Bìoball air-loidhne

1 Zään 4 - GOD - u2

Sä nyɩkpɔ yi lä ‑kpläkplö 'plɔfɛtɩnyʋa yibhë nä

¹ 'Naa ‑wawanyʋänyɩ‑, nyɩkpaa ‑wa ci lä nynä ‑mä wa ‑kä Laagɔɔ' 'Wugɔɔ nä, a 'nä kään ‑lä 'sɔɔ waa' ‑lefɩɩn pɔlötɛtɛ. A bɩä 'fɩa ‑yä 'wugɔɔ wa ‑kä lä nä, ʋ kä Laagɔɔ' ‑lʋʋ plöö‑ nä, a 'kʋ yibhë. ‑Ɔnöza bhää? ‑Kpläkplö 'plɔfɛtɩnyʋä yä 'ylʋzɔɔ zumë.

² A ni sä a 'kä lä Laagɔɔ' 'Wugɔɔ yibhë nä. ‑Ɔ gä ci nynä ‑mä Zozi Klisö ‑yii 'yɛkɛɛ 'mnö 'ylʋnʋzɔɔ nä, ‑lɔɔ' nyɩkpɔɔ ‑kä Laagɔɔ' 'Wugɔɔ.

³ 'Ɩzä nyɩkpɔɔ' lɔɔ ‑ɔɔ 'ylä ‑wʋ lä nynä ‑mä wa ci nynä Zozii ‑glö nyɩkpɔ nä, ɔɔ' ‑wʋ Laagɔɔ' lɔɔ plöö. Ɔmɔɔ‑ plöö‑ lä Klisöö' ‑Zɔbhlɛgbänyɔɔ. A yä bhɛ 'nu nynä ‑mä ‑lɔɔ' nyɩkpɔɔ yi yi. ‑Mä kä n mʋ'anyɩ yɩ soo ‑kää nynä ‑mä ‑lɔɔ' ‑Zɔbhlɛgbänyɔɔ yä wɛzä 'ylʋzɔɔ yi.

⁴ Anyɩ, 'naa 'yuënyɩ‑, a ‑glö Laagɔɔ' 'yuë. A yä ‑kpläkplö 'plɔfɛtɩnyʋa sɩä. ‑Zuzunyënyuu‑ ‑kʋ lä ‑mää 'ylʋzɔɔ 'nɩ, ‑ʋ pɩä lä 'kɔɔnʋ 'kʋ nä, Laagɔɔ' 'Wugɔɔ‑ ‑kʋ'anyɩ lä yëku nä, ʋ ‑kä 'päwä 'nɩ ʋ ziu.

⁵ ‑Kpläkplö 'plɔfɛtɩnyʋa ‑glö ‑mää 'ylʋzɔɔ' lʋä nä, 'ylʋzɔɔ' nyɩkpa 'bhisäkʋ wa sää mʋ, 'ɩzä 'ylʋzɔkʋnyʋä puwa lä 'nyukwli.

⁶ ‑Mä ‑anyɩ, ‑a ‑glö Laagɔɔ' 'yuë nä, ‑ɔ ‑yi la Laagɔ nä, ɔmɔɔ‑ pu‑anyɩ lä 'nyukwli. ‑Ɔ 'nö Laagɔɔ' 'yu plöö‑ nä, ɔɔ' pu‑anyɩ ‑wʋ 'nyukwli. ‑Lɔɔ ‑a 'bhää lä 'nɩ ‑a yibhë lä ‑nʋawlɛɛ' 'Wugɔɔ, 'nɩ ‑a yibhë lä ‑kpläkplaa' ‑zuzuu.

Laagɔ ‑glö ‑wawʋ

⁷ 'Naa ‑wawanyʋänyɩ‑, a ‑ya wamä ‑wamä, ‑mä ‑wawʋ Laagɔ yëku‑ ʋ bha lä. Nyɩkpɔɔ' lɔɔ ‑ɔ ‑waa lä ɔ ‑lie nä, ɔ ‑glö Laagɔɔ' 'yu 'nɩ ɔ ‑yi Laagɔ.

⁸ Sä Laagɔ ‑glö lä ‑wawʋ nä, nyɩkpɔɔ' lɔɔ‑ ‑wʋ lä ɔ ‑lie ‑waa nä, ɔɔ' ‑wʋ Laagɔ ‑yi.

⁹ A ni 'sää Laagɔ panö‑anyɩ lä ‑wawʋʋ ʋ ‑kä lä ‑anyɩa ‑za nä. Ʋ ‑lä ‑mää 'ylʋzɔɔ ʋ ‑Yowlio ‑bhlo 'coo ʋ ‑kä lä nä, ɩyä ɔ 'kä gbä ‑a 'gä 'pʋpʋɛ 'ni.

¹⁰ ‑Lɔɔ' ‑wawʋʋ, a ni 'sää ʋ ‑kʋ lä. ‑Anyɩ, ‑anyɩɩ ‑wʋ Laagɔ ‑wamä, ‑mä Laagɔ 'mʋʋ‑ ‑wamänö‑anyɩ 'nɩ ʋ ‑lä lä ʋ ‑Yowli. 'Nɩ ‑anyɩa nyenyii' ‑za, ʋ yio lä 'cibhi 'kʋ ‑sä ‑yä ‑anyɩa nyenyii 'kä cienöɔ.

¹¹ Nä, 'naa ‑wawanyʋänyɩ‑, Laagɔ ‑wamänö‑anyɩ ylä 'sää nä, ‑anyɩ ‑mä 'sɩɩ, ɩ ‑ŋwa 'kʋ nynä ‑mä ‑a wamä ‑wamä.

¹² Nyɩkpɔɔ' ‑läzä Laagɔ 'yi 'ni. ‑Mä ‑a gä ‑wäwä nä, Laagɔ ‑yä ‑anyɩ 'sɔ yi 'jɛnyɩ‑, 'nɩ ʋʋ' ‑wawʋʋ ‑kʋ‑anyɩ lä pleyii nä ʋ yi nëë' slää.

¹³ A ni sä ‑a yibhë lä sɔɔ nynä ‑mä kä ‑a ‑yä Laagɔ 'sɔ 'jɛnyɩ‑ 'nɩ ʋmʋ ‑mä 'sɩɩ ʋ ‑yanyɩ 'sɔ 'jɛnyɩ‑ nä. Ɩmɩɩ‑ plöö‑ lä nynä ‑mä Laagɔ nyɩ‑anyɩ ʋʋ' Kplɔɔkplɔɔ‑wugɔɔ.

¹⁴ 'Nɩ ‑anyɩ nä, ‑a nii‑ 'yi nynä ‑mä 'Bäɔ ‑lobho 'zaazɩ ɔ ‑Yowli ‑yä ɔ 'kä 'ylʋzɔkʋnyʋä ‑lɔɔ nëë' ‑sä. Nä ‑lɔɔ' ‑dläfʋɛ 'mɛ ‑a lü lä.

¹⁵ Nyɩkpɔɔ' lɔɔ ‑ɔ ci lä nynä Zozii plöö‑ 'zaazɩ Laagɔ ‑Yowli nä, ‑lɔɔ' nyɩkpɔɔ kɔ ‑yä Laagɔ 'sɔ 'jɛnyɩ‑ 'nɩ Laagɔ ‑yɔsɔ 'jɛnyɩ‑ lä.

¹⁶ 'Nɩ ‑anyɩ nä, Laagɔɔ' ‑wawʋʋ ‑a ‑yiu, 'nɩ ‑a ‑känɩ plɛkʋ nynä ‑mä Laagɔ ‑waa‑anyɩ. Laagɔ ‑glö ‑wawʋ nä, nyɩkpɔɔ' lɔɔ ‑ɔ gä ‑wawʋʋ 'mnö ‑kʋ nä, kɔ ‑yä Laagɔ 'sɔ 'jɛnyɩ‑ 'nɩ Laagɔ ‑yɔsɔ 'jɛnyɩ‑.

¹⁷ ‑Anyɩa ‑wawʋʋ kä ‑kplɔɔ wɩa nä, Laagɔɔ' 'tite 'kädɛɛ pläylʋʋ 'kʋ nä, plɛ 'nö‑anyɩ ‑lä 'mʋ belio. ‑Ɔnöza bhää? Sä Zozi Klisöö' zëkpëa ‑kʋ lä nä, sɔɔ ‑anyɩa laa ‑kʋ lä 'sɩɩ ‑mää 'ylʋzɔɔ.

¹⁸ ‑Wawʋ 'mnö ‑ŋänöö' ‑wʋ ‑mɔɔ ‑kʋ. ‑Wawʋʋ' lʋʋ ‑ʋ ‑kplɔɔ lä nä, kʋ tlü ‑ŋänö. ‑Ɔnöza bhää? Nyɩkpɔ ‑ŋänö kɔ pleyii ‑kʋ nä, wälɩklü‑nyënyë ɔ ‑nʋ lä nä, aa' ‑gesii' plɛɛ belio lä 'mʋ. Nä, ‑ŋänö kä nyɩkpɔ pleyii ‑kʋ nä, ɔɔ' ‑wawʋʋ' ‑wʋ ‑kplɔɔ.

¹⁹ ‑Mä ‑anyɩ nä, Laagɔ 'mʋʋ‑ ‑wamänö‑anyɩ lä tɛɛ, ɩɩ' ‑zä ‑a kä lä ‑wawʋ.

²⁰ Nä, nyɩkpɔ kä ci nynä ‑mä kɔ ‑waa Laagɔ, 'nɩ ɔ kä ɔ ‑lie ‑zɔɔ nä, ‑lɔɔ' nyɩkpɔɔ ‑glö ‑kpläkplönyɔ. Ɔ ‑lio ɔ ni lä 'yi nä, ɔ 'nö ɔɔ' ‑wawʋ ‑kä nä, Laagɔ‑ ɔɔ' 'ni ‑wʋ lä 'yi nä, ɔɔ' ‑lä mii 'nɩ ɔ 'kä ʋʋ' ‑wawʋ kään.

²¹ Nä, a ni ‑jläma Klisö ‑tü‑anyɩ lä nä. Ɔ lä nyɩkpɔ kä Laagɔ ‑waa nä, ɔ wamä 'sɩɩ ɔ ‑lie.

« Roimhe

Air adhart »

Wycliffe Bible Translators, Inc.

Lean sinn:

Ceanglaichean taic

Sanasan