Bìoball air-loidhne

2 Kolɛtɩ‑dunyʋä 5 - GOD - u2

¹ ‑Pɛpɛɛ nä, ‑a ‑yi yɩ sɔɔ nynä ‑mä, ‑mää zëkpë 'kʋ ‑anyɩa 'yɛkɛɛ ‑glö 'taplee ‑papä. ‑Mä 'taplee ‑papänä kä yɩ zɛɛ‑ nä, Laagɔ slää‑ ‑mɔɔ Laagɔduu' ‑anyɩa 'gbë. Nyɩkpaa' wlɩɩ 'nöa ‑wʋ slää‑, ‑mä Laagɔ 'titi, ʋmʋʋ‑ slaa‑. 'Nɩ ‑lɔɔ' 'gbëa nä, a ‑kʋ ‑lɔɔ 'kɔɔkɔɔ ‑za.

² ‑Pɛpɛɛ' nä, ‑papänä ‑zɔɔ ‑a ‑kʋ lä ‑bhlɛ 'nɩ ‑a zlʋ lä. 'Nɩ ‑a tään lä nynä ‑mä ‑anyɩa ŋɔkʋʋ' 'gbëa ‑a 'ga 'mnö mʋ.

³ ‑Aa ‑lä wlu ‑döö ‑mä ‑a yi ylo ‑yä Laagɔɔ' kä ‑lɔɔ ‑anyɩa wludölʋa ŋëë.

⁴ ‑Ɛɛɛ, 'tänyɩ 'fɩɩn 'mnö ‑a yi lä ‑mää ‑dʋdʋkʋʋ' ‑papa ‑zɔɔ kʋ nä, ‑a yi zlʋ nynä nyɩkpaa' lʋä‑ bhɛɛ‑ 'kʋ 'ŋɔnɔ ‑gbaakʋ. Ɩɩ' ‑wʋ plöö‑ nynä ‑mä kä ‑a 'gä ‑anyɩa ‑mää ‑dʋdʋkʋʋ' 'kotuu 'mʋ ‑sä. ‑Mä kä ‑a tään lä nynä ‑mä, ‑anyɩa Laagɔduu' 'kotuu Kwlienyɔɔ plaa‑anyɩmʋ 'mʋ ‑yä, ʋʋ' 'mnö 'pʋpʋɛ 'kä gbä ‑yä 'kwiee 'kä bhɩä.

⁵ Laagɔ 'titii‑ ŋʋʋ‑ lä nynä ‑mä ‑lɔɔ' 'pʋpʋɛ ‑a yie 'ni. Ʋmʋʋ‑ nyɩ‑anyɩ lä Kplɔɔkplɔɔ‑wugɔɔ ‑bhlɛ ‑yä ‑zee ‑mɔɔ' ‑lɩɩ 'kä ‑lɔɔ gbɛɛ.

⁶ Nä, ‑a ‑kä 'kɔɔkɔ 'tɛtɩ. ‑A ‑yi sɔɔ nynä 'tänyɩɩ 'fɩɩn 'mnö ‑a yi lä 'yɛkɛnɛ 'mnö kʋ nä, kä ‑a ‑sä lä Kwlienyɔɔ gwë.

⁷ ‑Anyɩa pɔlötɛtɛɛ 'mnö ‑a nämnö lä ‑mä sä ‑a ni lä 'yi nä, sɔɔ ‑aa nää ‑wʋ.

⁸ ‑Ɛɛɛ, ‑a ‑kä 'zazɩ 'tɛtɩ ‑mä, ‑anyɩa kunʋ 'mnö nä, ‑a ‑waa yɩ 'sɩɩ nynä ‑mä ‑a 'gä ‑mɔɔ ‑bha ‑yä ‑a 'gä Kwlienyɔ yëku mʋ.

⁹ ‑Maa, ‑a yi kuunʋ 'mnö kʋ ‑o, ‑a yiu 'mnö ‑bhaa ‑o, wälɩklëa ‑a tänö lä Kwlienyɔɔ' nä, amää‑ plöö‑ lä nynä ‑mä ɔ wamänö‑anyɩ.

¹⁰ ‑Ɔnöza bhää? 'Tänyɩ yi ‑lɔɔ kʋ 'nɩ ‑a yi Klisöö' tlobinaa' ‑jlëa 'mnö 'nynigo ‑yä, ɔ 'kä ‑anyɩa yëkuu' 'tite plä. Ɩyä nyɩkpɔ nyɩkpɔɔ' sɔ ‑nʋ lä ‑mää 'ylʋzɔɔ nä, ɔ 'kä ɩɩ' plʋʋlɩɩ 'ni. 'Nää ‑n yi bhɛ nʋ ‑o, nyenyi ‑n yi bhɛ nʋ ‑o, ‑n yi ‑lɔɔ' plʋʋlɩɩ 'ni.

Nyɩkpa ‑yä Laagɔ 'sɔ 'jɛnyɩ‑ Klisö 'mnö
( Wlɔmʋ 5.1‑11 ; Efɛ 4.20‑24 )

¹¹ Nä 'klʋkpaa nyɩkpɔ yi lä Kwlienyɔɔ' ‑za kään nä, ‑a ‑yi aa' gba. ‑Nɩnɩ 'mɩɩ‑ ‑kä lä 'ŋnö 'nɩ ‑a soo lä nyɩkpa nynä ‑mä wa ŋoo Kwlienyɔɔ 'kʋ. Laagɔ kʋ yi‑anyɩ wɩa, 'nɩ n bhobho 'sɩɩ nynä ‑mä, ‑mɔɔ anyɩa' pleyii, a ‑yi‑anyɩ 'sɩɩ.

¹² ‑Anyɩ 'titii‑ pana yɩɔ ‑a yëku nynä ‑mä a yibhënö‑anyɩ. ‑Mä kä ‑a nʋ lä saa 'fɩɩn ‑yä, a 'kä mii a 'ka‑anyɩ mʋ täkpɔ. Ɩyä nyɩkpaa' ‑lʋa ‑wa täkpɔɔ lä 'kʋwloolɩɩ 'mnö 'nɩ ‑waa 'mänyɩ ‑wʋ lä pleyii kʋkʋlɩɩ nä, a kä mii‑ a 'kwa soo.

¹³ ‑A gä nää‑ nynä pɔlö‑bhlänyʋä nä, Laagɔɔ' ‑zä ‑a nää lä sɔɔ. ‑A gä lä 'sɩɩ dɩgälɩsä nää nä, anyɩa' ‑za ‑a nää‑ lä sɔɔ.

¹⁴ Nyɩkpɔ ‑bhlo 'coo, ɔmɔɔ‑ kuu‑ lä nyɩkpaa 'fɩɩn 'wlu, ɔmɔɔ‑ plöö‑ lä Klisö. ‑A gɩ bhobho nä, kä Klisöö' ‑wawʋʋ yie ‑anyɩa pɔlöö 'yii. Kɩ plöö‑ lä 'sɩɩ nynä ‑mä ‑anyɩ 'fɩɩn ‑yä Klisö 'sɔ yä däbhloo' 'kuu‑.

¹⁵ Kɔ kuu‑ lä nyɩkpa 'fɩɩn 'wlu. Nä, nyɩkpaa' ‑lʋa ‑wa ‑yä 'nɩ ‑wa ‑kʋ lä ‑mää zëkpë 'kʋ nä, waa' yɩɔ zëkpëa 'mnö ‑kʋ wa yëkuu' ‑za. ‑Mä Klisö kuu‑ lä 'nɩ ‑ɔ ‑glɔɔ lä 'kuëë nyɩkpaa 'fɩɩn ‑za nä, ɔɔ' ‑zä wa ‑kʋ ylä zëkpë 'kʋ.

¹⁶ Nä ‑pɛpɛɛ nä, ‑a gä nyɩkpɔ wloo nä, ‑anyɩa nyɩkpa‑yinɩ 'mnö ‑aa wlonöɔ yɩɔ. ‑Ɛɛɛ, 'zaazɩ tɛɛtɛɛ nä, ‑anyɩa nyɩkpa‑yinɩ 'mɩ ‑a ‑yibhë bhlä Klisö. ‑Mä ‑pɛpɛɛ nä, sɔɔ ‑aa yibhë yɩɔ Klisö.

¹⁷ Nyɩkpɔ kä yɩ Klisö 'mnö ‑kʋ nä, ɔ ‑glö yɩ nyɩkpɔɔ' lɔɔ Laagɔ ‑nʋ lä nyɩkpa ‑lolo 'kʋ nä. 'Kɔgɔbhlää' ‑lɩɩ yä plö. 'Nɩ a ni 'yi, ‑lɩɩ 'fɩɩn yä ‑lɛɛ lelii' 'plöö.

¹⁸ ‑Mä Laagɔ ‑gbä 'nɩ ‑lɩɩ 'fɩɩn plöö‑ lä sɔɔ 'kʋ. Klisö 'kʋ Laagɔ ‑ghlää 'nɩ ʋ ‑yanyɩ 'sɔ yi lä glää. 'Nɩ ʋ nyɩ‑anyɩ ylä ‑tëbhu nynä ‑mä, ‑a gbä ‑yä nyɩkpa ‑yä Laagɔ 'sɔ 'kä glää.

¹⁹ ‑Ɛɛɛ, Laagɔ 'titii‑ ‑gbä 'nɩ 'ylʋzɔkʋnyʋä ‑yʋsɔ yi lä glään. Ʋʋ' yɩɔ waa' 'focloo 'gë 'ŋʋʋ 'nɩ ʋ nyɩ‑anyɩ ylä ‑tëbhu nynä ‑mä ‑a gbä ‑yä nyɩkpa ‑yä Laagɔ 'sɔ glään.

²⁰ Nä ‑anyɩ, Klisö‑ ‑lobhu‑anyɩ 'nɩ ‑a ci lä ɔɔ' bhlëë'. 'Nɩ wälɩɩ ‑a sonö'anyɩ lä nä, kɩ ‑kʋ ‑lä nynä Laagɔ‑ cinö‑anyɩ nëë'. Nä bheeje, ‑a slä'anyɩ 'wlu Klisöö' 'ŋnöö 'mnö, a ‑yä Laagɔ 'sɔ glään.

²¹ Klisö nä, ɔɔ' ‑wʋ nyenyi ‑kä ‑mä, kä Laagɔ ‑kpäsöɔ ‑anyɩa nyenyii. Ɩyä ɔmɔ 'mnö ‑a 'gä yɩ ghlää ‑yä ‑a 'gä Laagɔ dëlü 'yigënyʋä 'plö.

« Roimhe

Air adhart »

Wycliffe Bible Translators, Inc.

Lean sinn:

Ceanglaichean taic

Sanasan