Bìoball air-loidhne

2 Kolɛtɩ‑dunyʋä 7 - GOD - u2

¹ Laagɔ cii‑ ylä nynä ‑mä ʋ yi‑anyɩ ‑nɩnɩ 'fɩɩn 'nyɛ nä, 'naa ‑wawanyʋänyɩ‑, ‑lɩɩ 'fɩɩn ‑ɩ yi bhlä ‑anyɩa 'yɛkɛɛ ‑yä ‑anyɩa 'wugɔɔ pee plaa nä, ɩ ‑ŋwa 'kʋ nynä ‑mä ‑a ‑sɩɩ ‑a yëku yëku ‑yä ‑a 'gä kplɔɔ. ‑A nʋ saa 'fɩɩn ‑yä ‑a kplɔɔ ‑yä ‑a 'ŋʋ Laagɔɔ 'klʋkpää.

Pɔlʋʋ' pleyii ‑kʋ ‑jäkä

² A bhɛnönö‑anyɩ anyɩa' pɔlöö 'yii ‑mä ‑aa ‑wʋ nyɩkpɔ nyenyi ‑nʋ. ‑Aa ‑wʋ nyɩkpɔɔ' lʋʋ ‑nyima, 'nɩ ‑aa ‑wʋ 'sɩɩ nyɩkpɔ 'kʋ ‑lü.

³ ‑Nɩnɩ n ci lä nä, n yɩ wɛzä ci. 'Nɩ nn' cii ‑wʋ ‑yä n 'kanyɩ gbʋ klaa. ‑Mɔɔ ‑anyɩa pɔlöö 'yii nä, ka känö‑anyɩ gbʋ. ‑A yi 'ku ‑o, ‑a yi zëkpë 'kʋ kʋ ‑o, ka känö‑anyɩ gbʋ.

⁴ N 'tɛnö'anyɩ dë kpänyɩ, 'nɩ n täkpɔnö'anyɩ 'mʋ. 'Nɩ nyäkälɩnɩ 'fɩɩn n ‑kʋ lä nëëdë nä, n ‑kʋɩ 'mnö ‑mä n ‑kä 'sɩɩ 'tɛtɩ kpänyɩ, 'nɩ 'naa pleyii ‑jäkaa 'mɩä 'kʋ.

Pɔlʋ ‑kʋ Masedʋanöbhlɩ 'kʋ

⁵ 'Tänyɩɩ ‑a ‑ŋëë lä Masedʋanö‑bhlɩɛ 'mnö nä, ‑aa ‑wʋ 'sää 'casɩpɛ ‑a 'gä 'kʋ ‑wɔtɔ. Kä ‑a nii‑ nyäkälɩ ‑bhutukpä. Daa 'fɩɩn nä, nyäkälɩ binö‑anyɩ bhä 'kʋ, 'fɩa 'nɩ ‑ŋänö ‑kʋ‑anyɩ bhä 'sɩɩ pleyii.

⁶ Nyɩkpɔɔ' lɔɔ plɛ 'kpɔsɔ lä nä, Laagɔ‑ nyɩɔ lä 'tɛtɩ. Nä, 'tänyɩɩ bheli Titö ‑yi ylä nä, kä ‑anyɩa pɔlöö ‑bhlü yɩ.

⁷ 'Nɩ Titöö' yilɩɩ ‑bhlo 'nö‑anyɩ ‑wʋ plɛɛ' ‑bhlüa, ‑mä anyɩa' sä a ‑bhlüo lä plɛɛ' nä, sɔɔ ‑kʋmʋ 'sɩɩ. Ɔ ‑sonö‑anyɩ nynä ‑mä 'naa 'tʋ bhla'anyɩ bhä kpänyɩ. 'Nɩ ɔ ‑sonö‑anyɩ 'sɩɩ sa tu lä 'nɩ a bhlää lä kpänyɩ 'kʋ 'naa ‑za nä. Ɔ cii‑ lä sɔɔ nä, kä 'naa pleyii ‑jäkaa ‑zumë bʋkʋ.

⁸ Nä, 'naa 'bɔɔgʋʋ n jɩjla'anyɩ la nä, ʋʋ 'mnö wälɩɩ ka'anyɩ yëkuu kamä nä, ɩɩ' belie'e ‑wʋ plɛɛ'. ‑Mä 'tänyɩɩ n ‑yibhë lä sɔɔ nynä ‑mä kɩ ‑kamänö'anyɩ yëkuu' nä, ‑lɔɔ ‑tɛɛ plɛ belio'o lä 'pɛpɛlɩä 'mʋ.

⁹ ‑Mä ‑pɛpɛɛ nä, ɩ ŋʋʋ'ʋ yɩ ‑jäkä pleyii. ‑Ɛɛ ‑wʋ nynä ‑mä sɩ ‑kamänö'anyɩ yëkuu nä, ɩɩ' ‑zä n ci 'sɔɔ. ‑Mä sɩ ‑kamänö'anyɩ lä yëkuu' 'nɩ ɩ ‑gbä 'nɩ a 'cɩcɩɩ‑ lä anyɩa' nʋnʋsaa nä, ɩ ŋʋʋ‑ 'naa pleyi ‑jäkä. Sä Laagɔ tään bhlä nynä ‑mä ɩ kamänö'anyɩ yëkuu nä, sɔɔ ɩ plöö‑ lä 'kʋ ‑mä, ‑a nö'anyɩ ‑wʋ wälɩklü ‑nyënyë ‑nʋ.

¹⁰ Wälɩklë kä nyɩkpɔ yëkuu' kamä Laagɔ dëlü nä, kä ‑lɔɔ' wälɩklëa gbä 'nɩ ‑lɔɔ' nyɩkpɔɔ 'cɩcɩ, 'nɩ ɔ bha ‑lɔɔ nëë'. ‑Lɔɔ' wälɩɩ' belie ‑wʋ plɛɛ'. ‑Ɔnöza bhää? ‑Mää 'ylʋzɔɔ nä, wälɩklë kamä nyɩkpɔ yëkuu' 'nɩ a nʋ ɔɔ' 'kwiee.

¹¹ A ni 'yi ‑a! Sä Laagɔ ‑gbä 'nɩ ɩ ‑kamänö‑anyɩ lä yëkuu 'nɩ anyɩa' zëkpëa yä lä 'kʋ 'plöö nä, a ni yɩ sɔɔ 'yi ‑a! A ‑gbään yɩ ‑pɛɛ plɛkʋ. 'Nɩ ɩ ‑ka'anyɩ yɩ 'sɩɩ zoo 'kʋ. Ɩ kamänö'anyɩ yɩ ‑pɛɛ yëkuu', 'nɩ a gu yɩ 'sɩɩ. Ka tään yɩ ‑pɛɛ nynä a kä'ä 'yi 'ni. 'Nɩ a tään yɩ ‑pɛɛ 'sää 'titi nynä ‑mä gbenyenyii' nʋɔ ‑läyɩɔ. 'Nɩ wälɩɩ 'fɩɩn‑ plöö‑ lä 'kʋ nä, a yä pana nynä ‑mä, a 'nɩ ‑bhɔɔ 'mnö ‑kʋmʋ.

¹² Nä, n ‑jɩjlä'anyɩ lä nä, ɩɩ' ‑wʋ plöö‑ nynä ‑mä, ‑ɔ ‑nʋ bhlä ‑lɔɔ' gbenyenyii nä, ɔɔ' ‑zä n ‑jɩjlä. 'Nɩ ɩɩ' ‑wʋ 'sɩɩ plöö‑ nynä ‑mä, nyɩkpɔɔ' ‑lɔɔ gbenyenyii ‑ŋëë lä nä, ɔɔ' ‑zä n ‑jɩjlä'anyɩ. ‑Mä, kä n tään lä nynä n 'kä Laagɔ dëlü pana nynä ‑mä ka ‑ghlɩlɩ bhä 'kɔɔkɔ ‑anyɩa' ‑za.

¹³ A ni ‑nɩnɩ 'mɩɩ‑ nyɩ‑anyɩ lä 'tɛtɩ. 'Nɩ ‑ɛɛ ‑wʋ 'sɩɩ ɩmɩ ‑bhlo, ‑mä ‑jäkaa ‑a ‑kʋ lä bheli Titö pleyi nä, a ‑gbä 'nɩ ‑anyɩa plɛ yä bhlü. ‑Ɛɛɛ, anyɩ 'fɩɩn, anyɩa' ‑bɔɔ lä 'nɩ Titöö' plɛ yä lä bhlü.

¹⁴ Bheli Titöö' 'klʋ 'nɩ n ‑täkpɔnö'anyɩ 'mʋ. 'Nɩ n ‑täkpɔnö'anyɩ lä 'mʋ nä, a nö'ö ‑wʋ 'sɩɩ zoo bhlaa‑. ‑Mä sä ‑a sonö'anyɩ lä 'kɔɔkɔ ‑nʋawlɛɛ nä, 'klüü ‑lɩɩ ‑ɩnözä n täkpɔnö'anyɩ bhlä 'mʋ bheli Titö 'yikʋ nä, ɩ plöö‑ yɩ 'zaazɩ ‑nʋawlɛ.

¹⁵ Ɔ lüë yɩ anyɩa' dä 'kʋ. Sä a ŋʋɔ‑ lä 'klʋkpää 'nɩ, yëku tɩtɛnö'anyɩ bhlä ɔɔ' klälɩɩ' ‑za nä, ɔ kä ‑lɔɔ 'klüü plɛkʋ 'pä nä, ka anyɩa' ‑wawʋ zumënöɔ bʋkʋ pleyii kpänyɩ.

¹⁶ Naa, sä n yi'anyɩ lä ‑lɩɩ 'fɩɩn 'mnö dë 'tɛɛ nä, ɩ ŋʋ'ʋ ‑jäkä yɩ pleyii.

« Roimhe

Air adhart »

Wycliffe Bible Translators, Inc.

Lean sinn:

Ceanglaichean taic

Sanasan