Bìoball air-loidhne

2 Kolɛtɩ‑dunyʋä 13 - GOD - u2

Pɔlʋ gblɩmä Kolɛtɩduu' 'cɔcɩnyʋa gbäbhɩädä

¹ 'Naa taanadä n 'kä ylä anyɩa' duu' yi. N kä ‑yi 'nɩ kä wälɩ kä ‑lɔɔ ‑kʋ nä, ‑lɔɔ' wälɩɩ' cidaa, ɩ ‑ŋwa 'kʋ nynä ‑mä ‑dläfʋɛ‑lünyʋä 'sɔ ‑yä taa 'nii ‑lɔɔ.

² 'Tänyɩɩ n ‑yi'anyɩ lä yëku 'naa 'sɔnadä nä, n ‑sonö'anyɩ. ‑Mä ‑zɩkä nä, nn' ‑lätee ‑mɔɔ ‑yi 'nɩ n sonö'anyɩ lä bʋkʋ nynä ‑mä, nyɩkpaa' ‑lʋa ‑wa ‑nʋ bhlä ‑lɔɔ' 'tänyɩɛ 'mnö nyenyii nä, wa ‑yä ‑pɛpɛɛ' ‑lʋa 'sɔ, n kä ‑yi nä, nn' ‑lä waa' nëëdëë' nyɩkpɔ cie.

³ Ka tään lä nynä ‑mä a 'kä sɔɔ yibhë nynä Klisö cinö'ö nëë' nä, ‑lɔɔ' 'klüü a yii 'ni. Klisö 'mɔɔ‑ ‑lä anyɩ nëëdë 'mʋ yɔmä. Ɔ ‑kä 'kɔɔkɔ 'päwä anyɩ nëëdë.

⁴ ‑Ɛɛɛ, ɔɔ' bhɔɔ lä 'tɛtɩ ‑kä nä, wa bhlɔɔ‑ 'zaazɩ 'nɩ ɔ 'kuu‑ 'kusuu 'yi. ‑Mä Laagɔɔ' 'päwaa ‑gbä 'nɩ ɔ ‑yi zëkpë 'kʋ. ‑Anyɩmɔɔ‑ ‑kʋ ‑lä Klisö 'mnö nä, ‑aa ‑wʋ ‑cʋcʋ ‑kä ‑mä Laagɔɔ' 'päwa yi gbä 'nɩ ‑a yio zëkpë 'mnö 'nii 'nɩ ‑a yi'anyɩmɔ pana.

⁵ Nä, a bɩä a yëku ‑yä a wloo a kä ‑kä pɔlötɛtɛɛ 'mnö nämnö nä. A ka yëku bɩä nä, a 'yi 'ni nynä ‑mä Zozi Klisö ‑kʋ anyɩa' zëkpëa 'mnö. Yio ‑a? A 'nö bɩäsä ‑yi nä, ka yä ylä sɩä.

⁶ ‑Mä n bhobho nynä ‑mä a yi 'sɩɩ 'yi 'ni nynä ‑mä ‑a nää‑ 'zaazɩ Klisöö' lobho lobhonyʋä 'titi 'bhisäkʋ.

⁷ Nä, ‑a bhibhie anyɩa' ‑za ‑yä aa' kä ‑kä gbenyenyii' 'cënänä nʋ. N ci lä nä, ɩɩ' ‑wʋ plöö‑ nynä ‑mä ‑anyɩ ‑a yä ‑lɩɩ 'fɩɩn sɩä. 'Nɩ ‑anyɩ ‑a 'nö bhɛ ‑zi mii‑ ‑kaaa nä, ‑a tään nynä ‑mä anyɩ, a mii ‑yä a 'kä 'nägägbɩ nʋ.

⁸ ‑A ‑kä 'päwä ‑yä ‑a 'gä Laagɔɔ' ‑nʋawlɛɛ ci ‑mä ‑aa ‑wʋ 'päwä ‑kä ‑yä Laagɔɔ' ‑nʋawlɛɛ ‑a ‑yɛsɔ 'kä 'kʋ bhlä.

⁹ ‑A 'nö ‑cʋcʋ ‑kä 'nɩ anyɩ a kä 'tɛtɩ ‑kä nä, ɩ nʋ ‑anyɩa ‑jäkä. 'Klüü ‑a ylä lä anyɩa' ‑za ‑anyɩa bhibhielɩɩ 'mnö nä, ɩmɩɩ‑ plöö‑ lä nynä ‑mä, anyɩa' kʋkʋsa kplɔɔ wɩa.

¹⁰ Ɩmɩ‑ ‑kä lä 'ŋnö 'nɩ nn' ‑lätee lä ‑yi 'nɩ n jɩjlä lä. N kä ‑yi nä, nn' kä ‑kɛ kpänyɩ yëkuu' kamä. Kä Kwlienyɔɔ nyɛɛ'ɛ lä ‑tëbhunʋ ‑yä n 'kä 'cɔcɩnyʋa 'tɛtɩɩ' 'ŋʋ, ‑mä ɔ nö'ö 'mʋʋ ‑wʋ nyɛɛ‑ ‑yä n 'kwa nuë.

Bhlüüdää' bhää‑wälɩ

¹¹ ‑Pɛpɛɛ nä, bhelie ‑yä bhɛŋwnɩänyɩ‑, a kʋ yɩ ‑jäka 'mnö! A tään nynä anyɩa' zëkpëa 'kä kplɔɔ. A 'ŋʋŋʋ 'sɩɩ 'tɛtɩɩ ‑yä a 'nunuu 'mʋ, ɩyä a kʋ 'kʋ wɔtɔlɩɩ 'mnö. Laagɔ, ‑ʋ plöö‑ lä ‑wawʋ Laagɔɔ ‑yä 'kʋ wɔtɔlɩɩ Laagɔɔ nä, ʋ yi'anyɩ yëku kʋ.

¹² A bhänö ‑bhänö ‑yä gbëë ‑gbëë bheli‑wawʋʋ 'mnö. ‑Mää' 'cɔcɩnyʋa 'fɩɩn wa bhänö'anyɩ.

¹³ Kwlienyɔ Zozi Klisöö' 'nyupälɩɩ ŋënö'anyɩ 'kʋ, anyɩ 'fɩɩn! Ɩyä Laagɔɔ' ‑wawʋʋ kʋ'anyɩ 'pleyii! Ɩyä Kplɔɔkplɔɔ‑wugɔɔ 'mnö 'jɛnyɩlɩɩ kʋ'anyɩ nëëdë anyɩ 'fɩɩn!

« Roimhe

Air adhart »

Wycliffe Bible Translators, Inc.

Lean sinn:

Ceanglaichean taic

Sanasan