Bìoball air-loidhne

1 Timotee 3 - GOD - u2

'Cɔcɩɛɛ' 'tienyʋa
( Titö 1.5‑9 ; 1 Pɩɛ 5.1‑4 ; Nʋnʋ 6.1‑6 )

¹ Wälɩklënä n 'kä lä ci nä, a plöö‑ wälɩklë 'titi. Nyɩkpɔ kä cii‑ nynä ‑mä, ɔ yi ‑Laagɔ‑lebhee' 'yikʋ kʋ 'nɩ ɔ yi 'cɔcɩ 'tie nä, lebhe‑ 'nänɛ ɔ ylä lä.

² Nä ‑Laagɔ‑lebhee' 'tienyɔ, ɩ ‑ŋwa 'kʋ nynä ‑mä ɔ nää sä nyɩkpa 'nöɔ ‑lä lä nëkʋ fä nä. Ɔ 'plö 'sɩɩ nyɩkpɔɔ' lɔɔ‑ nöö lä 'ŋnɔ ‑bhlo nä. Ɔ klä 'sɩɩ ɔ yëku ‑kpään. Ɔ 'plö nyɩkpɔɔ' lɔɔ‑ sää lä dɩgälɩsä 'mʋ nä. Ɔ yibhë nyɩkpaa' 'kʋ kʋʋsä. Nyɩkpaa‑ yi lä ɔɔ' daa nä, ɔ yibhë waa' kläsä. Ɔ yibhë 'sɩɩ nyɩkpaa' cɩasä.

³ Ɔɔ' cie ‑lä ɔ yëku nʋmnälɩ. Ɔɔ' wamä ‑lä 'gba ‑mä, ɔ wɔtɔmä plɛ. Ɔɔ' 'plö ‑lä cice‑täänyɔ. Ɔɔ' wamä ‑lä 'sɩɩ gbʋʋsä monii.

⁴ Ɔ 'plö nyɩkpɔɔ' lɔɔ ‑ɔ ‑yi lä ɔɔ' gbëë' nyɩkpaa' 'tiesä nä. Ɩyä ɔɔ' 'yua 'nu ɔɔ' cici‑wälɩ ‑yä wa 'ŋʋɔ 'klʋkpä.

⁵ Nyɩkpɔ 'nö ɔɔ' gbünyʋää' 'tielɩ mii nä, säsä ɔ yi bhä mii 'nɩ ɔ yi bhä Laagɔɔ' 'cɔcɩɛ 'kʋ wloo?

⁶ Nyɩkpɔɔ' lɔɔ ‑ɔ ŋoo‑ lä Laagɔ 'kʋ 'nɩ ɩɩ' ‑lätee lä 'mʋ ‑tlʋmä nä, ɔɔ' 'plö ‑lä 'cɔcɩɩ' nëkʋ kʋnyɔ. Ɔ yi ‑kä täkpɔ, 'nɩ ‑lɔɔ' täkpɔlɩɩ yio ‑kä 'wluu zii 'nɩ Laagɔ yio ‑kä gbʋ klaa 'Dëvlo ‑zuzuu 'bhisäkʋ.

⁷ Nyɩkpɔɔ' lɔɔ‑ ylä lä 'sɩɩ nynä ‑mä ɔ 'kä 'cɔcɩgbë 'tie nä, ɩ ‑ŋwa 'kʋ nynä nyɩkpaa‑ ‑wʋ lä 'cɔcɩnyʋä plöö‑ nä, wa ci ɔɔ' 'nää ‑yä waa' kɔ ‑kä nyɩä. Ɩyä ɔɔ' kä ‑kä 'sɩɩ 'Dëvloo' ‑gbesii nëë' bhlüü.

'Cɔcɩɛɛ' 'tienyʋaa' kläänyʋa

⁸ 'Cɔcɩɛɛ' 'tienyʋaa' kläänyʋa ‑mä 'sɩɩ, ɩ ‑ŋwa 'kʋ nynä ‑mä wa 'plö nyɩkpaa' lʋä‑ ‑kʋ lä 'klʋkpää' nä. Waa' gë ‑lä yio. Waa' cie ‑lä wa yëku nʋ. Ɩyä waa' tänö ‑lä monii gbenyenyii 'mnö.

⁹ Pɔlötɛtɛɛ' nʋawlɛɛ ɛ pana lä nä, wa nämnönɩɛ 'mnö ‑yä wa kään bhobhowluu' lʋʋ ‑ʋ ‑kplɔɔ lä nä.

¹⁰ Ɩ ‑ŋwa 'kʋ nynä ‑mä wa bɩwa 'fɩa. Wa 'nö yɩ gbëgëdë nyënyë yëku ‑kä nä, ‑lɔɔ ‑tɛɛ wa yi lä 'cɔcɩɛɛ' 'tienyʋa lebhe klää.

¹¹ Wa 'ŋwnɩä ‑mä 'sɩɩ, ɩ ‑ŋwa 'kʋ nynä wa kʋ 'klʋkpää'. Waa' ‑sää ‑lä nyenyisä 'mʋ ‑yä wa klä wa yëku ‑kpään. Ɩyä wa kään dë 'tɛɛ sä nʋnʋgbɩɩ 'fɩɩn 'mnö.

¹² 'Cɔcɩɛɛ' 'tienyʋaa' kläänyɔ nä, ɩ ‑ŋwa 'kʋ nynä ‑mä ɔ kään 'ŋnɔ ‑bhlo. Ɔ yibhë 'nägäsä ɔɔ' 'yua ‑yä ɔɔ' 'gbëë nyɩkpaa' 'tiesä.

¹³ 'Cɔcɩɛɛ 'tienyʋaa' kläänyɔ kä 'nää lebhe nʋ nä, kä nyɩkpa 'kɔ 'ŋnu fään. 'Nɩ ɩ yi 'sɩɩ gbä 'nɩ pɔlötɛtɛɛ ɔ ‑kä lä Zozi Klisöö' ‑za nä, ɛ yi kpänyɩ 'tɛtɩ kään.

Laagɔwälɩɩ 'mnö wälɩklü ‑zizio ‑mɔɔ

¹⁴ Nä Timotee‑, kä n jɩjlä‑ä lä 'bɔɔgʋnʋ ‑mä, n ‑känɩ plɛkʋ nynä ‑mä ‑zee, n yi‑i 'sɩɩ 'yi 'ni kää yi.

¹⁵ 'Ɩzä kä n 'nö siso ‑yi nä, ‑n ‑yi sä ‑n 'gä ylä ‑mɔɔ 'cɔcɩɛ 'mnö ‑n yëku klä nä. 'Cɔcɩɛ nä, ɛ plöö‑ ‑Yäyä Laagɔɔ' 'cɔcɩ. Ɛmɛ ‑nʋawlɛɛ 'tënö lä, 'nɩ ɛmɛɛ‑ ‑klä lä 'sɩɩ ‑nʋawlɛɛ sä.

¹⁶ 'Zaazɩ, wälɩɩ‑ ‑zizio lä pɔlötɛtɛɛ 'mnö nä, kɩ 'ghlü. Klisö nä, ‑Mää ‑dʋdʋkʋ Kɔ pana‑ ɔ yëku nynä nyɩkpɔ. 'Nɩ Kplɔɔkplɔɔ‑wugɔɔ pana‑ 'sɩɩ nynä Ɔ ‑glö nyɩkpɔɔ' lɔɔ‑ gëë‑ lä 'yi nä. ‑Laagɔzizi nio 'sɩɩ 'yi. 'Nɩ nyɩkpa ‑sää ɔɔ' 'döö 'ylʋzɔɔ' dää 'fɩɩn. 'Nɩ 'ylʋzɔkʋnyʋä ‑kä ɔɔ' pɔlötɛtɛ. 'Nɩ ‑mɔɔ Laagɔduu' Laagɔ bhlüo 'kʋ 'Nɩ ʋ yio ʋʋ' 'klʋagba 'mnö 'ŋʋ.

« Roimhe

Air adhart »

Wycliffe Bible Translators, Inc.

Lean sinn:

Ceanglaichean taic

Sanasan