2 Tesalonikö‑dunyʋä 2 - GOD - u2

'Klünö yi 'fɩa 'plö 'nɩ Kwlienyɔɔ' yiylʋʋ yi ŋëë

¹ Bhelie ‑yä bhɛŋwnɩänyɩ‑, ‑anyɩa Kwlienyɔɔ Zozi Klisö nä, kɔ yi. 'Nɩ ɔ kä ‑yi nä, ‑a yio yëku 'wlu 'wlää nä, 'klüü ‑a 'ylänö'anyɩ ylä nä a ni yɩ ɩmɩ.

² Nyɩkpɔ ka'anyɩ ‑soo nynä ‑mä Kwlienyɔɔ' yiylʋʋ yä ŋëë nä, plɛɛ' belio'anyɩ ‑lä 'mʋ ‑mä a 'ŋʋ ‑mɔɔ plɛ. Nyɩkpɔ kä cii‑ nynä ‑mä Laagɔ‑ ŋʋ'ɔnyɩ nëë' 'nɩ ɔ cii nä, aa' laa ‑lɔɔ' wälɩɩ nyaasäsä. Wa yi 'sɩɩ ci nynä ‑mä ‑anyɩa nëë' ciciwälɩ ‑o, ‑ɔ, ‑anyɩ‑ ‑jɩjlɩɩ 'bɔɔgʋ ‑o, ‑lɔɔ' wälɩɩ nä, aa' lɩɩ ‑lä nyaasäsä.

³ Aa' ‑taa ‑lä nyɩkpɔ 'yi 'nɩ ɔ ka'anyɩ ‑kpläkplaa' 'cënänä mna. A ni 'yi naa, 'fɩa ‑yä Kwlienyɔɔ' yi‑tänyɩɛ 'kä ŋëë nä, nyɩkpaa ‑wa 'gä lä Laagɔɔ' 'yikʋ cɩcɩɔ nä, wa yi zumë. Bʋkʋ 'nɩ, gbenyenyinyɔɔ, ‑ɔ plöö‑ lä too too ‑zuzuu nä, ɔ yi 'sɩɩ ɔ yëku pana wɩa.

⁴ Gbenyenyi ‑zuzuyɩ nä, wälɩɩ 'fɩɩn ‑ɩ zɛɛ lä Laagɔ 'ŋnö nä kʋ ‑zʋɩ. 'Nɩ bʋbɔlɩɩ 'fɩɩn ʋʋ' 'yi 'mɩänɩ 'kʋ. Ɩ ‑kä 'ŋnö nä, ʋ yi nʋ ‑aaa 'nɩ Laagɔɔ' bʋbɔda ʋ yi ‑lɔɔ sä kʋ 'nɩ ʋ yi 'kükle bhütë nynä ‑mä, ʋmʋʋ‑ plöö‑ yɩ Laagɔ.

⁵ Anyɩ Tesaloniköduu' 'cɔcɩnyʋa nä, 'tänyɩɩ n ‑kʋ'anyɩ bhlä ‑lätee nëëdë nä, n ‑sonö'anyɩ wälɩnɩ 'fɩɩn nä, ka ‑bë bhä ‑a?

⁶ Wälɩklëa ‑a ‑kä lä 'ŋnö 'nɩ gbenyenyinyɔɔ bʋä lä 'nɩ ɔɔ' ‑läte lä ‑yi nä, a ya yɩ ‑pɛɛ yibhë. Kɩ plöö‑ lä nynä ‑mä, ɔɔ' 'tänyɩɛ kä ‑ŋëë nä, ɔ yi ɔ yëku pana.

⁷ ‑Mä ‑lɔɔ' gbenyenyi ‑zuzuu yä wɛzä ʋʋ' lebhee bhɔ. ‑Ɔ gbä lä 'nɩ ʋʋ' yi ‑wʋ lä 'yikʋ nä, ɔ yi 'fɩa ‑lɔɔ ‑bha.

⁸ Ɔ kä yɩ ‑lɔɔ ‑bha nä, ‑lɔɔ ‑tɛɛ 'mnö ‑nyunɔ ‑zuzuu 'kä lä ʋ yëku 'kʋ ghlaa wɩa. ‑Mä Kwlienyɔ Zozii kä ‑yi nä, ɔ yiu nyämʋ 'kʋ 'pä 'nɩ ɔɔ' nëë' nyämʋnʋ yiu nuë. Ɔɔ' yi‑tänyɩɛɛ' zëlüü' lielɩɩ yiu nuë.

⁹ 'Tänyɩɩ Gbenyenyii' ‑zuzuu 'kä ylä 'Dëvloo' 'päwa bhɛɛ ‑yä ʋ 'kä yi nä, ʋ yi 'yiziziogbɩ ‑yä ‑daminüü' nü nü nü nʋ ‑yä ʋ 'kä 'ylʋzɔkʋnyʋä 'nyigë.

¹⁰ Ʋ yi 'nyigëlɩ ‑bhutukpä 'mnö ghlää 'nɩ, 'ylʋzɔkʋnyʋa ‑wa mʋ lä too ‑kää nä, ʋ yiwa 'nyigë. ‑Ɔnöza bhää? ‑Nʋawlɛɛ‑ 'gwa bhlä ‑lɔɔ nëë' ‑sä nä, wa 'nɩɛ ‑wʋ 'kʋ ŋoo nä, 'ɩɩ ‑zä wa 'kä lä ‑too.

¹¹ Ɩmɩɩ‑ ‑kä lä 'ŋnö 'nɩ Laagɔ ‑lʋwa 'päwaa' laa‑ 'nyigë lä nä, ‑yä ‑kpläkplaa 'mä wa 'kä yɩ 'kʋ 'gë.

¹² Nä, nyɩkpaa 'fɩɩn‑ ‑wʋ lä ‑nʋawlɛɛ 'kʋ ŋoo‑ 'nɩ ‑wa ‑kʋ lä gbenyenyii 'mnö nä, Laagɔ yiwa gbäylɩ ‑sä.

'Cɔcɩnyʋaa' pɔlötɛtɛɛ see sä 'nägäsä
( 1 Pɩɛ 1.2‑9 )

¹³ Bhelie ‑yä bhɛŋwnɩänyɩ‑, anyɩmɔ Kwlienyɔɔ ‑waa lä kpänyɩ nä, ‑a ‑kä 'nɩ ‑a yi 'kɔɔkɔ Laagɔ 'ŋnu fään anyɩa' ‑za. Anyɩ‑ Laagɔ ‑sä lä tɛɛ nynä a 'kä ‑lɔɔ nëë' ‑bha. Kplɔɔkplɔɔ‑wugɔɔ' kplɔɔlɩɩ ‑yä anyɩa' pɔlötɛtɛɛ' ‑nʋawlɛɛ yi gbä 'nɩ a yi ‑lɔɔ nëë' bha.

¹⁴ 'Klünöö' ‑zä Laagɔ ‑ghlänö‑anyɩ lä 'kʋ 'nɩ ɔ laa'anyɩ lä, 'nɩ ‑a ‑sänö'anyɩ lä 'Nägädönö ‑yä ‑anyɩa Kwlienyɔɔ Zozi Klisöö' 'klʋagba, a 'ka 'mnö kʋmʋ.

¹⁵ Nä bhelie ‑yä bhɛŋwnɩänyɩ‑ a 'tɛmä 'mʋ. Ɩyä 'klüü ‑a cɩanö'anyɩ lä nëë' nä, ɩyä ‑lɩɩ ‑a ŋʋʋ‑ lä 'sɩɩ 'bɔɔgʋʋ' nä, a 'ŋʋɩ 'nägäsä 'wluu.

¹⁶ ‑Anyɩa Kwlienyɔ Zozi Klisö 'titi, ɔ ‑yä ‑a 'Bä Laagɔɔ‑ ‑wamänö‑anyɩ lä 'nɩ, plɛkʋmɛnɔɔ 'mnö ‑ɔ bhlü‑anyɩ lä 'kɔɔkɔɔ plɛɛ' 'nɩ ɔ 'tɛmänö‑anyɩ lä pleyii lä nä,

¹⁷ ɔ gbä ‑yä plɛ bhlü'anyɩ ‑yä anyɩa' nʋnʋgbɩɩ 'mnö, ɩyä anyɩa' ciciwälɩɩ 'mnö, a kään 'tɛtɩ ‑yä a nʋ 'kɔɔkɔ 'nää.

« Roimhe

Air adhart »

Wycliffe Bible Translators, Inc.

Lean sinn:

Ceanglaichean taic

Sanasan