Bìoball air-loidhne

2 Kolɛtɩ‑dunyʋä 8 - GOD - u2

Masedʋanöbhlɩ 'kʋ 'cɔcɩnyʋa wa bʋʋ 'kwänɩsɩ Zolizalɛmʋduu' 'cɔcɩnyʋaa' ‑za
( Wlɔmʋ 15.25‑27 ; 1 Kolɛ 16.1‑4 )

¹ Bhelie ‑yä bhɛŋwnɩänyɩ‑, Masedʋanöbhlɩ 'kʋʋ 'cɔcɩgbüü 'mnö 'nää Laagɔ ‑nʋ lä ‑mɔɔ nä, ‑a ‑waa nynä ‑mä a yibhënöa.

² ‑Mɔɔ 'cɔcɩnyʋa nä, wa nii‑ 'kwlɩkabhɩä ‑bhutukpä ‑mä, wa ‑kä 'kɔɔkɔ ‑pʋpɛ. 'Nɩ waa' ‑pʋpɛɛ 'mnö nä, wa nyɩ‑anyɩ kpänyɩ 'nää. ‑Bhlɛ waa' ŋäzöö' ‑wʋ 'kʋ mʋsä ‑kä.

³ ‑Ɛɛɛ, n yi waa' ‑dläfʋɛ lü. Wa nyɛɛ‑ sä wa yi bhlä mii nä. 'Nɩ wa nyɛɛ‑ 'sɩɩ 'nɩ wa 'tɔtɔ‑ nëkʋ. ‑Bhlɛ nyɩkpɔ 'nʋwa bhɔɔ ‑soo 'nɩ wa ‑gbään plɛkʋ 'nɩ wa nyɛɛ‑ lä.

⁴ Kä wa ‑bhibhie‑anyɩ kpänyɩ nynä kwänɩsɩɛ 'cɔcɩgbüü bʋʋ lä Zolizalɛmʋʋ 'cɔcɩnyʋaa' ‑za nä, wa 'kɛ bʋʋmʋ.

⁵ 'Nɩ wa nyɛɛ‑ 'zaazɩ. 'Nɩ sä ‑a bhobhonʋwa bhlä 'mʋ nä, wa mɩä‑ ‑lɔɔ 'kʋ. ‑Ɛɛɛ, wa nyɛɛ‑ 'fɩa wa yëku Kwlienyɔ 'wlɩɩ, 'nɩ wa yi‑anyɩ lä wa yëku wlɩɩ' 'nyɛ. Sä Laagɔ ylä bhlä nä sɔɔ wa ‑nʋ lä.

Titö ‑mʋ Kolɛtɩduu' kwänɩsɩɛɛ' bʋlɩɩ' ‑za

⁶ Ɩmɩɩ‑ ‑kä lä 'ŋnö 'nɩ ‑a ‑soo lä bheli Titö nynä ɔ yi'anyɩ yëku ‑yä, 'klüü ɔ yä bhɛ lä Zolizalɛmʋduu' 'cɔcɩnyʋaa' ‑za bhɔ nä, ɔ 'kɩ ‑zɔɔ bhɩä.

⁷ Anyɩ Kolɛtɩduu' 'cɔcɩnyʋa nä, ‑lɩɩ 'fɩɩn 'mnö nä, anyɩ, a nii‑ 'nää kpänyɩ. A ‑kä pɔlötɛtɛ, 'fɩa 'nɩ a ‑yi cisä, 'nɩ a ‑yi Laagɔ yëkuu' wälɩ ‑bhutukpä. 'Nɩ a ‑ghlɩlɩ 'kɔɔkɔ ‑Laagɔ‑lebhee' ‑za. 'Nɩ a ‑yi bʋkʋ 'nɩ a ‑kä lä ‑anyɩa ‑wawʋ. ‑Nɩnɩ 'fɩɩn ‑kä 'ŋnö 'nɩ ‑a ylä lä nynä ‑mä Zolizalɛmʋduu' 'cɔcɩnyʋaa' kläälɩɩ' 'kwänɩsɩɛ a bʋmʋɛ 'sɩɩ kpänyɩ.

⁸ 'Nn kla'anyɩ ‑wʋ kutu kutu nynä ‑mä a 'nyɛ. ‑Mä 'yigädadi 'kʋʋ 'cɔcɩgbüü sɩ 'köka 'nɩ ɩ bʋʋ lä nä, ɩɩ' ‑zä n sonö'anyɩ lä ‑yä a 'kä ‑kä 'sɩɩ pana nynä ‑mä a ‑kä 'zaazɩ ‑wawʋ.

⁹ Sä ‑anyɩa Kwlienyɔɔ Zozi Klisö nyɛ lä nä, a ‑yi sɔɔ. Ɔmɔ mɔɔ ‑ɔ ‑kä bhlä lɩ nä, kɔ ‑sä yëku 'nɩ ɔ nyɛɛ‑. 'Nɩ ɔ yi ŋäzönyɔɔ' 'plöö anyɩa' ‑za. Kɔ ‑nʋ lä sɔɔ ‑yä, ɔɔ' ŋäzöö 'kä yɩ gbä ‑yä a 'kä lɛkäänyʋä 'plö.

¹⁰ Sä n nii lä 'yi nä, sɔɔ n cii ‑klä ‑ɛɛn! 'Ylʋbaa ‑a plöö‑ lä nä, amä 'mnö, anyɩ‑ nyɛɛ‑ bhlä tɛɛ. Anyɩ 'titi ‑gbään plɛkʋ 'nɩ a ‑bʋʋ bhlä Zolizalɛmʋduu' 'cɔcɩɛɛ ‑za, nä aa' ‑sä lä ‑lɔɔ wlɩ.

¹¹ Nä ‑pɛpɛɛ nä, sa cie‑ lä 'kʋ plɛkʋmɛnɔɔ 'mnö nä, a bhɩä yɩ sɔɔ ‑zɔɔ. Sa yi lä 'zaazɩ mii nä, a 'nyɛ sɔɔ.

¹² Nyɩkpɔ kä plɛkʋmɛnɔɔ' 'nyɛɛ nä, ‑lʋʋ ɔ nyɛ lä nä, kä wa tlʋʋ wlɩ. Waa' 'ylänöɔ ‑wʋ ‑lʋʋ ɔɔ' ‑wʋ lä ‑kä nä.

¹³ ‑Anyɩ, ‑aa tään ‑wʋ nynä ‑mä ‑a 'ganyɩ ŋäzö 'kʋ kwlie ‑yä, ‑a 'gä 'yigädadää' nyɩkpa klä. ‑Mä ɩ 'kä sɔɔ nʋɔ ‑yä ‑a 'gä säbhlo ‑säbhlo kään.

¹⁴ Nä 'tänyɩnɛ 'mnö lʋʋ a kä ‑kä 'nɩ ‑ʋ gä kpänyɩ ‑zu nä, a mii ‑yä a ‑sʋʋ 'kʋ ‑yä a 'nyɛ. 'Nɩ nyɩkpaa' ‑lʋwa ‑wʋ lä ‑kä nä, a ‑kä 'nɩ a yiwa klää. 'Nɩ 'tänyɩ kä ‑lɔɔ ‑kʋ 'nɩ anyɩ ‑mä 'sɩɩ a 'nö lʋʋ ‑kä nä, lʋʋ wa kä ‑kä 'nɩ ʋ gä kpänyɩ ‑zu nä, wamä ‑mä 'sɩɩ, wa yiu 'kʋ ‑sä 'nɩ wa yi'anyɩ klää ‑yä a 'kä ‑kä 'sɩɩ säbhlo ‑säbhlo kään.

¹⁵ Laagɔ‑bɔɔgʋʋ sonö‑anyɩ nynä ‑mä, ‑Ɔ ‑kä bhlä kpänyɩ nä, Ɔɔ' 'mɩä bhɔɔ 'kʋ. 'Nɩ ‑ɔɔ bhɔɔ lä kpänyɩ ‑kä nä, Ɔɔ' bɔɔ bhɔɔ lʋʋ.

Titö ‑yä nyɩkpa 'sɔ nää

¹⁶ Nä Laagɔ ‑tɛɛ ‑kä lä bhää‑wälɩ. 'Klüü ‑lɩɩ Laagɔ ŋʋʋ‑ bhlä 'na plɛɛ 'yii anyɩa' ‑za nä, ɩmɩ Laagɔ ŋʋʋ‑ lä 'sɩɩ bheli Titö pleyii 'nɩ ɔ nʋ'anyɩ lä nëëdë.

¹⁷ Sä ‑a 'ylää‑ lä Titö nynä ɔ nʋ nä, ɔ ŋoo‑ sɔɔ 'kʋ. 'Nɩ ɔmɔ 'titi ‑gbään plɛkʋ 'nɩ, ɔ 'sipo ‑sipo 'kʋ 'nɩ ɔ yi'anyɩ lä ‑mɔɔ yëku yi.

¹⁸ Bhelio ‑ɔnö wälɩɩ wa ci lä, 'nɩ 'cɔcɩgbüü 'fɩɩn fään lä 'ŋnu Kwlienyɔɔ' 'Nägädöö bielɩɩ' ‑za nä, kä Titö ‑yɔsɔ yi'anyɩ lä ‑mɔɔ yëku.

¹⁹ Bhelio nä, 'cɔcɩgbüü yɔ ‑sä nynä ɔ ‑yanyɩ 'sɔ nää ‑yä ‑a 'gä 'kwänɩsɩɛ 'wlu 'wlää. Kwlienyɔɔ' 'klʋagbaa' ‑zä ‑a nʋ lä sɔɔ, ɩyä 'nägägbɩɩ ‑ɩ ‑kʋ lä ‑mɔɔ ‑anyɩa pɔlöö 'yi nä, ɩ 'kä 'sɩɩ nʋɔ.

²⁰ Moniibhëë' ‑tëbhu wa nyɩ‑anyɩ lä. Nä, kä ‑a nʋ lä sa 'fɩɩn ‑yä nyɩkpɔɔ' ka‑anyɩ ‑kä wälɩklë yëku fä.

²¹ Laagɔ dëlü nä, sää‑ yi lä 'nää 'plö, ɩyä nyɩkpa 'yikʋ sää‑ yi lä 'sɩɩ 'nää 'plö nä, sɔɔ ‑a tään lä.

²² Bhelia ‑a ‑lobho lä nä, ‑a ‑gbɩwa 'sɩɩ 'yigädalɔɔ 'kʋ. Ɔ ‑glö nyɩkpɔɔ' lɔɔ‑ ‑ɔnö plɛɛ ‑kʋ lä kpänyɩ 'cɔcɩnyʋaa' kläälɩ 'kʋ nä. Ɔ ya‑anyɩ sɔɔ 'ci bhutukpä pana. 'Nɩ ɔ ylä ‑lätee nynä ‑mä ɔ 'kä nyɩkpa klää, 'nɩ ɔ 'tɛnö'anyɩ 'sɩɩ kpänyɩ dë.

²³ Titö nä, ɔ ‑glö 'naa 'kʋnämʋnyɔɔ' lɔɔ n ‑yɔsɔ nʋʋ lä ‑Laagɔ‑lebhe 'kʋ ‑mɔɔ anyɩ nëëdë nä. ‑Mä bhelia ɔ ‑yʋwa 'sɔ nää‑ lä nä, 'cɔcɩgbüü 'mɩɩ‑ ‑lobhuwa lä. Lebhee' ‑lɛɛ wa nʋ lä nä, Klisöö' 'klʋagbaa ‑zä wa nʋɛ lä.

²⁴ Nä a panʋwa nynä ‑mä ‑wawʋ 'titi a ‑kä. Ɩyä 'klüü ‑ɩ ‑kä lä 'ŋnö 'nɩ ‑a täkpɔnö'anyɩ lä 'mʋ nä, wa 'kɩ 'yi 'ni.

« Roimhe

Air adhart »

Wycliffe Bible Translators, Inc.

Lean sinn:

Ceanglaichean taic

Sanasan