2 Tesalonikö‑dunyʋä 1 - GOD - u2

Bhäälɩ

¹ Anyɩ Tesaloniköduu' 'cɔcɩnyʋa, anyɩmɔɔ‑ ‑kʋ lä ‑a 'Bä Laagɔ ‑yä Kwlienyɔɔ Zozi Klisö 'sɔ wlɩɩ' nä, ‑amʋ Pɔlʋ, n ‑yä Slivɛɛn ‑yä Timotee, ‑anyɩ‑ jɩjlä'anyɩ lä 'bɔɔgʋnʋ.

² ‑A 'Bä Laagɔ ‑yä Zozi Klisö ‑anyɩa Kwlienyɔɔ, wa pa'anyɩ 'nyu ‑yä wa nyɩ'anyɩ 'kʋ wɔtɔlɩ.

Kwlienyɔɔ yi 'ylʋzɔkʋnyʋä 'tite 'ŋʋ

³ Bhelie ‑yä bhɛŋwnɩänyɩ‑, ɩ ‑ŋwa 'kʋ nynä ‑mä ‑anyɩ, ‑a bhään 'kɔɔkɔ Laagɔ anyɩa' ‑za. ‑Ɛɛɛ, sä anyɩa' pɔlötɛtɛɛ 'ghlümë lä 'kɔɔkɔ nä, 'nɩ ‑wawʋʋ ‑ʋ ‑kʋ'anyɩ lä pää' nä ʋ 'ŋʋnöɔ lä 'kɔɔkɔ 'kʋ nä, ɩ ‑ŋwa 'zaazɩ 'kʋ nynä ‑mä ‑a bhään anyɩa' ‑za Laagɔ.

⁴ Anyɩa' kʋkʋsa 'mä ‑a ni lä 'yi, ɩmɩɩ‑ ‑kä lä 'ŋnö 'nɩ ‑a gbänö'anyɩ lä 'mʋ Laagɔɔ' 'cɔcɩgbüü 'mnö. ‑Ɛɛɛ, a nii‑ 'flɛ 'kwlɩkabhɩä ‑bhutukpä, 'nɩ a ‑nyɛnɩä kpänyɩ 'zaazɩ ‑mä plɛ nö'anyɩ ‑wʋ 'kpɔsɔ‑ 'nɩ a ‑kä 'kɔɔkɔ pɔlötɛtɛ.

⁵ ‑Nɩnɩ 'fɩɩn pana nynä ‑mä anyɩa' nyɛnɩälɩɩ' ‑za, Laagɔ yi anyɩa' 'yigëë‑tite plä ‑yä a 'kä ʋʋ 'Leyiduu 'mnö plämʋ.

⁶ ‑Ɛɛɛ, saa‑ gëë‑ lä 'yii nä, Laagɔ yi sɔɔ nʋ. ‑Wa ŋʋ'anyɩ lä ‑lɔɔ' nyäkälɩɩ 'mnö nä, Laagɔ yiwa 'sɩɩ nyäkälɩɩ' 'ŋʋ.

⁷ Anyɩmɔ 'kwlɩɩ kplɔɔ lä nä, Kwlienyɔ Zozii ‑yä ɔɔ' 'päwö‑kää ‑Laagɔzizii 'sɔ kä yɩ ŋɔkʋ 'kʋ ‑ghlä nä, ɔ yi'anyɩ 'kʋ wɔtɔlɩ 'nyɛ.

⁸ Nyɩkpaa ‑wa ‑wʋ lä Laagɔ ‑yi 'nɩ, ‑anyɩa Kwlienyɔɔ Zozii' 'Nägädöö ‑waa 'ŋʋɩ ‑wʋ lä 'klʋkpää' nä, ɔ yi ŋnäŋnä ‑kosu‑düdëa 'mnö yii, 'nɩ ‑lɔɔ' nyɩkpa‑cëa ɔ yiwa gbäylö ‑sä.

⁹ Kɔ 'kwa nuë 'kɔɔ ‑yä 'kɔɔ ‑za. Wa yio 'yikʋ ‑bha 'kwläkwlä, 'nɩ wa yi ɔɔ' 'klʋagba gwë ‑sä fɛɛn.

¹⁰ 'Ylʋʋyɩ 'kʋ nä, Kwlienyɔɔ yi yi 'nɩ nyɩkpa 'fɩɩn‑ plöö‑ lä ɔɔ' lʋä 'nɩ ‑wa ‑kä lä ɔɔ' pɔlötɛtɛ nä, wa yi ɔɔ' kʋkʋsaa 'yi 'ni, 'nɩ wa yio 'klʋkpää' 'ŋʋ, 'nɩ wa yio 'sɩɩ 'ŋnu fään. ‑Lɔɔ' nyɩkpaa nä, anyɩ 'titi, a yiwa nëëdë kʋmʋ. ‑Ɔnöza bhää? 'Tänyɩɩ ‑a ‑sänö'anyɩ lä Kwlienyɔɔ' 'Nägädöö nä, ka ŋoonɩ.

¹¹ ‑Nɩnɩ 'mɩɩ‑ ‑kä 'ŋnö 'nɩ ‑a bhibhie lä 'kɔɔkɔ Laagɔ anyɩa' ‑za. ‑Anyɩa Laagɔɔ‑ gbä ‑yä anyɩa' ‑laagɔ‑zëkpëa nää ʋʋ' pɔlösaa. Laagɔ gbä 'sɩɩ ‑yä 'nää 'fɩɩn a tään lä nä, a 'nia ‑yä anyɩa' pɔlötɛtɛɛ' nʋnʋgbɩɩ 'plöö 'kʋ.

¹² ‑Nɩnɩ yi gbä 'nɩ ‑anyɩa Kwlienyɔɔ Zozii, nyɩkpa yio 'ŋnu fään anyɩa' ‑za. 'Nɩ ɔmɔ ‑mä 'sɩɩ, ɔ yi gbä 'nɩ, wa yi'anyɩ 'ŋnu fään. ‑Nɩnɩ 'fɩɩn nä, ‑anyɩa Laagɔɔ ɩyä Kwlienyɔɔ Zozi Klisöö' ‑bɔɔ 'nɩ ɩ 'kä lä sɔɔ kʋ 'plö.

« Roimhe

Air adhart »

Wycliffe Bible Translators, Inc.

Lean sinn:

Ceanglaichean taic

Sanasan