Bìoball air-loidhne

2 Kolɛtɩ‑dunyʋä 2 - GOD - u2

¹ ‑Amʋ 'naa pleyii ‑za nä, ɩɩ' ‑wʋ 'kʋ ‑ŋwa nynä ‑mä n yi'anyɩ yëku ‑yä n 'kanyɩ plɛ 'kpɔsʋä.

² N kä ‑yi 'nɩ n ka'anyɩ yɩ plɛ 'kpɔsʋä‑ nä, lɔɔ ‑sä yi bhä ‑pɛɛ 'naa pleyi ‑jäkä 'ŋʋʋ? Anyɩ‑ gä'ä bhɛ lä ‑jäkä pleyi 'ŋʋ nä, anyɩ n 'kpɔsʋä ylä plɛɛ! Yio ‑a?

³ ‑Nɩnɩ 'fɩɩn 'mɩɩ‑ ‑kä 'ŋnö 'nɩ n ‑jɩjlä'anyɩ bhlä. Nn' bhɔɔ ŋoo‑ nynä ‑mä anyɩmɔɔ‑ gä'ä lä pleyii ‑jäkä 'ŋʋ nä, n 'kä yi ‑yä n 'kanyɩ plɛɛ 'kpɔsʋä. ‑Ɛɛɛ, n ‑yi sɔɔ nynä ‑mä ‑jäkä kä'ä pleyii ‑kʋ nä, anyɩ ‑mä 'sɩɩ ‑jäkä yi'anyɩ pleyii kʋ.

⁴ Nyäkälɩ 'kädɩ 'mnö n ‑kʋ 'nɩ n jɩjlä'anyɩ lä 'bɔɔgʋnʋ. Kä n nyɛnɩä lä 'naa 'wʋgɔɔ 'mnö. 'Naa 'tutulɔɔ 'nɩ n jɩjlä lä. Nn' jɩjlä'anyɩ ‑wʋ ‑yä n 'kanyɩ plɛ 'kpɔsʋä. Kä n jɩjlä'anyɩ lä ‑yä n 'kanyɩ pana nynä ‑mä kä n ‑waa'anyɩ 'nɩ n 'tɔtɔ‑ nëkʋ.

Pɔlʋ lä wa cie‑ gbenyenyinyɔ

⁵ Anyɩa nëëdëë' nyɩkpɔ kä ɔ ‑lie plɛ 'kpɔsʋä nä, ‑amʋ ‑lɔɔ' nyɩkpɔɔ' 'kpɔsʋä ‑wʋ plɛ. Nn' kä ‑kɛ wälɩ nëë' pään nä, ɩɩ' ‑za, ‑mä ‑lɔɔ' nyɩkpɔ nä, anyɩ fɩɩn ɔ 'kpɔsʋä lä plɛ.

⁶ 'Nɩ ‑lɔɔ' nyɩkpɔɔ nä, 'cɔcɩnyʋa kɔ nëkʋ ‑fä nä, sä wa kä cii‑ nä, sɔɔ nää‑.

⁷ Ɩ ‑kä 'ŋnö nä, a cienöɔ ‑yä a 'ŋʋɔ 'tɛtɩɩ' ‑mä plɛɛ' kɔ ‑kä 'kpɔsɔ ‑yä ɛɛ' kä ‑kä klä mʋmʋ.

⁸ ‑Lɔɔ' nyɩkpa‑cëa nä, n ylä bhä nynä ‑mä a panʋwa anyɩa' ‑wawʋʋ.

⁹ A ni wälɩklëa ‑anözä n ‑jɩjlä'anyɩ lä nä. Kä n tään bhlä nynä ‑mä n 'kanyɩ ‑zɔɔ ‑sä ‑yä, a kä 'tänyɩɩ 'fɩɩn 'mnö 'klʋkpä 'ŋʋ nä, n 'kä sɔɔ yibhë.

¹⁰ A kä nyɩkpɔ cie‑ nä, ‑amʋ ‑mä 'sɩɩ kä n ‑cienöɔ lä. 'Nɩ Klisö dëlü nä, n kä ‑cie nä, anyɩa' ‑zä n nʋ lä sɔɔ.

¹¹ 'Dëvloo' kä ‑kä ‑nɩnɩ 'mnö ghlää ‑yä ɔɔ' ka‑anyɩ ‑kä 'nyigë. 'Nɩ sä 'Dëvlo bhobho lä nä, ‑anyɩ 'fɩɩn ‑a ‑yi sɔɔ.

Pɔlʋ ‑ghlää Tlʋwasöduu' 'nɩ ɔ yi Masedʋanöbhlɩ 'kʋ mʋ

¹² N ‑plä lä Tlʋwasöduu' nynä n 'kä ‑mɔɔ Klisöö' 'Nägädöö ‑sää nä, kä Kwlienyɔɔ ‑känö'ö 'gbë. ‑Mä sä nn' ‑wʋ lä ‑mɔɔ bheli Titö ‑ŋëë nä, 'naa 'wugɔɔ 'mnö, ‑mɔɔ ‑wʋ 'kʋ wɔtɔlɩ nii‑.

¹³ Nn' ‑wʋ lä bheli Titö nii‑ nä, ɩ ‑kamänö'ö kpänyɩ yëkuu'. Ɩ ‑kä 'ŋnö 'nɩ n ‑bha yɩ Tlʋwasöduu' 'nɩ n yi Masedʋanöbhlɩ 'kʋ mʋʋ.

Kä Zozi Klisö gbä 'nɩ nyɩkpɔ zi 'kʋ

¹⁴ ‑Mä a ‑ya bhään Laagɔ! Laagɔ kä‑anyɩ bhɛɛ‑ nä, Klisöö' 'ŋnöö 'mnö, ‑gbäsɩɩ ʋ fänö‑anyɩ lä nä, ka ‑a zi 'kʋ. ‑Anyɩ‑ Laagɔ ghlää lä 'kʋ 'nɩ Klisöö' 'ŋnöö jɛjɛ lä dää 'fɩɩn sä nynä 'ŋwänɩ.

¹⁵ Laagɔɔ' ‑za nä, ‑anyɩ, ‑a ‑glö Klisöö' 'ŋwänɩ. Nyɩkpaa' ‑lʋa ‑wa yä lä ‑lɔɔ nëë' ‑bha nä, ɩyä nyɩkpaa' ‑lʋa ‑wa too lä nä, waa' ‑za, ‑a plöö‑ Klisöö' 'ŋwänɩ.

¹⁶ ‑Nänʋää' ‑za nä, kä ‑a këën 'kuŋnɛ 'kʋ. 'Nɩ ‑nänʋä ‑kʋ ‑lɔɔ 'nɩ waa' ‑za nä, kä ‑a pä 'ŋwänɩɩ' lɩɩ ‑ɩ 'nyɛ lä 'pʋpʋɛ nä. Nä lebhenɛ ‑a nʋ lä nä, nyɩkpɔ‑ ‑sä yie bhä mii?

¹⁷ ‑Anyɩ nä, nyɩkpaa' ‑lʋa ‑wa 'pää lä Laagɔwälɩ 'kwäsɛɛ' nä, wamä ‑aa ‑wʋ plöö‑. ‑Mä Laagɔwälɩɩ' ‑nʋawlɛɛ 'mɛ Laagɔ nyɩ‑anyɩ lä nä, Laagɔ dëlüü' ‑nʋawlɛɛ 'mɛ ‑a ‑yä Klisö 'sɔ 'jɛnyɩ‑ 'nɩ a ci lä.

« Roimhe

Air adhart »

Wycliffe Bible Translators, Inc.

Lean sinn:

Ceanglaichean taic

Sanasan