Bìoball air-loidhne

2 Kolɛtɩ‑dunyʋä 11 - GOD - u2

Pɔlʋ lä wa luë ‑kpläkplö lobho lobhonyʋa
( Gala 1.6‑9 ; 4.9‑20 ; 2 Kolɛ 12.11‑15 ; Wlɔmʋ 16.17 )

¹ ‑Epo! Kä n 'kä ylä 'pɛpɛlɩä pɔlö‑bhlägbɩ nʋ nä, a 'kuu ‑wʋ saa 'mnö 'naa ‑za! ‑Ɛɛɛ, a mii ‑yä a 'kuu 'mnö 'naa ‑za.

² Kä n ‑waa'anyɩ nä, ɩɩ' luëzü‑ n plä ylä anyɩa' ‑za. 'Nɩ ‑lɔɔ' luëzüü nä, Laagɔ yëku ɩ bha lä. N naa, a ni 'wlio a 'kä lä nöö nä, ɔ ‑bhlü ‑bhlo. Ɔmɔ wa laa lä Klisö. Nä n ylä nynä ‑mä a kplɔɔ wɩa. A kplɔɔ 'ŋnɔɔ' lɔɔ‑ ‑wʋ lä ŋwadi ‑yi nä 'bhisäkʋ ‑yä n 'kanyɩmɔ dëlü fä.

³ ‑Maa, Adää 'ŋnɔ Evö nä, ‑leebolu 'nyigënöɔ‑ wä. Ɩ ‑kä 'ŋnö 'nɩ n ‑guu wälɩklë ‑bhlo 'kʋ. N gu nynä ‑mä waa' ka'anyɩ ‑kä 'nyigë. Aa' kä ‑kä Klisö gwë ‑sä ‑yä aa' kä ‑kä too.

⁴ ‑Ɛɛɛ, nyɩkpɔ yi'anyɩ ‑pɛpɛɛ yëku 'nɩ ɔ sonö'anyɩ Zozii' 'yigädalɔɔ yëkuu' wälɩ. 'Nɩ wälɩɩ' lɩɩ ‑a nö'anyɩ ‑läzä lä soo nä, ɔ sonö'anyɩmɩ. 'Nɩ 'wugɔɔ' lʋʋ aa' ‑läzä lä 'ni nä, ʋ kla'anyɩ 'kʋ. 'Nɩ 'döö lɩɩ aa' ‑läzä lä 'nu 'nɩ ‑ɩɩ ‑wʋ lä 'sɩɩ Kwlienyɔɔ' 'Nägädöö plöö‑ nä, wa sänö'anyɩmɩ 'nɩ a ŋomänɩ.

⁵ 'Nɩ ‑amʋ, n bhobho nynä ‑mä, nyɩkpaa a laa lä lobho lobhonyʋä 'kädʋa nä, waa' zi'i ‑wʋ.

⁶ ‑Ɛɛɛ, nn' ‑wʋ 'zaazɩ wälɩɩ' 'kʋ 'bhlüsä ‑yi o ‑mä, wälɩɩ' yibhëlɩɩ' 'pɛlʋ nä, n ‑yi wälɩ ‑bhutukpä. 'Nɩ saa 'fɩɩn ‑a ‑nʋ'anyɩ lä nëëdë nä, sɔɔ pana ‑lɔɔ' 'klüü.

⁷ 'Tänyɩɩ n sänö'anyɩ bhlä Laagɔɔ' 'Nägädöö nä, kä n ‑lä n yëku ‑dʋdʋkʋ 'nɩ, n yi'anyɩ 'kʋ bhɛlɩä. 'Nɩ nn' ‑wʋ 'sɩɩ nyɩkpɔ dlu 'ylää‑. N ‑nʋ lä sɔɔ nä, nn' bhä 'nää ‑nʋ ‑a?

⁸ 'Yigäda ‑gbäsɩɩ 'cɔcɩgbüü, ɩmɩɩ‑ nyɛɛ'ɛ lä. Ɩmɩɩ n ‑sä wlɩɩ' 'nɩ n nʋ'anyɩ lä ‑gä.

⁹ 'Tänyɩɩ n ‑kʋ'anyɩ bhlä yëku nä, lɩɩ' ‑nɩnɩɩ gbʋ bhlä'ä bhä ‑mä, nn' ‑wʋ anyɩa nëëdëë' nyɩkpɔ lʋʋ ‑zla. ‑Mä bhelie ‑bha Masedʋanöbhlɩ 'kʋ 'cɔcɩgbüü ‑mnö, 'nɩ wa ‑yä 'naa tlëë tlëëlɩɩ 'sɔ ‑yi. Ɩ ‑gbä 'nɩ nn' bɔɔ bhɛ lʋʋ. 'Nɩ n nö'anyɩ ‑lä 'sɩɩ 'kɔɔkɔ lʋʋ zlaa!

¹⁰ Klisöö' ‑nʋawlɛɛ ‑ɛ ‑kʋ'ʋ lä 'mnö nä, ɛmɛ n ghlää lä 'mnö 'nɩ n ci lä wälɩnɩ. 'Nɩ Akayii‑bhlɩɛ 'fɩɩn 'mnö nä, nyɩkpɔɔ' ‑lä ci nynä ‑mä 'naa täkpɔnɩ ‑lä 'mʋ.

¹¹ ‑Ɔnözä 'nɩ n ci bhä sɔɔ? Kɩ plöö‑ bhä nynä ‑mä n nö'anyɩ ‑wʋ ‑waa ‑a? Yio! Laagɔ ‑yi sɔɔ wɩa nynä kä n ‑waa'anyɩ.

¹² 'Klünö n ‑nʋ lä nä, n yii ‑lätee nʋ. N 'kä sɔɔ nʋ ‑yä nyɩkpaa' ‑lʋa wa tänönɩ lä 'focloo' nä, waa' kʋʋ ‑kä ‑mɔɔ 'ni. Waa' kä ‑kä täkpɔ ‑yä waa' kä ci nynä ‑mä wa ‑yanyɩ 'sɔ ‑bhlü.

¹³ ‑Lɔɔ' nyɩkpaa ‑glö ‑kpläkplö lobho lobhonyʋä. Wa laa wa yëku Klisöö' lobho lobhonyʋä ‑mä wa ‑glö nyɩkpaa' 'nyigënyʋä.

¹⁴ 'Nɩ ‑lɔɔ' 'klüü 'nini‑anyɩ ‑wʋ plɛkʋ. 'Dëvlo 'titi nʋmʋ 'sɩ sɔɔ. Ʋ gbëbie nynä ‑Laagɔzuzuu' lʋʋ‑ ‑kä lä zëlü nä.

¹⁵ Nä, 'Dëvloo' ‑gänʋnyʋä kä nʋ nynä Laagɔɔ 'yigënyʋä nä, ɩɩ' 'ninie‑anyɩ ‑wʋ plɛkʋ. ‑Mä bhɩädää nä, saa 'fɩɩn, 'klüü wa ŋʋʋ‑ lä sä nä, wa yi ɩɩ' dluu plʋʋ.

Pɔlʋ ni 'kwlɩkabhɩä ‑bhutukpä
( 2 Kolɛ 4.9‑13 ; 6.3‑10 ; 1 Kolɛ 4.8‑13 ; Nʋnʋ 20.18‑27 )

¹⁶ Kä n sonö'anyɩ ylä bʋkʋ nynä ‑mä nyɩkpɔɔ' wloo'o ‑lä nynä dëbënyɔ. 'Nɩ a kä 'sɩɩ ‑waa nä, a lä'ä dëbënyɔ ‑yä n 'kɩ 'mʋ täkpɔ 'pɛpɛlɩä.

¹⁷ Wälɩɩ n sonö'anyɩ lä ‑lää nä, n nö'anyɩ ‑wʋ ‑soo nynä ‑mä Kwlienyɔ‑ ‑sonö'ö 'mɩɩ. Kä n sää lä 'flɛ 'mʋ nynä pɔlöbhlänyɔ. 'Nɩ n ‑yi sɔɔ nynä ‑mä n kɩ 'sɩɩ 'mʋ täkpɔ nä, 'naa wälɩ mɛɛ‑.

¹⁸ Sä nyɩkpa ‑bhutukpä täkpɔɔ lä wa yëku 'mʋ nä, sɔɔ ‑amʋ ‑mä n täkpɔ lä 'sɩɩ.

¹⁹ Anyɩmɔɔ‑ plöö‑ lä nyɩkpaa' ‑lʋa ‑kä lä 'fike nä, a mii 'nɩ dëbënyʋa a puwa 'nyukwli.

²⁰ Wa kla'anyɩ nynä geyuë 'nɩ wa lü'anyɩ 'kʋ, 'nɩ wa ghlü'anyɩ käälɩɩ 'fɩɩn. 'Nɩ wa wlonö'anyɩ ‑dʋdʋkʋ. 'Nɩ wa pa'anyɩ 'kpeyi. 'Nɩ ‑nɩnɩ 'fɩɩn a ŋonɩ 'kʋ.

²¹ N cii lä 'sää nä, ɩ ‑kä'ä zoo 'kʋ 'nɩ n cii lä. Kɩ ‑kʋ lä nynä ‑mä ‑a ‑kʋ'anyɩ bhlä nëëdë nä, ‑aa bhɔɔ 'zaazɩ ‑cʋcʋ ‑kä! ‑Mä nyɩkpɔ kä ‑lɔɔ ‑kʋ 'nɩ ɔ kä cii‑ nynä ‑mä ɔ yi täkpɔ nä, ‑amʋ ‑mä 'sɩɩ n yi täkpɔmʋ. Pɔlöbhlänyɔ 'bhisäkʋ n sää ‑kɛ lä 'mʋ aa!

²² Eblëënyʋä‑ waa' bhä plöö‑ ‑a? ‑Amʋ ‑mä n plöö‑ 'sɩɩ Eblëëyu. 'Yizlɛnyʋä‑ waa' bhä plöö‑ ‑a? ‑Amʋ ‑mä 'sɩɩ, n plöö‑ 'Yizlɛyu. Ablaamʋʋ' 'lɔlʋnyʋä‑ waa' bhä plöö‑ ‑a? ‑Amʋ ‑mä 'sɩɩ, n ‑glö Ablaamʋʋ' 'lɔlʋnyɔ.

²³ Klisö‑ wa nʋ bhä ‑gä ‑a? ‑Amʋ ‑mä 'sɩɩ ɔmɔ n nʋ lä ‑gä. 'Nɩ n plöö 'sɩɩ Klisöö' ‑gänʋnyɔ 'nɩ n ziwa. ‑Ɛɛɛ, pɔlöbhlänyɔɔ 'bhisäkʋ n sää ‑kɛ ylä 'mʋ a! Kä n ci ylä nynä ‑mä n ‑nʋ lebhe 'nɩ n ‑ziwa. 'Nɩ Klisöö' ‑gänʋlɩɩ' ‑za nä, n yä ‑jɩɩ nʋ 'ci bhutukpä. Wa yä'ä bhütë 'ci bhutukpä. N ‑bha yɩ 'ci bhutukpä 'kwiee ‑vluu 'kʋ.

²⁴ 'Zufʋnyʋä yä'ä 'ci ‑ngbü bhütë. 'Tänyɩɩ 'fɩɩn 'mnö wa ‑bhütënö'ö lä nä, wa 'sɛpɩnö'ö ‑gblɩyee' 'ci glʋ 'nɩ 'kʋgbä ‑pɛɛnä.

²⁵ Wlomɛɛnyʋä yä'ä ci taa ‑gblɩyee' bhütë. Ylʋʋ ‑kʋ ‑lɔɔ 'nɩ wa bhlää'ä cɛkwɩɩ' nynä n 'kä 'ku. 'Mɩɩ yä'ä jie 'klʋ 'ci taa ‑vluu 'kʋ ‑sä. 'Tänyɩ ‑kʋ ‑lɔɔ 'nɩ n ‑sä ylʋʋbhë ‑ylʋbhë jie 'klʋ 'nɩ, n ‑goo jilakwɩɩ nëëdë.

²⁶ N yä lowli ‑bhutukpä 'kʋ mʋ. N yä ‑zʋɛɛ' nü nü nü 'ni. 'Nyie yä'ä ‑vluu 'kʋ sä. Nyɩkpa‑bhlänyʋä yä'ä ‑vluu 'kʋ ‑sä 'sɩɩ. N bhelie‑ 'Zufʋnyʋä nëëdë ‑o, n ‑mie. Nyɩkpaa‑ ‑wʋ lä 'Zufʋnyʋä plöö‑ nä nëëdë ‑o, n ‑mie. N ‑kʋ 'duu ‑o, n ‑mie. N ‑kʋ 'popi 'kʋ ‑o, n ‑mie. N ‑bha jie 'klʋ ‑vluu 'kʋ. 'Nɩ ‑kpläkplö bhelie ‑sä'ä 'sɩɩ ‑vluu 'kʋ.

²⁷ N ‑yä 'sää 'titi lebhee' ‑lɛɛ ‑klɛ nʋ 'ci ‑bhutukpä. N yä 'ylaa 'kplëë goo. ‑Gbugbe ‑yä 'mnätʋ 'sɔ yä'ä 'bhlä. N ‑bɔɔ ŋënü 'sää 'futu 'futu. N kʋ bhä wätlɩ nëëdë 'nɩ nn' bhɔɔ 'kʋ ‑gbi lʋʋ ‑kä. Nn' bhɔɔ 'kotu ‑kä ‑yä n 'kä plä.

²⁸ ‑Nɩnɩ ‑kʋ ‑mɔɔ 'nɩ nn' ‑läyɩɔ ɩɩ' zɛlɩ mii. ‑Mä wälɩklea' ‑laa ‑a ‑kʋ lä kpänyɩ ylɩɩ 'fɩɩn 'kʋ 'naa 'wluu 'mnö nä, amää‑ plöö‑ lä 'cɔcɩɛ yëkuu' lebhee. 'Naa plɛ ‑kʋɛ kpänyɩ 'kʋ.

²⁹ Nä nyɩkpɔ 'nö ‑cʋcʋ ‑kä nä, ‑amʋ ‑mä 'sɩɩ nn' ‑wʋ ‑cʋcʋ ‑kä ɔɔ' bhlëë'. Kä nyɩkpɔ kä nyenyii' ‑bhlüü nä, kä ɔɔ' wälɩɩ nyɛɛ'ɛ 'sɩɩ nyäkälɩ.

³⁰ Nä, ɩ kä bhä plöö‑ nynä ‑mä n yi a 'zaazɩ täkpɔ nä, sä nn' ‑wʋ ‑cʋcʋ ‑kä nä, sɔɔ n 'kä bhlä 'mʋ täkpɔ.

³¹ 'Nɩ n ci lä ‑sɔɔ nä, nn' gë ‑wʋ yio. Laagɔɔ, ‑ʋ plöö‑ lä Kwlienyɔɔ Zozi Klisö ɔ 'Bä nä, ʋ ‑yi sɔɔ nynä ‑mä, nn' gë ‑wʋ yio. Nä 'nyʋpälɩ ŋënʋ 'kʋ 'kɔɔkɔɔ' ‑za.

³² 'Tänyɩɩ n ‑kʋ bhlä Damasöduu' nä, 'loyoo wa laa lä Aletasö nä, ɔɔ' 'tänyɩɩ ‑gɔmnä ‑gbä 'nɩ 'sʋjä ‑koo 'duu ‑yä wa kä'ä 'kʋ bhlü.

³³ ‑Mä wa ŋʋʋ'ʋ ‑takwëë', 'nɩ wa ‑ghlänö'ö gbü‑papʋʋ' 'ŋwɩdɛɛ' këfëa nëë' 'nɩ wa yi'i ʋʋ' klë kwlie. Ɩmɩɩ‑ ‑sä'ä ‑lɔɔ nëë'.

« Roimhe

Air adhart »

Wycliffe Bible Translators, Inc.

Lean sinn:

Ceanglaichean taic

Sanasan