Bìoball air-loidhne

2 Kolɛtɩ‑dunyʋä 1 - GOD - u2

Bhäälɩ

¹ ‑Amʋ Pɔlʋ, Laagɔ ‑gbä 'nɩ ‑ɔ yä lä Zozi Klisöö' lobho lobhonyɔ 'plö nä, n ‑yä bhelio Timotee 'sɔ, ‑anyɩ‑ jɩjlä'anyɩ 'bɔɔgʋnʋ, anyɩ Kolɛtɩduu' 'cɔcɩnyʋa. 'Nɩ ‑a jɩjlʋʋ 'sɩɩ Akayii‑bhlɩɛ 'mnö 'cɔcɩnyʋa 'fɩɩn ‑za.

² ‑A 'Bä Laagɔ ‑yä Kwlienyɔ Zozi Klisöö' 'sɔɔ 'nää, a ŋënö'anyɩ 'kʋ ‑yä a kʋ waa' 'kʋ wɔtɔlɩɩ 'mnö.

Pɔlʋ bhään Laagɔ

³ Laagɔ, ʋmʋ mʋ ‑ʋ plöö‑ lä ‑anyɩa Kwlienyɔɔ Zozi Klisö ɔ 'Bä nä, 'klʋagba ŋënʋ. Ʋ plöö‑ 'Bä lɔɔ‑ yibhë lä ŋäzö 'nɩ ‑ɔ ŋʋ lä 'kɔɔkɔ 'tɛtɩɩ.

⁴ 'Kwlɩkabhɩa 'fɩɩn ‑a blüë lä 'mnö nä, kʋ ‑bhlüë‑anyɩ plɛɛ' 'kɔɔkɔ. Kʋ ‑nʋ lä sɔɔ ‑yä ‑a 'gä mii ‑yä ‑lʋa 'kwlɩ bhɩä lä ‑lɩɩ 'fɩɩn 'mnö nä, ‑a 'gwa 'sɩɩ plɛɛ' bhlüë.

⁵ Sä Klisöö' 'kwlɩkabhɩa ‑a 'nimʋa lä nä, sɔɔ ‑a 'ninöɔ lä 'sɩɩ 'tɛtɩɩ kpänyɩ.

⁶ Nä ‑a gä 'kwlɩkabhɩä 'ni nä, anyɩ, a 'kä 'tɛtɩ 'ni ‑yä a 'kä ‑lɔɔ nëë ‑bha 'ɩɩ ‑za lä. ‑A gä 'tɛtɩ ‑kä nä, ‑a 'ganyɩ 'sɩɩ 'tɛtɩɩ 'ŋʋ ‑yä a kä ‑lɔɔ 'kwlɩkabhɩa nëë bhɩä.

⁷ Nä, ‑a ga'anyɩ plɛkʋ 'pä nä, plɛɛ' belio‑anyɩ yɩɔ 'mʋ. 'Zaazɩ nä, 'kwlɩkabhɩa ‑a ni lä nä, ka 'nimʋa. ‑Mä sä pleyii yä‑anyɩ ylä 'tɛmä nä, ‑a ‑yi sɔɔ nynä ‑mä anyɩ ‑mä 'sɩɩ, pleyii yi'anyɩ 'tɛmä.

⁸ Bhelie ‑yä bhɛŋwnɩänyɩ‑, nyäkälɩɩ ‑a nii‑ lä Azii‑bhlɩɛ 'mnö nä, ‑a ‑waa nynä ‑a yibhënɩ. Aziibhlɩ 'kʋ nä, 'kwlɩ ‑bhɩänö‑anyɩ kpänyɩ 'nɩ ɩ 'tɔɔtɔɔ‑ nëkʋ. ‑A ‑bhobho 'sää 'titi nynä ‑mä ‑a yii a 'mnö too.

⁹ Kä ‑a ‑bhobho bhä sää 'titi nynä ‑mä ‑a yii bhä 'kwie 'mnö 'nii. Ɩ ‑kʋ bhɛ lä sɔɔ nä, ‑aa bhɛ ‑pɛɛ ‑a yëku dë 'tɛɛ sää 'titi. ‑Mä Laagɔ, ʋ mii 'nɩ ‑ʋ gälɩä lä 'kudukuë nä, ʋmʋ ‑bhlo 'coo ‑a 'tɛɛ‑ bhɛ dë.

¹⁰ Naa, Laagɔ 'mʋʋ‑ ‑sanyɩ lä ‑lɔɔ' 'kwie nëë. 'Nɩ ʋ yi‑anyɩ ‑lätee 'kwie nëë' ‑sä. ‑Ɛɛɛ, ‑a 'tɛnʋ dë nynä ʋ yi‑anyɩ ‑lätee ‑lɔɔ nëë' ‑sä.

¹¹ 'Nɩ anyɩ ‑mä 'sɩɩ ka klänö‑anyɩ bhibhielɩɩ 'mnö. Ɩ ‑kä 'ŋnö nä, Laagɔɔ' yi anyɩa' bhibhie 'kʋ ŋoo 'nɩ, ʋʋ' 'nää yi‑anyɩ 'kʋ ŋëë. Ɩ yi 'ŋnö kään 'nɩ bhutukpä yi Laagɔ bhään ‑anyɩa zëkpëa ‑za.

Pɔlʋ yä ɔɔ' lowluu' mʋlɩɩ dä 'kʋ ‑sä

¹² Wälɩklëa ‑a yi lä 'mʋ täkpɔ, 'nɩ ‑anö ‑dläfʋɛ yi‑anyɩ lä 'wugɔɔ' kʋ nä, amää‑ plöö‑ lä nynä ‑mä, sä ‑a nää lä ‑mää 'ylʋzɔɔ nä, 'nɩ anyɩ 'titi 'yikʋ sä ‑a nää lä nä, kä sɔɔ kplɔɔ wɩa, Laagɔ dëlü. Nyɩkpaa' dɩgälɩ ‑aa bhɔɔ 'kʋ gëë, ‑mä Laagɔɔ' plɛkʋmɛnɔɔ 'mʋʋ‑ 'tienö‑anyɩ lä.

¹³ ‑Anyɩa 'bɔɔgwɩɩ 'fɩɩn ‑a jɩjlä'anyɩ lä nä, wälɩɩ 'fɩɩn a yä lä zɛɛ 'nɩ a ‑yi wɛzä lä nä, ɩmɩ ‑a ‑jɩjlä lä. Nä, n ‑yi sɔɔ nynä ‑mä a yi‑anyɩ 'mʋ 'nu wɩa.

¹⁴ 'Klünö 'kʋ nä, a yä‑anyɩ wɛzä 'mʋ 'nu. Ɩ ‑kä ylä 'ŋnö nä, Kwlienyɔ Zozii' yiylʋʋ 'kʋ, ‑anyɩ‑ a 'kä lä 'mʋ täkpɔ. 'Nɩ anyɩ ‑mä 'sɩɩ, ‑a ‑kä 'nɩ ‑a yi'anyɩ 'mʋ täkpɔ.

¹⁵ 'Klünö 'mɩ n 'tɛɛ‑ lä dë nä, ɩɩ' ‑zä n ŋʋʋ‑ bhlä nynä ‑mä ‑anyɩ‑ n 'kä tɛɛ 'yi 'ni 'kää yi. Ɩyä 'naa yilɩɩ ka'anyɩ bhɛ 'ci 'sɔ 'kʋ ‑jäkä pleyii 'ŋʋ.

¹⁶ Anyɩa' duu' n 'kä bhlä ghlää‑ ‑yä n 'kä Masedʋanöbhlɩ 'kʋ mʋ. N kä bhɛ 'sɩɩ Masedʋanöbhlɩ 'kʋ ‑bha nä, n yi a bʋkʋ anyɩa' duu' ghlää ‑yä a kä'ä bhɛ ‑blɔkʋ fään ‑yä n 'kä Zudeebhlɩ 'kʋ mʋ.

¹⁷ N cii‑ bhɛ lä nynä ‑mä n yi yi 'nɩ 'nn ‑wʋ lä ‑yi nä, ka bhobho nynä ‑mä n 'nɩɩ bhɔɔ plɛ yëku fään ‑a? ‑Mä ka bhobho nynä ‑mä n kä cii‑ nynä n 'kä wälɩklë nʋ nä, 'naa 'wluu n sa 'nɩ n nʋa ‑a? Ka bhobho nynä ‑mä n kä cii‑ nynä ‑ɛɛɛ nä, 'naa ‑Ɛɛɛ, kɔ 'kä Yioo' jɩjlɔɔ ‑a?

¹⁸ Laagɔ 'titi yi ‑lɔɔ' ‑dläfʋɛ lü. Ʋ ‑yi sɔɔ nynä ‑mä ‑anyɩa ‑Ɛɛɛ, ɔɔ' jɩjlää ‑wʋ Yioo'.

¹⁹ A ni 'yi naa, bheli Slivɛɛn ‑yä Timotee, ɩyä ‑amʋ 'titi nä, Laagɔ ‑Yowli Zozi Klisöö' wälɩɩ ‑a ‑sonö'anyɩ lä nä, ɩɩ' ‑wʋ ‑Ɛɛɛ 'mnö ‑kʋ 'nɩ ɩ 'kä Yio 'mnö ‑kʋ. Zozi Klisö 'mnö nä, ‑Ɛɛɛ ‑bhlo 'coo ‑kʋ lä ‑mɔɔ.

²⁰ Zozi Klisö nä, ɔmɔɔ‑ plöö‑ lä ‑Ɛɛɛ. Sa 'fɩɩn Laagɔ ci lä nynä ‑mä ʋ yi nʋ nä, Zozi Klisö ‑mɔɔ plöö‑ lä ʋʋ' ‑Ɛɛɛ, nynä ‑mä ɩ yi nʋɔ. A gä cii nynä ‑mä 'klʋagba ŋëë Laagɔ nä, Zozii' 'ŋnöö 'mnö ‑a ci lä nynä ‑mä, ‑Ɛɛɛ, ɩ kʋ sɔɔ!

²¹ Anyɩ ‑yä ‑anyɩ 'sɔ nä, Laagɔ 'mʋʋ‑ nyɩ‑anyɩ lä 'tɛtɩ. Ʋmʋʋ‑ ‑sanyɩ 'nɩ ‑ʋ ‑gboguë‑anyɩ lä Klisöö' ‑za.

²² Laagɔ ‑gboguë‑anyɩ 'nɩ ʋ ‑sanyɩ 'ylö ‑yä ‑a 'gä yibhënöɔ, 'nɩ ʋ ŋʋ‑anyɩ ʋʋ' Kplɔɔkplɔɔ‑wugɔɔ pleyii. Kɩ plöö‑ lä nynä ‑mä sä ‑a 'gä lä 'ni nä, sɔɔ ‑wʋ gbʋ 'kʋ ‑kʋ.

²³ Laagɔ yi 'naa ‑dläfʋɛ lü. Kä n kä ‑kpläkplö wälɩ ci nä, Laagɔ ‑tɛɛ ‑kä lä wälɩ. Nä, n nö'anyɩ ‑wʋ lä bʋkʋ yëku 'ylɩbhɔ nä, ‑ɛɛ ‑wʋ 'flɛɛ. Kä n nää‑ lä sɔɔ ‑yä nn' ka'anyɩ ‑kä nyäkälɩ 'nyɛ.

²⁴ ‑Aa tään ‑wʋ nynä ‑mä ‑a gä'anyɩ pɔlötɛtɛɛ 'mnö 'wluu zii ‑yä a 'ganyɩ 'tie. ‑A ‑yi sɔɔ nynä ‑mä anyɩa' pɔlötɛtɛɛ yä sikplii 'ŋʋ, ‑mä lebhee' ‑lɛɛ ‑a ‑ya anyɩ 'sɔ nʋ lä nä, ‑a ylä nynä ‑mä ɛ ŋʋ'anyɩ ‑jäkä pleyii.

« Roimhe

Air adhart »

Wycliffe Bible Translators, Inc.

Lean sinn:

Ceanglaichean taic

Sanasan