Bìoball air-loidhne

2 Kolɛtɩ‑dunyʋä 4 - GOD - u2

Klisö ‑kʋ ɔɔ' ‑gänʋnyʋaa' lebhee 'mnö

¹ Laagɔɔ' plɛkʋmɛnɔɔ 'mnö ʋ nyɩ‑anyɩ lä ‑tëbhunʋ. Ɩmɩɩ‑ ‑kä 'ŋnö 'nɩ plɛɛ' 'kpɔsʋ‑anyɩ ‑wʋ lä.

² Nʋnʋgbɩɩ 'fɩɩn‑ plöö‑ ylä zioziodää' nʋnʋgbɩɩ' ‑lɩɩ ‑kä lä zoo 'kʋ nä, ‑anyɩ ‑aa nʋɩ yɩɔ. ‑Aa yɩɔ ‑kpläkplä ‑kä. ‑Aa ‑sä yɩɔ Laagɔwälɩɩ dä 'kʋ. ‑Mä ka ‑a cinɩ ‑nʋawlɛɛ 'mnö ‑yä nyɩkpa 'fɩɩn bhobhowlu 'kä 'klʋ känöɔ Laagɔ dëlü.

³ ‑Anyɩa 'Nägädöö ‑a bie lä nä, ɩ kä ‑lätee 'kʋ ‑zizio nä, nyɩkpaa' ‑lʋa ‑wa mʋ lä too ‑kää nä, waa' ‑zä ɩ ‑zizio lä 'kʋ.

⁴ 'Dëvlo yä waa' bhobhowluu 'yikʋ wlä nä, waa' ‑wʋ pɔlötɛtɛ ‑kä. Ɩ gbä 'nɩ waa' 'ni yɩɔ Klisöö' 'Nägädöö' 'klʋagba 'yi. Klisö nä, ɔmɔɔ‑ plöö‑ lä Laagɔɔ' 'wlʋʋnyɔ.

⁵ ‑Ɛɛɛ, wälɩɩ ‑a cɩa lä nä, ‑a yëkuu' wälɩ ‑aa ci ‑wʋ. ‑Mä Klisö, Zozii ‑ɔ plöö‑ lä Kwlienyɔɔ nä, ɔɔ' yëkuu' wälɩ‑ ‑a ci lä. ‑Anyɩ, ‑a ‑glö anyɩa' ‑gänʋnyʋä Zozi ‑za.

⁶ Laagɔ ‑ʋ cii‑ bhlä ‑mɔɔ ‑gɔgɔbhlää' nynä ‑mä, zëlü yi ‑yä ɩ liee 'cucuu mnö 'nɩ zëlü ‑yi lä nä, ʋ yä gbä ‑anyɩa pɔlöö 'yii zëlü yä ‑mɔɔ ŋänɩä. Ɩ 'kä gbä ‑yä Klisö 'kʋtakpaa 'klʋ, ‑a 'gä ‑lɔɔ Laagɔɔ' 'klʋagba 'yi 'nii.

Pɔlʋ ‑yä ɔɔ' 'kʋnämʋnyʋa 'sɔ 'kwlɩ bhɩänʋwa

⁷ ‑Mä 'Wugɔɔ' leylünɩ 'fɩɩn ‑a ‑kä lä nä, ‑anyɩa maa‑yɛkɛnɛ 'mnö ‑a bhɛnönɩ‑ lä. Kɩ ‑kʋ lä sɔɔ ‑yä ɩ 'kä pana nynä ‑mä 'päwö 'kädänä ‑a ‑kä lä nä, Laagɔduu' a bha ‑mä anyɩ 'mnö aa' ‑bha ‑wʋ.

⁸ ‑A ni 'kwlɩkabhɩä' nü nü nü, ‑mä ‑lɔɔ' 'kwlɩkabhɩa' susuë‑anyɩ ‑wʋ. Plɛ yi‑anyɩ 'mʋ belio, ‑mä plɛ 'nö‑anyɩ ‑lä 'kpɔsɔ.

⁹ Wa ŋʋ‑anyɩ nyäkälɩɩ', ‑mä nyɩkpa 'nö‑anyɩ ‑wʋ cɛɛ‑. ‑A bhlü ‑zɔɔ, ‑mä ‑aa too ‑wʋ.

¹⁰ Ylɩɩ 'fɩɩn 'kʋ nä, Zozi Klisöö' 'kwiee ɔ kuu‑ lä nä, ɛ nämnö‑anyɩ 'yɛkɛɛ. Ɩ yi gbä 'nɩ ɔɔ' 'pʋpʋɛ yi‑anyɩ 'sɩɩ 'yɛkɛɛ nämnö.

¹¹ ‑A ‑yä yɩ 'flɛ o, ‑mä ylɩɩ 'fɩɩn 'kʋ, ‑a ‑kʋ 'kwie numnu 'kʋ Zozii' ‑za. Ɩ 'kä 'ŋnö kään ‑yä ɔɔ' 'pʋpʋɛ 'kä ‑anyɩa 'kuyɛkɛnɛ 'mnö 'yi nio.

¹² Nä, ‑anyɩa 'yɛkɛnɛ 'mnö kä 'kwiee nʋ lä ‑mɔɔ lebhe ‑yä anyɩa' ‑lɛɛ 'mnö 'pʋpʋɛ 'kä ‑mɔɔ yi.

¹³ Laagɔ‑bɔɔgʋʋ cii‑ wälɩklë ‑bhlo. Ʋ lä kä n ‑kä pɔlötɛtɛɛ nä, ɩɩ' ‑zä n ci lä. Nä, ‑anyɩ ‑mä 'sɩɩ, kä ‑a ‑kä pɔlötɛtɛ nä, ɩɩ' ‑zä a ci lä.

¹⁴ ‑A ‑yi sɔɔ nynä ‑mä Laagɔ ‑ʋ ‑gbä lä 'nɩ Kwlienyɔ Zozii ‑glɔɔ lä 'küëë nä, ʋ yi gbä 'nɩ ‑a yi Zozii 'mnö ghlää 'nɩ ‑a yi 'kuëë glɔɔ. 'Fɩa 'nɩ anyɩ ‑yä ‑anyɩ 'sɔ, Laagɔ yi‑anyɩ yɩ Zozii dëlü fä.

¹⁵ Wälɩɩ 'fɩɩn ‑ɩ ŋënö‑anyɩ lä nä, anyɩa' ‑za lä. A 'kä 'nää 'ni ‑yä anyɩa' 'nää 'kä 'kʋ 'mɩä. Ɩyä nyɩkpa 'kä 'sɩɩ zumë ‑yä wa 'kä Laagɔ bhään ‑yä wa 'kʋ 'ŋnu fään.

‑A ‑kään 'kɔɔkɔ pɔlötɛtɛ

¹⁶ ‑Nɩnɩ ‑kä lä 'ŋnö nä, plɛɛ' 'kpɔsʋ‑anyɩ ‑wʋ. 'Nɩ anyɩa ‑mää zëkpëkʋʋ' 'yɛkɛɛ kä yɩ 'sɩɩ nyɔnyɔɔ' bhɩä nä, ‑anyɩa kätö‑zuzuu 'tɛmä 'mʋ ylɩɩ 'fɩɩn 'kʋ.

¹⁷ ‑Ɛɛɛ, 'klʋagba 'käda ‑aa bhɩä ‑wʋ lä 'nɩ ‑a 'gä lä ‑zee 'mnö kʋ nä, ‑a ga plɛkʋ 'pä nä, 'kwlɩkabhɩa 'fɩɩn ‑a ni lä ‑mää 'ylʋzɔɔ nä, aa' ‑wʋ lʋʋ plöö‑.

¹⁸ Ɩ ‑kä ylä 'ŋnö nä, ‑lɩɩ 'fɩɩn nyɩkpɔɔ' 'yi ni lä 'yi nä, ɩmɩ ‑aa tään yɩɔ. ‑Ɔnöza bhää? ‑Lɩɩ 'fɩɩn nyɩkpɔɔ' 'yi ni lä 'yi nä, kɩ plö. ‑Mä ‑lɩɩ nyɩkpɔɔ' 'yii 'ni ‑wʋ lä 'yi nä, ɩmɩɩ‑ ‑kʋ lä 'kɔɔkɔɔ' ‑za.

« Roimhe

Air adhart »

Wycliffe Bible Translators, Inc.

Lean sinn:

Ceanglaichean taic

Sanasan