Bìoball air-loidhne

1 Timotee 5 - GOD - u2

'Cɔcɩnyʋaa' cikpɔ cikpɔ

¹ 'Cɔcɩɛ 'mnö nyɩkpɔ kä 'kɔgwlɛnyɔ plöö‑ nä, ‑naa sonʋwa ‑lä wälɩ ‑kälɩ ‑mä, ‑n ‑yɔsɔ kä ci nä, ‑n ‑yɔsɔ ci nynä ‑n ‑näsä ‑n ‑yä ‑n 'bä 'sɔɔ ci bhlä nä. Ɩyä nyëblii, ‑n klɩɩ nynä ‑n bhelie.

² Ŋnʋklöö, ‑n klɩɩ nynä ‑n ‑nɔɔsɩ. Ɩyä ŋnʋgbɛnyʋa, ‑n klʋwa nynä ‑n bhɛŋwnɩä. Ɩyä sä ‑n bhobho lä waa' ‑za nä, sɔɔ kplɔɔ.

'Cɔcɩɛ 'mnö 'kuzëlü‑ŋwnɩaa' yëkuu' wälɩ

³ 'Kuzëlü‑ŋwnɩa, ‑n 'ŋʋwa 'klʋkpää. 'Kuzëlüŋwnɩa 'titi wamä n sä ‑klää ‑ɛɛn!

⁴ 'Nɩ kä 'kuzëlüŋnɔ kä ‑lɔɔ ‑kʋ 'nɩ ɔ kä 'yuë ‑kä nä, natokloyuë ɔ 'nä yi 'sɩɩ ‑kä ‑o, ɩ ‑ŋwa 'kʋ nynä ‑mä ‑lɔɔ' 'yua yibhë wälɩklënä. Ɩ ‑ŋwa 'kʋ nynä ‑mä wa ghlää waa' pɔlötɛtɛɛ 'mnö ‑yä wa wloo waa' gbünyʋä 'kʋ. Kɩ ‑kʋ ylä nynä ‑n ‑näsä waa' nyʋa ‑wluwa lä 'kʋ ‑aaa nä, ɩɩ' 'nää wa ‑nʋwa bhlä nä, aa' ‑bʋzʋɛ 'mɛ wa 'ylɩbhʋwa. ‑Nɩnɩ 'mɩ Laagɔ ‑waa lä kpänyɩ.

⁵ 'Ŋnɔɔ' lɔɔ‑ ‑ɔɔ ‑wʋ lä 'kwläkwlä 'sää 'kʋ wloonyɔ ‑kä nä, ɔmɔɔ‑ plöö‑ lä 'kuzëlüŋnɔ 'titi. Laagɔ ‑bhlo ɔ 'tɛɛ lä dë. 'Nɩ ‑gägäzëlü ‑yä 'sabo, ɔ bhibhie 'nɩ ɔ zözlä Laagɔ dëlü.

⁶ ‑Mä 'Kuzëlü‑ŋnɔɔ lɔɔ ‑ɔ tään lä ‑lätee zëkpënä ‑zɔɔ' mɛnɔɔ ‑bhlo 'coo nä, ɔ kuu‑ wɛzä 'nɩ ɔ nää lä 'flɛ.

⁷ 'Klünö nä, ‑n sonɩɩ 'kuzëlü‑ŋwnɩa ‑mä nyɩkpaa' kwa ‑kä nëkʋ fä.

⁸ Nyɩkpɔ 'nö ɔɔ' nyʋää' 'kʋ wloolɩ mii, 'nɩ ɔ 'nö ɔɔ' gbünyʋää' 'kʋ wloolɩ mii nä, kä ‑lɔɔ' nyɩkpɔɔ cɛɛ‑ lä ɔɔ' pɔlötɛtɛɛ. Ɔ ‑nyumä yɩ 'sɩɩ kpänyɩ 'nɩ ɔ ‑zi nyɩkpɔɔ' lɔɔ‑ ‑wʋ lä Laagɔ ‑yi nä 'kʋ.

⁹ 'Ŋnɔ 'nö ‑lätee 'ylʋbɔɔ gwlɩ taa ‑kä nä, ‑naa zɛnönöɔ lä 'kuzëlüŋwnɩa nëëdë 'nɩ ‑n 'gä ɔɔ' 'ŋnö 'kuzëlü‑ŋwnɩaa' 'bɔɔgʋʋ 'mnö 'ŋʋ. 'Nɩ ɩ ‑ŋwa 'sɩɩ 'kʋ nynä ‑mä 'kuzëlüŋnɔ 'plö 'ŋnɔɔ lɔɔ ‑ɔ nöö‑ lä 'wli ‑bhlo ɔɔ' zëkpëa 'mnö nä.

¹⁰ Ɩ ‑ŋwa 'sɩɩ 'kʋ nynä ‑mä 'nägägbɩɩ ɔ ‑nʋ lä nä nyɩkpa yibhënɩ. Wa yibhë sä ɔ ‑klä lä 'yuë, 'nɩ ɔ ‑klä lä lowie, 'nɩ ɔ ‑wɔɔ lä kplɔɔkplɔɔnyʋä ‑kokokpü, 'nɩ ɔ ‑klää 'sɩɩ ŋäzönyʋä nä. Ɩ kʋ yɩ nynä ‑mä 'klüü 'fɩɩn ‑ɩ plöö‑ lä 'nägägbɩɩ nä, ɔ ‑nʋɩ.

¹¹ 'Kuzëlü‑ŋwnɩa ‑wa plöö‑ lä ‑lätee ‑lɛɛ ŋnʋ ‑dägböö nä, ‑naa 'ŋʋ ‑lä waa' 'ŋnö 'bɔɔgʋʋ'. ‑Ɔnoza bhää? Waa' pɔlöö kä 'ylä nynä ‑mä wa nöö bʋkʋ 'wlie nä, kä wa sä Klisö gwë.

¹² Wa kä yɩ sɔɔ nää nä wa yä Laagɔ dëlü ‑gesi tʋ. ‑Ɔnöza bhää? Sä wa ŋʋʋ‑ bhlä tɛɛ nynä ‑mä wa yi nää nä, wa yä sɔɔ 'klʋkpää' ‑sä.

¹³ Bʋkʋ 'nɩ, sä waa' ‑wʋ lä nʋnʋ‑lebhe ‑kä nä, wa bha ‑lää 'gbënä 'mnö nä, wa mʋ ‑näna 'mnö. 'Nɩ waa' bhɛ 'flɛ nʋnʋ‑lebhe ‑kä ‑mä, wa ‑kä 'sɩɩ 'kɛsɛ. Waa' ‑wʋ nëkʋ bhlüsä ‑yi, 'nɩ wa sää 'mʋ 'jëbhlë 'jëbhlë.

¹⁴ Nä, kä n ci ylä nynä ‑mä, 'kuzëlü‑ŋwnɩa ‑wa plöö‑ lä ‑lɛɛ ‑dägböö nä, n ‑waa nynä ‑mä wa nöö bʋkʋ 'wlie. Wa gään 'yuë, ɩyä wa 'tie waa' gbünyʋä. Waa' 'nyɛ ‑lä ‑anyɩa ‑zɔbhlɛgbänyʋa 'casɩ 'nɩ wa 'kä ‑anyɩa nyenyi ci.

¹⁵ ‑Ɔnöza bhää? 'Kuzëlü‑ŋwnɩää' ‑nänʋä ‑nʋ sɔɔ 'nɩ wa yi Laagɔɔ' ‑blɔɔ 'kʋ ‑bha 'nɩ wa yi 'Dëvlo bʋkʋ too.

¹⁶ 'Cɔcɩŋnɔ nä, ɔɔ' 'lɔlʋkpä 'kʋ 'kuzëlü‑ŋwnɩä kä ‑lɔɔ ‑kʋ nä, ɔ wluwa 'kʋ. ‑Mä ‑lɔɔ' ‑tëbhuu wa 'nä 'nyɩʋ ‑lä 'cɔcɩɛ. ‑Lɔɔ 'cɔcɩɛ yi ‑kä mii 'nɩ ɛ yi 'kuzëlü‑ŋwnɩa 'titi 'kʋ wloo.

'Cɔcɩɛɛ' 'tienyʋaa' yëkuu' wälɩ

¹⁷ 'Cɔcɩɛɛ' nëkʋʋ' kʋnyʋa wa nʋ lä 'nägäsä lebhe nä, ɩ ‑ŋwa 'kʋ nynä ‑mä, ‑wa 'ŋʋwa kpänyɩ 'klʋkpää'. ‑Wa ‑kʋ lä Laagɔwälɩɩ' bielɩɩ ‑yä ɩɩ' cɩalɩɩ' 'kwlɩkabhɩa 'mnö nä, wamä 'tasɩɛ, ɩ ‑ŋwa 'kʋ nynä ‑mä nyɩkpa 'ŋʋwa kpänyɩ 'klʋkpää'.

¹⁸ Laagɔ‑bɔɔgʋʋ nä, kʋ ci lä nynä ‑mä, ‑dodobhlii' lɛɛ nyɩkpɔ ‑kä 'nɩ ‑ɛ nʋ lä ɔɔ' nyʋʋklää' lebhe nä, ɔɔ' gʋɛ ‑lä në 'klʋ nynä ɛɛ' kä ‑kä ɔɔ' ‑nyʋʋ lü. 'Nɩ Laagɔ‑bɔɔgʋʋ ci 'sɩɩ nynä ‑mä, nyɩkpɔ kä lebhe nʋ nä, ɩ ‑ŋwa 'kʋ nynä ‑mä ɔ 'nii 'sɩɩ ɛɛ' 'mnö ‑bʋzʋɛ.

¹⁹ Nyɩkpɔ kä ‑yi 'nɩ ɔ kä‑ä 'cɔcɩɛɛ nëkʋ kʋnyɔɔ' ‑za ‑jlo ‑plä nä, ‑naa laa ‑lä 'fɩa ɔɔ' ciciwälɩɩ nyaasäsä. ‑Mä nyɩkpa 'sɔ ‑yä taa kä ‑yi 'nɩ wa kä‑ä mɩɩ 'sɩɩ ‑soo nä, ɩ kʋ yɩ nynä ‑mä ‑dläfʋɛ wa ‑lü lä. ‑Lɔɔ ‑tɛɛ ‑n ‑nä laa ‑lɔɔ' wälɩɩ nyaasäsä.

²⁰ ‑Wa nʋ lä nyenyii nä, ‑n fʋwa nëkʋ nyɩkpa 'fɩɩn 'klʋ. ‑N nʋ sɔɔ ‑yä ‑mɔɔ' ‑lʋa ‑ŋänö 'kwa pleyii kʋ.

²¹ 'Klüü n 'ylänö‑ö lä 'sää 'titi Laagɔ ‑yä Zozi Klisö 'sɔ dëlüü nä, ɩyä ‑Laagɔzizii dëlü nä, ɩ plöö‑ nynä ‑mä, wälɩɩ 'fɩɩn n ‑sonö‑ö lä nä, ‑n nʋɩ ‑yä ‑naa bë ‑lä ɩɩ' 'mnö wälɩklë 'kʋ. Ɩyä ‑naa gbäzö ‑lä 'sɩɩ nyɩkpaa'!

²² ‑Naa ‑vʋvʋä ‑lä 'kʋ 'nɩ ‑n 'gä nyɩkpɔ ‑klɔgbö 'kʋ gbɛɛ nynä ‑mä, ‑n 'gɔ 'cɔcɩɩ ‑tëbhu 'nyɛ. Nyɩkpɔɔ' nʋ ‑lä nyenyi 'nɩ ‑n ‑yɔsɔ 'kä 'plö. ‑Mɔɔ 'titi ‑mä 'sɩɩ, ‑n kʋ kplɔɔlɩɩ 'mnö.

²³ ‑N gä nʋ nä, ‑naa 'mnä ‑läyɩɔ 'nyu yläylʋʋ ‑kpakpa! ‑Mä sä 'mnöö ‑waa lä ‑naa 'bhlälɩ, 'nɩ ‑naa 'yɛkɛɛ' bhlü ‑wʋ lä 'sɩɩ në nä, ‑n 'mnämʋ 'pɛpɛlɩä divaa.

²⁴ Nyɩkpaa' ‑nänʋä ‑kʋ ‑lɔɔ 'nɩ wa kä nyenyi ‑nʋ nä, ɩ ‑yibhënöɔ 'nɩ wa plänɩ 'tite 'kʋ. ‑Mä ‑nänʋä ‑kʋ ‑lɔɔ 'nɩ wa kä nyenyi nʋ nä, ɩ nʋ 'fɩa 'tänyɩ 'nɩ ɩ nio 'yi.

²⁵ Sɔɔ ‑säkä ‑säkä 'nägägbɩ nio lä 'yi sisio. Nyɩkpɔ nʋ 'nää 'nɩ a nio 'yi 'kpobhu ‑bhlo 'kʋ. 'Nɩ 'nää ‑a nʋɔ lä 'nɩ waa' 'ni ‑wʋ lä 'kpobhu ‑bhlo 'kʋ 'yi nä, aa' zizio ‑wʋ 'kʋ 'kɔɔkɔɔ' ‑za.

« Roimhe

Air adhart »

Wycliffe Bible Translators, Inc.

Lean sinn:

Ceanglaichean taic

Sanasan