Bìoball air-loidhne

2 Kolɛtɩ‑dunyʋä 3 - GOD - u2

Mɛnʋ ‑loluu' 'tänyɩɩ Laagɔɔ' ‑gänʋnyʋa

¹ ‑Anyɩ 'titii‑ 'gä bhä bʋkʋ ‑a yëku lobho ‑a? ‑Mä, kä wa 'ka‑anyɩ bhä 'fɩa 'bɔɔgʋ 'kʋ gbɛɛ ‑yä a 'ka‑anyɩ yibhë ‑a? ‑Maa, anyɩ‑ 'gä‑anyɩ bhä 'bɔɔgʋ 'kʋ gbɛɛ ‑yä wa 'kä‑anyɩ yibhë ‑a?

² N naa, anyɩ‑ plöö‑ lä ‑anyɩa 'bɔɔgʋʋ. Anyɩ, anyɩ‑ ‑a ‑jɩjlä lä ‑mɔɔ ‑anyɩa pɔlöö 'yii. Nä 'bɔɔgʋnʋ a plöö‑ lä anyɩa ‑za nä, ʋmʋ nyɩkpa 'fɩɩn 'kä lä yibhë ‑yä wa 'kä zɛɛ.

³ Nä a ‑glö yɩ Klisöö' 'bɔɔgʋ, 'nɩ ‑anyɩa ‑Laagɔ‑lebhee 'mɛɛ‑ ‑jɩjlä lä ‑lɔɔ' 'bɔɔgʋʋ. 'Pesloo' wa 'nʋ ‑wʋ ‑jɩjlä ‑mä, ‑Yäyä Laagɔɔ' 'Wugɔɔ 'mʋ wa ‑jɩjlänʋ lä 'mʋ. Cɛcʋ‑kplu 'yii waa' ‑wʋ 'sɩɩ ‑lɔɔ' 'bɔɔgʋʋ ‑jɩjlä ‑mä, ‑mä anyɩa 'yɛkɛɛ 'mnö kpluu 'yii, ‑mɔɔ anyɩa pɔlöö 'yi, ‑mɔɔ ‑lɔɔ' 'bɔɔgʋʋ ‑jɩjlɔ lä.

⁴ Nä, ‑nɩnɩ 'mɩ ‑a tɛɛ lä dë Klisöö' 'ŋnöö 'mnö Laagɔ dëlü.

⁵ ‑Mä a ni 'yi naa, ‑aa ‑wʋ cii‑ nynä ‑mä kä ‑a ‑kä 'tɛtɩ nä, ‑lɔɔ' tɛtɩɩ, ‑a yii 'kʋ 'bhlü 'nɩ ‑anyɩ ‑bhlo, ‑a yii lʋʋ 'mʋ nʋʋ. Laagɔ 'mʋʋ‑ gbä lä 'nɩ ‑a mii lä lʋʋ nʋlɩ.

⁶ Mɛnʋ ‑loluu' 'tänyɩnɛ 'mnö nä, Laagɔ yä gbä 'nɩ ‑a plöö‑ yɩ ʋʋ' ‑gänʋnyʋä. 'Nɩ mɛnʋnʋ nä, ʋʋ' ‑wʋ ‑jlämaa' laa ‑a ‑jɩjlɔ lä nä plöö‑, ‑mä ʋ ‑glö Laagɔɔ' 'Wugɔ. ‑Jlämaa' laa wa jɩjlä lä nä, ka bhlä. ‑Mä Laagɔɔ' 'Wugɔɔ 'pʋpʋɛ ʋ nyɛ.

⁷ Moyizöö' ‑Jlämaa nä, cɛkʋ‑kpli 'yii wa ‑jɩjla bhä 'nɩ ɔ nämnönöa bhlä 'kʋ. ‑Mä a ‑glö bhä ‑jlämaa' laa‑ bhɛɛ‑ bhlä 'kwie nä. ‑Mä ɩ kʋ sɔɔ 'nɩ 'yizlɛnyʋää' ‑wʋ mii‑ 'nɩ wa 'kä Moyizöö' 'kʋtakpa 'yikʋ paa. ‑Ɔnöza bhɛɛ? Kpänyɩ Moyizöö' 'kʋtakpaa' 'klʋagba lie bhä. ‑Bhlɛ Moyizöö' ‑Jläma 'mnö 'klʋagba nä, a ‑glö bhä 'plö 'plölaa.

⁸ Nä, a 'pä yɩɔ plɛ! Säsä 'titi Laagɔɔ' 'Wugɔɔ' 'klʋagbaa' ‑lä bhɛ kpänyɩ 'tɛtɩ kään 'nɩ a 'kä 'kʋ zii?

⁹ ‑Jlämaa' ‑laa ‑a fään lä 'kwie 'yii nä, a kä ylä 'sää 'klʋagba nä, Laagɔɔ' 'Wugɔɔ gbä lä 'nɩ nyɩkpɔ gëë lä 'yii nä, säsä ʋʋ' 'klʋagba ‑lä bhɛ 'tɛtɩ kään 'nɩ a 'kä 'kʋ zii?

¹⁰ ‑A yi mii‑ 'nɩ ‑a yi ci nynä ‑mä, ‑pɛpɛɛ 'klʋagbaa' zëlüü' ŋänɩälɩɩ yä ‑gɔgɔbhlää' 'klʋagbaa' zëlüü 'wlu zii.

¹¹ ‑Lʋʋ ‑ʋ ‑kʋ bhlä 'plödä nä, ʋ bhɛɛ‑ bhä 'klʋagba nä, ‑lʋʋ ʋ ‑kʋ lä ‑lɔɔ 'kɔɔkɔɔ ‑za nä, säsä ʋʋ' 'klʋagbaa' ‑lä bhɛ kpänyɩ 'tɛtɩ kään?

¹² 'Klünö 'mɩ ‑a 'tɛɛ‑ lä dë ɩɩ' ‑zä ‑anyɩa pleyii 'tɛ lä kpänyɩ.

¹³ ‑Anyɩ nä, ‑aa ‑wʋ Moyizö 'bhisäkʋ 'wlu gbii‑. Kɔ gbi bhä 'wlu ‑yä 'Yizlɛnyʋää' kä bhä ‑lɔɔ' 'klʋagba 'yi 'ni, ‑bhlɛ a ‑glö bhä 'plö 'plö laa.

¹⁴ ‑Mä 'Yizlɛnyʋä nä, waa' bhobhowluu gbɔɔ‑ 'klʋ ‑aaa 'nɩ ‑zɩkä. Wa kä ‑gɔgɔbhlää' mɛnʋʋ' 'bɔɔgʋʋ zɛɛ nä, ‑lapoluu ‑säkä ‑säkä gbiwa‑ ‑läzä 'wluu. ‑Mä Klisöö' 'mnö ‑tɛɛ ʋ ‑bha lä ‑lɔɔ.

¹⁵ ‑Zɩkä 'titi ‑mä 'sɩɩ, 'tänyɩɛ 'fɩɩn 'mnö wa zɛɛ lä Moyizöö' ‑Jlämaa nä, waa' pɔlöö ‑laapoluu gbii ‑läte 'wlu.

¹⁶ ‑Mä nyɩkpɔ kä yɩ ɔ yëku Kwlienyɔɔ nyɛɛ‑ nä, kä ‑laapoluu bha yɩ ‑lɔɔ.

¹⁷ Wa kä cii nynä Kwlienyɔ nä, Laagɔɔ' 'Wugɔɔ 'mʋ wa sä lä. 'Nɩ dä Kwlienyɔɔ' 'Wugɔɔ ‑kʋ lä nä, nyɩkpɔɔ' lɔɔ‑ yi lä ‑lɔɔ nä, kɔ doo 'kpɔ.

¹⁸ Nä ‑anyɩ 'fɩɩn, ‑aa yɩɔ 'wlu gbii‑ 'nɩ Kwlienyɔɔ' 'klʋagbaa ‑kʋ‑anyɩ lä 'kʋtakpää' 'nɩ a lie ylä. ‑A yä yɩ 'cɩcɩ ɔmɔ 'bhisäkʋ 'nɩ ‑a ‑kä yɩ 'klʋagbaa' ‑lɛkädä. Kwlienyɔɔ, ‑ɔ plöö‑ lä 'sɩɩ Laagɔɔ' 'Wugɔɔ nä, 'klünö 'mɩ ɔ nʋ lä.

« Roimhe

Air adhart »

Wycliffe Bible Translators, Inc.

Lean sinn:

Ceanglaichean taic

Sanasan