Bìoball air-loidhne

2 Kolɛtɩ‑dunyʋä 12 - GOD - u2

Laagɔ ‑gbä 'nɩ Pɔlʋ wälɩ ‑ghlɔɔ 'yi
( Nʋnʋ 22.17 ; 'Nɔblʋ 12.6‑12 )

¹ N 'kä bhä täkpɔ ‑a? ‑Ɔ! Ɩɩ' ‑wʋ gba ‑kä! Wälɩɩ' ‑lɩɩ Kwlienyɔɔ ‑gbä 'nɩ n nii‑ lä 'yi, 'nɩ ɔ panö'ö lä nä, ɩmɩ n 'kä ylä ci.

² N ‑yi Klisöö' 'kʋgënyɔ ‑bhlo. Ɩ nʋ yɩ 'ylʋbɔ 'kʋgbä ‑mɔɔnä, 'nɩ Laagɔ bhlüo‑ 'kʋ 'nɩ ʋ gblɔɔ ‑mɔɔ Laagɔduu' fɛɛn! Ʋ blüënöɔ‑ ŋɔkʋʋ' ‑laagwɩ 'mnö ‑aaa, 'nɩ ɔ ‑mʋ ‑mɔɔ taanalʋʋ 'mnö. (‑A! Ɔɔ' 'yɛkɛɛ kuu 'mnö ɔ ‑kʋ bhɛ ‑o, kɔ ‑të ku 'nɩ ɔ gblää‑ ‑o, 'nn ‑wʋ ‑yi. Laagɔ ‑bhlo 'coo‑ ‑yii lä).

³ 'Yɛkɛɛ kuu 'mnö ɔ ‑kʋ 'nɩ ɔ gblää‑ ‑o, kɔ ‑të ku 'nɩ ɔ gblää‑ ‑o, nn' ‑wʋ ‑yi. Laagɔ ‑bhlo 'coo‑ ‑yii lä.

⁴ ‑Mä n ‑yi sɔɔ nynä ‑lɔɔ' nyɩkpɔɔ gblää‑ Laagɔduu'. Ɔ ‑mʋ lä nä, ɔ nuu‑ ‑mɔɔ wälɩ. Wälɩɩ' lɩɩ ɔɔ' ‑lä lä cilɩ mii nä, ɔ nui‑.

⁵ ‑Lɔɔ' nyɩkpɔɔ nä, ɔmɔ n yi lä 'mʋ täkpɔ. ‑Mä ‑amʋ nä, n kä bhä ‑waa nynä n 'kä n yëku 'mʋ täkpɔ nä, sä nn' ‑wʋ lä ‑cʋcʋ ‑kä nä, sɔɔ n 'kä lä 'mʋ täkpɔ.

⁶ 'Nɩ kɩ kä bhɛ 'sɩɩ ‑kʋ nynä ‑mä n yëku‑ n täkpɔ 'mʋ nä, waa' ‑lä bhɛ ci nynä ‑mä plɛɛ bhlä'ä! ‑Ɔnöza bhää? Wälɩɩ 'fɩɩn n 'kä bhlä ci nä, ‑nʋawlɛɛ bhlä! ‑Mä nn' ‑lä täkpɔ ‑yä, sä nn' ‑lätee ‑lä ‑ŋëë nä nyɩkpa kä'ä sɔɔ 'mʋ bhobhoo. 'Klüü n nʋ lä nä, 'nɩ wälɩɩ n ci lä nä, ɩmɩ nyɩkpɔ kä'ä ylä 'mö wlonö.

⁷ Wälɩɩ' ‑lɩɩ Laagɔ yä lä gbä 'nɩ n yä lä 'yi 'ni nä, kɩ 'ninie lä kpänyɩ plɛkʋ. Nä, nn' kɩ ‑kɛ lä 'mʋ täkpɔɔ nä, kä Laagɔ ŋʋʋ'ʋ yɩ 'ŋwëci 'yɛkɛɛ. 'Nɩ 'Dëvloo' ‑zuzu yi 'nɩ ʋ bhütë'ë ‑yä nn' kɩ ‑kä 'mʋ täkpɔ.

⁸ N yä 'ci taa Kwlienyɔ bhibhie nynä ɔ ‑sä'ä ‑lɔɔ' nyäkälɩɩ 'mnö.

⁹ ‑Mä Kwlienyɔ ‑sonö'ö, ɔ lä sä n ‑wamänö‑ö lä nä, sɔɔ ‑zu ‑naa ‑za. ‑Mä nyɩkpɔ 'nö 'cʋcʋ ‑kä nä, ‑lɔɔ 'naa 'päwaa ‑yɔsɔ nʋ lä lebhe. Nä, ‑nɩnɩ 'mɩɩ‑ ‑kä lä 'ŋnö 'nɩ nn' ‑wʋ ‑cʋcʋ ‑kä 'nɩ n täkpɔ lä ‑yä Klisöö' 'päwaa kä'ä yëku kʋ.

¹⁰ ‑Nɩnɩ gbä lä nä, nn' ‑wʋ 'tɛtɩ ‑kä ‑o, nyɩkpa yi'i 'bhɩsɛ ‑o, n yi lʋʋ bɔɔ ‑o, nyɩkpa yi'i 'kwlɩkabhɩä' 'ŋʋ ‑o, plɛ yi'i' 'mʋ belio Klisöö' lebhee' ‑za ‑o, n ŋoo‑ sɔɔ 'kʋ. ‑Ɛɛɛ, n 'nö lä ‑cʋcʋ ‑kä nä ‑lɔɔ 'titi n ‑kä lä 'tɛtɩ.

Kolɛtɩduu' 'cɔcɩnyʋaa' gbʋ bhlä kpänyɩ Pɔlʋ

¹¹ Pɔlö‑bhlägbɩɩ n nʋ lä nä, anyɩ‑ ‑gbä 'nɩ n nʋɩ lä. Anyɩ‑ gä'ä bhlä 'mʋ täkpɔɔ ‑mä aa' nʋ ‑wʋ sɔɔ. N 'nö ‑zi lʋʋ plöö‑ nä, ‑wa laa lä wa yëku lobho lobhonyʋä 'kädʋa nä, waa' zi'i ‑wʋ nyɩkpa‑plölɩɩ'.

¹² 'Klüü ‑ɩ pana lä nynä ‑mä n ‑glö Kwlienyɔɔ' lobho lobhonyɔ nä, ka 'ninɩ 'naa zëkpëa 'mnö 'yi wɩa. Ɩ pana nynä ‑mä n ‑kʋ'anyɩ bhlä nëëdë nä, a nii‑ 'yi nynä ‑mä n ‑glö nyɩkpɔɔ' lɔɔ‑ yi lä kpänyɩ ‑bɛɛsä nä. 'Nɩ Kwlienyɔ ‑gbä 'sɩɩ 'nɩ 'yiziziogbɩ ‑yä ‑daminë 'sɔ ‑nʋɔ. 'Nɩ 'naa nʋnʋgbɩɩ 'fɩɩn nä, ɩ ‑kä bhä 'sɩɩ 'päwä. ‑Nɩnɩ 'fɩɩn pana nynä ‑mä n ‑glö Kwlienyɔɔ' lobho lobhonyɔ.

¹³ Lʋʋ ‑sä 'yigädabhlɩ 'kʋʋ 'cɔcɩnyʋa ‑kä bhä 'nɩ anyɩ aa' bhä ‑kää? 'Nɩ n nö'anyɩ ‑läzä 'sɩɩ lʋʋ 'ylää. Kɩ kä plöö‑ nynä ‑mä ‑lɔɔ' ‑klüü 'kʋ nn' ‑wʋ 'nää ‑nʋ nä, a cienö'ö.

¹⁴ N ka'anyɩ yɩ bʋkʋ yëku ‑yi nä, ɩ nʋ yɩ 'naa 'ci taanadä. N kä ‑yi nä n nö'anyɩ ‑lä 'sɩɩ lʋʋ 'ylää. Anyɩ 'titi, anyɩ‑ n tään lä ‑mä, anyɩa' monie 'mɛ nn' tään ‑wʋ. ‑Ɔnöza bhää? 'Yu, ɔmɔɔ‑ klä ‑wʋ 'nää ɔɔ' gäänyʋää' ‑za ‑mä ɔɔ' gäänyʋä wamää‑ klä lä ɔɔ' ‑za 'nää.

¹⁵ Nä ‑amʋ, n yi wlɩɩ' ‑sä 'nɩ n yi 'nyɛ. 'Nɩ 'naa zëkpëa 'titi, n yia 'sɩɩ ‑sä anyɩa' ‑za. Nä, n yi'anyɩ bhä 'sää kpänyɩ wamä 'nɩ a yi bhä ci nynä ‑mä a nö'ö lä wamä ‑a?

¹⁶ N cii‑ lä nynä ‑mä n ‑kʋ'anyɩ bhlä nëëdë nä, ‑amʋ 'titii‑ wloo bhä n yëku 'kʋ nä, ‑nänʋä ‑kʋ ‑lɔɔ 'nɩ wa ci nynä ‑mä sä n cii‑ lä nä, sɔɔ ‑wʋ nyaasäsä plöö‑. Wlä ‑kpläkplä n bhlüü‑ 'kʋ 'nɩ n ‑tlaa'anyɩ ‑gbosu.

¹⁷ Nyɩkpaa' ‑lʋa n ya'anyɩ lä 'kʋ lobho nä, n yä bhä waa' nëëdëë' nyɩkpɔ soo nynä ‑mä ɔ sonö'anyɩ ‑yä a nyɛɛ'ɛ lʋʋ 'cënänä ‑a?

¹⁸ N ‑lobho bheli Titö anyɩ yëku. Ɔ mʋ lä nä, n ‑gbɩɔ bhelii' 'yigädalɔɔ 'kʋ. Nä, Titö ‑yi lä ‑mɔɔ nä, kɔ lü'anyɩ bhä lʋʋ 'kʋ ‑a? Titö ‑yä ‑amʋ 'sɔ nä, bhobhowluu ‑bhlo ‑a bhɛɛ‑ lä. 'Nɩ ‑a nää‑ 'sɩɩ säbhlo ‑säbhlo. Yio ‑a?

¹⁹ Ɩ nʋ yɩ 'tänyɩ 'nɩ a bhobho lä nynä ‑mä kä ‑a tään ‑a 'gä ‑a yëku gbʋʋ' ‑sä. Ɩ ‑wʋ sɔɔ ‑kʋ. Laagɔ dëlü ‑a ‑kʋ ‑klä ‑ɛɛn! 'Nɩ ‑a ‑kä 'sɩɩ Klisö 'kʋ 'nɩ ‑a ci lä. Kä ‑a nʋ lä sɔɔ ‑yä a 'kä 'tɛtɩ 'ni.

²⁰ N yi'anyɩ lä bʋkʋ yëku nä, n ‑guu yɩ wälɩklë ‑bhlo 'kʋ. Amää‑ plöö‑ lä nynä ‑mä, n kä ‑yi nä, sä n tänönö'anyɩ lä 'mʋ nä, n yi'anyɩ bhä sɔɔ 'mʋ 'nii ‑a? 'Nɩ anyɩ ‑mä 'sɩɩ, sa tänönö'ö lä 'mʋ nä, a yi'i bhä sɔɔ 'mʋ 'nii ‑a? Nn' ‑wʋ ‑waa nynä ‑mä n ŋënö'anyɩ 'kʋ bhläälɩɩ 'mnö. Nn' ‑wʋ 'sɩɩ ‑waa nynä ‑mä n ŋënö'anyɩ luëzüü 'mnö, ɩyä n ŋënö'anyɩ gbʋgblɛɛ 'mnö. Nn' ‑wʋ ‑waa nynä ‑mä n ŋënö'anyɩ cicee 'mnö, ɩyä n ŋënö'anyɩ nyɩkpaa' kpʋkpɔlɩɩ 'mnö. Nn' ‑wʋ ‑waa nynä ‑mä n ŋënö'anyɩ gbenyenyisaa' 'mʋ ‑säälɩ nëë', ɩyä n ŋënö'anyɩ täkpɔlɩɩ 'mnö. Nn' 'ylä ‑wʋ 'sɩɩ nynä n ŋënö'anyɩ bhusulɩɩ 'mnö.

²¹ N yi'anyɩ lä bʋkʋ yëku nä, n gu 'sɩɩ nynä ‑mä, 'naa Laagɔɔ' kä'ä ‑kä bʋkʋ anyɩ 'yikʋ sʋkpa, ɩyä nyɩkpaa' ‑lʋa ‑wa ‑bhlüü lä ‑lɔɔ' 'tänyɩɛ nyenyii 'mnö nn' kä ‑kä waa' bhutukpää' ‑za 'tu. Waa' 'ylä ‑wʋ lä nynä ‑mä wa 'kɩ 'mnö bha nä, wa ‑kʋ ‑lätee plʋplälɩɩ 'mnö, wa nää ‑lätee dëbësä 'nɩ wa ‑kʋ ‑lätee ‑käpä ‑käpaa 'mnö.

« Roimhe

Air adhart »

Wycliffe Bible Translators, Inc.

Lean sinn:

Ceanglaichean taic

Sanasan