Bìoball air-loidhne

1 Timotee 6 - GOD - u2

Geyuë ‑yä waa' käänyʋä

¹ Nyɩkpaa 'fɩɩn‑ nʋ lä geyulɛɛ nä, wa 'ŋʋ waa' käänyʋä 'klʋkpää sää 'titi. Wa kä sɔɔ nʋ nä, ‑lɔɔ nyɩkpaa' ‑lä Laagɔɔ' nyenyi ci, 'nɩ waa' ‑lä 'sɩɩ sä ‑a cɩa lä nää' nyenyi ci.

² 'Cɔcɩɩ' bhelia ‑wa plöö‑ lä geyua nä, waa' käänyʋä kä 'sɩɩ 'cɔcɩnyʋä plöö‑ nä, sä waa' käänyʋä plöö‑ ylä waa' 'cɔcɩɩ' bhelie nä, ɩ ‑wʋ 'kʋ ‑ŋwa nynä ‑mä wa ‑sʋwa 'klʋkpää. Ɩ ‑ŋwa 'kʋ nynä ‑mä wa nʋwa 'nägäsä ‑gä. ‑Ɔnöza bhää? Waa' käänyʋä ‑glö lä 'cɔcɩnyʋä nä, kä Laagɔ ‑waa waa' wälɩ.

Monii' ‑wawʋ ɩyä kpläkplö cɩalɩ

³ ‑Nɩnɩ 'mɩ ‑n ‑kä lä ‑yä ‑n 'gä cɩa ‑yä ‑n 'gä nyɩkpa soo nynä wa nʋ. Nyɩkpɔ kä bʋkʋ ‑mɔɔ ‑kʋ 'nɩ ɔ kä 'yigäda‑wälɩ cɩa nä, 'nɩ ‑lɔɔ' nyɩkpɔɔ 'nö ‑anyɩa Kwlienyɔɔ Zozi Klisöö' kplɔɔkplɔɔ‑wälɩɩ' 'kʋ gëë‑ nä, 'nɩ sä wa cɩa‑anyɩ lä nä, ɔ 'nö 'sɔɔ nää nä,

⁴ ‑Lɔɔ' nyɩkpɔɔ ‑glö täkpɔ täkpɔnyɔ. Nä, ɔɔ' täkpɔlɩɩ gbä yɩ 'nɩ ɔɔ' 'ni ‑wʋ sä. Kä ɔɔ' ‑wʋ lä lʋʋ ‑yi. Ɔ 'nö cɛɛlɩ ‑yä 'kʋ bhläälɩ 'sɔ 'mnö ‑kʋ nä, ɔɔ' ‑wʋ ‑yä. ‑Nɩnɩ 'mɩɩ‑ lä lä luëzüü, ‑yä cice ɩyä nyɩkpaa' 'luglulɩɩ. Ɩmɩɩ‑ gbä 'nɩ nyɩkpɔ bhobho lä ɔ ‑liee' nyenyi.

⁵ Ɩmɩɩ‑ gbä lä 'nɩ cɛɛlɩɩ ‑kʋ lä nyɩkpa nëëdë. ‑Wanö wluu' ‑wʋ lä 'kʋ ‑gögä nä, wamää‑ nʋ lä sɔɔ. Waa' ‑wʋ 'kwläkwlä sää ‑nʋawlɛɛ' ‑blɔɔ 'kʋ ‑kʋ. Wa bhobho nynä ‑mä, wa kä ‑Laagɔ‑lebhe nʋ nä, ‑lɔɔ wa 'kä leylü lü.

⁶ ‑Ɛɛɛ, 'zaazɩ, ‑Laagɔ‑lebhe lää nyɩkpɔ leylü. ‑Mä, ɩ ‑ŋwa 'kʋ nynä ‑mä sä nyɩkpɔ nii‑ lä nä, sɔɔ‑ ‑lä 'plö ɔɔ' dä.

⁷ ‑A yi lä ‑mää 'ylʋzɔɔ nä, ‑aa ‑wʋ lʋʋ ‑lämʋ. ‑A bha lä 'sɩɩ 'ylʋzɔɔ nä ‑aa ‑lä ‑mɔɔ' lʋʋ fämʋ.

⁸ Naa, ‑a gä lülülʋʋ nii‑ 'nɩ ‑a gä ‑lü nä, 'nɩ ‑a gä 'kotu nii‑ 'nɩ ‑a gä 'mʋ plä nä, ɩ nää sɔɔ 'kʋ.

⁹ Nyɩkpaa' ‑lʋa ‑wa tään lä nynä wa 'kä leylü kään nä, kä wa bhlüü ‑zɔɔpälɩɩ'. Bhobholɩɩ' lɩɩ‑ ‑wʋ lä gba ‑kä 'nɩ ‑ɩ ‑nyuu lä nä, wa bhlüü ɩɩ' ‑gbesii 'nëë. Wa fään nyɩkpa 'kwie 'yii 'nɩ wa gbä 'nɩ ‑lɔɔ' nyɩkpaa' zëkpëa nuë, 'nɩ a mnɔ 'kwläkwlä.

¹⁰ Nä, 'kwlɩkabhɩa 'fɩɩn nyɩkpɔ ni lä, monii' ‑wawʋ, ʋmʋʋ‑ plöö‑ lä aa' glu bhäädä. ‑Bhutukpä gëë‑ yɩ monie zëkpëa 'kʋ ‑aaa, 'nɩ wa yi too. Wa ‑sä 'kwläkwlä 'sää pɔlötɛtɛɛ' ‑blɔɔ gwë 'nɩ wa yi wa yëku nyäkälɩ bhutukpä 'mnö 'ŋʋ.

Pɔlʋ ŋʋ Timotee dɩgälɩɩ'

¹¹ ‑Mä ‑mɔɔ plöö‑ lä Laagɔ‑nyɩkpɔ nä, ‑lɔɔ' nʋnʋgbɩɩ 'fɩɩn, ‑n ‑sɩɩ gwë 'kwläkwlä. Saa‑ gëë lä 'yi nä, ‑n tään sɔɔ, ɩyä ‑n ‑yä Laagɔ 'sɔ 'jɛnyɩ 'kɔɔkɔ. ‑N nämnö pɔlötɛtɛɛ ‑yä ‑wawʋʋ 'sɔ 'mno. ‑N yibhë plɛkʋ 'tɛmä sä ‑yä ‑n wɔtɔmä plɛ.

¹² ‑N bhlää 'nägäsä pɔlötɛtɛɛ' ‑za 'kʋ. Ɩyä 'pʋpʋɛɛ‑ ‑kʋ lä 'kɔɔkɔɔ ‑za nä, ‑n klɛɛ sä. ‑Ɔnöza bhää? ‑Lɔɔ' zëkpëa' ‑zä Laagɔ pä‑ä lä wälɩ, 'nɩ nyɩkpa ‑bhutukpää' 'klʋ, 'nɩ ‑n ŋoo‑ lä ‑naa pɔlötɛtɛɛ' gbʋ.

¹³ Nä, Laagɔ ‑ʋ nyɛ lä 'pʋpʋɛ nä ʋmʋ 'yikʋ, ɩyä Zozi Klisö ‑ɔ ‑lü lä 'nägä‑dläfʋɛ ‑gɔmnä Pɔsö Pilatö dëlüü nä, ɔmɔ 'yikʋ, n 'ylänö‑ö yɩ wälɩklë.

¹⁴ Amää‑ plöö‑ lä nynä ‑mä, ‑Jlämaa ‑n cɩä‑ lä nä, ‑n 'ŋʋa 'klʋkpää. Nyɩkpɔɔ' 'ninö‑ö ‑lä gbenyenyii', ɩyä wa 'nä 'ninö‑ö ‑lä wälɩ‑nyenyi yëku. Ɩ kʋ sɔɔ ‑aaa ‑yä, ‑anyɩa Kwlienyɔɔ, Zozi Klisö 'kä yi.

¹⁵ Ɔɔ' yi‑tänyɩɛ nä, Laagɔ 'titii‑ ŋʋɛ‑. Ʋmʋʋ‑ plöö‑ lä 'nää 'fɩɩn glu ‑bhäädä. Ʋ ‑bhlü ‑bhlo. Ʋmʋʋ‑ 'kämä lä kʋkʋlɩɩ 'fɩɩn. Ʋmʋʋ‑ plöö‑ lä 'loyuaa' 'Loyo. Ʋmʋʋ‑ plöö‑ Kwlienyʋaa' Kwlienyɔ.

¹⁶ Ʋmʋ ‑bhlo 'coo, Ʋmʋʋ‑ 'ku ‑wʋ lä. Zëlüü' lɩɩ nyɩkpɔɔ' ‑lä lä 'kɔɔn yëku 'mɛ nä, Ɩmɩ 'mnö Laagɔ ‑kʋ lä. Nyɩkpɔɔ' ‑läzä Laagɔ 'yi 'ni, 'Nɩ nyɩkpɔ 'nʋ ‑lä 'kɔɔn 'yi 'ni. 'Klʋagbaa ‑yä 'päwaa ‑a ‑kʋ ‑lä kɔɔn ‑yä 'kɔɔn ‑za nä, Ɩ 'plö Laagɔɔ' dä. Ɩ kʋ sɔɔ!

Pɔlʋ 'pää lɛkäänyʋa dɩgälɩ

¹⁷ Timotee‑, 'ylʋnʋzɔɔ' lɛkäänyʋa, ‑n sonʋwa nynä ‑mä, waa' täkpɔɔ ‑lä waa' leylü 'mʋ. Leylüü' lɩɩ ‑ɩɩ ‑wʋ lä dë 'tɛɛ sä ‑kä nä, wa 'nä 'tɛnɩ ‑lä dë ‑mä, wa 'tɛɛ Laagɔ dë. Laagɔɔ' plɛkʋmɛnɔɔ 'mnö nä, kʋ nyɩ‑anyɩ ‑lɛɛ bhutukpä.

¹⁸ ‑N sonʋwa nynä ‑mä, 'klüü‑ nää lä nä, wa nʋɩ. Wa nʋ 'sää 'nää ‑lɛɛ bhutukpä 'titi. Wa namä plɛkʋ ‑yä wa ‑yä wa ‑liesɩ 'sɔ dëë.

¹⁹ Wa kä sɔɔ nʋ nä, ‑zee' ‑za, leylüü ‑ɩ nää lä 'nɩ ‑ɩ gwlɛ lä nä, wa yii kään. 'Nɩ wa yi 'pʋpʋɛɛ 'titi 'ni.

Bhlüüdä

²⁰ Nä Timotee‑, sä Laagɔ nyɛɛ‑ɛ lä nä, ‑n nyɔnʋä sɔɔ wlɩ! Ɩyä 'flɛflɛsaa' 'kɛsɛɛ ‑yä ‑anyɩa pɔlötɛtɛɛ 'sɔ mʋʋ ‑wʋ yëkuu' nä, ‑n ‑sɛ gwë! ‑Wa ci lä nynä ‑mä kwa ‑yi wälɩ ‑bhlɛ wa 'nɩɩ ‑wʋ lä ‑yi nä, ‑n ‑sʋwa gwë.

²¹ Nyɩkpaa' ‑nänʋä ‑kʋ ‑lɔɔ 'nɩ, wa ‑bhobho bhɛ nynä kwa ‑yi wälɩ ‑bhutukpä. Ɩ ‑gbä yɩ 'nɩ wa yi pɔlötɛtɛɛ' ‑blɔɔ gwë ‑sä. Laagɔɔ' 'nyupälɩɩ ŋënö'anyɩ 'kʋ!

« Roimhe

Air adhart »

Wycliffe Bible Translators, Inc.

Lean sinn:

Ceanglaichean taic

Sanasan