Bìoball air-loidhne

1 Zään 3 - GOD - u2

Sää Laagɔɔ' 'yuë 'kä lä nää

¹ 'Naa 'yuënyɩ‑, a wloo sä 'Bäɔ ‑wamänö‑anyɩ sää kpänyɩ nä! Ɔɔ' ‑wawʋʋ ‑kä 'ŋnö nä, kä wa laa‑anyɩ ylä Laagɔɔ' 'yuë. 'Nɩ ‑a plöö‑ 'zazɩ Laagɔɔ' 'yuë. ‑Mä sä 'ylʋzɔkʋnyʋää' ‑wʋ lä Laagɔ ‑yi nä, ɩɩ' ‑zä wa 'nö‑anyɩ ‑wʋ lä ‑yi.

² 'Naa ‑wawanyʋänyɩ‑, ‑pɛpɛɛ nä, ‑a ‑glö yɩ Laagɔɔ' 'yuë. ‑Mä sä ‑a 'gä lä ‑zee kʋ nä, sɔɔ ‑zizio ‑lätee nyɩkpa 'yii. 'Klëa ‑a ‑yi lä ‑bhlɛ nä, amää‑ plöö‑ lä nynä ‑mä Klisöɔ kä yɩ 'ylɩbhɔ‑ 'nɩ ɔ kä ‑yi nä, ‑a yio 'yi 'ni wɩa. Bʋkʋ 'nɩ sä ɔ ‑kʋ lä nä, ‑anyɩ ‑mä 'sɩɩ ‑a yi sɔɔ kʋ.

³ Nyɩkpɔɔ' lɔɔ ‑ɔ gä Klisö dë 'tɛɛ nä, sä Klisö ‑kplɔɔ lä nä, ɔmɔ ‑mä 'sɩɩ, ɔ yi sɔɔ ɔ yëku kpɔlʋä.

⁴ Nyɩkpa 'fɩɩn‑ nʋ lä nyenyi nä, kɩ ‑kʋ lä nynä ‑mä kwa sä Laagɔɔ' ‑Jläma 'klʋkpää. 'Nɩ nyenyii nä, ɩ ‑glö Laagɔɔ' ‑Jlämaa' 'klʋkpää' ‑sälɩ.

⁵ A ‑yi sɔɔ nynä ‑mä Zozi Klisö nä, nyenyi 'nöɔ bhɔɔ yëku ‑kʋ. 'Nɩ kɔ ‑yi bhä ‑yä ɔ 'kä 'ylʋzɔkʋnyʋä nyenyi yëku ‑sä.

⁶ Nyɩkpɔɔ' lɔɔ‑ ‑yä Zozi Klisö 'sɔ kä yɩ 'jɛnyɩ‑ nä, ɔɔ' nʋ ‑läyɩ nyenyi. Nyɩkpɔ kä nyenyi nʋ nä, kɔ pana lä nynä ‑mä ɔɔ' ‑läzä Klisö ‑yi 'ni, 'nɩ ɔ 'nöɔ ‑wʋ 'sɩɩ ‑yi.

⁷ 'Naa 'yuënyɩ‑, nyɩkpɔ 'nä 'nyigënö'anyɩ ‑lä! Nyɩkpɔɔ' lɔɔ ‑ɔ nʋ lä 'yigëgbɩ nä, ɔmɔɔ‑ plöö‑ lä 'yigënyɔ. Sä Klisö plöö‑ lä 'yigënyɔ nä, sɔɔ ‑lɔɔ' nyɩkpɔɔ plö lä 'sɩɩ 'yigënyɔ.

⁸ Nyɩkpɔ kä gbenyenyi 'mnö ‑kʋ nä, ɔ ‑glö 'Dëvloo' nyɩkpɔ. ‑Ɛɛɛ, 'bhää yɩ ciedää ‑kaaa ‑yä ŋëë ‑zɩkä nä, kä 'Dëvlo ‑kʋ 'kɔɔkɔ nyenyii 'mnö. Ɩmɩɩ‑ ‑kä 'ŋnö 'nɩ Laagɔ ‑Yowli ‑yi lä ‑yä ɔ 'kä 'Dëvloo' nʋnʋ‑lebhee nuë.

⁹ Nyɩkpɔɔ' lɔɔ ‑ɔ plöö‑ ylä Laagɔɔ' 'yu nä, ɔɔ' kʋ yɩɔ nyenyi 'mnö. Laagɔwälɩɩ' 'tɛtɩɩ 'mɩɩ‑ ‑kʋɔ ylä 'yɛkɛɛ, 'nɩ ɔ ‑yi 'nɩ ɔ plöö‑ ylä 'sɩɩ Laagɔɔ' 'yu. Ɩ ‑kä ylä 'ŋnö nä, ɔɔ' ‑lä nyenyii 'mnö kʋ.

¹⁰ 'Klünö, ɩmɩɩ‑ gbä lä 'nɩ, wa yibhë yibhë lä Laagɔɔ' 'yuë ‑yä 'Dëvloo' 'yuë 'sɔ 'mʋ. Nyɩkpɔɔ' nʋnʋgbɩ 'nö 'yi gëë‑, 'nɩ ɔ 'nö ɔ bheli ‑waa 'nɩ ɔ 'nö ɔ bhɛŋnɔ ‑waa nä, ‑lɔɔ' nyɩkpɔɔ' ‑wʋ Laagɔɔ' 'yu plöö‑.

A wamä ‑wamä

¹¹ A ni 'yi naa, ‑bhɔɔdaa' wälɩɩ a nuu‑ lä nä, ɩmɩɩ‑ plöö‑ lä nynä ‑mä, a wamä ‑wamä!

¹² Nä, ‑a 'nä kʋ ‑lä nynä Kayɛɛn! Kayɛɛn ‑glö bhä 'Dëvloo' nyɩkpɔ. Ɩmɩɩ‑ ‑kä 'ŋnö 'nɩ ɔ bhlää‑ lä ɔ bheli Abɛlö. 'Nɩ ‑ɔnözä 'nɩ ɔ ‑nʋ bhɛ sɔɔ? Ɔ bhelii' nʋnʋgbɩɩ kɩ gëë‑ bhä 'yi, ‑bhlɛ ɔmɔ 'titii nä, ɔɔ' nʋnʋgbɩɩ ‑nyu bhä, 'ɩɩ ‑zä ɔ bhlɔɔ‑ lä.

¹³ Nä, bhelie ‑yä bhɛŋwnɩänyɩ‑, ‑mää 'ylʋzɔɔ nyɩkpa ka'anyɩ ‑zɔɔ nä, plɛkʋ 'na 'ninio'anyɩ ‑lä!

¹⁴ ‑Anyɩ nä, ‑a ‑yi sɔɔ nynä ‑mä, ‑a yä 'kuëë ‑bha 'nɩ ‑a yä zëkpë 'kʋ yi. Ɩmɩɩ‑ ‑kä 'ŋnö 'nɩ ‑a ‑waa lä ‑a ‑liesɩ. Nyɩkpɔɔ' lɔɔ‑ ‑wʋ lä ɔ ‑lie ‑waa nä, 'kwiee ‑säklöö 'mnö ɔ ‑kʋ lä.

¹⁵ Nyɩkpɔɔ' lɔɔ‑ ‑kä lä ɔ ‑liee' ‑zɔbhlɛzʋ nä, ɔ ‑glö nyɩkpa‑bhlänyɔ. 'Nɩ a ‑yi sɔɔ nynä ‑mä 'pʋpʋɛɛ Laagɔ nyɛ lä 'nɩ ‑ɛ ‑kʋ lä 'kɔɔkɔɔ ‑za nä, nyɩkpa‑bhlänyɔ 'nɩɛ ‑lä 'nimʋ.

¹⁶ ‑Wawʋʋ nä, a ni sä ‑a yiu lä yibhë nä. Ʋmʋʋ‑ plöö‑ lä nynä ‑mä, Zozi Klisö ‑sä ɔ yëku ‑anyɩa ‑za. Nä, ɩ ‑ŋwa 'kʋ nynä ‑anyɩ ‑mä 'sɩɩ ‑a ‑sä ‑anyɩa zëkpëa ‑a ‑liesɩɩ' ‑za.

¹⁷ Nyɩkpɔ kä ‑mää 'ylʋzɔɔ' kääkäälɩɩ ‑kä nä, 'nɩ ɔ ‑lie kä mielɩɩ' ‑kʋ 'nɩ ɔ kɔ 'yi nii‑, 'nɩ ɔ 'nö ɔɔ' ŋäzöplɛ ‑kä nä, ‑lɔɔ' nyɩkpɔɔ, säsä ɔ yi bhä ci nynä ‑mä kɔ ‑kä Laagɔɔ' ‑wawʋʋ?

¹⁸ Nä, 'naa 'yuënyɩ‑, ‑a 'nä cii ‑lä 'flɛ nëë' nynä ‑mä ‑a ‑kä ‑wawʋ. ‑A gä 'zaazɩ ‑wawʋ ‑kä nä, a ‑ya paanʋ ‑anyɩa nʋnʋgbɩɩ 'mnö!

Laagɔɔ' 'yua plɛ 'nʋwa ‑lä 'mʋ belio

¹⁹ ‑Nɩnɩ 'mɩɩ‑ 'gä lä gbä ‑yä ‑a 'gä lä sɔɔ yibhë nynä ‑mä ‑a ‑glö ‑nʋawlɛɛ' nyɩkpa. Ɩmɩɩ‑ 'gä lä 'sɩɩ gbä ‑yä, Laagɔ dëlü, plɛ 'nö‑anyɩ ‑lä lä 'mʋ belio.

²⁰ Nä, ‑anyɩa plɛ ka‑anyɩ bhɛ gbʋ klaa nä, ‑a yibhë sɔɔ nynä ‑mä Laagɔ 'mʋʋ 'ghlü 'nɩ ‑ʋ ‑zi ‑anyɩa pɔlöö 'kʋ, 'nɩ ʋ ‑yi 'sɩɩ wälɩɩ 'fɩɩn.

²¹ Nä bhelie ‑yä bhɛŋwnɩänyɩ‑, ‑anyɩa plɛ 'nö‑anyɩ gbʋ klaa nä, ‑lɔɔ ‑a gä Laagɔ dëlü yi 'nɩ ‑a ‑kä lä 'tɛtɩ 'nɩ ‑a yi lä.

²² ‑A ŋʋ lä Laagɔɔ' ‑Jlämaa 'klʋkpää 'nɩ ‑a nʋ lä ʋʋ' pɔlösaa nä, ɩ ‑kä 'ŋnö nä, saa 'fɩɩn ‑a 'ylänʋ lä nä, kʋ nyɩ‑anyɩ sɔɔ.

²³ A ni wälɩklëë' laa Laagɔ 'ylänö‑anyɩ lä nä. Amää‑ plöö‑ lä nynä ‑mä, ʋ ‑Yowli Zozi Klisöö' nä, ‑a ‑kään ɔɔ' pɔlötɛtɛ. Ɩyä sä Klisö ‑sonö‑anyɩ lä nynä ‑mä ‑a wamä ‑wamä nä, ‑a wamä ‑wamä sɔɔ.

²⁴ Nyɩkpɔɔ' lɔɔ ‑ɔ ŋʋ lä Laagɔɔ' ‑jlämaa 'klʋkpää nä, kɔ ‑yä Laagɔ 'sɔ 'jɛnyɩ‑, 'nɩ Laagɔ ‑yɔsɔ 'jɛnyɩ‑. A ni 'sää ‑a yibhë lä sɔɔ nynä ‑mä Laagɔ ‑yanyɩ 'sɔ 'jɛnyɩ‑. Ʋʋ' Kplɔɔkplɔɔ‑wugɔ ʋ nyɩ‑anyɩ lä nä, ʋmʋʋ‑ gbä 'nɩ ‑a yibhë lä sɔɔ nynä ‑mä kʋ ‑yanyɩ 'sɔ 'jɛnyɩ‑.

« Roimhe

Air adhart »

Wycliffe Bible Translators, Inc.

Lean sinn:

Ceanglaichean taic

Sanasan