Bìoball air-loidhne

2 Kolɛtɩ‑dunyʋä 6 - GOD - u2

¹ ‑Anyɩmɔɔ‑ ‑yä Laagɔ 'sɔ nʋʋ lä 'kʋ nä, ka ‑a sla'anyɩ lä 'wlu. 'Nää ‑laa Laagɔ ‑nʋ'anyɩ lä nä, a 'nä plänöa ‑lä yɔlʋ 'kʋ.

² A ni sä Laagɔ cii‑ lä nä, ʋ lä ‑Naa bhibhie nä, 'Tänyɩɛ 'mnö ɩ ‑ŋwa lä 'kʋ nynä ‑mä n ŋonɩɛ 'kʋ nä, ‑Lɔɔ kä ‑ŋëë 'nɩ n ŋonɩɛ lä 'kʋ. 'Tänyɩɛ 'mnö ɩ ‑ŋwa lä 'kʋ nynä ‑mä n ‑sää‑ä ‑lɔɔ nëë' nä, ‑Lɔɔ' 'tanyɩɛ kä ŋëë 'nɩ n ‑sää‑ä lä ‑lɔɔ nëë'. ‑Ɛɛɛ, ‑pɛpɛɛ nä, ‑lɔɔ' 'tänyɩɛ yä ŋëë. ‑Lɔɔ nëë' ‑bhalɩɩ ylʋʋ ‑yä ŋëë.

³ ‑Anyɩa lebhee ‑a ‑yä lä nʋ nä, ‑aa 'ylä ‑wʋ nynä ‑mä nyɩkpa 'ninɩɛ 'foclo 'mnö. Ɩ ‑kä 'ŋnö nä, ‑aa 'ŋʋ ‑wʋ nyɩkpɔ 'kwlɩkabhɩää'.

⁴ ‑Anyɩa nʋnʋgbɩɩ 'fɩɩn 'mnö nä, kä ‑a pana lä nynä ‑mä, Laagɔɔ' ‑gänʋnyʋä 'titi ‑a plöö‑. 'Kwlɩkaabhɩa, nyäkälɩɩ, ɩyä nyɛnɩälɩ 'fɩɩn ‑a ni lä nä, ɩmɩ 'mnö ‑a yibhë plɛkʋ 'tɛmä sä.

⁵ Wa bhütü‑anyɩ 'nɩ wa ŋʋ‑anyɩ ‑jɩɩ'. Wa kunö‑anyɩ ‑jlë, 'nɩ wa nyɩ‑anyɩ lebhe ‑klɛ nʋdä. ‑Aa ŋɔɔ ‑wʋ 'nɩ wa bhla‑anyɩ ‑gbugbee'.

⁶ Zëkpëa' laa‑ ‑kplɔɔ lä nä, amä ‑a pana lä nyɩkpa. Kä ‑a pana lä nynä ‑mä kä ‑a ‑yi 'zaazɩ Laagɔ. ‑A ‑yi plɛkʋ 'tɛmä sä 'nɩ ‑a nää‑ 'sɩɩ plɛkʋ. Kplɔɔkplɔɔ‑wugɔɔ gbä 'nɩ a mii ‑nɩnɩ 'fɩɩn 'nɩ ‑a ‑kä 'sɩɩ ‑wawʋ 'titi.

⁷ Laagɔɔ' 'tɛtɩɩ ‑bɔɔ 'nɩ ‑a bie lä ʋʋ' ‑nʋawlɛ‑wälɩɩ. ‑Nʋawlɛnɛ 'mɛɛ‑ plöö‑ lä ‑anyɩa tëvëlɩɩ ‑yä ‑a yëkuu' 'kʋ bhläälɩɩ.

⁸ Nyɩkpaa' ‑nänʋä fänö‑anyɩ 'ŋnu, 'nɩ ‑nänʋä sʋkpa‑anyɩ. ‑Nänʋä ci ‑anyɩa nyenyi, 'nɩ ‑nänʋä ci ‑anyɩa 'nää. 'Nɩ ‑nänʋä wlu‑anyɩ nynä ‑kpläkplönyʋä, ‑bhlɛ ‑nʋawlɛɛ‑ ‑a ci lä.

⁹ Wa wlu‑anyɩ nynä ‑n ‑näsä wa 'nö‑anyɩ ‑wʋ lä ‑yi nä, ‑bhlɛ wa ‑yi‑anyɩ 'nägäsä. Wa bhobho nynä ‑a yä 'ku, ‑bhlɛ ‑a ‑yä 'nägäsä. Kä wa ŋʋʋ‑anyɩ lä ‑jämɩɩ', ‑mä wa 'nö‑anyɩ ‑wʋ bhlää‑.

¹⁰ Wa bhobho nynä plɛ yä‑anyɩ 'kpɔsɔ, ‑bhlɛ ‑a ‑kʋ 'kɔɔkɔ ‑jäka 'mnö. Wa wlu‑anyɩ nynä ŋäzönyʋä, ‑bhlɛ ‑a wlʋa lɛkäänyʋä ‑bhutukpä. Wa bhobho nynä ‑mä ‑a ‑glö nyɩkpaa' ‑lʋä ‑wʋ lä lʋʋ ‑kä nä, ‑bhlɛ ‑a ‑kä ‑lɩɩ 'fɩɩn.

¹¹ Nä, anyɩ Kolɛtɩduu' bhelia ‑yä bhɛŋwnɩa nä, ‑a 'nö‑anyɩ ‑wʋ wälɩklë 'yii ‑zizie. Kä ‑a panö'anyɩ wɩa nynä ‑mä kä ‑a ‑waa'anyɩ kpänyɩ ‑anyɩa pɔlöö 'yii.

¹² ‑Anyɩa pɔlöö ‑kʋ'anyɩ 'kɔɔkɔ yëkʋ. ‑Mä anyɩ‑ gbaa‑ lä anyɩa' pɔlöö 'klʋ.

¹³ Sä 'bä soo lä ɔɔ' 'yuë nä, sɔɔ n sonö'anyɩ lä. Nä bheeje, anyɩ ‑mä 'sɩɩ, a kään anyɩa' pɔlöö 'klʋ wɩa, ‑anyɩa ‑za!

A ‑sä gbenyenyii gwë

¹⁴ Nyɩkpaa' ‑lʋa ‑wʋ lä Laagɔɔ' pɔlötɛtɛ ‑kä nä, a ‑yʋwa 'sɔɔ 'nä 'jɛnyɩ ‑lä. A ‑yʋwa 'sɔɔ ‑lä 'kʋ kʋʋlɩ mii. Wälɩɩ' lɩɩ‑ gëë‑ lä 'yii nä, ɩyä wälɩɩ' lɩɩ‑ ‑wʋ lä 'yi gëë nä, ɩmɩ 'sɔ yi bhä yëkuu' mʋʋ ‑a? Zëlü ‑yä 'cucu 'sɔ yi bhä 'jɛnyɩ ‑a?

¹⁵ Klisö ‑yä 'Dëvlo 'sɔ yi bhä 'mʋ 'nunu ‑a? Nyɩkpɔɔ' lɔɔ ‑ɔ ‑kä lä Laagɔɔ' pɔlötɛtɛ nä, ɩyä nyɩkpɔɔ' lɔɔ ‑ɔɔ 'mänyɩ ‑wʋ lä Laagɔ nä, 'klü ‑sä wa yi bhä 'kʋ känöö?

¹⁶ 'Klë ‑sä Laagɔɔ' ‑bhutuu ‑yä ‑zlëë 'sɔ yi bhä 'kʋ känö? ‑Anyɩ nä, ‑a ‑glö yɩ ‑Yäyä Laagɔɔ' kplɔɔkplɔɔ‑bhutu. Kä Laagɔ cii‑ wälɩklënä, ʋ lä N yiwa nëëdë kʋ 'nɩ n ‑yʋwa 'sɔ yi nää. N yi waa' Laagɔ 'plö 'nɩ wa yi 'naa nyɩkpa 'plö.

¹⁷ Ɩɩ' ‑zä ‑amʋ Kwlienyɔɔ n ci ylä nynä ‑mä, ‑Lɔɔ' nyɩkpa‑cëa, a ‑bhʋwa nëëdë! A ‑sʋwa gwë 'kwläkwlä 'sää! Lʋʋ 'nö ‑kplɔɔ nä, aa' 'taanʋ ‑lä! A kä sɔɔ nʋ nä, ‑amʋ Laagɔ n yi'anyɩ 'kʋ gboo.

¹⁸ ‑Ɛɛɛ, ‑amʋ Kwlienyɔɔ ‑ɔ ‑zii lä 'tɛtɩɩ 'fɩɩn 'wlu nä, ‑amʋʋ‑ ci lä sɔɔ. N nä, n yi a 'bä 'plö, 'Nɩ anyɩ ‑mä 'sɩɩ, a yi 'naa 'yuë 'plö! A yi 'naa 'yuŋwadie ‑yä 'naa 'yuŋnʋgbɛnyʋä 'plö.

« Roimhe

Air adhart »

Wycliffe Bible Translators, Inc.

Lean sinn:

Ceanglaichean taic

Sanasan