩ Laagɔ ‑ghlää lä Zozi Klisö 'kʋ, 'nɩ ʋ yi‑anyɩ lä ʋʋ' plɛkʋmɛnɔɔ 'mnö 'nää 'nyɛ.

¹⁰ 'Nɩ ‑pɛpɛɛ nä, ‑anyɩa Puënyɔɔ Zozi Klisö, ɔɔ' yilɩɩ 'mɩɩ‑ panö‑anyɩ ylä Laagɔɔ' plɛkʋmɛnɔɔ. Zoziinɔ nä 'mɔɔ‑ ‑sɩä lä 'kwie. 'Nɩ ɔɔ' 'Nägädöö 'mnö, 'pʋpʋɛɛ‑ ‑kʋ lä ‑mɔɔ kɔɔkɔɔ' ‑za nä, ɔ yi‑anyɩmɛ lä pana.

¹¹ Kwlienyɔɔ' 'Nägädöö nä, ɩɩ' ‑zä Laagɔ ‑sä'ä lä. 'Ɩɩ ‑zä n plöö‑ lä ʋʋ' lobho lobhonyɔ 'nɩ n bie lä ʋʋ' 'Nagadöö.

¹² ‑Nɩnɩ 'mɩɩ‑ ‑kä lä 'ŋnö 'nɩ, n nyɛnɩä lä 'nɩ n 'kuu lä 'mnö. Ɩ nö'ö ‑wʋ zoo 'kʋ ‑kä 'sɩɩ. ‑Ɔnöza bhää? Nyɩkpɔɔ' ‑lɔɔ n ŋʋʋ‑ lä 'naa pɔlötɛtɛɛ 'kʋ nä, n ‑yio. 'Nɩ n ‑yi 'sɩɩ sɔɔ nynä ‑mä, sä Kwlienyɔɔ nyɛɛ'ɛ lä nä, ɔ ‑kä 'tɛtɩ 'nɩ ɔ yi sɔɔ 'kʋ wloodä kʋ ‑aaa, 'nɩ ɔɔ' yi‑tanyɩɛ yi ŋëë.

¹³ Nä, ‑nʋawlɛnɛ 'fɩɩn n sonö‑ö lä nä, ‑n 'bhlünɩɛ 'sëploo 'kʋ. Zozi Klisö 'mnö pɔlötɛtɛɛ, ɩyä ‑mɔɔ' ‑wawʋʋ 'sɔ, ‑n klɩɩ sä 'nägäsä.

¹⁴ Cɩalɩɩ ‑n cɩä‑ lä nä, ɩ ‑glö cɩalɩɩ' 'nägälɩɩ nä ‑n wlui 'kʋ. Kplɔɔkplɔɔ‑wugɔɔ ‑a ‑kä lä 'mnö nä, ʋ yi‑i klää.

Timotee ‑yä Pɔlʋ 'sɔ 'pää ‑waawʋ

¹⁵ ‑Mɔɔ 'titi ‑n ‑yi sɔɔ nynä ‑mä, Aziibhlɩ 'kʋʋ 'cɔcɩnyʋa kwa ‑lefɩɩn ‑bha yiosä 'naa gbʋʋ'. Waa' nëëdëë' nyɩkpa‑ plöö‑ lä Fizɛlö ‑yä Yemozɛnö.

¹⁶ ‑Mä ‑ɔ plöö‑ lä bhelio Onezifɔɔ nä, ɔɔ' gbünyʋa, Kwlienyɔ yibhënʋwa ŋäzö! Onezifɔɔ nä, n ‑kʋ 'flɛ ‑jɩɛɛ' ‑säklöö 'mnö ‑mä, 'naa wälɩ 'nöɔ ‑wʋ zoo 'kʋ ‑kä. Ɔ yi 'futu 'futu ‑mää 'nɩ ɔ bhlüë'ë plɛɛ'.

¹⁷ Onezifɔɔ ‑yi lä 'gää Wlɔmʋduu' nä, kɔ ‑tänö'ö ‑aaa, 'nɩ ɔ nii'i.

¹⁸ 'Nɩ 'nää 'fɩɩn Onezifɔɔ ‑nʋ'ʋ lä ‑mɔɔ Efɛzɩduu' nä, ‑mɔɔ Timotee, ‑n yia 'nɩ ‑n ‑zi nyɩkpaa 'fɩɩn. Nä, Kwlienyɔ gbä ‑yä, 'Tite 'kädɛɛ' pläylʋʋ 'kʋ nä, Laagɔ yibhë Onezifɔɔ ŋäzö!

« Roimhe

Air adhart »

Wycliffe Bible Translators, Inc.

Lean sinn:

Ceanglaichean taic

Sanasan