Bìoball air-loidhne

1 Zään 1 - GOD - u2

Klisö ‑glö Ciciwälɩɩ‑ nyɛ lä 'pʋpʋɛ nä

¹ ‑Ɩ ‑kʋ bhlä bhɔɔdä nä, ‑a nui‑, 'nɩ ‑anyɩa 'yi nii‑ 'yi. ‑A ‑wlui 'nägäsä, 'nɩ ‑a 'tanɩ wlɩ. Ciciwälɩɩ ‑ɩ nyɛ lä 'pʋpʋɛ nä, ɩmɩ bhlä.

² 'Nɩ 'pʋpʋɛ ‑yi 'nɩ ɛ pana‑ ɛ yëku 'nɩ ‑a nie‑ lä 'yi nä, 'ɩɩ ‑dläfʋɛ ‑a lü lä. 'Pʋpʋɛɛ' lɛɛ‑ ‑kʋ lä 'kɔɔkɔɔ ‑za nä, ɛɛ' yëkuu' wälɩ ‑a sonö'anyɩ lä. 'Pʋpʋɛyɩ nä, Laagɔ yëku‑ ɛ ‑kʋ bhlä, 'nɩ ɛ ‑yi 'nɩ ɛ panö‑anyɩ lä ɛ yëku.

³ 'Klüü ‑a nii‑ lä 'yi, 'nɩ ‑a nuu‑ lä 'sɩɩ nä, ɩmɩ ‑a sonö'anyɩ lä ‑yä anyɩ ‑mä 'sɩɩ, a ‑yä ‑anyɩ 'sɔ 'kä 'jɛnyɩ. 'Nɩ ‑anyɩa 'jɛnyɩlɩɩ nä, ‑a ‑yä 'Bäɔ ‑yä ɔ ‑Yowli Zozi Klisö 'sɔ 'mnö ɩ ‑slä lä gwë.

⁴ Ka ‑a jɩjlä'anyɩ lä wälɩnɩ ‑yä ‑anyɩa ‑pʋpɛɛ 'kä nëë' slää.

A nämnö Laagɔɔ' zëlüü 'mnö

⁵ A ni Zozi Klisöö' nüdöö ‑a nuu‑ 'nɩ ‑a la'anyɩ lä nä, ɩmɩɩ‑ plöö‑ lä nynä ‑mä Laagɔ ‑glö zëlü, nä ʋʋ' 'mnö 'cucuu' ‑wʋ 'kwläkwlä 'sää ‑mɔɔ ‑kʋ.

⁶ Nä, ‑a gä ci nynä ‑mä kä ‑a ‑yä Laagɔ 'sɔ 'jɛnyɩ‑, 'nɩ ‑a gä bʋkʋ 'cucuu 'mnö nämnö nä, ‑kpläkplödö ‑a ŋʋ lä. ‑Aa nämnö ‑wʋ ‑nʋawlɛɛ 'mnö.

⁷ Sä Laagɔ 'titi ‑kʋ lä zëlüü' nä, ‑anyɩmä 'sɩɩ ‑a gä zëlüü 'mnö nämnö nä, kä ‑a 'jɛnyɩ‑ lä ‑anyɩ bhlobhlo 'pää. Nä ʋ ‑Yowli Zozii' doluu ʋ yi‑anyɩ nyenyi 'fɩɩn yëku ‑sä 'nɩ ‑a yi kplɔɔ.

⁸ ‑A gä ci nynä ‑mä nyenyi 'nö‑anyɩ ‑wʋ yëku ‑kʋ nä, ‑a yëku ‑a 'nyigë lä. ‑Nʋawlɛ 'nö‑anyɩ ‑wʋ 'mnö ‑kʋ.

⁹ Laagɔ nä, kä ʋʋ' nʋnʋgbɩ gëë‑ 'yi, nä sʋ ci lä nä, kʋ nʋ sɔɔ. ‑A gä ‑anyɩa nyenyii në wla, 'nɩ ‑a gɩ Laagɔ soo nä, nyenyii 'fɩɩn‑ ‑kʋ‑anyɩ lä yëku nä, ʋ yi‑anyɩmɩ cie, 'nɩ ʋ yi‑anyɩ gbenyenyii yëku ‑sä 'nɩ ‑a yi kplɔɔ.

¹⁰ ‑Mä kä ‑a gä ci nynä ‑mä ‑aa ‑wʋ nyenyi ‑nʋ nä, Laagɔ 'mʋ ‑a ni lä 'kpläkplä 'kʋ. 'Nɩ ʋʋ' ciciwälɩɩ ‑mä 'sɩɩ, ɩ 'nö‑anyɩ ‑wʋ lä 'wluu ‑kʋ.

« Roimhe

Air adhart »

Wycliffe Bible Translators, Inc.

Lean sinn:

Ceanglaichean taic

Sanasan