Bìoball air-loidhne

1 Timotee 4 - GOD - u2

Nyɩkpa yi yi 'nɩ wa yi ‑kpläkplä cɩa
( 1 Zään 4.1‑3 ; Kolɔ 2.16‑23 ; 2 Timo 2.4‑6 )

¹ Kä Kplɔɔkplɔɔ‑wugɔɔ cii‑ wɩa nynä ‑mä, bhɩädää' 'tänyɩɛ 'mnö nä, nyɩkpaa' ‑nänʋä yi pɔlötɛtɛɛ' ‑blɔɔ 'kʋ ‑bha 'nɩ wa ‑yä 'nyigë 'nyigë ‑zizii 'sɔ yi 'jɛnyɩ. 'Nɩ wa yi ‑zizinyenyii' cɩalɩɩ 'kʋ 'gë.

² Wa yi wa yëku 'nyigë 'nyigënyʋä ‑yä ‑kpläkplönyʋä 'sɔ cie. ‑N ‑näsä nyɩkpɔ bhlü lä lätöslo 'kʋ 'nɩ ɔ sä lä nyɩkpɔ 'ylö nä, 'sɔɔ ‑kpläkplaa yʋwa lä bhobhowlu 'mnö 'ylö ‑sä.

³ Wa soo nyɩkpa nynä ‑mä waa' nöö ‑lä 'ŋwnɩä, ɩyä waa' lü ‑lä lülülɩɩ' 'cënänä, ‑bhlɛ Laagɔ‑ ‑nʋ lä ‑lɔɔ' lülülɩɩ. Nä 'cɔcɩnyʋaa‑ ‑yi ylä ‑nʋawlɛɛ nä, wa yi mii 'nɩ wa yi ‑lɔɔ' lülülɩɩ lü 'nɩ wa yi Laagɔ 'ŋnu fään.

⁴ ‑Ɛɛɛ, lülülɩɩ 'fɩɩn Laagɔ ‑nʋ lä nä, kɩ nää‑. Lʋʋ' ‑wʋ ‑kʋ 'nɩ ʋ 'kä zloolɩ 'kʋ ‑ŋwa. ‑Mä lülülɩɩ 'fɩɩn ‑a lü lä nä, ɩ ‑ŋwa 'kʋ nynä ‑mä ‑a gɩ lü nä, ‑a fään Laagɔ 'ŋnu.

⁵ Laagɔwälɩɩ ‑yä bhibhielɩɩ nä, kɩ gbä 'nɩ ‑lɩɩ 'fɩɩn ‑kplɔɔ Laagɔ dëlüü.

Zozi Klisöö' ‑gänʋnyɔ 'titi

⁶ ‑Nɩnɩ 'fɩɩn nä, ‑n mii ‑yä ‑n cɩɩ bhɛŋwnɩa ‑yä bhelia. Ɩmɩɩ‑ 'gä lä gbä ‑yä ‑n 'gä Zozi Klisöö' ‑gänʋnyɔ 'titi 'plö. ‑N pana 'sɩɩ nynä ‑mä pɔlötɛtɛɛ' ciciwälɩɩ ‑yä 'yigëgbɩɩ 'fɩɩn ‑n cɩä‑ lä nä, ɩmɩɩ‑ ‑kʋʋ lä 'yɛkɛɛ 'nɩ, ɩmɩɩ‑ gëë lä 'sɩɩ sää 'titi 'kʋ.

⁷ 'Nünüü, ɩyä nyɩkpaa' gbütëlɩɩ ŋnʋ‑kpʋkpɔɔ ‑waa lä nä, ɩ ‑yä pɔlötɛtɛ 'sɔɔ mʋʋ ‑wʋ yëkuu' nä, ‑naa ŋonɩ ‑lä 'kʋ.

⁸ 'Yɛkɛɛ 'kʋ wloolɩɩ nää‑ bhɛ 'flɛ, ‑mä 'klü bhutukpää' ‑za, ɩɩ' ‑wʋ gba ‑kä. Nyɩkpɔɔ' ‑laagɔ‑zëkpë nä, amää‑ ‑kä lä ‑lɩɩ 'fɩɩn 'mnö gbaa. ‑Ɔnöza bhää? ‑Laagɔ‑zëkpë nä, ka ‑yä 'pʋpʋɛ 'sɔ nää‑. A bhɛɛ‑ 'tänyɩnɛ 'mnö 'pʋpʋɛ, 'nɩ ‑zee, a yi 'sɩɩ 'pʋpʋɛ kään.

⁹ Wälɩɩ n ‑sonö'anyɩ lä nä, ɩ ‑kä dë 'tɛɛ sä. Ɩ ‑ŋwa 'kʋ nynä ‑mä, nyɩkpaa 'fɩɩn 'nui ‑yä wa nämnönɩ 'mnö.

¹⁰ ‑Ɛɛɛ, ‑a gä lä lebhe ‑klɛ nʋ 'nɩ, ‑a gä lä 'sɩɩ 'kʋ bhlää nä, Laagɔɔ ‑a bʋbɔ 'nɩ ‑ʋ plöö‑ lä ‑Yäyä Laagɔɔ nä, ʋmʋ ‑a 'tɛɛ‑ lä dë. Ʋmʋʋ‑ puë lä nyɩkpaa 'fɩɩn. 'Cɔcɩnyʋa 'tasɩɛ, wamä ʋ puë lä.

¹¹ Nä, ‑n gbä ‑yä ‑nɩnɩ 'fɩɩn cɩɔ ‑yä ɩ nʋɔ.

Timotee' nʋnʋsaa 'plö 'cɔcɩnyʋaa' 'sëplo

¹² Nyɩkpɔɔ' ci lä nynä ‑mä sä ‑n plöö‑ lä nyëbluu nä, ɔ 'kä‑ä ‑dʋdʋkʋ wloo. ‑Naa cicisaa, ‑naa nämʋʋ, ‑naa ‑wawʋʋ, ‑naa pɔlötɛtɛɛ ‑yä ‑naa zëkpëa' kplɔɔlɩɩ 'mnö nä, 'cɔcɩnyʋa 'fɩɩn, wa 'bhlünö‑ö 'sëploo' ‑kʋ.

¹³ ‑N zɛnö ‑bhlɛ Laagɔ‑bɔɔgʋʋ ‑jlëë' ‑mä kä n yi lä. ‑N 'ŋʋ 'cɔcɩnyʋa 'tɛtɩɩ ‑yä ‑n cɩwa Laagɔwälɩɩ.

¹⁴ Kplɔɔkplɔɔ‑wugɔɔ' 'nyupälɩɩ ʋ nyɛɛ‑ɛ lä 'flɛ nä, ‑naa plänɩ ‑lä yɔlʋ 'kʋ! ‑N ni 'tänyɩɩ 'plɔfɛtɩnyʋa cii‑ lä nynä ‑mä, kä Kwlienyɔ ‑sä‑ä nä, 'nɩ 'cɔcɩɛɛ' nëkʋʋ' kʋnyʋa ‑gbɛnö‑ö lä ‑klɔgbö 'kʋ 'nɩ wa ‑bhibhie lä ‑naa 'wluu nä, ‑n nii‑ 'nyupälɩ. Nä sä ‑n nii‑ lä nä, ‑naa plää ‑lä sɔɔ yɔlʋ 'kʋ.

¹⁵ ‑N 'sänyɩ sää 'titi ‑yä ‑n fään 'kɔɔkɔ ‑lɔɔ' lebhe plɛ yëku ‑yä ‑n nʋɛ wɩa. ‑N gä yɩ sɔɔ nää nä, nyɩkpaa 'fɩɩn yi 'ni nynä ‑mä ‑naa Laagɔ‑zëkpëa yä 'kʋ 'plöö.

¹⁶ ‑Nä, ‑n wloo ‑n yëku 'kʋ, ɩyä ‑n wloo ‑naa cɩasaa 'kʋ ‑yä ‑n nʋ sɔɔ 'kɔɔkɔ. ‑N gä sɔɔ nʋ nä, ‑n yi ‑n yëku puë, 'nɩ ‑wa poo‑o lä 'nyukwli nä, ‑n yiwa 'sɩɩ puë.

« Roimhe

Air adhart »

Wycliffe Bible Translators, Inc.

Lean sinn:

Ceanglaichean taic

Sanasan