Bìoball air-loidhne

1 Timotee 1 - GOD - u2

Bhäälɩ

¹ ‑Amʋ Pɔlʋ nä, n ‑glö Zozi Klisöö' lobho lobhonyɔ. ‑Anyɩa Puënyɔɔ Laagɔ, ɔ ‑yä Zozi Klisö‑ ‑a 'tɛɛ lä dë nä, wamää‑ nyɛɛ'ɛ lä ‑lɔɔ' ‑tëbhu.

² Timotee‑, ‑mɔɔ 'naa 'yuo 'titi ‑n ‑gänö lä pɔlötɛtɛɛ 'mnö nä, ‑mɔɔ n jɩjlä lä 'bɔɔgʋnʋ. ‑A 'Bä Laagɔ, ɔ yä ‑anyɩa Kwlienyɔ Zozi Klisö, n ylä nynä ‑mä wa 'nyɛ‑ɛ 'nää! Wa yibhënö‑ö ŋäzö ‑yä wa 'nyɛ‑ɛ 'kʋ wɔtɔlɩ!

A luë ‑kpläkplaa' cɩanyʋa

³ N 'kä lä Masedʋanöbhlɩ 'kʋ mʋ nä, n ‑sonö‑ö bhä nynä ‑n kʋ ‑lɔɔ Efɛzɩduu'. Nä ‑n kʋ ‑lɔɔ. ‑N kʋ ‑lɔɔ ‑mä nyɩkpaa' ‑nänʋä yi ‑mɔɔ 'nɩ wa cɩa ‑kpläkplö wälɩ. ‑Lɔɔ' nyɩkpaa nä, ‑n sonʋwa nynä ‑mä waa' cɩa ‑läyɩɔ!

⁴ 'Nünüü wa bhobho 'nɩ wa pä lä nä, ɩyä 'lälɩ bhutukpɔɔ' zɛɛlɩɩ nä, ‑n gbä ‑yä wa ‑tanɩ 'yi! ‑Ɔnöza bhää? Kɩ lä cice. 'Nɩ ɩɩ' gbä ‑wʋ 'sɩɩ 'nɩ Laagɔɔ' lebhee‑ nʋɔ lä pɔlötɛtɛɛ 'mnö nä, ɛ 'kä 'yikʋ mʋ.

⁵ Wälɩklënä n ‑sonö‑ö lä nynä ‑mä ‑n nʋ nä, a yi gbä 'nɩ pleyii ‑wawʋ yi zumë, 'nɩ pleyii' yi kplɔɔ. Nyɩkpɔ nyɩkpɔɔ' bhobhosa, yi 'sɩɩ 'nää 'mnö kʋ. 'Nɩ pɔlötɛtɛɛ' lɛɛ‑ ‑wʋ lä ‑kpläkplä 'kʋ gëë nä, ɛ yi 'sɩɩ yi.

⁶ Bhutukpä ‑bha yɩ ‑nʋawlɛɛ' ‑blɔɔ 'kʋ, 'nɩ wa yi nüzawlɛɛ 'mnö too.

⁷ Wa tään nynä wa 'kä Moyizöö' ‑Jlämaa' cɩanyʋä 'plö ‑mä, wälɩɩ wamä 'titi ci lä nä, waa' 'nui ‑wʋ 'mʋ. 'Nɩ 'klüü 'titi wa ‑kä 'tɛtɩ 'nɩ wa cɩa lä 'sɩɩ nä, wa 'nɩɩ ‑wʋ ‑yi.

Sä Moyizöö' ‑Jlämaa nʋ lä nä

⁸ ‑Ɛɛɛ, ‑a ‑yi sɔɔ nynä Moyizöö' ‑Jlämaa nä, nyɩkpɔ ka 'nägäsä 'kʋ 'gë nä, ‑lɔɔ a nää.

⁹ ‑Mä ɩ ‑ŋwa 'kʋ nynä ‑a yibhë 'sɩɩ sɔɔ nynä ‑mä, ‑jlämaa' laa nyɩkpa ŋʋ lä sä nä, ‑wanö nʋnʋgbɩ‑ gëë‑ lä 'yii nä, waa' ‑zä waa' 'ŋʋa ‑wʋ sä. ‑Waa 'ŋʋ ‑wʋ lä 'klʋkpää' nä, ɩyä ‑wa cɩcɩɔ lä nä, ɩyä 'mnö ‑nyunɔ‑nyʋa, ɩyä gbenyenyinyʋa 'sɔ, waa' ‑za ‑jlämä ŋʋɔ lä sä. Nyɩkpaa' ‑lʋa ‑wa nyima lä Laagɔ yëku 'nɩ ‑wa bhusuë lä Laagɔ 'ŋnöö nä, 'ŋʋʋ yɩ ‑wa bhlä lä wa 'bäsɩ ‑yä wa 'nɔsɩ nä, ɩyä nyɩkpa‑bhlänyʋa 'titi, waa' ‑zä ‑jlämä ŋʋɔ lä sä.

¹⁰ ‑Wa nʋ lä ‑käpä ‑käpaa nä, ɩyä ŋwadia wa ylä lä wa lüŋwadia nä, ɩyä ‑wa ‑kʋ lä geyuëë' 'kpä‑ŋʋlɩɩ' lebhee 'mnö nä, 'ŋʋʋ yɩ ‑kpläkplönyʋa ‑yä nyɩkpaa‑ zlügo lä ‑kpläkplösä nä, ɩyä nyɩkpaa 'fɩɩn‑ 'ylä ‑wʋ lä cɩalɩɩ‑ gëë‑ lä 'yii 'nɩ ‑wa ‑yɩɩ 'sɔ bhlää lä 'kʋ nä, ‑waa' ‑za ‑jlämä ŋʋɔ‑ lä sä.

¹¹ Cɩalɩnɩ nä, 'Nägädöö ‑ɩnö ‑tëbhuu n bhɛɛ‑ lä nä, ɩmɩ 'mnö, 'klünö cio‑ ‑mɔɔ. Ɩmɩɩ‑ pana lä 'klʋagba Laagɔɔ ‑ʋ bhɛɛ‑ lä ‑jlɔɔ nä.

Pɔlʋ pä Zozi Klisö ‑aŋukwä ɔ 'nää ‑za

¹² ‑Anyɩa Kwlienyɔɔ Zozi Klisö nä, n pɔɔ ‑aŋukwä! Ɔmɔɔ‑ nyɛɛ‑ lä 'tɛtɩ 'nɩ n nʋ lä lebhenɛ. Sä ɔ mii 'nɩ ɔ 'tɛnö'ö lä dë 'nɩ, ɔ ‑gbä 'nɩ n nʋɔ lä ‑gä nä, n bhänöɔ.

¹³ ‑Amʋ nä, 'naa ‑gɔgɔbhlää' zëkpëa 'mnö kä n 'bhɩsɛ bhä Kwlienyɔ, kä n nyɩɔ‑ kpänyɩ nyäkälɩ. 'Naa gblu gblu gblu 'tɛ bhä kpänyɩ 'mʋ. ‑Mä ɩ ‑kʋ sɔɔ 'nɩ ɔ ‑yibhënö'ö ŋäzö. Tɛɛtɛɛ nä, nn' bhɔɔ lä pɔlötɛtɛ ‑kä nä, 'klüü n nʋ bhlä nä, n 'nɩɩ bhɔɔ ‑yi.

¹⁴ ‑Mä ‑pɛpɛɛ nä, 'nää ‑anyɩa Kwlienyɔ Laagɔ ‑nʋ'ʋ lä nä, a yä 'kʋ 'mɩä. Ɔ ‑gbä 'nɩ n ‑kä yɩ Zozi Klisöö' pɔlötɛtɛɛ ‑yä ɔɔ' wawʋ pleyii.

¹⁵ A ni wälɩklëë' laa ‑a ‑ŋwa lä 'kʋ nynä ‑mä a fään plɛ yëku nä, amää‑ plöö‑ lä nynä ‑mä, Zozi Klisö nä, kɔ ‑yi lä ‑mää 'ylʋzɔɔ ‑yä ɔ 'kä gbenyenyinyʋa ‑lɔɔ nëë ‑sä. 'Nɩ gbenyenyinyʋa nä, ‑amʋʋ‑ plöö‑ lä waa' tɛɛtɛɛlɔɔ.

¹⁶ ‑Mä kä Laagɔ ‑yibhënö'ö lä 'sää ŋäzö ‑yä, ‑amʋ mɔ ‑ɔ plöö‑ gbenyenyinyɔ 'kadɔɔ nä, Zozi Klisö kä'ä tɛɛ 'kʋ ghlää ‑yä ɩ 'kä panalɩ 'plö ‑yä ‑wa 'gä lä ‑zee pɔlötɛtɛ kään nä, wa 'kä 'pʋpʋɛɛ 'ni 'kɔɔkɔɔ ‑za.

¹⁷ Laagɔ, Ʋmʋ mʋ ‑ʋ plöö‑ lä 'Loyoo 'kɔɔkɔɔ ‑za nä, Ʋmʋʋ mʋʋ ‑ʋʋ ‑lä lä 'kɔɔn 'nɩ 'kɔɔn 'ku nä, 'Nɩ ʋmʋ mʋ nyɩkpɔɔ' 'ni ‑wʋ lä 'yi nä, Ʋmʋ ‑bhlo 'coo‑ plöö‑ lä Laagɔɔ nä, Nyɩkpaa 'fɩɩn 'ŋʋʋ 'klʋkpää, Ɩyä wa fänʋ 'ŋnu ‑Zɩkä ‑yä 'kɔɔkɔɔ' ‑za! Ɩ kʋ sɔɔ.

A bhlää 'kʋ 'nägäsä

¹⁸ Nä Timotee‑, 'naa 'yunɔ, 'klünö 'mɩ n të‑ë lä yëku ‑yä ‑n 'gä cɩa. Wälɩɩ 'fɩɩn Laagɔ ŋʋʋ‑ lä ʋʋ' 'plɔfɛtɩnyʋa nëë' 'nɩ wa cii‑ bhlä ‑naa za nä, kɩ ‑yä ‑nɩnɩ 'fɩɩn 'sɔ mʋʋ lä yëkuu. Ɩmɩɩ‑ 'gä lä gbä ‑yä ‑n 'gä 'tɛtɩ kään ‑yä ‑n 'gä 'nägäsä 'kʋ bhlääsä yibhë.

¹⁹ ‑N kʋ pɔlötɛtɛɛ 'mnö ‑yä n kään bhobhowlu 'nänʋ. ‑Ɔnöza bhää? Nyɩkpaa' ‑nänʋä ‑kʋ ‑lɔɔ 'nɩ waa' wʋ bhobhowlu 'nänʋ 'kʋ bhlüü. Ɩ ‑kä 'ŋnö ‑zɩkä nä, waa' pɔlötɛtɛɛ yä 'foclo bhlü.

²⁰ Nyɩkpanä nëëdë nä, Yimenee‑yä Alɛzadlö kʋmʋ ‑mɔɔ. ‑Mä wamä nä, n yʋwa 'Dëvlo kuu ‑yä, wa 'kä sɔɔ yibhë nynä ‑mä waa' 'bhɩsɛ ‑wʋ Laagɔ.

« Roimhe

Air adhart »

Wycliffe Bible Translators, Inc.

Lean sinn:

Ceanglaichean taic

Sanasan