Bìoball air-loidhne

1 Timotee 2 - GOD - u2

Pɔlʋ lä 'cɔcɩnyʋa bhibhie nyɩkpaa 'fɩɩn 'wlu

¹ 'Fɩa ‑yä 'yigäda‑wälɩ 'kä cio nä, wälɩklëa n 'ylää lä nyɩkpɔɔ' nä, amää‑ plöö‑ lä nynä ‑mä, dää 'fɩɩn nyɩkpɔ yi lä kʋ nä, ɔ zlaa Laagɔ. Ɔ bhibhie ‑yä ɔ zözlänʋ 'wlɩɩ ‑yä ɔ 'pä Laagɔ ‑aŋukwä 'ylʋzɔkʋnyʋa 'fɩɩn ‑za.

² 'Loyua ‑yä nyɩkpaa 'fɩɩn ‑wa ‑kä lä nyɩkpaa' 'kämälɩɩ' ‑tëbhuu nä, nyɩkpɔ nyɩkpɔ bhibhie waa' 'wlu ‑yä ‑anyɩa zëkpëa 'kä 'kʋ wɔtɔlɩɩ' kʋmʋ, ɩyä plɛɛ' kä‑anyɩ ‑kä 'mʋ belio. ‑A ‑yä Laagɔ 'sɔ 'kä 'kɔɔkɔ 'jɛnyɩ ‑yä ‑a 'gä kplɔɔlɩɩ 'mnö kʋ.

³ Laagɔ, ‑anyɩa Puënyɔɔ nä, ‑nɩnɩ 'mɩɩ‑ nää lä ʋʋ' ‑za. ‑Nɩnɩ 'mɩ ʋ ‑waa lä 'sɩɩ kpänyɩ.

⁴ Ʋ ‑waa nynä nyɩkpaa 'fɩɩn ‑bha ‑lɔɔ nëë'. Ɩyä wa mii 'sɩɩ ‑yä wa yibhë ‑nʋawlɛɛ.

⁵ Laagɔ nä, ʋ ‑bhlü ‑bhlo. 'Nɩ Laagɔ ‑yä 'ylʋzɔkʋnyʋa 'sɔ pää nä, Gläänyɔ ‑bhlo 'coo‑ ‑kʋ lä ‑mɔɔ. Ɔ ‑glö nyɩkpɔ. Ɔmɔ wa laa Zozi Klisö.

⁶ Zozi Klisö nä, kɔ ‑sä ɔ yëku zëkpë, ‑yä 'ylʋzɔkʋnyʋä 'kä ‑lɔɔ nëë' ‑bha. Kɩ pana lä nynä ‑mä 'tänyɩɛ Laagɔ ŋʋʋ‑ lä nä, ɛ ‑yä ŋëë 'zaazɩ.

⁷ ‑Nɩnɩɩ' ‑dläfʋɛɛ' lülɩɩ' ‑za Laagɔ ‑sä'ä lä nynä n plöö‑ ʋʋ' wälɩɩ' bienyɔ ‑yä ʋʋ' lobho lobhonyɔ. Wälɩɩ n ci lä nä, ‑nʋawlɛɛ n ci lä ‑mä 'nn ci ‑wʋ ‑kpläkplö wälɩ. Kä Laagɔ ‑lobho'o nynä ‑mä, nyɩkpaa‑ ‑wʋ lä 'Zufʋnyʋä plöö‑ nä, n cɩwa pɔlötɛtɛɛ' yëkuu wälɩ yä n cɩwa ‑nʋawlɛɛ.

‑Mɔɔ 'cɔcɩɩ' sä 'ŋwnɩä ‑yä ŋwadie 'sɔ 'kä lä wa yëku klä
( 1 Pɩɛ 3.1‑6 ; Titö 2.3‑5 )

⁸ Nä, n ‑waa nynä ‑mä, dää 'fɩɩn nyɩkpa yi lä kʋ nä, wa tlaa ‑laagɔɔ' wlɩ ‑yä wa bhibhie. Waa' pleyii kplɔɔ 'nägäsä. Ɩyä wa ‑taa gbʋgblɛɛ ‑yä cicee 'sɔ 'yi.

⁹ 'Klüü n ‑kä lä 'sɩɩ ‑yä n 'kä 'ŋwnɩa soo nä, ɩmɩɩ‑ plöö‑ lä nynä ‑mä, n ylä nynä 'ŋnɔ 'ŋnɔ nä, ɔ plä 'klʋkpää kʋsä 'mʋ. Sä ɔ yi lä 'mʋ plä 'nɩ ɔɔ' ‑lä lä zoo' bhla nä, ɔ plä sɔɔ 'mʋ. Nn' ‑wʋ cii‑ nynä ‑mä 'ŋwnɩä bhlä nyɩɩwli. Nn' ‑wʋ 'sɩɩ cii‑ nynä ‑mä wa ylo ‑sikaa, ɩyä wa ylo lɔlɔgbälɩ. 'Nɩ nn' ‑wʋ 'sɩɩ cii‑ nynä ‑mä, wa plä 'ŋnumʋ‑kwëti.

¹⁰ ‑Mä wa pana 'nägägbɩ. 'Ŋnɔɔ lɔɔ ‑ɔ yä ylä Laagɔ 'kʋ ŋoo nä, ɩ ‑ŋwa 'kʋ nynä ‑mä ɔ nʋ ‑lɔɔ' 'klüü.

¹¹ Bʋkʋ nä, Laagɔwälɩɩ' cɩa‑tänyɩ kä ‑ŋëë nä, ɩ ‑ŋwa 'kʋ nynä ‑mä 'ŋnɔ kʋ ‑plɩɩ ‑yä, 'klʋkpaa 'mnö, ɔ poo 'nyukwli ‑yä wa 'kɔ cɩa.

¹² Nn' 'ylä ‑wʋ nynä ‑mä 'ŋnɔ cɩa ŋwadi. 'Nɩ nn' 'ylä ‑wʋ 'sɩɩ nynä ɔ pɩä ŋwadi 'kʋ. Ɔ kä ‑lɔɔ ‑kʋ nä ɔ kʋ ‑plɩɩ!

¹³ ‑Ɔnöza bhää? Ŋwadio, Adää, ɔmɔ Laagɔ ‑nʋ tɛɛ. 'Nɩ ʋ yi lä ɔ 'ŋnɔ Ɛvö nʋ.

¹⁴ 'Nɩ Adää nä, ɔmɔ 'Dëvloo ‑wʋ 'nyigë ‑mä, Ɛvö 'mɔ 'Dëvlo 'nyigë‑ 'nɩ ɔ yi lä Laagɔ 'klʋkpää ‑sä.

¹⁵ Ɩ ‑kʋ 'sɩɩ 'flɛ sɔɔ ‑mä, 'ŋnɔ nä, ɔɔ' 'yugälʋ yio puë. Ɔ kä 'kɔɔkɔ Laagɔɔ' pɔlötɛtɛ ‑kä, 'nɩ ɔ kä 'sɩɩ ʋʋ' ‑wawʋʋ ‑kä, 'nɩ ɔ kä ɔ yëku kplɔɔkplɔɔsä klä nä, 'nɩ Laagɔ dëlü, ɔ kä 'sɩɩ ɔ yëku ‑kpään klä nä, ‑lɔɔ' 'ŋnɔɔ yi ‑lɔɔ' nëë' ‑bha.

« Roimhe

Air adhart »

Wycliffe Bible Translators, Inc.

Lean sinn:

Ceanglaichean taic

Sanasan