Bìoball air-loidhne

2 Kolɛtɩ‑dunyʋä 10 - GOD - u2

Pɔlʋ bhlää ɔɔ' ‑Laagɔ‑lebhee 'kʋ
( 1 Kolɛ 2.1‑5 ; Wlɔmʋ 15.17‑19 ; 2 Kolɛ 6.4‑7 ; 13.2‑4 )

¹ ‑Amʋ Pɔlʋ nä, Klisöö' pɔlöwätɛ ‑yä ɔɔ' plɛkʋmɛnɔɔ 'mʋ n bhlü lä 'kʋ 'nɩ n 'ylänö'anyɩ lä 'klünö. Wlä n ka'anyɩ nëëdë ‑kʋ nä, kä n ‑kʋ ‑cʋʋn ‑mä, n ka'anyɩ gwë ‑sä 'nɩ n gbɛtɛ anyɩa' ‑za.

² Nä bheeje, n bhibhie'anyɩ kpänyɩ. N kä ‑yi nä, aa' gbä ‑lä 'nɩ n ka'anyɩ ‑kä 'fɩ 'kʋ fä. A ni nyɩkpaa' ‑nänʋä bhobho nynä lebhee ‑a nʋ lä nä, ‑a yëku 'wlu ‑a sä 'nɩ ‑a nʋɛ. ‑Lɔɔ' nyɩkpa‑cëa nä, n kä ‑yi nä, n 'nʋwa ‑lä ‑kä 'mʋ gäma ‑ɛɛn!

³ ‑A plöö‑ 'flɛ ‑mää 'ylʋzɔɔ' nyɩkpa ‑mä, tʋʋ ‑a vë lä nä, ʋʋ' ‑wʋ ‑mää 'ylʋzɔɔ' tʋ plöö‑.

⁴ Tʋnʋ 'mnö nä, tëvëlɩɩ ‑a bhɛɛ‑ 'nɩ ‑a vë lä nä, ɩɩ' ‑wʋ ‑mää 'ylʋzɔɔ' lɩɩ plöö‑. Ɩɩ' 'tɛtɩɩ Laagɔ yëku ɩ bha lä. ‑Lɔɔ' tëvëlɩɩ nä, sä gbü‑papʋ yi‑anyɩ ‑blɔkʋ sɩɔmɔ ‑sɩɔmɔ ‑kaa nä, ɩ yiu sä pään.

⁵ Nä, ‑kpläkpla 'fɩɩn nyɩkpa ŋʋ lä sä 'nɩ ‑a ‑sɩän lä Laagɔɔ' yibhëlɩɩ ‑blɔɔ 'kʋ nä, sa yi kʋmɔ ‑kʋmɔ ‑kaa nä, ‑a yia nuë. Bʋkʋ 'nɩ ‑a yi nyɩkpaa' bhobhowli 'cɩcɩ ‑yä wa 'kä yi wa 'kä Klisö 'klʋkpää 'ŋʋ.

⁶ Anyɩ, a kä yɩ 'fɩa 'nägäsä Klisöö' 'klʋkpä‑ŋʋsä ‑yibhë nä, nyɩkpaa‑ 'ŋʋɔ ‑wʋ lä 'klʋkpää' nä, ‑lɔɔ ‑a 'gwa ylä gbäylɩ sä.

⁷ Nä, sä wälɩɩ ‑kʋ lä nä, a 'nii sɔɔ 'yi! Nyɩkpɔ kä ‑lɔɔ ‑kʋ 'nɩ ɔ kä ci nynä ‑mä, ɔ ‑glö Klisöö' nyɩkpɔ nä, ‑lɔɔ' nyɩkpɔɔ yibhë 'sɩɩ sɔɔ nynä ‑mä ‑anyɩ ‑mä 'sɩɩ, ‑a ‑glö Klisöö' nyɩkpa.

⁸ Kä Kwlienyɔɔ nyɩ‑anyɩ lä ‑tëbhuu nynä ‑mä ‑a gbä ‑yä anyɩa' 'cɔcɩgbëa 'kä 'kʋ 'plöö. Ɔɔ' ‑wʋ cii‑ nynä ‑mä ‑a gbä ‑yä a 'kä nuë. 'Nɩ ‑lɔɔ' tëbhuu nä, zoo nö'ö ‑lä 'bhlä ‑mä, n yiu 'mʋ täkpɔ.

⁹ 'Nɩ kä nn' jɩjlä'anyɩ ‑wʋ 'sɩɩ ‑yä n 'kanyɩ fuë.

¹⁰ Kä nyɩkpa ci lä nynä ‑mä, Pɔlʋʋ' 'bɔɔgwɩɩ ɔ jɩjla‑anyɩ lä nä, ɩ ‑kä kpänyɩ 'fɩ, 'nɩ ɔɔ' ciciwälɩɩ sie yëku. ‑Mä ɔmɔ 'titi kä‑anyɩ yëku ‑yi nä, ɔɔ' ‑wʋ ‑cʋcʋ ‑kä, 'nɩ ɔɔ' ciciwälɩɩ' sä ‑wʋ ŋɔnyɔ.

¹¹ ‑Mä ‑wa bhobho lä sɔɔ nä, ɩ ‑ŋwa 'kʋ nynä ‑mä wa 'ŋʋ wälɩklënä 'wlu nynä, ‑anyɩa 'bɔɔgwɩɩ 'mnö ciciwälɩɩ sɩ ‑kä lä 'yizlɛ nä, ‑a ga'anyɩ nëëdë ‑yi nä, sɔɔ ‑säkä ‑säkä ‑a 'ganyɩ lä 'yizlɛ 'kʋ 'ŋʋʋ.

¹² ‑Ɛɛɛ, nyɩkpaa' ‑nänʋä 'kʋ ‑lɔɔ 'nɩ wa täkpɔɔ wa yëku 'mʋ. ‑Lɔɔ' nyɩkpaa nä, ‑aa ‑lä ci nynä ‑mä kä ‑a ‑yʋwa 'sɔ ‑bhlü. ‑A 'nʋwa ‑lä ‑a yëku 'kʋ nyäka. Wamä nä, sä wa ‑kʋ lä nä, sɔɔ wa wloo 'nɩ wa nyäka wa yëku. Kɩ plöö‑ lä nynä ‑mä wa ‑glö dëbënyʋä.

¹³ Mä ‑anyɩ ‑aa ‑lä täkpɔ 'nɩ ‑a 'gä nëkʋ 'tɔtɔ. Laagɔ ‑lobhu‑anyɩ lä nä, kʋ pään ‑känzlʋʋ nynä ‑anyɩa lebhee ‑kä bhloodä. Nä ‑lɔɔ' ‑känzlʋʋ 'mʋ ‑a wloo 'nɩ ‑a nyäka lä.

¹⁴ 'Tänyɩɩ ‑a ‑bha lä 'kʋ 'nɩ ‑a ‑mʋ'anyɩ lä yëku nä, ‑aa ‑wʋ ‑lɔɔ ‑känzlʋʋ tɔɔ. ‑Anyɩ‑ nää‑ lä tɛɛ 'nɩ ‑a yi'anyɩ lä yëku yi 'nɩ ‑a yi'anyɩ lä Klisöö' 'Nägädöö ‑sää.

¹⁵ Nä ‑aa 'mɩä yɩɔ ‑lɔɔ 'kʋ 'nɩ a 'gä yigäda‑nyɩkpɔɔ' nʋnʋ‑lebhe 'mʋ täkpɔ. Wälɩklë ‑bhlo ‑a ‑kään lä plɛkʋ nä, amää‑ plöö‑ lä nynä ‑mä, anyɩ, anyɩa' pɔlötɛtɛɛ kä yɩ glɛɛ‑ nä, 'lëkpëa ‑a nʋʋ lä lebhe 'mnö nä, ‑a yi mii 'nɩ ‑a yia 'ghlümë. ‑Mä zlʋʋ Laagɔ panö‑anyɩ lä nä, ‑a 'nʋʋ ‑lä 'kɔɔn 'kʋ 'mɩä.

¹⁶ 'Nɩ 'tänyɩ yi ŋëë 'nɩ ‑a yi yɩ ‑kääzlʋʋ 'tɔɔ 'nɩ ‑a yii ‑mɔɔ' 'yigäda‑bhlɩɩ 'mnö Kwlienyɔɔ' 'Nägädöö bie ‑kä mʋ. Nä lebhee' lɛɛ 'yigäda‑nyɩkpɔ yä wɛ läzä nʋ nä, ɛmɛ ‑aa ‑lä 'mʋ täkpɔ.

¹⁷ Nyɩkpɔ kä ‑waa nynä ‑mä ɔ 'kä täkpɔ nä, ɔ täkpɔ Kwlienyɔ 'mnö.

¹⁸ ‑Ɔnöza bhää? Nyɩkpɔɔ' lɔɔ ‑ɔ lobho lä ɔ yëku nä, Kwlienyɔɔ' klɔɔ ‑wʋ ‑kpacɛ. ‑Mä nyɩkpɔɔ' ‑lɔɔ Kwlienyɔ ‑lobho lä nä, ɔmɔ ɔ klä ‑kpacɛ.

« Roimhe

Air adhart »

Wycliffe Bible Translators, Inc.

Lean sinn:

Ceanglaichean taic

Sanasan