2 Tesalonikö‑dunyʋä 3 - GOD - u2

Pɔlʋ lä 'cɔcɩnyʋa bhibhie
( Wlɔmʋ 15.30‑32 )

¹ N mʋ ylä bhlü ‑kää nä, bhelie ‑yä bhɛŋwnɩänyɩ‑, a bhibhie ‑anyɩa ‑za ‑yä Kwlienyɔɔ' ciciwälɩɩ 'kä 'fäfä nyɩkpa yëku ŋëë. Ɩyä sɩ ‑kʋ lä 'klʋkpää anyɩ nëëdë nä, ɩ 'kä 'sɩɩ sɔɔ 'klʋkpää kʋ 'kɔɔkɔ.

² A bhibhie 'sɩɩ ‑anyɩa ‑za ‑yä ‑abhlɛɛnyʋa ‑yä dëbënyʋa ‑a 'gwa nëë' ‑bha, ‑mä nyɩkpaa' fɩɩn wamää‑ ‑wʋ Laagɔwälɩɩ 'kʋ ŋoo!

³ Sä Kwlienyɔɔ ci lä nä, kɔ nʋ sɔɔ. Nä, ɔ yi'anyɩ 'tɛtɩ 'nyɛ 'nɩ ɔ yi'anyɩ 'kʋ wloo ‑yä Gbenyenyinyɔɔ‑ ka'anyɩ ‑kä 'kʋ ŋëë.

⁴ ‑A ‑kä pɔlötɛtɛ nynä ‑mä Kwlienyɔɔ' 'ŋnöö 'mnö, sä ‑a 'ylänö'anyɩ lä nä, ka nʋ sɔɔ. 'Nɩ a yi ‑lätee 'kɔɔkɔ sɔɔ nʋ.

⁵ Kwlienyɔɔ 'tie anyɩa' pɔlöö ‑yä ɔ gbä ‑yä a kään Laagɔɔ' ‑wawʋ ‑yä a yibhë Klisö 'bhisäkʋ ‑bɛɛsä.

Pɔlʋ lä 'cɔcɩnyʋa nʋ waa' 'wludää' lebhe

⁶ Bhelie ‑yä bhɛŋwnɩänyɩ‑, kä ‑a sonö'anyɩ lä Kwlienyɔ Zozi Klisöö' 'ŋnöö 'mnö nynä ‑mä, 'cɔcɩnyʋaa' ‑lʋa ‑kʋ lä 'zɛnɔɔ 'mnö nä, ɩyä ‑lʋa ‑waa 'gë ‑wʋ lä ‑anyɩa cɩalɩɩ 'kʋ nä, a ‑sʋwa gwë!

⁷ Sa 'kä lä ‑anyɩa 'sëploo 'kʋ 'gë ‑yä sa 'kä lä nää nä, a ‑yi sɔɔ 'nägäsä. A ni 'yi naa, ‑a ‑kʋ'anyɩ bhlä nëëdë nä, ‑aa bhɔɔ zɛɛ.

⁸ ‑Aa zlaa bhɔɔ nyɩkpɔ lülülʋʋ. ‑Aa kä bhlä anyɩa' nëëdëë' nyɩkpɔɔ' ‑gbaakʋ 'plö nä, kä 'kwlɩ kplɔɔ‑anyɩ 'nɩ ‑a ‑nʋ lebhe ‑gägäzëlü ‑yä 'sabo.

⁹ ‑A yi'anyɩ bhä dë 'tɛɛ 'nɩ a yi‑anyɩ bhä 'nyɛ ‑mä, kä ‑a ‑nʋ lä sɔɔ ‑yä a 'ka‑anyɩ 'sëploo 'kʋ 'bhlüü.

¹⁰ ‑Ɛɛɛ, 'tänyɩɩ ‑a ‑kʋ'anyɩ bhlä yëku nä, ‑a ‑sonö'anyɩ bhä nynä ‑mä nyɩkpɔ kä ‑lɔɔ ‑kʋ 'nɩ ɔ kä cii‑ nynä ‑mä ɔɔ' ‑lä lebhe nʋ nä, ‑lɔɔ' nyɩkpɔɔ nä, ɔɔ' lü ‑lä 'sɩɩ!

¹¹ ‑Bhlɛ ‑a nu nynä ‑mä anyɩa' nëëdë nyɩkpa ‑kʋ ‑mɔɔ 'nɩ wa zɛɛ‑ lebhee'. Wa mii‑ ‑wʋ lʋʋ nʋlɩ 'nɩ wälɩɩ' lɩɩ‑ wluwa ‑wʋ lä 'kʋ nä, ɩmɩ wa 'mänyɩ.

¹² ‑Lɔɔ' nyɩkpa‑cëa nä, Kwlienyɔ Zozi Klisöö' 'ŋnöö 'mnö, ‑a sonʋwa yɩ nynä ‑mä wa nʋ lebhe! Wa nʋ lebhe 'tänyɩɩ 'fɩɩn 'mnö ‑yä wa 'kä wa yëkuu' wlɩɩ' 'titii' lʋʋ lümʋ!

¹³ Anyɩ 'cɔcɩɩ' bhelia ‑yä bhɛŋwnɩa nä, aa' sɩä ‑lä 'nää nʋlɩ 'kʋ.

¹⁴ Kä nyɩkpɔ kä ‑lɔɔ ‑kʋ 'nɩ 'bɔɔgʋnʋ ‑a ‑jɩjlä lä nä, ʋʋ' 'mnö wälɩɩ ɔ 'nɩ 'klʋkpä 'ŋʋ nä, a gblɩmä ɔɔ' ‑za. A ‑yɔsɔɔ' nämnö ‑läyɩɔ 'kʋ ‑yä zoo 'kɔ 'bhlä.

¹⁵ Aa' klɔɔ lä nynä ‑zɔbhlɛgbänyɔ ‑mä, sä ɔ plöö‑ ylä a bheli nä, a fɔɔ nëkʋ!

'Nyupälɩ ‑yä bhlüüdää' bhää‑wälɩ

¹⁶ Kwlienyɔɔ, ‑ɔ plöö‑ lä 'kʋ wɔtɔlɩɩ' Kwlienyɔɔ nä, sɩ yi kʋmɔ ‑kʋmɔ ‑kaa nä, ɔ nyɩ'anyɩ 'kʋ wɔtɔlɩ 'kɔɔkɔɔ. Kwlienyɔɔ kʋ'anyɩ yëku, anyɩ 'fɩɩn!

¹⁷ ‑Amʋ Pɔlʋ, ‑amʋ 'titii‑ jɩlä lä 'bɔɔgʋnʋ. N bhänö'anyɩ! 'Naa 'bɔɔgwɩɩ 'fɩɩn n jɩjlä lä nä, 'sää n 'sänyɩnɩ lä. 'Sää n jɩjlä lä.

¹⁸ ‑Anyɩa Kwlienyɔɔ Zozi Klisöö' 'nyupälɩɩ ŋënö'anyɩ 'kʋ anyɩ 'fɩɩn!

« Roimhe

Air adhart »

Wycliffe Bible Translators, Inc.

Lean sinn:

Ceanglaichean taic

Sanasan