Bìoball air-loidhne

2 Kolɛtɩ‑dunyʋä 9 - GOD - u2

Kä Laagɔ ‑waa nyɩkpɔɔ' lɔɔ ‑ɔ 'nyɛɛ lä plɛkʋmɛnɔɔ' nä

¹ Kwänɩsɩɛ ‑a sä lä Zolizalɛmʋduu' 'cɔcɩnyʋa ‑za nä, nn' yɩɔ ‑kä 'nɩ n 'kanyɩ 'fɩa jɩjlä nynä a bʋʋmʋɛ.

² N ‑yi sɔɔ nynä ‑mä ka ‑ghlɩlɩ 'kɔɔkɔ ɛɛ' ‑za. 'Nɩ 'tänyɩɩ n ‑kʋ bhlä ‑lätee Masedʋanöbhlɩ 'kʋ nä, kä n gbänö'anyɩ bhä 'mʋ ɛɛ' ‑za. N sonʋwa bhä nynä anyɩ Akayii‑bhlɩɛ 'mnö 'cɔcɩnyʋa nä, a ‑ghlɩlɩ wɛzä too too ‑mɔɔ klëë' 'ylʋba 'mnö nynä a yi anyɩa' kwänɩsɩɛ ‑lä. 'Nɩ sä a 'kökanɩ lä 'kʋ nä, ɩ ‑gbä 'nɩ Masedʋanöö' 'cɔcɩgbü ‑bhutukpä nʋ yɩ anyɩ 'bhisäkʋ.

³ Nä sä ‑a ‑täkpɔnö'anyɩ ylä 'mʋ nä, ɩmɩɩ‑ ‑kä 'ŋnö 'nɩ n ‑lobho lä bhelia anyɩ yëku. Ɩyä a 'kä ‑ghlɩlɩ ‑yä, sä n cii‑ lä anyɩa' ‑za nä, a 'kä 'zaazɩ sɔɔ nʋ.

⁴ N ‑yä ‑mää Masedʋanöö' 'cɔcɩnyʋä 'sɔɔ‑ 'ganyɩ bhlä 'yi 'ni kää yi. ‑Mä sä ‑a 'tɛnö'anyɩ lä dë nä, a 'nö sɔɔ ‑ghlɩlɩ nä, ɩ yi ‑anyɩa zoo nʋ, 'nɩ ɩ yi 'sɩɩ anyɩa' zoo nʋ.

⁵ Ɩmɩɩ‑ ‑kä 'ŋnö 'nɩ n ‑bhobho lä nynä ‑mä, 'fɩa ‑yä n ‑yä nyɩkpa 'kanyɩ ‑mɔɔ 'yi 'ni kää yi nä, ɩ ‑ŋwa 'kʋ nynä ‑mä n lobho bhelia ‑yä wa yi'anyɩ 'fɩa 'yi 'ni kää. Ɩyä kwänɩsɩɛ a cii‑ lä nynä ‑mä a yi bhä bʋʋ nä, wa 'kä ɛɛ' wälɩɩ wlɩɩ' klää 'nägäsä. Ɩ kä yɩ sɔɔ ‑nʋɔ 'nɩ n kä ‑yi nä, ɩ yi pana nynä ‑mä 'zaazɩ, anyɩa' plɛkʋmɛnɔɔ 'mnö a ‑bʋʋ 'nɩ a nii‑ lä ‑lɔɔ' kwänɩsɩɛ ‑mä, nyɩkpɔ‑ nö'anyɩ ‑wʋ 'fɩa 'kʋ ‑gbä nynä a ‑sɛɛ.

⁶ ‑Mä a ni 'yi naa, nyɩkpɔɔ' lɔɔ‑ goo lä 'pɛpɛ nä, 'pɛpɛ ɔ ni. 'Nɩ nyɩkpɔɔ' lɔɔ‑ goo lä ‑vlu nä, ɔ ni ‑vlu.

⁷ Nä, nyɩkpɔ nyɩkpɔɔ' sä ɔ ŋʋɩ‑ lä ‑mɔɔ ɔɔ' pleyii nynä ‑mä ɔ yi ‑sä nä, plɛɛ' belio ‑lä 'mʋ ‑yä waa' klɔɔ ‑lä 'sɩɩ 'fɩa kutu kutu ‑yä ɔ 'kä 'nyɛ. ‑Mä nyɩkpɔɔ' lɔɔ ‑ɔ 'nyɛɛ lä pleyii ‑jäkaa 'mnö nä, kä Laagɔ ‑wɔɔ.

⁸ Nä Laagɔ yi mii 'nɩ ʋ yi'anyɩ 'nää bhutukpä 'kʋ kwlie. Saa 'fɩɩn a tään lä nä, a yi sɔɔ 'ni ɩyä a 'kä 'kɔɔkɔ lɩ kään ‑yä a 'kä 'nää bhutukpä nyɩkpa nʋ.

⁹ Laagɔ‑bɔɔgʋʋ cii‑, ʋ lä Laagɔ nä kʋ nyɛ Ʋ nyɛ ŋäzönyʋä 'nää, 'Nɩ ʋʋ 'nägägbɩɩ ‑kʋ 'kɔɔkɔɔ ‑za.

¹⁰ Nä Laagɔɔ ‑ʋ nyɛ lä ‑lɛɛgonyɔ gogolɩɩ 'nɩ ɔ goo lä nä, 'nɩ ‑ʋ nyɩɔ lä lülülɩɩ 'nɩ ɔ lü lä nä, ʋ yi gbä 'nɩ anyɩa' gogolɩɩ yi zumë. 'Nɩ sä anyɩa' nʋnʋgbɩɩ gëë‑ lä 'yi nä, Laagɔ yi gbä 'nɩ ɩ yi 'bhü tlʋ kpänyɩ.

¹¹ Laagɔ yi gbä 'nɩ ‑nɩnɩ 'fɩɩn 'mnö, a yi lɛkäänyʋä 'plö. Ɔnö ‑za bhää? A 'kä lɩ kään ‑yä anyɩa' plɛkʋmɛnɔɔ 'mnö, a 'kä nyɩkpa klää. Ɩ yi gbä 'nɩ, ‑lɩɩ a sä 'nɩ ‑a fä lä, bhutukpä yii 'gë 'ŋʋʋ 'nɩ wa yi Laagɔ 'ŋnu fään.

¹² Nä, anyɩa' kwänɩsɩɛ nä, kɛ klää 'cɔcɩnyʋa, 'nɩ ɛ gbä 'sɩɩ 'nɩ wa fään kpänyɩ Laagɔ 'ŋnu.

¹³ Nä anyɩa' 'nyɛlɩɩ 'mnö, ka pana lä nynä ‑mä, Klisöö' 'Nägädöö ka ŋʋɩ 'zaazɩ 'klʋkpä. Anyɩa' plɛkʋnanɔɔ 'mnö nä, Zolizalɛmʋduu' 'cɔcɩɛ, ɩyä 'cɔcɩnyʋa 'fɩɩn, ka ‑yʋwa 'sɔ 'jɛnyɩ ylä. ‑Nɩnɩ yi gbä 'nɩ wa yi Laagɔ 'ŋnu fään.

¹⁴ Ɩ yi 'sɩɩ gbä 'nɩ anyɩa' wälɩ yiwa 'tʋ kamä. 'Nɩ sä Laagɔ gbä 'nɩ a ni lä 'nää bhutukpä nä, wa yi 'sɩɩ anyɩa' 'wlu bhibhie.

¹⁵ Nä 'klʋagba ŋëë Laagɔ! 'Zaazɩ, 'nää ʋ nyɛ lä nä, aa' ‑wʋ nyäkasä ‑kä!

« Roimhe

Air adhart »

Wycliffe Bible Translators, Inc.

Lean sinn:

Ceanglaichean taic

Sanasan