Bìoball air-loidhne

1 Zään 2 - GOD - u2

Zozi Klisö plöö‑ ‑anyɩa 'wlucinyɔ

¹ 'Naa 'yuënyɩ‑, kä n jɩjlä'anyɩ lä wälɩnɩ ‑yä a 'kä nyenyii gwë ‑sä. 'Ɩzä kä nyɩkpɔ kä nyenyi ‑nʋ nä, ‑mɔɔ 'Bäɔ yëku, ‑a ‑kä ‑mɔɔ ‑anyɩa 'wlucinyɔ. Ɔmɔɔ‑ plöö‑ lä 'yigënyɔɔ, Zozi Klisö.

² Zozi Klisö nä, kɔ ‑sä ɔ yëku 'cibhi 'kʋ ‑yä ‑anyɩa nyenyii 'kä cienöɔ. 'Nɩ, ‑ɔɔ ‑wʋ 'sɩɩ ‑anyɩ ‑bhlogbee' ‑za, ‑mä 'ylʋzɔɔ' nyɩkpaa 'fɩɩn waa' nyenyii' ‑za lä 'sɩɩ.

A 'ŋʋ Laagɔɔ' ‑jlämaa 'klʋkpää

³ ‑A gä Laagɔɔ' ‑jlämaa 'klʋkpää' 'ŋʋ nä, ‑lɔɔ ‑a yibhë lä sɔɔ nynä ‑mä ‑a ‑yi Laagɔ.

⁴ Nä, nyɩkpɔ kä ci nynä ‑mä ɔ ‑yi Laagɔ 'nɩ ɔ 'nö Laagɔɔ' ‑jlämaa 'klʋkpää' 'ŋʋ nä, ‑lɔɔ' nyɩkpɔɔ ‑glö ‑kpläkplönyɔ. ‑Nʋawlɛ 'nöɔ ‑wʋ 'mnö ‑kʋ.

⁵ ‑Mä nyɩkpɔ kä Laagɔwälɩ 'klʋkpää' 'ŋʋ nä, ‑lɔɔ' ‑wawʋʋ ɔ ‑kä lä Laagɔɔ' ‑za nä, ʋ ‑glö ‑wawʋ 'titi. ‑Nɩnɩ 'mnö ‑a yibhë lä sɔɔ nynä ‑mä kä ‑a ‑yä Laagɔ 'sɔ 'jɛnyɩ‑.

⁶ Nyɩkpɔ kä ci nynä ‑mä kɔ ‑yä Laagɔ 'sɔ 'jɛnyɩ‑ nä, sä Zozi Klisöö' nää bhlä nä, ‑lɔɔ' nyɩkpɔɔ ‑mä ɔ nää 'sɩɩ sɔɔ.

‑Jlämö lëlë

⁷ 'Naa ‑wawanyʋänyɩ‑, wälɩɩ' ‑lɩɩ n jɩjlä'anyɩ lä nä, ɩɩ' ‑wʋ ‑jlämaa' ‑lɛɛ lëlë plöö‑. 'Kɔgɔbhlä‑jläma lä. ‑Mɔɔ ciedää' Laagɔwälɩɩ a nuu‑ lä nä, ɩmɩɩ‑ plöö‑ lä ‑lɔɔ' ‑jläma.

⁸ ‑Mä, a ‑yi 'nɩ a plöö‑ 'sɩɩ ‑Jlämä lëlë 'nɩ n jɩjlä'anyɩma lä. ‑Lää' ‑jlämänä, Zozii 'mnö wa 'ninöa lä, 'nɩ wa 'ninö'anyɩma 'sɩɩ 'mnö 'yi. Nä, a ‑glö 'zaazɩ ‑jlämaa' ‑lɛɛ lëlë. ‑Ɔnöza bhää? Kä 'cucuu bhɩä lä. Zëlüü 'titi 'mɩɩ‑ ghlä ylä 'kʋ.

⁹ Nyɩkpɔ kä ci nynä ‑mä kɔ nämnö zëlüü' 'nɩ ɔ kä ɔ ‑lie ‑zɔɔ nä, ‑lɔɔ' nyɩkpɔɔ ‑kʋ ‑lätee 'cucuu'.

¹⁰ ‑Mä nyɩkpɔɔ' lɔɔ‑ ‑waa lä ɔ ‑lie nä, kɔ ‑kʋ lä zëlüü', nä lʋʋ' yɩɔ bʋkʋ ‑kʋ 'nɩ ʋ 'kɔ 'focloo 'ŋʋ.

¹¹ Nyɩkpɔ kä ɔ ‑liee' ‑zɔbhlɛzʋ pleyi ‑kä nä, ‑lɔɔ' nyɩkpɔɔ ‑kʋ ‑lätee 'cucuu. 'Nɩ sä ‑lɔɔ' 'cucuu slɔ lä 'yikpü nä, ‑gbäsɩɩ ɔ mʋ lä nä, ɔɔ' ‑wʋ ‑mɔɔ dä ‑yi.

Aa' 'mänyɩ ‑lä 'ylʋzɔɔ nʋnʋlɩɩ

¹² 'Naa 'yuënyɩ‑, kä n jɩjlä'anyɩ lä ‑yä n 'kanyɩ soo nynä ‑mä anyɩa nyenyii yä cienöɔ, Zozii' 'ŋnöö 'mnö.

¹³ 'Bäsɩnyɩ‑, kä n jɩjlä'anyɩ lä ‑yä n 'kanyɩ soo nynä ‑mä, ‑ɔ 'nö bhlä ‑mɔɔ ciedää kʋ nä, 'nɩ ‑ɔ ‑kʋ lä 'kɔɔkɔ nä, ɔmɔ a ‑yi lä. Nyëbli ‑yä ŋnʋgbɛnyʋänyɩ‑, kä n jɩjlä'anyɩ lä ‑yä, n 'kanyɩ soo nynä ‑mä, a yä 'Dëvlo sɩä.

¹⁴ 'Naa 'yuënyɩ‑, kä n jɩjlä'anyɩ lä ‑yä, n 'kanyɩ soo nynä ‑mä a yä 'Bäɔ yibhë. 'Bäsɩnyɩ‑, kä n jɩjlä'anyɩ lä ‑yä, n 'kanyɩ soo nynä ‑mä, ‑ɔ 'nö bhlä kʋ 'nɩ ɔ ‑kʋ lä 'kɔɔkɔ nä, a yio. Nyëblisɩnyɩ‑, ŋnʋgbɛnyʋänyɩ‑, kä n jɩjlä'anyɩ lä ‑yä n 'kanyɩ soo nynä ‑mä ka 'tɛ 'mʋ! Laagɔwälɩɩ ‑kʋ'anyɩ pleyi, 'nɩ a ‑yi 'nɩ a ‑sɩä 'Dëvlo.

¹⁵ Nä a 'nä wamä ‑lä 'ylʋzɔɔ nʋnʋgbɩɩ ‑yä ‑mɔɔ' kʋkʋlɩɩ. Nyɩkpɔ kä 'ylʋzɔɔ ‑waa nä, ‑a 'Bä Laagɔɔ' ‑wawʋ 'nöɔ ‑wʋ pleyii ‑kʋ.

¹⁶ Nʋnʋgbɩɩ 'fɩɩn‑ ‑kʋ lä 'nɩ nyɩkpɔɔ' 'yɛkɛ ‑waa lä nä, ɩyä ‑lɩɩ ɔɔ' 'yi bhlä lä nä, ɩyä täkpɔlɩ nä, ɩɩ' ‑bha ‑wʋ 'Bäɔ yëku, ‑mä ‑mää 'ylʋzɔɔ ɩ bha lä.

¹⁷ 'Nɩ 'kɔɔnʋ nä, ʋ yi 'plö 'nɩ ʋʋ' 'mnö ‑lɩɩ 'fɩɩn nyɩkpa 'yi bhlä lä nä, ɩ yi 'sɩɩ 'plö. ‑Mä nyɩkpɔɔ' lɔɔ ‑ɔ nʋ lä Laagɔɔ' pɔlösaa nä, ɔ yi kʋ 'kɔɔkɔɔ' ‑za.

Klisöö' ‑zɔbhlɛgbänyʋä ‑bhutukpä yä wɛzä yi

¹⁸ 'Naa 'yuënyɩ‑, bhɩädaa' 'tänyɩɛ yä ŋëë. A nuu‑ bhä nynä Klisöö' ‑zɔbhlɛgbänyɔ yi bhä yi. ‑Mä kä n sonö'anyɩ yɩ nynä Klisöö' ‑zɔbhlɛgbänyʋa waa' bhutukpä yä wɛzä yi. Ɩmɩ 'titii‑ gbä lä 'nɩ ‑a ‑yi lä sɔɔ nynä ‑mä bhɩädaa' 'tänyɩɛ yä ŋëë.

¹⁹ ‑Lɔɔ' nyɩkpa‑cëyɩ naa, ‑anyɩ nëëdë wa ‑bha 'flɛ ‑mä waa' bhɔɔ ‑anyɩa lʋä plöö‑. ‑Anyɩa lʋä wa kä bhä plöö‑ nä, wa yia‑anyɩ bhä nëëdë kʋ. ‑Mä kwa ‑bhanyɩ lä nëëdë ‑yä ɩ 'kä 'kʋ ghlä wɩa nynä ‑mä waa' nëëdëë' nyɩkpɔɔ' bhɔɔ ‑anyɩa lɔɔ plöö‑.

²⁰ ‑Mä anyɩ nä kä Klisö ‑gbä 'nɩ a nii‑ Kplɔɔkplɔɔ‑wugɔɔ, ɩ ‑kä yɩ 'ŋnö 'nɩ anyɩ 'fɩɩn, a yä ‑nʋawlɛɛ yibhë.

²¹ Nä, n ka'anyɩ jɩjlä nä, ɩɩ' ‑wʋ plöö‑ nynä ‑mä aa' ‑wʋ ‑nʋawlɛɛ ‑yi. ‑Mä sä a ‑yi lä ‑nʋawlɛɛ 'nɩ a ‑yi lä sɔɔ nynä ‑mä ‑nʋawlɛɛ' ‑wʋ ‑kpläkplä 'mnö ‑kʋ nä, ɩɩ' ‑zä n jɩjlä'anyɩ lä.

²² ‑Ɔ plöö‑ bhä ‑zi ‑kpläkplönyɔ 'naa? Nyɩkpɔɔ' lɔɔ‑ ci lä nynä ‑mä, Zozii' 'mɔɔ‑ ‑wʋ Klisö plöö‑ nä, ‑lɔɔ' nyɩkpɔɔ ‑glö ‑kpläkplönyɔ. 'Nɩ ɔ plöö‑ 'sɩɩ Klisöö' ‑zɔbhlɛgbänyɔ. ‑Lɔɔ' nyɩkpɔɔ nä, kɔ cɛɛ‑ lä 'Bäɔ, 'nɩ ɔ ‑yi 'nɩ ɔ cɛɛ‑ lä 'sɩɩ 'Bäɔ ‑Yowli.

²³ Nä, nyɩkpɔɔ' lɔɔ ‑ɔ cɛɛ lä 'Bäɔ ‑Yowli nä, kɔ cɛɛ lä 'sɩɩ 'Bäɔ. 'Ɩzä nyɩkpɔɔ' lɔɔ ‑ɔ ŋoo‑ lä 'Bäɔ ‑Yowli nä, kä ɔ ŋoo‑ lä 'sɩɩ 'Bäɔ.

²⁴ Ɩ ‑kä 'ŋnö nä, wälɩɩ a nuu‑ lä ciedää nä, ɩ kʋ'anyɩ pleyii 'kɔɔkɔ. Sä a nuu‑ lä ciedää nä, sɔɔ ka'anyɩ pleyii ‑kʋ nä, anyɩ ‑mä 'sɩɩ, ka ‑yä 'Bäɔ ‑yä ɔ ‑Yowli 'sɔ 'jɛnyɩ‑ lä.

²⁵ 'Nɩ, ‑lʋʋ Klisö cii‑ lä nynä ‑mä ɔ yi‑anyɩ 'nyɛ nä, a ni ʋmʋ. Ɔ lä 'pʋpʋɛɛ‑ ‑kʋ lä 'kɔɔkɔɔ ‑za nä, ɔ yi‑anyɩmɛ 'nyɛ.

²⁶ Nyɩkpaa' ‑lʋa ‑wa tään lä nynä ‑mä ‑wa 'ganyɩ 'nyigë nä, waa' ‑zä n jɩjla'anyɩ lä 'bɔɔgʋnʋ ‑yä a 'kä gblɩmä.

²⁷ Anyɩ nä, 'Wugɔɔ Klisö nyɩ'anyɩ lä nä, ʋ ‑kʋ'anyɩ 'mnö, 'nɩ ʋ cɩa'anyɩ ‑lɩɩ 'fɩɩn. Nä aa' ‑wʋ ‑kä 'nɩ a ‑kä cɩanyʋä tään. Kä Kplɔɔkplɔɔ‑wugɔɔ cɩa'anyɩ wälɩɩ 'fɩɩn. ‑Nʋawlɛɛ 'mɛ ʋ cɩa'anyɩ lä ‑mä ʋʋ' cɩa'anyɩ ‑wʋ ‑kpläkplä. Nä, sʋ cɩa'anyɩ lä nä, a nʋ sɔɔ! A ‑yä Klisö 'sɔ 'jɛnyɩ.

Laagɔɔ' 'yuaa' nʋnʋgbɩ gëë‑ 'yi

²⁸ ‑Ɛɛɛ, 'naa 'yuënyɩ‑, a ‑yä Klisö 'sɔ 'jɛnyɩ! A ‑yɔsɔ kä 'jɛnyɩ‑ nä, ‑anyɩ ‑mä 'sɩɩ, ɔ kä 'kʋ ‑ghlä nä, ‑a yi 'tɛtɩ kään. Ylʋʋ 'kʋ ɔ 'kä lä yi nä, zoo 'nö‑anyɩ lä 'kʋ yii.

²⁹ A ‑yi ylä sɔɔ nynä ‑mä, Klisö nä, kä ɔɔ' nʋnʋgbɩ gëë‑ 'yii nä, a yibhë 'sɩɩ sɔɔ nynä ‑mä nyɩkpɔɔ' lɔɔ‑ nʋ lä 'yigëgbɩ nä, ɔ ‑glö Laagɔɔ' 'yu.

« Roimhe

Air adhart »

Wycliffe Bible Translators, Inc.

Lean sinn:

Ceanglaichean taic

Sanasan